Seb 5
5
UAnaniya loSafira
1Kodwa indoda ethile, uAnaniya ibizo layo, loSafira umkayo, bathengisa indawo; 2yagodla enye yemali, lomkayo ekwazi yaletha ingxenye ethile, yayibeka ngasenyaweni zabaphostili. 3Kodwa uPetro wathi: Ananiya, kungani ukuba uSathane agcwalise inhliziyo yakho, uqambe amanga kuMoya oNgcwele, ugodle ingxenye yemali yelizwe na? 4Lisekhona lalingesilo elakho na? Selithengisiwe belingekho emandleni akho na? Uyibekeleni leyonto enhliziyweni yakho? Kawuqambanga amanga ebantwini kodwa kuNkulunkulu. 5Kwathi uAnaniya esizwa lamazwi, wawela phansi, wafa; ukwesaba okukhulu kwabehlela bonke abakuzwayo lokhu. 6Insizwa zasuka, zamgoqela, zamthwalela ngaphandle, zamngcwaba.
7Sekudlule izibanga ezintathu kwangena umkakhe engakwazi okwenzakeleyo. 8UPetro wasesithi kuye: Ngitshele ukuba ilizwe lilithengise ngokungaka na? Wathi: Yebo, ngokungaka. 9Kwang’khona uPetro wathi kuye: Kungani livumelene ngokulinga uMoya weNkosi na? Khangela, inyawo zabambele indoda yakho zisemnyango, lawe bazakukuthwalela ngaphandle. 10Khonokho wasewela phansi ngasenyaweni zakhe, wafa; insizwa zangena, zamfumana esefile, zamthwalela ngaphandle, zammbela phansi kwendoda yakhe. 11Ukwesaba okukhulu kwalehlela lonke ibandla labo bonke abazizwayo lezizinto.
Izimangaliso zabaphostoli
12Kwenziwa izibonakaliso lezimangaliso ezinengi ebantwini ngezandla zabaphostoli; babenhliziyonye bonke ethulini likaSolomoni. 13Kodwa kwabanye kwakungekho olesibindi sokuzihlanganisa labo, kodwa abantu babebahlonipha kakhulu. 14Kwengezelelwa kakhulu abakholwayo eNkosini, abanengi abesilisa labesifazana, 15baze bakhuphela phandle emigwaqweni abagulayo, bababeka emathaleni lemacansini, ukuze kuthi lapho uPetro esiza, isithunzi sakhe nje sibasithe abanye babo. 16Abantu abanengi abavela emizini ezingelezele iJerusalema babuthana beletha abagulayo labangenwe ngomoya ababi; basiliswa bonke.
Ukubotshwa lokukhululwa kwabaphostoli
17Kwasekusuka umpristi omkhulu labo bonke ababelaye abangabehlelo labaSadusi, bagcwala umona, 18bababamba abaphostoli, babafaka entolongweni. 19Kodwa ebusuku isithunywa seNkosi savula iminyango yentolongo, sabakhupha, sathi: 20Hambani, lime ethempelini likhulume ebantwini wonke amazwi alokhukuPhila. 21Kwathi sebezwile lokhu, bangena ethempelini emadabukakusa, bafundisa.
Kwasekufika umpristi omkhulu lalabo ababelaye, babizela ndawonye umphakathi wabo bonke abadala bakoIsrayeli, bathumela entolongweni ukuba balethwe. 22Kodwa kwathi amanxusa efika kawabaficanga entolongweni; abuyela emuva, abika 23athi: Intolongo siyifumene ivaliwe, iqinile, labalindi bemi eminyango; kodwa sesivulile kasificanga muntu phakathi. 24Kwathi ukuba induna yethempeli labapristi abakhulu bezwe lamazwi, badideka kakhulu ngawo, bamangala ukuba lokhu kuzakucina ngani. 25Kwasekufika omunye, wabatshela wathi: Khangelani, amadoda ebeliwafake entolongweni emi ethempelini, ayafundisa abantu. 26Yasiphuma induna lamanxusa, baya, babathatha bengababambi ngamandla ngoba besaba ukukhandwa ngamatshe ngabantu.
27Sebebalethile babamisa phambi komphakathi; umpristi omkhulu wababuza 28wathi: Salilayisisa ukuba lingafundisi ngebizo leli, kodwa, khangelani, seligcwalise iJerusalema ngemfundiso yenu, liqonde ukwehlisela igazi lalumuntu phezu kwethu.#Mat 27:25 29Kodwa uPetro labaphostoli baphendula bathi: Simele ukulalela uNkulunkulu kulokulalela abantu. 30UNkulunkulu wabokhokho wamvusa uJesu elambulala ngokumphanyeka esiphambanweni; 31yena uNkulunkulu wamphakamisela ngakwesokunene sakhe abe yiNkosi loMsilisi ukuba anike uIsrayeli ukuphenduka lokuthethelelwa kwezono. 32Thina singofakazi balezizinto kanye loMoya oNgcwele uNkulunkulu amnike labo abamlalelayo.
Iseluleko sikaGamaliyeli
33Kwathi bona sebezwile lokhu bathukuthela, bafuna ukubabulala. 34Kwasekusukuma umFarisi othile emphakathini, uGamaliyeli ibizo lakhe, umfundisi womlayo, ohlonitshwa yibo bonke abantu, walaya ukuba amadoda akhutshelwe phandle okwesikhatshana. 35Wasesithi kubo: Madoda akoIsrayeli, qaphelani kulokho elizakukwenza kulababantu. 36Ngoba ngaphambi kwalezinsuku kwasuka uTewuda wazitshaya umuntu omkhulu; amlandela amadoda angaba ngamakhulu amane; kodwa wabulawa, kwathi labo ababemlandela bachitheka, baphela. 37Emva kwakhe kwasuka uJudasi waseGalili ensukwini zokubalwa; wahola abantu ukuba bamlandele; laye wafa, lalabo bonke ababemlandela bachitheka. 38Ngakhoke ngithi kini: Dedani kulababantu, libayekele, ngoba uba lelicebo lalumsebenzi ungowabantu, uzakuchitheka; 39kodwa uba ungokaNkulunkulu, kaliyikuba lamandla okuwuchitha, funa lifunyaniswe lingabalwayo loNkulunkulu. Basebemvumela.
40Sebebabizile abaphostoli babatshaya, babalaya ukuba bangakhulumi ngebizo likaJesu, babakhulula. 41Ngakho basuka phambi komphakathi bethokoza, ngoba babefanele ukudunyazwa ngenxa yalelobizo. 42Insuku zonke ethempelini lasekhaya kabayekelanga ukufundisa lokutshumayela ngoJesu ukuthi unguKristu.
Currently Selected:
Seb 5: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
