Joha 10
10
Umalusi olungileyo
1Ngiqinisile, ngiqinisile ngithi kini: Ongangeni ngesango esibayeni sezimvu, kodwa akhwele kwenye indawo, lowo ulisela lomphangi. 2Kodwa ongena ngesango ungumalusi wezimvu. 3Umlindi wesango uyamvulela; lezimvu ziyalizwa ilizwi lakhe; uyazibiza ezakhe ngamabizo, aziholele phandle. 4Nxa esezikhuphile zonke ezakhe, uhamba phambi kwazo, izimvu zimlandele, ngoba ziyalazi ilizwi lakhe. 5Owemzini kazisoze zimlandele, kodwa zizakumbalekela, ngoba kazilazi ilizwi labemzini. 6UJesu wakhuluma lumfanekiso kibo; kodwa kabaqedisisanga lokho akutshoyo kibo.
7Ngakho uJesu waphinda wathi kibo: Ngiqinisile, ngithi kini: Mina ngilisango lezimvu. 8Bonke abafika phambi kwami bangamasela labaphangi, ngakho izimvu kazibezwanga. 9Mina ngilisango; uba umuntu engena ngami uzakusiliswa, angene aphume, afumane idlelo. 10Isela liyeza kuphela ukweba lokubulala lokubhubhisa; mina ngizile ukuba babe lokuphila, kugcwale kuphuphume. 11Mina ngingumalusi olungileyo. Umalusi olungileyo udela ukuphila kwakhe ngenxa yezimvu. 12Oqatshiweyo engesuye umalusi, izimvu zingesizo ezakhe, ebona impisi isiza, utshiya izimvu, abaleke. Impisi izibambe, izichithe. 13Uyabaleka ngoba engoqatshiweyo engazikhathaleli izimvu. 14Mina ngingumalusi olungileyo; ngiyazazi ezami, lezami ziyangazi, 15njengalokhu uBaba uyangazi, lami ngiyamazi uBaba; ngidela ukuphila kwami ngenxa yezimvu.#Mat 11:27; Luka 10:22 16Ngilezinye izimvu ezingesizo zalesisibaya; lazo ngifanele ukuziletha; zizakuzwa ilizwi lami, ukuze zibe mhlambi munye lomalusi munye. 17Ngenxa yalokhu uBaba uyangithanda, ngoba ngidela ukuphila kwami ukuba ngibuye ngikuthathe. 18Kakho ongamuka khona, kodwa ngikudela ngokwami. Ngilamandla okukudela, ngilamandla okubuya ngikuthathe. Lumlayo ngiwamukele kuBaba.
19Kwaba khona futhi ukwahlukana phakathi kwabaJuda ngenxa yalamazwi. 20Abanengi babo bathi: Ulomoya omubi, uyahlanya; limlalelelani na? 21Abanye bathi: Lamazwi kawasiwo awomuntu olomoya omubi; umoya omubi angavula amehlo esiphofu na?
UJesu unguKristu
22Kwakukhona umkhosi wokuhlanjululwa kwethempeli eJerusalema; kwakusebusika. 23UJesu wayehamba ethempelini ethulini likaSolomoni. 24AbaJuda basebemhanqa, bathi kuye: Koze kube nini usilibazisa na? Uba unguKristu, sitshele ngokucacileyo. 25UJesu wabaphendula wathi: Ngalitshela, kodwa kalikholwanga; imisebenzi engiyenza ebizweni likaBaba yiyo engifakazelayo. 26Kodwa lina kalikholwa, ngoba kalisibo abezimvu zami. 27Izimvu zami ziyalizwa elami ilizwi; lami ngiyazazi, ziyangilandela; 28ngizinika ukuphila okungapheliyo, kazisoze zabhubha kokuphela; kakho ongazihluthuna esandleni sami. 29UBaba ozinike mina mkhulu kulabo bonke; kakho ongazihluthuna esandleni sikaBaba. 30Mina loBaba simunye.
31AbaJuda basebephinda bethatha amatshe ukuba bamkhande. 32UJesu wathi: Ngilitshengise imisebenzi eminengi emihle evela kuBaba; yiwuphi umsebenzi kiyo elingikhandela wona na? 33AbaJuda bamphendula bathi: Kasikukhandi ngenxa yomsebenzi omuhle kodwa ngenxa yenhlamba, ngoba wena ungumuntu, uzenza uNkulunkulu.#Levi 24:16 34UJesu wabaphendula wathi: Kakulotshiwe yini emlayweni wenu ukuthi: Ngithe: Lingonkulunkulu na?#Hubo 82:6 35Uba wababiza ngokuthi bangonkulunkulu bona eleza kibo ilizwi likaNkulunkulu — umbhalo ungephulwe — 36lithi kuye uBaba amahlukanisileyo, wamthumela emhlabeni, uyahlambaza, ngoba ngithe: NgiyiNdodana kaNkulunkulu na? 37Uba ngingenzi imisebenzi kaBaba, kalingakholwa kimi. 38Kodwa uba ngiyenza, lanxa lingakholwa kimi, kholwani imisebenzi, ukuze lazi, liqedisise ukuthi uBaba ukimi, lami ngikuBaba.
39Ngakho bafuna ukumbamba, kodwa waphunyuka ezandleni zabo.
40Wabuya wawelela ngaphetsheya kweJordani kuleyondawo lapho uJohane wayebhaphathiza khona kuqala, wahlala khona.#Joha 1:28 41Abanengi beza kuye, bathi: UJohane kenzanga isibonakaliso, kodwa konke uJohane akutsho ngalumuntu kwakuqinisile. 42Abanengi bakholwa kuye lapho.
Currently Selected:
Joha 10: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
