YA-SFADOCI JRNE 21

1Hvhkuwihi ina yolumv wiahi Jesise nuhgi u tapinvukufatv-wvhi weiv nihi kvgahgimrfhi mrlrqv’ hini Drpilivsiwi msi-napi; macimi vlv-yomv yasi tapinvukufadoci weiv. 2Nitvsi mrwvdwr-beki Svimvn’ Betv, chena Drmuse, Titimvs’ yrlofu, chena Nafani-vle, Ganv uci Galalewi-drmqa, chena nihi u qifhi Sapade, chena neswi kutvkhi u kvgahgimrfhi. 3Svimvn’ Betv, Nih pvh-nvmafga, u talvhi nihi. Nahfrpi ki wedamalapa, u talrwrli nihki. Nhaki nihki, macimi ini ulvgalagi lkvmoki; chena ina tapahgi mvtv wiahi u pathvdonrwv. 4Pvyaqv uwa ini qalvhwhrpvgi, Jesise nepvwi ini sqrbiagi : gawvgi mvtv nihki kvgahgimrfvki u wrku-drnrwv ini yasi Jesise-wilici nili. 5Waciganvhi Jesise, Vpaluh-fati, hv mvtv wiahi ki bonrnrwv wvh mecigi? u talvhi nihi. Nihki ud rpvtvwrwrli, Mvtv. 6Chena inv, Hini mvyrwi wvyatvhqa ini ulvgasi ipvgitvmuku ini hrqvsqhrkv, macimi ga mkvhfupwv, u talvhi nihi. Waciganvhi nihki ut ipvgidrnrwv, macimi uwa rlwi ilafeki nihki wvhsi utvhpanv-muwrci ini xvga ini u msalowanwv nihki nvmahfvki. 7Hinv kvgahgimrfv waciganvhi, yavhqalamrci Jesise, Dabalamiwatv inv, u talrli Betvli. Svimvn’ Betv waciganv-hi iah nodrgaci ini yasi inv Dabalamiwa-wici, gitvpifu u godemi (xvga inv svhsrgitwi), macimi ini msi-napigi ut ipvgidr weiv. 8Wakv nihki kutvkvki kvgahgimrfvki ini cvgi ulvgafagi biaki (xvga nihki mvtv paluwi ini vsisgi uci, wakv nvwitu nesana taba-wa giupit Irqv), susqrfeki ini hrqvsqhrkv uqihsinuhi nvmafhi. 9Hina waciganvhi nihki ia hvqvhsinuwrci ini usgi-drmqa, u nama-nrwv skuta mkvdawvlu ntvsi, macimi nvmahfv saxinwv usgici ntvsi, chena tvkuwhv. 10Bialahku inv nvmahfv mviahci uwa pathvnaqa, u talvhi Jesise. 11Svimvn’ Betv waciganvhi spamagi hawv, chena vsisgegi u ta hvqvhfatu ini hrqvsqhrkv, uqihsinoki mvgi nvmahfvki, tabawa gita nyrlvnwr-pitvgi gita nfwi : macimi jrivhki waghi vbeki yone si maci, ini hrqvsqhrkv mvtv lalgahkv. 12Birku macimi puskunvmuku k’ ucigawanwv, u talvhi Jesise. Macimi mvtv nakuti dapitaha nihki kvgahgimrfvki wvhsi, Nafv-wa gelv? si nvtuhtvwrci nili, wrkutvmoki ini yasi Dabalamwawi-lici nili. 13Jesise biawv, macimi u tah mvma ini tvkuwhv, chena u tah melvhi nihi, macimi nahfrpi nili nvmahfvli. 14Yomv uwa ini mvwi-nfana yasi Jesiseli tapinvukufadofuwrci nihki kvgahgi-mrfvki, vhkuwihi yasi inv nili napalici uci unsgrnofuci.

15Yone ina nihki iah mahci puskunvmuwrci ucigawanwv, Svimvne, u qihfvli Jrne, hv vlikv git vhqalami notv yolumv? u talrli Svimvn’ Betvli Jesise. Hinv, Hvnkv, Dabalamiwatv; gi wrkutv gelv yasi vhqalamalv, u talrli. Hvhsvmi ni pvlvsrni mage-fvki, u talrli inv. 16Nuhgi inv mvwi-nesana, Svimvne, u qihfvli Jrne, hv git vhqalami? u talrli. Hinv, Hvnkv, Dabalamiwatv; gi wrkutv gelv yasi vhqalamalv, u talrli. Gcitvwalami ni magefvki, u talrli inv. 17Hinv ini mvwi-nfana, Svimvne, u qihfvli Jrne, hv git vhqalami? u talrli. Betv vhqitaha xvga inv ini mvwi-nfana, Hv git vhqalami? u talrli nili. Macimi inv, Dabalamiwatv, gi wrkutv gelv jrivhki wiahi; gi wrkutv yasi vhqalamalv, u talrli. Hvhsvmi ni magefvki, u talrli Jesise. 18Tapilo, tapilo, gi tala nelv, Hina iah mvyrnafivni gelv, gi gr-gitvpido geiv, macimi lrqv gi tasi brmfa yasi tahaivni gelv : pvyaqv ina pvsidofiwivna, mr gah si jegingala gi laciwvli, macimi kutvkv ga gitvpilaqv, macimi lrqv gah si walaqv buryr gelv si tahaivni. 19Huwa yomv inv kvlvwi, giginodrcimu wv higi iqinvmowa wih wvhfrci-makufihrci Mvnadoli. Macimi ina inv iah mahci kvivwici yomv, Nakvsilu, u talrli nili. 20Betv, mrsi kulapi, u nawrli nili kvgahgimrfvli ya-vhqalamrci Jesise nakvsiwali; nileni nahfrpi vttvwvssi vpvcsinoli u pvlagi ini tvh svbrwigi, macimi, Dabalamiwatv, nafvwa inv wvh masdrhahkv? hiuli. 21Betv waciganv’ hu nawrli nili, macimi, Dabalamiwatv, chena nahiwa yrmv ilani wah silvwi? u talrli Jesiseli. 22Qahqi nelv si tahaiv wvhsi inv nvkvhsigi brluhi biriv, nahiwa ini gelv si? nakvslu gelv, u talrli Jesise. 23Yomv iyowa waciganvhi wapfaiv alagenv nihki ujaninrnvki, wvhsi inv kvgah-gimrfv tagi napagi : waghi Jesise mvtv u talrli nili wvhsi tagi napalici; wakv, Qahqi nelv si tahaiv wvhsi inv nvkvhsigi brluhi biriv, nahiwa ini gelv si? u talrli.

24Yrmv inv kvgahgimrfv ba-pvh-nemakv yolumv wiahi si dabwawa, macimi vwiga yolumv wiahi : chena ki wrkudrpa yasi u dabwawa dabwawanigi.

25Chena vhdawv nahfrpi maci kutvkvli wiahi Jesise ya-silvweci, nileni qahqi wi hvwigapi jrgi nakuti, tuga ni tasi taha weginrqi ini yalakuqvh-kvmigigi mvtv ivh kvtvwi dapfanu nili awigrdawvli wv hvwigaki.

Currently Selected:

YA-SFADOCI JRNE 21: SJW

Highlight

Copy