Luka 8

Abesifazana abasiza uJesu ngempahla yabo

1Emva kwalokho wadabula imizi lemizana etshumayela ememezela ivangeli lombuso kaNkulunkulu. Babelaye abalitshumi lambili 2kanye labesifazana abathile ababesiliswe kubomoya ababi lasemikhuhlaneni, uMariya othiwa nguMagadalena, okwakhutshwa kuye omoya ababi abayisikhombisa,#Mat 27:55–56; Mark 15:40–41; Luka 23:49 3loJowana umkaKuza induna kaHerodi, loSusana, labanye abanengi, ababebasiza ngempahla yabo.

Umfanekiso womhlanyeli

(Mat 13:1–9; Mark 4:1–9)

4Sekubuthene kuye ixuku elikhulu livela emizini ngemizi, wakhuluma ngemifanekiso, 5wathi: Umhlanyeli waphuma ukuyahlanyela inhlanyelo yakhe. Kwathi ekuhlanyeleni enye yawela endleleni; yanyathelwa ngenyawo, inyoni zaphezulu zayidobha, zayiqeda. 6Enye yawela edwaleni; kwathi ekukhuleni, yahanguka, ngoba yaswela ubulunama. 7Enye yawela emeveni, ameva amila layo, ayiminyanisa. 8Enye yawela emhlabathini omuhle; yakhula, yathela ikhulu. Esetshilo lokhu wamemeza wathi: Olendlebe zokuzwa akezwe.

Ukuchasiswa komfanekiso womhlanyeli

(Mat 13:10–17; Mark 4:10–11)

9Abafundi bakhe bambuza ukuba utsho ukuthini lumfanekiso. 10Wathi: Lina liphiwe ukwazi imfihlakalo yombuso kaNkulunkulu, kodwa abanye bakuphiwa ngemifanekiso ukuze babone bangabonisisi, bezwe bangaqedisisi.#Isa 6:9–10 11Umfanekiso utsho lokhu: Inhlanyelo iyilizwi likaNkulunkulu. 12Abangasendleleni yilabo abathi sebezwile, besekufika uSathane, alisuse ilizwi enhliziyweni zabo ukuze bangakholwa, basiliswe. 13Abasedwaleni yilabo abathi belizwile ilizwi, balamukele ngokuthokoza; kodwa laba kabalampande, bayakholwa okwesikhatshana nje, kuthi ngesikhathi sokulingwa bawe. 14Okuwele phakathi kwameva yilabo abathi sebezwile, bahambe, baminyaniswe yikuphisekela inotho lenkanuko yokusila, bangatheli izithelo ezivuthiweyo. 15Okusemhlabathini omuhle yilabo abathi belizwile ilizwi, balibambe ngenhliziyo enhle lelungileyo, bathele izithelo ngokubekezela.

Umfanekiso wesibane

(Mark 4:21–25)

16Kakho othi eselumathise isibane, asimbomboze ngesitsha ingabe asibeke ngaphansi kwethala, kodwa usibeka esiqobaneni, ukuze abangenayo babone ukukhanya.#Mat 5:15; Luka 11:33 17Ngoba kakukho okufihliweyo okungayikubonakaliswa, lokuthukuziweyo okungayikulethwa ekukhanyeni.#Mat 10:26; Luka 12:2 18Ngakhoke qaphelisani ukuba lizwa kanjani; ngoba ilowo lalowo olakho uzakuphiwa; kodwa lowo ongelakho uzakwamukwa lalokho athi ulakho.#Mat 25:29; Luka 19:26

Izihlobo zikaJesu eziyizo

(Mat 12:46–50; Mark 3:31–35)

19Kwafika kuye unina labafowabo, kodwa bahluleka ukufinyelela kuye ngenxa yexuku. 20Wabikelwa ukuthi: Unyoko labafowenu bemi ngaphandle bafuna ukukubona. 21Kodwa wathi kibo: Umama labafowethu yilabo abalizwayo ilizwi likaNkulunkulu, balenze.

Ukuthuliswa kwesiphepha

(Mat 8:23–27; Mark 4:35–41)

22Kwathi ngolunye usuku wangena emkolweni, yena kanye labafundi bakhe, wathi kubo: Asiwelele ngaphetsheya kolwandle. Basukake. 23Kwathi besahamba ngomkolo, walala ubuthongo. Kwavuka olwandle isiphepha esikhulu somoya, umkolo wagcwala amanzi, babesengozini. 24Basondela, bamvusa besithi: Nkosi, Nkosi, siyabhubha! Wasevuka, wakhuza umoya lamavinqo amakhulu. Kwaqamuka, kwathula kwathi zwi. 25Wathi kubo: Kungaphi ukukholwa kwenu na? Besaba, bamangala, bakhulumisana besithi: Kambe ungubani lo ukuba alaye umoya lamanzi, kumlalele na?

