Luka 20

Amandla kaJesu

(Mat 21:23–27; Mark 11:27–33)

1Kwathi ngolunye usuku efundisa ethempelini, etshumayela ivangeli, kwafika abapristi abakhulu lababhali labadala. 2Bathi kuye: Sitshele ukuba izinto lezi uzenza ngawaphi amandla, ingabe ngubani okunike lamandla na? 3Wabaphendula wathi: Lami ngizakulibuza, ake lingitshele. 4Ubhaphathizo lukaJohane lwavela ezulwini ingabe ebantwini na? 5Bakhulumisana bodwa, besithi: Uba sisithi: Lwavela ezulwini; uzakuthi: Kalikholwanga kuye ngani na? 6Kodwa uba sisithi: Lwavela ebantwini; abantu bonke bazakusikhanda ngamatshe, ngoba bakholiwe ukuthi uJohane wayengumprofethi. 7Basebemphendula ngokuthi kabazi lapho lwavela khona. 8UJesu wasesithi kibo: Lamike kangilitsheli ukuthi ngenza lezizinto ngawaphi amandla.

Umfanekiso wabalimi besivini

(Mat 21:33–46; Mark 12:1–12)

9Waseqala ukutshela abantu lumfanekiso, esithi: Umuntu wahlanyela isivini, wasiqatshisa kubalimi, waya kwelinye ilizwe isikhathi eside.#Isa 5:1 10Kwathi ngesikhathi esifaneleyo wathuma inceku kubalimi ukuba bayinike okunye kwezithelo zesivini; kodwa abalimi bayitshaya, bayibuyisela ize. 11Wathuma enye; layo bayitshaya, bayiphatha kubi, bayibuyisela ize. 12Wasephinda ethuma leyesithathu, leyo bayilimaza, bayiphosela ngaphandle. 13Ngakho umninisivini wathi: Ngizakwenza njani na? Ngizakuthuma indodana yami ethandekayo; mhlawumbe yona bazakuyihlonipha. 14Kodwa kwathi abalimi beyibona bakhulumisana besithi: Le yindlalifa; asiyibulale ukuze ilifa libe ngelethu. 15Bayiphosela ngaphandle, bayibulala. Kambe uzakwenza njani umninisivini na? 16Uzakuza, ababhubhise labobalimi, anikele isivini kwabanye. Bekuzwa lokhu bathi: Phinde! 17Kodwa wabakhangela, wathi: Pho, kutsho ukuthini lokhu okulotshiweyo kokuthi:

Ilitshe elaliwayo ngabakhi

yilo eseliyinhloko yengonsi?#Hubo 118:22

18Yilowo lalowo owela phezu kwalelolitshe uzakuphahlazeka; kodwa lowo eliwela phezu kwakhe lizakumchoboza.

Umthelo kaKesari

(Mat 22:15–22; Mark 12:13–17)

19Ababhali labapristi abakhulu bafuna ukumbamba khona lapho, kodwa besaba abantu, ngoba babona ukuthi wayekhuluma lumfanekiso ngabo. 20Basebemqaphela, bethumela inhloli ezizitshaya abantu abalungileyo ukuba bamthiye ekukhulumeni kwakhe, ukuze bamnikele emandleni ombusi. 21Bambuzake besithi: Mfundisi, siyazi ukuthi wena ukhuluma ufundise ngokuqondileyo, kawukhathaleli muntu, kodwa ufundisa indlela kaNkulunkulu ngeqiniso. 22Kuvunyelwe yini ukuba sithele kuKesari ingabe atshi na? 23Kodwa wabubona ubuqili babo wathi kibo: 24Ngitshengisani imali; ilomfanekiso lombhalo kabani na? Bathi: OkaKesari. 25Wathi kubo: Mnikeni uKesari izinto zikaKesari loNkulunkulu izinto zikaNkulunkulu. 26Bahluleka ukumbamba ngamazwi akhe phambi kwabantu, bamangaliswa yikuphendula kwakhe, bathula.

Ukuvuka kwabafileyo

(Mat 22:23–33; Mark 12:18–27)

27Kwasekusiza kuye abathile kubaSadusi abathi kakukho ukuvuka kwabafileyo;#Seb 23:8 28bambuza besithi: Mfundisi, uMose wasilobela ukuthi uba umfowabo womuntu esifa atshiye umkakhe engatshiyi abantwana, umfowabo kamngene umfazi, amvusele inzalo umfowabo.#Dute 25:5 29Kwakulezelamani eziyisikhombisa; owokuqala wathatha umfazi, wafa engelabantwana. 30Lowesibili kwaba njalo; 31lowesithathu wamthatha kwaba njalo; kwaba njaloke kwabayisikhombisa; bafa bengatshiyanga abantwana. 32Ekucineni wafa lomfazi. 33Ngakhoke ekuvukeni kwabafileyo owesifazana lo uzakuba ngumfazi wawuphi kibo, ngoba abayisikhombisa babelaye engumkabo na?

34UJesu wathi kibo: Abantwana balesisikhathi bayathatha, bendiswe. 35Kodwa labo okuthiwa bafanele ukufinyelela kulesosikhathi lasekuvukeni kwabafileyo kabathathani, kabendiswa; 36ngoba bangephinde bafe; banjengezithunywa zasezulwini; bangabantwana bakaNkulunkulu, bahlanganyela ekuvukeni kwabafileyo. 37Kodwa mayelana lokuvuswa kwabafileyo uMose wakubonakalisa endabeni yesihlahla, lapho eyibiza iNkosi ngokuthi nguNkulunkulu kaAbrahama, loNkulunkulu kaIsaka, loNkulunkulu kaJakobe.#Eks 3:6 38UNkulunkulu kasuye uNkulunkulu wabafileyo kodwa ungowabaphilayo; ngoba bonke baphilela yena. 39Abathile bababhali baphendula bathi: Mfundisi, ukhulume kuhle. 40Ngoba kabasaphindanga ukumbuza imibuzo.

UKristu losendo lwakhe

(Mat 22:41–46; Mark 12:35–37)

41Wasesithi kubo: Batsho kanjani ukuthi uKristu uyiNdodana kaDavida na? 42Ngoba uDavida uqobo lwakhe uthi encwadini yamaHubo:

INkosi yathi eNkosini yami:

Hlala ngakwesokunene sami,#Hubo 110:1

43ngize ngenze izitha zakho zibe yisigcabha senyawo zakho.

44Uba uDavida embiza ngokuthi yiNkosi, pho, uyindodana yakhe kanjani na?

UJesu usola ababhali

(Mat 23:1–36; Mark 12:38–40; Luka 11:37–54)

45Besalalele abantu bonke, wathi kubafundi bakhe: 46Xwayani ababhali abathanda ukuhamba bembethe ingubo ezinde, bethanda ukubingelelwa emidangeni lezihlalo ezingaphambili emasinagogeni lezindawo ezinkulu ekudleni, 47abadla izindlu zabafelwakazi, bekhuleka isikhathi eside ngokuzenzisa; laba bazakwamukeliswa ukulahlwa okukhulu.

Currently Selected:

Luka 20: BE1978

Highlight

Copy