Luka 5

Ukubizwa kukaPetro lababelaye

(Mat 4:18–22; Mark 1:16–20)

1Kwathi ixuku selimminyezele ukuzwa ilizwi likaNkulunkulu, wayemi ngasolwandle lwaseGenesaretha,#Mat 13:1–2; Mark 3:9–10; 4:1 2wabona imikolo emibili imi ngasolwandle; kodwa abagoli benhlanzi babephumile begezisa amambule abo. 3Esengenile komunye wemikolo ongokaSimoni wamcela ukuba asuke kancinyane emhlabathini. Wahlala phansi, wafundisa abantu esemkolweni. 4Kwathi eseqedile ukukhuluma, wathi kuSimoni: Qhubekela enzikini, wehlise amambule akho, ubambe. 5USimoni waphendula wathi: Nkosi, sitshikatshike ubusuku bonke, kasibambanga lutho; kodwa ngelizwi lakho ngizakwehlisa amambule.#Joha 21:3 6Sebekwenzile lokho babamba inhlanzi ezinengi kakhulu, aze adabuka amambule abo.#Joha 21:6 7Baqhweba abangane babo ababekomunye umkolo ukuba beze, babasize. Bezake, bayigcwalisa yomibili imikolo, yaze yaqala ukutshona. 8Kuthe uSimoni Petro ekubona lokhu, wawela phansi ngasenyaweni zikaJesu, esithi: Suka kimi, Nkosi, ngoba ngingumuntu oyisoni. 9Ngoba wamangala yena labo bonke ababelaye ngobunengi benhlanzi ababezibambile; 10ngokunjaloke loJakobe loJohane amadodana kaZebediya ababengabangane bakaSimoni bamangala. UJesu wathi kuSimoni: Ungesabi; kusukela khathesi uzakubamba abantu. 11Sebeyifikisile imikolo yabo emhlabathini batshiya konke, bamlandela.

UJesu usilisa umuntu olobulephero

(Mat 8:1–4; Mark 1:40–45)

12Kwathi ekomunye umuzi, kweza indoda egcwele ubulephero. Kwathi ibona uJesu, yawa ngobuso, yamncenga isithi: Nkosi, aluba uthanda, ungangihlambulula. 13UJesu welula isandla sakhe, wamthinta esithi: Ngiyathanda, hlambuluka. Bahle basuka ubulephero kuye. 14Wamlayisisa ukuba angatsheli muntu, wathi: Kodwa hamba, uziveze kumpristi, unikele ngokuhlanjululwa kwakho, njengokulaya kukaMose, kube yibufakazi ebantwini.#Levi 14:1–32 15Kodwa kwayilapho ukukhuluma ngaye kusanda kakhulu. Amaxuku abuthana kuye ukumlalela lokusiliswa ezifweni zawo. 16Kodwa yena wayayaphumele enkangala ukukhuleka.

UJesu usilisa umuntu oyisilima

(Mat 9:1–8; Mark 2:1–12)

17Kwathi ngolunye lwalezonsuku efundisa, kwakuhlezi khona abaFarisi labafundisi bomlayo abavela kuyo yonke imizi yaseGalili, laseJudiya, laseJerusalema. Lamandla eNkosi ayekuye ukuba asilise. 18Kweza amadoda ethwele ngethala umuntu oyisilima, afuna ukumngenisa ambeke phambi kukaJesu. 19Kodwa engafumani indlela yokumngenisa ngenxa yexuku, akhwela phezu kwendlu, amehlisa ophahleni ngethala, ambeka phambi kukaJesu ngaphakathi. 20Kwathi ebona ukukholwa kwawo wathi: Ndoda, uthethelelwe izono zakho. 21Ababhali labaFarisi banakana besithi: Ungubani lo okhuluma inhlamba na? Ngubani ongathethelela izono ngaphandle kukaNkulunkulu yedwa na? 22Kwathi uJesu esazile ngokunakana kwabo waphendula, wathi kibo: Linakanelani izinto lezi enhliziyweni zenu na? 23Yikuphi okulula ukuthi: Izono zakho zithethelelwe; ingabe ukuthi: Sukuma uhambe, na? 24Kodwa ukuze lazi ukuba iNdodana yomuntu ilamandla okuthethelela izono emhlabeni — wathi koyisilima — ngithi kuwe: Sukuma uthathe ithala lakho, uye ekhaya. 25Wahle wasukuma phambi kwabo, wathatha ithala ayelele kulo, waya ekhaya edumisa uNkulunkulu. 26Bamangala bonke, badumisa uNkulunkulu, behlelwa yikwesaba besithi: Sibonile izimanga lamuhla.

Ukubizwa kukaLevi

(Mat 9:9–13; Mark 2:13–17)

27Emva kwalokho waphuma, wabona umthelisi othiwa nguLevi, ehlezi endaweni yokuthelisela. Wathi kuye: Ngilandela. 28Watshiya konke, wasuka, wamlandela.

29ULevi wamenzela idili elikhulu endlini yakhe; kwakukhona ixuku elikhulu labathelisi behlezi kanye labo ekudleni. 30AbaFarisi lababhali babo basola kubafundi bakhe besithi: Lidlelani linathe labathelisi lezoni na?#Luka 15:1–2 31UJesu wabaphendula wathi: Labo abaphilayo kabadingi nyanga, kodwa labo abagulayo. 32Kangizanga ukubiza abalungileyo, kodwa ngize ukubiza izoni ukuba ziphenduke.

Ukuzila ukudla

(Mat 9:14–17; Mark 2:18–22)

33Basebesithi kuye: Abafundi bakaJohane bandisa ukuzila ukudla, benze imikhuleko, kunjalo labafundi babaFarisi, kodwa abakho bayadla, banathe. 34Kodwa uJesu wathi kubo: Lingabazilisa ukudla yini abakwabo kamyeni, umyeni eselabo na? 35Kodwa zizakufika insuku, lapho umyeni ezakususwa kibo; kubeng’khonake bezakuzila ngalezonsuku. 36Wasebatshela lumfanekiso wokuthi: Kakho odabula isichibi engutsheni entsha, asibekele engutsheni endala; uba esenza njalo, uzakuyona entsha, futhi isichibi sentsha kasizukuzwana lendala. 37Kakho othela iwayini elitsha emigodleni emidala; uba esenza njalo iwayini elitsha lizakudabula imigodla, lichitheke lona, lemigodla yonakale. 38Kodwa iwayini elitsha limele lithelwe emigodleni emitsha. 39Kakho othi esenathe iwayini elidala afise elitsha, ngoba uthi elidala limnandi.

Currently Selected:

Luka 5: BE1978

Highlight

Copy