Gen 3
3
Ukuwa komuntu
1Inyoka yayilobuqili kulazo zonke inyamazana zeganga eyayizenzile iNkosi uNkulunkulu. Yathi kowesifazana: Impela uNkulunkulu watsho yini ukuthi: Lingadli okwezihlahla zasensimini na?#Isam 12:9; 20:2 2Owesifazana wathi enyokeni: Singadla izithelo zezihlahla zasensimini; 3kodwa ngezithelo zesihlahla esiphakathi kwensimu uNkulunkulu wathi: Lingazidli, lingazithinti ukuba lingafi. 4Inyoka yathi kowesifazana: Kaliyikufa. 5Ngoba uNkulunkulu uyazi ukuthi mhla lizidlayo, amehlo enu azavuleka, libe njengoNkulunkulu, likwazi konke. 6Ngakhoke lapho owesifazana ebona ukuthi isihlahla silungele ukudliwa lokuthi siyabukeka emehlweni, lokuthi isihlahla sikhwabithisa ukuhlakanipha, wakha izithelo zaso, wazidla; wanika lendoda yakhe, layo yadla. 7Kwasekuvuleka amehlo abo bobabili, babona ukuthi bahambaze; bathunga amahlamvu omkhiwa bazenzela izambatho.
8Basebesizwa iNkosi uNkulunkulu ihamba ensimini kusihlwa ekupholeni kwelanga; ngakho indoda lomkayo bayicatshela iNkosi uNkulunkulu phakathi kwezihlahla zensimu. 9INkosi uNkulunkulu yasimbiza umuntu, yathi kuye: Ungaphi wena? 10Wathi: Kuthe lapho ngisizwa usiza ensimini ngesaba, ngoba ngihambaze; ngakho ngacatsha. 11Yasisithi: Ngubani okutshele ukuthi uhambaze na? Udlile okwesihlahla engakulaya ngaso ukuthi ungakudli na? 12Umuntu wathi: Owesifazana owangipha yena ukuba abe lami unginike okwesihlahla, ngadla. 13INkosi uNkulunkulu yathi kowesifazana: Kuyini lokhu okwenzileyo na? Owesifazana wathi: Inyoka ingikhohlisile, ngadla.#2 Kor 11:3; 1 Tim 2:14 14INkosi uNkulunkulu yathi enyokeni:
Njengokuba usukwenzile lokhu,
uqalekisiwe phakathi kwezifuyo zonke
lazo zonke inyamazana, zeganga.
Uzakuhamba ngesisu sakho, udle uthuli
insuku zakho zonke zokuphila kwakho.
15Ngizavusa inzondano phakathi kwakho lowesifazana,
laphakathi kwenzalo yakho lenzalo yakhe.
Yona izachoboza ikhanda lakho,
wena uzalimaza isithende sayo.#Isam 12:17
16Yathi kowesifazana:
Uzakuba lobuhlungu obukhulu ekukhululekeni kwakho;
uzabeletha abantwana ngobuhlungu.
Kodwa ukukhanuka kwakho kuzakuba sendodeni yakho,
yona izakukubusa.
17Yathi kuAdamu:
Njengokuba ulalele ilizwi lomkakho,
wadla okwesihlahla engakulaya ngaso ukuthi ungakudli,
ngalokhu umhlabathi uqalekisiwe ngenxa yakho.
Ngokukhathazeka uzazuza ukudla kuwo
insuku zakho zonke zokuphila kwakho.#Heb 6:8
18Uzakukuvezela ameva lokhula,
wena udle imibhida yeganga.
19Ngesithukuthuku sobuso bakho uzakuzuza ukudla,
uze ubuyele emhlabathini owathathwa kuwo;
ngoba ungumhlabathi,
uzabuyela emhlabathini.
20Umuntu wamutha umkakhe ibizo lokuthi nguEva, ngoba waba ngunina wabo bonke abaphilayo. 21INkosi uNkulunkulu yabenzela uAdamu lomkakhe amaxaba, wabambathisa. 22INkosi uNkulunkulu yasisithi: Khangela, umuntu usenjengomunye wethu, usesazi konke. Uba eselula isandla sakhe athathe okwesihlahla sokuphila adle, uzakuphila kokuphela.#Isam 22:14 23Ngakho iNkosi uNkulunkulu wamkhupha ensimini yaseEdeni ukuba alime umhlabathi athathwa kuwo. 24Wamxotsha umuntu; wabeka ngasempumalanga kwensimu yaseEdeni amakherubi kanye lomhedla ovuthayo ophenduphendukayo, okulinde indlela eya esihlahleni sokuphila.
Currently Selected:
Gen 3: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
