Gen 18
18
Ukuzalwa kukaIsaka kuyathenjiswa
1INkosi yabonakala kuAbrahama eduze lezihlahla ezinkulu zaseMamre, ehlezi emnyango wethente ngesikhathi sokutshisa kwelanga. 2Ephakamisa amehlo akhe wabona amadoda amathathu emi ngaphambi kwakhe; esewabonile wasuka emnyango wethente, wagijima ukuwahlangabeza, wakhothama,#Heb 13:2 3wathi: Nkosi yami, uba ngifumene umusa emehlweni akho, ungadluli encekwini yakho. 4Ke ngilethe amanzi ligeze inyawo zenu, liphumule ngaphansi kwesihlahla. 5Ngizaletha lokudla, libambe ithumbu andubana lidlule, njengokuba lifikile encekwini yenu. Athi: Yenza njengokutsho kwakho. 6UAbrahama waphuthuma ethenteni wathi kuSara: Phangisa uthathe amagokoko amabili empuphu ecolekileyo, uyixove, wenze izinkwa. 7UAbrahama wagijima waya ezinkomeni, wathatha ithole elihle elinonileyo, walinika inceku; yaphangisa ukulilungisa. 8Wathatha amasi lochago, lethole abelilungisile, wakubeka phambi kwawo; wema ngakuwo ngaphansi kwesihlahla, adla.
9Athi kuye: Ungaphi uSara umkakho? Wathi: Nangu ethenteni. 10Isethekeli sasesisithi: Impela ngizakubuya kuwe ngalesisikhathi nyakenye; khangela, uSara umkakho uzazuza indodana. USara wakuzwa esemnyango wethente ngasemva kwakhe.#Roma 9:9 11UAbrahama loSara basebegugile beleminyaka eminengi; sasesiphelile kuSara isikhathi sokuzala. 12USara wahlekela ngaphakathi kwakhe, wathi: Njengokuba sengimdala, lendoda yami isiluphele, ng’khona ngizathokoziswa na?#1 Pet 3:6 13INkosi yasisithi kuAbrahama: Uhlekelani uSara esithi: Impela ngizakuzala ngimdala na? 14Kukhona into engahlula iNkosi na? Ngalesisikhathi nyakenye ngizabuya kuwe, uSara uzazuza indodana.#Luka 1:37 15USara wesaba, waphika esithi: Kangihlekanga. Kodwa wathi: Impela uhlekile.
UAbrahama ukhulekela iSodoma
16Amadoda asuka lapho aqonda ngaseSodoma; uAbrahama wahamba lawo ewaphelekezela. 17INkosi yathi: Ngingamfihlela uAbrahama lokho engizakwenza na? 18Atshi, ngoba uAbrahama uzakuba yisizwe esikhulu esilamandla; zonke izizwe zomhlaba zizabusiswa ngaye. 19Ngoba ngimkhethile ukuba alaye abantwana bakhe losendo lwakhe, bagcine indlela yeNkosi ngokwenza ukulunga lokuqotho, ukuze iNkosi imenzele uAbrahama lokho emthembise khona. 20INkosi yathi: Ukukhala kwaseSodoma leGomora kukhulu lobubi babo bukhulu; 21ngakho ngizakwehla ngibone ukuthi izenzo zabo ezimbi zinkulu yini njengokukhala osekufike kimi; uba kungenjalo ngizakukubona.
22Amadoda esefulathele lapho, aqonda ngaseSodoma; kodwa uAbrahama wayesemi phambi kweNkosi. 23UAbrahama wasondela, wathi: Uzabhubhisa abalungileyo kanye lababi na? 24Mhlawumbe kukhona abalungileyo abangamatshumi amahlanu phakathi komuzi; uzawubhubhisa ungawuhawukeli ngenxa yabalungileyo abangamatshumi amahlanu abakuwo na? 25Kakube khatshana lawe ukwenza njalo, ukubulala olungileyo kanye lomubi ukuba olungileyo abe njengomubi; kakube khatshana lawe impela; umahluleli womhlaba wonke kayikwenza ukulunga na? 26INkosi yasisithi: Uba ngifumana eSodoma abalungileyo abangamatshumi amahlanu phakathi komuzi, ngizawuhawukela ngenxa yalabo. 27UAbrahama waphendula wathi: Khangela, sengizimisele ukukhuluma eNkosini, mina engiluthuli nje lomlotha. 28Mhlawumbe kuzasweleka abahlanu kubo abalungileyo abangamatshumi amahlanu; uzabhubhisa umuzi wonke ngenxa yalabo abahlanu na? Yathi: Kangiyikuwubhubhisa uba ngifumana khona abangamatshumi amane lanhlanu. 29UAbrahama waphinda wakhuluma wathi kuyo: Mhlawumbe kuzafunyanwa khona abangamatshumi amane. Yathi: Kangiyikukwenza ngenxa yalabo abangamatshumi amane. 30UAbrahama wasesithi: INkosi kayingathukutheli lapho ngikhuluma ngithi: Mhlawumbe kuzafunyanwa khona abangamatshumi amathathu. Yathi: Kangiyikukwenza uba ngifumana khona abangamatshumi amathathu. 31Wathi: Khangela, sengizimisele ukukhuluma eNkosini; mhlawumbe kuzafunyanwa khona abangamatshumi amabili. Yathi: Kangiyikuwubhubhisa ngenxa yalabo abangamatshumi amabili. 32Wasesithi: INkosi kayingathukutheli, ngizakhuluma kanye kuphela; mhlawumbe kuzafunyanwa khona abalitshumi. Yathi: Kangiyikuwubhubhisa ngenxa yalabo abalitshumi. 33INkosi yasisuka isiqedile ukukhuluma loAbrahama; uAbrahama wabuyela endaweni yakhe.
Currently Selected:
Gen 18: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
