Gen 16
16
UHagari loIshmayeli
1USarayi umkaAbrama wayengamzaleli abantwana; wayelencekukazi yomGibithe ibizo layo linguHagari. 2USarayi wathi kuAbrama: Khangela, iNkosi ingivalile ukuzala; thatha incekukazi yami, mhlawumbe ngingazuza abantwana ngayo. UAbrama walalela ilizwi likaSarayi. 3Ngakhoke emva kokuba uAbrama esehlale elizweni laseKanani iminyaka elitshumi, uSarayi umkakhe wamthatha uHagari umGibithe, incekukazi yakhe, wamnika uAbrama indoda yakhe ukuba abe ngumkakhe. 4UAbrama wamthatha uHagari; uHagari wathatha isisu. Esebonile ukuthi usezithwele, inkosikazi yakhe yadeleleka kuye. 5USarayi wasesithi kuAbrama: Okubi okwenziwe kimi kakube phezu kwakho. Mina ngikunike incekukazi yami ibe ngumkakho, kodwa isibonile ukuthi ithethe isisu yasingidelela. INkosi kayahlulele icala phakathi kwami lawe. 6Kodwa uAbrama wathi kuSarayi: Khangela, incekukazi yakho isesandleni sakho. Yenza kuyo lokho okubona kufanele. USarayi wayiphatha kubi yaze yabaleka.
7Isithunywa seNkosi sayifumana ngasemthonjeni wamanzi enkangala, ngasemthonjeni osendleleni eya eShuri. 8Sathi kuyo: Hagari, ncekukazi kaSarayi, uvela ngaphi? Uya ngaphi? Yathi: Ngibalekile kuSarayi inkosikazi yami. 9Isithunywa seNkosi sathi kuyo: Buyela enkosikazini yakho, uzehlisele ngaphansi kwayo. 10Isithunywa seNkosi sathi kuyo futhi: Ngizakwandisa kakhulu inzalo yakho ukuze ingabe isabalwa ngenxa yobunengi bayo. 11Isithunywa seNkosi sathi kuyo:
Khangela, usuzithwele,
uzazala indodana;
uyithe ibizo uthi nguIshmayeli,
ngoba iNkosi isizwile ukuhlupheka kwakho.
12Phakathi kwabantu izakuba njengobabhemi ongathambanga,
isandla sayo simelane labantu bonke,
lesandla sabo bonke simelane layo;
izaphambana labafowabo bonke.
13Wayitha iNkosi eyayikhulume laye ibizo lokuthi: Wena unguNkulunkulu obonayo. Ngoba wathi: Imbala ngisekhona lanxa ngimbonile ongibonayo na? 14Ngakho umthombo wabizwa ngokuthi ngumthombo waseLahayi‐Royi; uphakathi kweKadeshi leBeredi.
15UHagari wamzalela uAbrama indodana; uAbrama wayitha indodana yakhe eyazalwa nguHagari wathi nguIshmayeli. #Gal 4:22 16UAbrama wayeleminyaka engamatshumi aficaminwembili lesithupha mhla uHagari emzalela uIshmayeli.
Currently Selected:
Gen 16: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
