Luka 22

Ukumnikela kukaJudasi

(Mat 26:1–5, 14–16; Mark 14:1–2, 10–11)

1Kwasondela umkhosi wesinkwa esingelamvubelo othiwa liPhasika.#Eks 12:1–27 2Abapristi abakhulu lababhali bafuna ukuba bangambulala kanjani uJesu, besaba abantu.

3USathane wasengena kuJudasi othiwa nguIskariyothi owayengomunye wabalitshumi lambili. 4Wasuka wayakhuluma labapristi abakhulu lezinduna ngokuthi angamnikela kanjani kubo. 5Bathokoza, bathembisa ukumnika imali. 6Yena wasevuma, wafuna ithuba elihle lokumnikela kibo lingekho ixuku.

Ukumiswa kwesidlo esingcwele

(Mat 26:17–30; Mark 14:12–16, 22–26; 1 Kor 11:23–25)

7Lwafika usuku lwesinkwa esingelamvubelo ababehlaba ngalo iwundlu lePhasika. 8UJesu wathuma uPetro loJohane, esithi: Hambani liye ukusilungisela iPhasika ukuba sidle. 9Bathi kuye: Uthanda ukuba sikulungiselele ngaphi na? 10Wathi kibo: Khangelani, kuzakuthi selingenile emzini lihlangane lendoda ithwele imbiza yamanzi; liyilandele, liye endlini ezakungena kuyo; 11lizakuthi kumninindlu: Uthi uMfundisi kuwe: Ingaphi indlu, lapho ngingadlela khona iPhasika labafundi bami na? 12Yena uzakulitshengisa indlu enkulu ephezulu, eyendlelweyo; lisilungisele khona. 13Bahambake bafumana njengokutsho kwakhe kubo; balungisela iPhasika.

14Kwathi sesifikile isikhathi, wahlala ekudleni, labaphostoli babelaye. 15Wasesithi kubo: Ngifisile kakhulu ukudla lani leliPhasika ngingakahlupheki. 16Ngoba ngithi kini: Kangisayikulidla futhi, lize ligcwaliseke embusweni kaNkulunkulu. 17Wasethatha inkezo, esebongile wathi: Thathani lokhu, labelane; 18ngoba ngithi kini: Kusukela khathesinje kangisayikunatha okwesithelo sevini, kuze kufike umbuso kaNkulunkulu. 19Wathatha isinkwa, esebongile, wasihlephuna, wabanika esithi: Lokhu kungumzimba wami, [owanikelelwa lina; yenzani lokhu ukuba lingikhumbule. 20Ngokunjalo wathatha lenkezo emva kokudla, esithi: Inkezo le yisivumelwano esitsha egazini lami elithululelwa lina.]#Jer 31:31–34 21Kodwa khangelani, isandla songinikelayo silami ekudleni.#Hubo 41:9 22Ngoba iNdodana yomuntu ihamba njengokumisiweyo, kodwa maye kulowomuntu enikelwa nguye! 23Basebeqala ukubuzana ukuthi kungaba ngubani kibo ozakwenza lokho.

Ubukhulu obuqotho

24Kwavela ukuphikisana phakathi kwabo okokuthi nguwuphi kibo ongathiwa ngomkhulu.#Mat 18:1; Mark 9:34; Luka 9:46 25Wasesithi kibo: Amakhosi abezizwe azibusa izizwe ngokulukhuni, leziphathamandla zazo zithiwa ngabenza okuhle.#Mat 20:25–27; Mark 10:42–44 26Kodwa kungabi njalo kini; omkhulu phakathi kwenu kabe njengomncinyane, longumkhokheli kabe njengomlandeli.#Mat 23:11; Mark 9:35 27Ngoba nguwuphi omkhulu, lowo ohlezi ekudleni ingabe lowo ophakululayo na? Kasilowo ohlezi ekudleni na? Kodwa mina ngiphakathi kwenu njengaye ophakululayo.#Joha 13:12–15 28Linake lingababambelele kimi ekulingweni kwami; 29lanjengoba uBaba engimisele umbuso, 30lami ngilimisele ukuba lidle, linathe etafuleni yami embusweni wami; lokuba lihlale ezihlalweni zobukhosi, lithonisise izizwe ezilitshumi lambili zakoIsrayeli.#Mat 19:28

Ukuxwayiswa kukaPetro

(Mat 26:31–35; Mark 14:27–31; Joha 13:36–38)

31Simoni, Simoni, khangela, uSathane wacela ukuba alihlungule njengamabele; 32kodwa mina ngikukhulekele ukuba ukukholwa kwakho kungapheli; wenake, nxa usuphendukile, uqinise abazalwane bakho. 33Wathi kuye: Nkosi, ngilungele ukuya lawe entolongweni lasekufeni. 34Yena wathi: Ngiyakutshela, Petro, iqhude kaliyikukhala lamhlanje, ungakangilanduli kathathu ukuthi kawungazi.

