يُوحَنَّا 1

الكِلمَه بِقى جِسم

1في البِدايَه كان الكِلمَه، و الكِلمَه كان عِند الله، و الكِلمَه كان الله. 2هو كان في البِدايَه عِند الله. 3كُلّو شي كان مَعمول بيهو، و بِدونو ما في شي كان مَعمول. 4الحَياة كانَت فيهو، و الحَياة كانَت نور النّاس. 5و النّور كان بِنَوِّر في الضَّلام، و الضَّلام ما قِدِر يَغلِبو.

6كان في إنسان مَرَسَّل مِن الله إسمو يُوحَنَّا. 7هو جا لِلشَّهادَه عَشان يَشهَد لِلنّور، عَشان كُل النّاس #1‏:7 آمَن بِ، يآمِن بِ: يَصَدِّق بِبِآمِنو بِواسطَتو. 8هو نَفسو ما كان النّور، لَكِن جا عَشان يَشهَد لِلنّور.

9النّور الحَقيقي البِنَوِّر كُلّو إنسان كان جاي لِلدُّنيا. 10هو كان في الدُّنيا، و الدُّنيا كانَت مَعمولَه بيهو، و الدُّنيا ما عِرفَتو. 11هو جا لِشَعبو، و شَعبو ما قِبلو. 12و لَكِن القِبلوهو، هو أدّاهُم سُلطَه عَشان يَبقو أولاد الله، يَعني النّاس البِآمِنو بِإسمو. 13ديل هُم النّاس الكانو مَولودين، مُش بِدَم، و لا بِإرادَة جِسم، و لا مِن إرادَة راجِل، لَكِن مِن الله.

14و الكِلمَه بِقى جِسم، و سَكَن في وَسِطنا. و شُفنا مَجدو زي مَجد الإبن الوَحيد مِن الأبو، مَليان #1‏:14 نِعمَه: الرَّحمَه اللَّطيفَه.بِنِعمَه و حَق. 15يُوحَنَّا شِهِد ليهو، و كورَك و قال: ”دا هو الرّاجِل الكَلَّمتَ عَنّو. هو البِجي بَعَدي، جا قِدامي، عَشان هو كان قُبّالي.“ 16و نِحنا كُلُّنا أخَدنا مِن خيرو الكَتير، نِعمَه فوق نِعمَه. 17عَشان الله أدّا القانون بِمُوسَى، لَكِن النِّعمَه و الحَق جو بِيَسُوع المَسيح. 18ما في زول شاف الله كُلّو كُلّو. الإبن الوَحيد الهو في قَلب الأبو، هو خَبَّر عَنّو.

شَهادَة يُوحَنَّا المَعمَدان

19و دي شَهادَة يُوحَنَّا، لَمّا اليَهود مِن أُورُشَلِيم رَسَّلو ليهو قُسُس و لاويين عَشان يَسألوهو: ”إنتَ مِنو؟“ 20يُوحَنَّا إعتَرَف و ما نَكَر، و شِهِد: ”أنا مُش المَسيح.“ 21و قالو ليهو: ”عَلى كِدا، إنتَ مِنو؟ إنتَ إِيلِيَّا؟“ قال ليهُم: ”لا، مُش أنا.“ و هُم قالو: ”إنتَ النَّبي؟“ هو رَدَّ عَليهُم: ”لا.“ 22عَلَشان كِدا قالو ليهو: ”قول لينا إنتَ مِنو، عَشان نَرُد عَلى النّاس الرَّسَّلونا. إنتَ تَقول شِنو عَن نَفسَك؟“ 23يُوحَنَّا قال: ”أنا صوت بِكورِك في الخَلا، حَضِّرو سِكَّة الرَّب، زي ما قال النَّبي إِشَعْيَاء.“

24و النّاس المَرَسَّلين كانو مِن الفَرِّيسِيِّين. 25بَعدين سألوهو: ”طَيب، لِشِنو بِتعَمِّد إذا إنتَ ما المَسيح، و لا إِيلِيَّا، و لا النَّبي؟“ 26يُوحَنَّا قال ليهُم: ”أنا بَعَمِّد بِالمويَه، لَكِن واحِد واقِف بينكُم إنتو ما بِتَعرِفوهو. 27هو البِجي بَعَدي، و أنا ما مُستَحِق أفِك جِزَمو.“ 28و دا كان في بيت عَنيا جَمب بَحَر الأُرْدُنّ، المَحَل الكان يُوحَنَّا بِعَمِّد فيهو.

