Gen 32
32
UJakobe uzilungiselela ukuhlangana loEsawu
1UJakobe wasehamba indlela yakhe, izithunywa zikaNkulunkulu zamhlangabeza. 2UJakobe ezibona wathi: Leli libandla likaNkulunkulu. Wabiza leyondawo ngokuthi yiMahanayimi. 3UJakobe wathuma izigijimi phambi kwakhe kuEsawu umnewabo, elizweni laseSeyiri, ilizwe lakoEdoma. 4Wazilaya wathi: Likhulume enkosini yami uEsawu lithi: Inceku yakho uJakobe ithi, bengihlala koLabani kuze kube khathesi; 5ngilezinkabi labobabhemi lemihlambi, lezinceku lezincekukazi; ngithumele ukubika enkosini yami ukuba ngithole umusa kuwe.
6Izigijimi zabuyela kuJakobe zathi: Sifikile kumnewenu uEsawu, laye uyeza ukukuhlangabeza kanye lamadoda angamakhulu amane. 7UJakobe wasetshaywa luvalo olukhulu, wakhathazeka. Wahlukanisa abantu ababelaye lezimvu lezinkomo lamakamela, kwaba ngamaqembu amabili; 8wathi: Uba uEsawu efika kwelinye iqembu alichithe, iqembu eliseleyo lizakuphepha. 9UJakobe wathi futhi: Nkulunkulu kababa uAbrahama, Nkulunkulu kababa uIsaka, Nkosi wena owathi kimi: Buyela elizweni lakini lezihlotsheni zakho, ngizakukwenzela okuhle; 10kangiwufanele umusa wakho wonke lokuthembeka kwakho encekwini yakho; ngoba ngawela leliJordani ngilodondolo lwami kuphela, khathesi sengingamaqembu amabili. 11Ngophula esandleni somnewethu, esandleni sikaEsawu; ngoba ngiyamesaba funa afike asibulale onina labantwana. 12Wena wathi: Impela ngizakwenzela okuhle, ngandise inzalo yakho ibe ngangetshebetshebe lolwandle elingelakubalwa ngenxa yobunengi.#Gen 22:17
13Walala lapho ngalobobusuku; kulokho ayelakho wakhuphela uEsawu umfowabo isipho, 14izibhuzikazi ezingamakhulu amabili lezimpongo ezingamatshumi amabili, lezimvukazi ezingamakhulu amabili lezinqama ezingamatshumi amabili, 15amakamela enyisayo angamatshumi amathathu lamathole awo, lamankomokazi angamatshumi amane, lenkunzi ezilitshumi, labobabhemikazi abangamatshumi amabili lamathole alitshumi. 16Wazinika inceku zakhe amaqembu ngamaqembu, wathi encekwini zakhe: Dlulelani phambili, litshiye ibanga phakathi kweqembu leqembu. 17Wayilaya ephambili esithi: Nxa uEsawu umnewethu ehlangana lawe, ekubuza esithi: Ungokabani wena? Uya ngaphi? Ngezikabani lezi eziphambi kwakho? 18ubokuthi: NgezikaJakobe inceku yakho, isipho esithunyelwa enkosini yami uEsawu; laye uqobo uyeza emva kwethu. 19Walaya leyesibili leyesithathu labo bonke ababelandela amaqembu esithi: Lapho limfumana uEsawu, lizakutsho njalo kuye; 20lithi futhi: UJakobe inceku yakho uyeza emva kwethu. Ngoba wathi: Ngizamthoba ngesipho esingandulelayo andubana ngimbone; mhlawumbe uzangamukela. 21Isipho sahamba kuqala; kodwa yena wahlala lobobusuku esihonqweni.
UJakobe ubindana loNkulunkulu
22Ebusuku wavuka, wathatha omkakhe bobabili lencekukazi ezimbili labantwana bakhe abalitshumi lanye, wawela umfula iJaboki. 23Wabathatha, wabaweza lalokho ayelakho. 24UJakobe wasala yedwa; kwafika umuntu, wabindana laye kwaze kwasa. 25Kodwa esebonile ukuthi kamahluli uJakobe, watshaya inyonga lakhe, inyonga likaJakobe lenyela esabindana laye. 26Wasesithi: Ngiyekela, ngihambe ngoba sekusisa. Kodwa uJakobe wathi: Kangizukukuyekela ukuba uhambe ungangibusisanga. 27Wathi kuye: Ungubani ibizo lakho na? Wathi: NginguJakobe. 28Wathi: Ibizo lakho kalisayikuthiwa nguJakobe, kodwa nguIsrayeli, ngoba ulwile loNkulunkulu labantu, wanqoba.#Gen 35:10 29UJakobe wambuza wathi: Ngitshela ibizo lakho. Wathi: Ulibuzelani ibizo lami na? Wambusisa khona lapho. 30UJakobe wayibiza leyondawo ngokuthi yiPeniyeli, ngoba wathi: Ngibubonile ubuso bukaNkulunkulu, kodwa ngisaphila. 31Ilanga laphuma esedlula iPeniyeli; wayeqhuliswa linyonga lakhe. 32Ngakhoke abantu bakoIsrayeli kabawudli umsipha wenqulu osenyongeni kuze kube lamuhla, ngoba watshaya inyonga likaJakobe emsipheni wenqulu.
Currently Selected:
Gen 32: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