35Wasesithi kubo: Mhla ngilithuma lingelamxhaka, lasikhwama, lamanyathelo, laswela ulutho na? Bathi: Kasiswelanga lutho.#Mat 10:9–10; Mark 6:8–9; Luka 9:3; 10:4 36Wasesithi: Kodwa khathesi lowo olomxhaka kawuthathe, lesikhwama futhi; lalowo oswele umhedla athengise ingubo yakhe, awuthenge. 37Ngoba ngithi kini: Kumele kugcwaliseke lumbhalo ngami wokuthi:

Wabalwa kanye lezoni.

Ngoba okuqondene lami kulokugcwaliseka kwakho.#Isa 53:12 38Basebesithi: Nkosi, khangela, nansi imihedla emibili. Wathi kibo: Kwanele.

EGetsemane

(Mat 26:36–46; Mark 14:32–42)

39Wasephuma, waya entabeni ethiwa iOliveti njengokwejwayela kwakhe, labafundi bakhe bamlandela. 40Esefikile khona wathi kibo: Khulekani ukuba lingangeni ekulingweni. 41Wamonyuka kibo okungaba libanga lokuphosa ilitshe, waguqa phansi, wakhuleka, 42esithi: Baba, uba uthanda, susa linkezo kimi; kodwake kungenziwa intando yami, kodwa kwenziwe eyakho. 43Kwabonakala kuye isithunywa esivela ezulwini, simqinisa. 44Esosizini olunzima wakhuleka kakhulu, izithukuthuku zakhe zaba njengamathonsi egazi, athontela emhlabathini. 45Esesukile ekukhulekeni weza kubafundi bakhe, wabafumana belele ngenxa yokudabuka. 46Wathi kibo: Lilaleleni na? Vukani likhuleke ukuba lingangeni ekulingweni.

Ukubotshwa kukaJesu

(Mat 26:47–56; Mark 14:43–65; Joha 18:1–11)

47Kwathi esakhuluma, kwafika ixuku; loJudasi, omunye wabalitshumi lambili, elikhokhele, wasondela kuJesu, wamanga. 48Kodwa uJesu wathi kuye: Judasi, uyayinikela iNdodana yomuntu ngokuyanga na? 49Kwathi labo ababengakuye sebebona okuzakwenzeka, bathi: Nkosi, sigadle ngomhedla na? 50Omunye wabo wagadla inceku yompristu omkhulu, waquma indlebe yayo yokunene. 51Kodwa uJesu wathi: Musani bo; kwanele. Wasethinta indlebe yayo, wayisilisa. 52UJesu wasesithi kubapristi abakhulu, lezinduna zethempeli, labadala ababeze kuye: Liphumile liphethe imihedla lezinduku kungathi lilande umphangi na? 53Bengilani insuku ngensuku ethempelini, kalingibambanga; kodwa lesi yisikhathi senu lesamandla omnyama.#Luka 19:47; 21:37

UPetro ulandula uJesu

(Mat 26:57–58, 69–75; Mark 14:53–54, 66–72; Joha 18:12–18, 25–27)

54Sebembambile, bamqhuba, bamusa endlini yompristi omkhulu. UPetro walandela ekhatshana. 55Sebebasile umlilo phakathi kweguma bahlala phansi ndawonye; loPetro wahlala phakathi kwabo. 56Intombazana ethile, imbona ehlezi ekukhanyeni komlilo, yamjolozela yathi: Lumuntu laye ubelaye. 57Kodwa walandula, wathi: Ntombazana, kangimazi. 58Ngemva kwesikhatshana omunye wambona, wathi: Lawe ungomunye wabo. Kodwa uPetro wathi: Ndoda, kangisuye. 59Sekudlule iawa engabanye, omunye futhi waqinisa esithi: Impela laye ubelaye, ngoba futhi ungowaseGalili. 60Kodwa uPetro wathi: Ndoda, kangazi ukuthi uthini. Lahle lakhala iqhude esakhuluma. 61INkosi yasiphenduka, yamkhangela uPetro. UPetro walikhumbula ilizwi leNkosi, njengokuba yathi kuye: Iqhude lingakakhali lamhlanje, uzakungilandula kathathu. 62Waphumela ngaphandle, wakhala kakhulu.

UJesu uphathwa kubi

(Mat 26:67–68; Mark 14:65)

63Amadoda ayembambile uJesu amenza inhlekisa, amtshaya. 64Amembesa ubuso, athi kuye: Profetha! ngubani okutshayileyo na? 65Akhuluma lokunye okunengi emthuka.

UJesu uphambi kwabapristi abakhulu

(Mat 26:59–66; Mark 14:55–64; Joha 18:19–24)

66Kwathi sekusile, kwabuthana umhlangano wabadala babantu labapristi abakhulu lababhali, bamusa emphakathini wabo, 67bathi: Uba unguKristu, sitshele. Wasesithi kibo: Uba ngilitshela, kalisoze likholwe; 68loba ngilibuza, kalisoze liphendule. 69Kodwa kusukela khathesinje iNdodana yomuntu izakuhlala ngakwesokunene samandla kaNkulunkulu. 70Basebesithi bonke: Kanti uyiNdodana kaNkulunkulu na? Wathi kubo: Kutsho lina. 71Basebesithi: Pho, sisafunelani obunye ubufakazi na? Ngoba sesizizwele uqobo lwethu ngomlomo wakhe.

Currently Selected:

Luka 22: BE1978

Highlight

Copy