Ukukhutshwa komoya ababi

(Mat 8:28–34; Mark 5:1–20)

26Basebefika elizweni lamaGerasene eliqondene leGalili. 27Esephumele emhlabathini, wahlangabezwa yindoda ethile yomuzi eyayilabomoya ababi; kwasekuyisikhathi ingambathi ingubo ingahlali endlini, kodwa ihlala emalibeni. 28Kwathi imbona uJesu yamemeza, yawa phansi phambi kwakhe, yathi ngelizwi elikhulu: Ngilani lawe Jesu, Ndodana kaNkulunkulu oPhezukonke? Ngiyakuncenga, ungangihluphi. 29Ngoba walaya umoya omubi ukuba aphume kulowomuntu. Ngoba wayesembambe kanengi; walindwa ebotshiwe ngamaketane lezibopho; kodwa eseqamule izibopho, waqhutshelwa ngumoya omubi enkangala. 30UJesu wambuza wathi: Ungubani ibizo lakho na? Wathi: NginguLegiyoni. Ngoba omoya ababi abanengi babengenile kuye. 31Bamncenga ukuba angabalayi ukuya emgodini ongelamkhawulo. 32Kwakukhona lapho umhlambi omkhulu wengulube usidla ewatheni lentaba. Bamncenga ukuba abavumele bangene kuzo; wabavumela. 33Kwathi omoya ababi sebephumile kulowomuntu, bangena engulubeni, umhlambi waphaphathekela eliweni, waphoseka olwandle, waminzwa.

34Kwathi ababezalusile bebona okwenzekileyo, babaleka, bakubika emzini lasemaphandleni. 35Abantu baphuma ukuyabona okwenzekileyo, bafika kuJesu, bamfumana lowomuntu okwakhutshwa kuye omoya ababi ehlezi ngasenyaweni zikaJesu embethe, eqonda; besaba. 36Ababekubonile babatshela ukuba usile kanjani owayengenwe ngomoya ababi. 37Abantu bonke bakulelo ilizwe lamaGerasene bamncenga ukuba asuke kibo, ngoba behlelwa yikwesaba okukhulu. Wasengena emkolweni, waphindela emuva. 38Kodwa leyondoda ebekukhutshwe kuyo omoya ababi yamncenga ukuba ibe laye; kodwa wayithuma esithi: 39Buyela kini, ulandise ukuba kungakanani uNkulunkulu akwenzele khona. Wasuka wahamba etshumayela phakathi komuzi wonke ngokuthi kungakanani abekwenzelwe nguJesu.

Indodakazi kaJayirosi ivuswa ekufeni. Owesifazana olomopho uyasiliswa

(Mat 9:18–26; Mark 5:21–43)

40Kwathi ekubuyeni kwakhe uJesu, ixuku lamthakazelela; ngoba bonke babemlindele. 41Kwafika indoda, ethiwa nguJayirosi, engumphathi wesinagoge, yawa phansi ngasenyaweni zikaJesu, yamncenga ukuba angene endlini yayo. 42Ngoba yayilendodakazi eyodwa eyayingaba leminyaka elitshumi lambili, eyayisisifa. Esahamba, ixuku lamcindezela. 43Owesifazana owayelomopho iminyaka elitshumi lambili, engelakusiliswa ngumuntu, 44weza ngemva kwakhe, wathinta umphetho wengubo yakhe; kwahle kwakhawula ukugobhoza kwegazi. 45UJesu wathi: Ngubani ongithintileyo na? Kwathi lapho bephika bonke, uPetro lababelaye bathi kuye: Nkosi, ixuku likuminyanisile likucindezele. 46Kodwa uJesu wathi: Ukhona ongithintileyo, ngoba ngizwile ukuthi amandla aphumile kimi. 47Owesifazana ebona ukuthi kalakufihlakala, weza ethuthumela, wawa phambi kwakhe; walandisa phambi kwabantu bonke ukuthi umthinteleni lokuthi uhle wasila khona lapho. 48Wathi kuye: Dade, ukukholwa kwakho kukusilisile; hamba kuhle.

49Esakhuluma, kwafika umuntu evela endlini yomphathi wathi: Indodakazi yakho isifile; ungabe usamhlupha uMfundisi. 50Kodwa uJesu ekuzwa lokhu wamphendula wathi: Ungesabi, kholwa kuphela, izakusila. 51Esefikile endlini kavumanga ukuba kungene umuntu kanye laye, kuphela uPetro, loJohane, loJakobe, loyise lonina wentombazana. 52Babekhala bonke beyililela. Kodwa wathi: Lingakhali; kayifanga, kodwa ilele. 53Bamhleka ulunya, besazi ukuthi ifile. 54Yena eyibamba ngesandla, wamemeza esithi: Ntombazana, vuka! 55Wabuya umoya wayo, yavuka khona lapho. Walaya ukuba inikwe ukudla. 56Abazali bayo bamangala; kodwa wabalaya ukuba bangatsheli muntu okwenzekileyo.

Currently Selected:

Luka 8: BE1978

Highlight

Copy