Joha 20

Ukuvuka kukaJesu

(Mat 28:1–10; Mark 16:1–8; Luka 24:1–12)

1Kwathi ngosuku lokuqala lweviki uMariya Magadalena wafika elibeni ekuseni kusesemnyama, wabona ilitshe lisusiwe elibeni. 2Ngakho wagijima waya kuSimoni Petro lakulowomfundi omunye owayethandwa nguJesu, wathi kibo: Bayisusile iNkosi elibeni, kasazi lapho bayibeke khona. 3Ngakho uPetro wasephuma lomunye umfundi, baya elibeni. 4Bagijima bobabili kanyekanye; kodwa lomunye umfundi wagijima kakhulu wamtshiya uPetro, wafika kuqala elibeni. 5Elunguza wabona amalembu ekhona, kodwa kangenanga. 6USimoni Petro laye wafika emlandela, wangena elibeni, wabona amalembu ekhona, 7lelembu elalisekhanda lakhe lingekho emalenjini amanye, kodwa libekwe lodwa. 8Wasengena laye umfundi omunye owayefike kuqala elibeni, wabona, wakholwa; 9ngoba babengakaqedisisi umbhalo othi ubefanele ukuvuka kwabafileyo. 10Basebesuka abafundi, babuyela ekhaya.

Ukuzibonakalisa kukaJesu

(Mark 16:9–11; Mat 28:16–20; Mark 16:14–18; Luka 24:36–49)

11Kodwa uMariya wema elibeni phandle ekhala; esakhala walunguza elibeni. 12Wabona izithunywa ezimbili zambethe okumhlophe, zihlezi lapho isidumbu sikaJesu besilele khona, esinye singekhanda lesinye singenyaweni. 13Zona zathi kuye: Mama, ukhalelani na? Wathi kuzo: Bayithethe iNkosi yami, kangazi lapho bayibeke khona. 14Esetshilo lokhu waphenduka, wabona uJesu emi, kodwa wayengamazi ukuthi nguJesu. 15UJesu wathi kuye: Mama, ukhalelani na? Ufuna ubani na? Kodwa yena esithi ngumphathi wensimu wathi kuye: Nkosi, uba esuswe nguwe, ngitshele lapho umbeke khona, ngizakumthatha. 16UJesu wathi kuye: Mariya! Yena waphendula wathi kuye ngesiHeberu: Raboni! okuyikuthi: Mfundisi. 17UJesu wathi kuye: Ungangibambi, ngoba angikenyukeli kuBaba. Kodwa yana kubafowethu, uthi kibo ngiyenyukela kuBaba lakuYihlo, kuNkulunkulu wami loNkulunkulu wenu. 18UMariya Magadalena wasuka wababikela abafundi wathi: Ngiyibonile iNkosi. Njalo wabatshela amazwi ayo.

19Kwathi kusihlwa ngalolosuku, usuku lokuqala lweviki, iminyango ivaliwe lapho abafundi babekhona ngenxa yokwesaba abaJuda, uJesu wafika wema phakathi kwabo, wathi kibo: Ukuthula akube kini. 20Esetshilo lokhu wabatshengisa izandla zakhe lohlangothi lwakhe. Ngakhoke bathokoza abafundi beyibona iNkosi. 21UJesu wabuya wathi kibo: Ukuthula akube kini. Njengokuba uBaba engithumile mina, lami ngiyalithuma lina. 22Kwathi esetshilo lokhu waphephetha phezu kwabo wathi kibo: Yamukelani uMoya oNgcwele. 23Labo elibathethelela izono zabo zithethelelwe; lezono zalabo elizibambayo zibanjiwe.#Mat 16:19; 18:18

24Kodwa uTomasi, othiwa liPhahla omunye wabalitshumi lambili, wayengekho kibo mhla uJesu efika. 25Ngakhoke abanye abafundi bathi kuye: Siyibonile iNkosi. Kodwa yena wathi kibo: Uba ngingaboni ezandleni zakhe amanxeba ezipikili, ngifake umunwe wami enxebeni lezipikili, ngibeke izandla zami ohlangothini lwakhe, kangiyikukholwa.

26Emva kwensuku ezificaminwembili abafundi bakhe babesendlini futhi, loTomasi elabo. UJesu wafika iminyango ivaliwe, wema phakathi kwabo, wathi: Ukuthula akube kini. 27Wasesithi kuTomasi: Beka umunwe wakho lapha, ubone izandla zami; yelula isandla sakho, usifake ohlangothini lwami; ungabi ngongakholwayo kodwa okholwayo. 28UTomasi wamphendula wathi: Nkosi yami, Nkulunkulu wami! 29UJesu wathi kuye: Usukholiwe ngoba usungibonile na? Babusisiwe labo abakholwa bengabonanga.

Umsebenzi wevangeli leli

30UJesu wazenza ezinye izibonakaliso ezinengi phambi kwabafundi bakhe, ezingalotshwanga kulolugwalo. 31Kodwa lezi zilotshelwe ukuba likholwe ukuthi uJesu unguKristu iNdodana kaNkulunkulu, lokuba lithi likholwe, libe lokuphila ebizweni lakhe.

Currently Selected:

Joha 20: BE1978

Highlight

Copy