Luka 16
16
Umfanekiso womphathi ongalunganga
1Wasekhuluma labafundi bakhe esithi: Kwakukhona umuntu onothileyo, owayelomphathi owamangalelwa kuye ngokuthi uchitha impahla yakhe. 2Wambiza, wathi kuye: Kuyini lokhu engikuzwayo ngawe na? Landisa ngobuphathi bakho, ngoba ungebe usaba ngumphathi. 3Umphathi wanakana lokhu wathi: Ngizakwenza njani, lokhu inkosi yami isingamuka ubuphathi bami na? Kangilamandla okulima, ngilenhloni zokuba ngiphanze. 4Ngiyakwazi engizakukwenza ukuze abantu bangamukele endlini zabo, nxa sengikhutshiwe ebuphathini. 5Ngakho wasebabiza ngamunye abalemilandu enkosini yakhe, wathi kowokuqala: Ulomlandu ongakanani enkosini yami na? 6Wathi: Amagokoko amagcobo angamakhulu amabili. Wasesithi kuye: Thatha incwadi yakho, ubhale masinyane ikhulu. 7Wathi kowesibili: Wenake ulomlandu ongakanani na? Wathi: Amasaka amabele angamakhulu amathathu. Wathi kuye: Thatha incwadi yakho ubhale amakhulu amabili. 8Inkosi yambabaza umphathi ongalunganga ngokuthi wenze ukuhlakanipha; ngoba abantwana balesisikhathi bahlakaniphile esizukulwaneni sabo kulabantwana bokukhanya.
9Lami ngithi kini: Zenzeleni lina abangane ngenotho engalunganga ukuze kuthi, nxa isiphelile, balamukele ezindlini ezingapheliyo. 10Othembekileyo kokuncinyane uthembekile lakokukhulu. Longathembekanga kokuncinyane kathembekanga lakokukhulu. 11Ngakhoke uba lingathembekanga enothweni engalunganga, ngubani ozakuliphathisa inotho eqotho na? 12Futhi uba lingathembekanga kokomunye, ngubani ozakulinika okungokwenu na? 13Kayikho inceku engakhonza amakhosi amabili; ngoba izakuzonda enye, ithande enye, ingabe ibambelele kwenye, idelele enye. Lingekhonze uNkulunkulu lenotho.#Mat 6:24
Ukusolwa kwabaFarisi
14AbaFarisi ababethanda imali bakuzwa konke lokhu, bamklolodela. 15Kodwa wathi kibo: Lina lingabazitshaya abalungileyo emehlweni abantu; kodwa uNkulunkulu uyazazi inhliziyo zenu, ngoba lokho okuphakemeyo phakathi kwabantu kuyisinengiso emehlweni kaNkulunkulu. 16Umlayo labaprofethi kwakukhona kwaze kwafika uJohane; kusukela kulesosikhathi ivangeli lombuso kaNkulunkulu liyatshunyayelwa; wonke umuntu uyafohlela kuwo.#Mat 11:12–13 17Kodwa kulula ukuba kudlule izulu lomhlaba kulokuba kudlule ichatshana elilodwa lomlayo.#Mat 5:18 18Ilowo lalowo olahla umkakhe, athathe omunye, uyafeba; lothatha umfazi olahlwe yindoda uyafeba.#Mat 5:32; 1 Kor 7:10–11
Umfanekiso wesinothi loLazaro
19Kwakukhona umuntu othile onothileyo owayegqoka eziyibubende lamalembu amahle, esidla okumnandi insuku zonke. 20Kwakukhona futhi umuntu ongumyanga othiwa nguLazaro, owayebekiwe esangweni lakhe egcwele izilonda, 21wafisa ukudla imvuthuluka ewayo etafuleni yesinothi; futhi lezinja zazisiza, zimkhothe izilonda. 22Wasesifa ongumyanga, izithunywa zamthwalela esifubeni sikaAbrahama; lesinothi laso safa, sambelwa. 23Sesisendaweni yabafileyo saphakamisa amehlo aso, sisebuhlungwini, sabona uAbrahama ekhatshana, loLazaro esesifubeni sakhe. 24Samemeza sathi: Baba Abrahama, ngihawukela, uthume uLazaro, acwilise umunwe wakhe emanzini, apholise ulimi lwami, ngoba ngiyahlupheka kakhulu kulelilangabi. 25Kodwa uAbrahama wathi: Ndodana, khumbula ukuthi wamukela okuhle kwakho ekusileni kwakho, uLazaro ngokunjalo wamukela okubi; kodwa khathesi uyathokoziswa lapha, wena uyahlupheka. 26Langaphandle kwakho konke lokhu kubekiwe phakathi kwethu lani igebe elikhulu ukuze kuthi abalapha abafuna ukusuka beze ngakini bangekwenze, labangapho bangewelele ngakithi. 27Sasesisithi: Njalo ngiyakuncenga, baba, ukuba umthumele endlini kababa, 28ngoba ngilabafowethu abahlanu, ukuze abaxwayise, funa labo beze kulindawo yokuhlupheka. 29Kodwa uAbrahama wathi: BaloMose labaprofethi; kabezwe bona. 30Sona sathi: Atshi, baba Abrahama, kodwa uba kusuka omunye kwabafileyo, aye kibo, bazakuphenduka. 31Wathi kuso: Uba bengalaleli uMose labaprofethi, bangeke bavume, loba kuvuka omunye kwabafileyo.
Currently Selected:
Luka 16: BE1978
Highlight
Share
Copy
Want to have your highlights saved across all your devices? Sign up or sign in
Bible Society of Zimbabwe 1978