يَسُوع حَمَل الله

29في اليوم التّاني، يُوحَنَّا شاف يَسُوع جاي ليهو. و قال: ”شوفو #1‏:29 حَمَل: خَروف صَغَيِر.حَمَل الله البِشيل خَطيّة الدُّنيا. 30دا هو الأنا قُلتَ عَنّو: جاي بَعَدي إنسان كان قِدامي، عَشان هو كان قُبّالي. 31و أنا ما كُنتَ عارِفو. لَكِن عَشان هو يَظهَر لِإِسْرَائِيل، أنا جيت أعَمِّد بِالمويَه.“ 32و يُوحَنَّا شِهِد و قال: ”أنا شُفتَ الرّوح نازِل زي حَمامَه مِن السَّما، و قَعَد عَليهو. 33و أنا ما كُنتَ عارِفو، لَكِن الرَّسَّلني عَشان أعَمِّد بِالمويَه، هو قال لَي: البِتشوف الرّوح نازِل و يِستَنّى عَليهو، دا هو البِعَمِّد بِالرّوح القُدُس. 34و أنا شُفتَ و شِهِدتَ، دا هو إبن الله.“

التَّلاميذ الأوَّلانيين

35و في اليوم التّاني، يُوحَنَّا كان واقِف مَعَ إتنين مِن تَلاميذو. 36و شاف يَسُوع ماشي، و قال: ”شوفو حَمَل الله.“ 37بَعدين التَّلاميذ الإتنين سِمِعوهو يتكَلَّم، و قامو و تِبعو يَسُوع. 38و يَسُوع إتلَفَت و شافُم يَتبَعوهو. و قال ليهو: ”إنتو عاوزين شِنو؟“ و قالو: ”رَبّي، يَعني يا مُعَلِّم، إنتَ ساكِن وين؟“ 39و قال ليهُم: ”تَعالو و شوفو.“ بَعدين مَشو و شافو المَحَل الهو كان ساكِن فيهو. و قَعَدو هِناك اليوم داك. و كان السّاعَه أربَعَه تَقريباً. 40و أنْدَرَاوُس أخو سِمْعَان بُطْرُس كان واحِد مِن الإتنين السِّمِعو يُوحَنَّا و تِبعو يَسُوع. 41و أنْدَرَاوُس لِقى أخوهو سِمْعَان في الأوَّل، و قال ليهو: ”لِقينا مَسيّا، يَعني المَسيح.“ 42و جابو لِيَسُوع. و يَسُوع عايَن ليهو و قال: ”إنتَ سِمْعَان وَلَد يُوحَنَّا. إنتَ إسمَك صَفا،“ يَعني #1‏:42 يَعني: ”حَجَر.“بُطْرُس.

43و في اليوم التّاني، يَسُوع #1‏:43 قَرَّر، يَقَرِّر: يَختار أن يَعمِل حاجَه.قَرَّر يَمشي لِلجَّليل. بَعدين لِقى فِيلُبُّس، و قال ليهو: ”أتبَعني.“ 44و فِيلُبُّس كان مِن بيت صَيدا، مَدينَة أنْدَرَاوُس و بُطْرُس. 45و فِيلُبُّس لِقى نَثَنَائِيل و قال ليهو: ”لِقينا الكَتَب عَنّو مُوسَى في القانون و الأنبياء، يَسُوع إبن يُوسِف المِن النَّاصِرَه.“ 46و نَثَنَائِيل قال ليهو: ”مُمكِن بِطلَع مِن النَّاصِرَه حاجَه طَيبَه؟“ فِيلُبُّس قال ليهو: ”تَعال و شوف.“ 47و يَسُوع شاف نَثَنَائِيل جاي ليهو، و قال عَنّو: ”شوف إِسْرَائِيلي بِالحَق، ما فيهو غِش.“ 48نَثَنَائِيل قال ليهو: ”إنتَ بِتَعرِفني مِن وين؟“ رَدَّ يَسُوع و قال: ”قُبّال ما فِيلُبُّس ناداك، أنا شُفتَك تِحِت شَجَرَة التّين.“ 49نَثَنَائِيل رَدَّ و قال ليهو: ”يا مُعَلِّم، إنتَ إبن الله. إنتَ مَلِك إِسْرَائِيل.“ 50و يَسُوع رَدَّ و قال ليهو: ”إنتَ آمَنتَ عَشان قُلتَ ليك أنا شُفتَك تِحِت شَجَرَة التّين؟ إنتَ بِتشوف حاجات أكبَر مِن دي.“ 51و قال ليهو: ”الحَق الحَق أقول ليكُم، بِتشوفو السَّما مَفتوحَه، و مَلائِكَة الله بِطلَعو و بِنزِلو عَلى إبن الإنسان.“

Currently Selected:

يُوحَنَّا 1: APD2024

Highlight

Copy