YASFADOCI LOKU 9

1Chena u mrwvtwi-mvhi nihi matvhfwi-gita-neswi, chena u melvhi wrsikvgi wvhsi makufihtvwr-wrci jrivhki wvninahfihi, macimi wvhsi gegahdo-lici vhqi-lugawanv. 2Chena u wrwenaskv-wvhi wvhsi nvnvhimiwa-lici ini u gimrwi-drmkumi Mvnatu, macimi wvhsi gegahr-wrci nihi ya-vhqi-luga-lici. 3Chena Mvtv-wiahi rmwadoku ya-lrmeyaqa, mvtv rpvdhowa, mvtv bedrkv, mvtv tvkuwhv, mvtv muni; mvtv nuhgi bonv-muku neswi godewvli. 4Macimi goqa-nahsi wegiwv utitv-maqa, ’n’tvsi vpiku, macimi ini uci wapfaku. 5Chena ya’tfwi bur utvhpanal-wrqa, ina ini udawa uci wapfa-ya-qa, pvwvtanv-muku ini paqi ki fidwrgi uci wvhsi dabwawan-haqa nihki, u talvhi. 6Chena nihki srwaki, macimi nili udawa-nafv si srbweki, pami nvnvhimiwaki ini uwasi-biadrcimowa, chena pami gega-hiwaki mafhega tvsi.

7Huwa Halade inv nakutah-fapvti-ugimv nodrga jrivhki ya-si lvwegi : macimi ulrmi wvnfuna-wafi, xvga ini ya-iuwrci nrlatv, yasi Jrne unsgrci nili na-palici uci; 8macimi nrlatv, yasi Elvicv mahci tapinvuku-fici; chena kutvkvki, yasi nakuti nihki pvsidowi mrmosigesqacki unsgrci nuhgi. 9Chena iwv Halade, Jrne ni gisgi-qatwhv : pvyaqv nafvwa yrmv, ya-lrcimo-fuci ni notv vlv-ini si wiahi? Macimi u nvtunahv wvhsi nawrci.

10Chena nihki apvstvleki, iah bir-wrci patagi, u muhgr-tutvmvwr-wrli si wiahi mviahci lutvmu-wrci nihki. Macimi ud rmwalvhi nihi, chena tabrna si srwa udawa Pafsaita sidota. 11Pvyaqv nihki mahsa-lagiki u pami moialadr-nrwv ini u nakvlr-wrli : macimi usilvwa-nvhi nihi, chena u kvlolvhi ini ugimrwi-drmkumi Mvnatu, chena nihi ya-grwrtvma-lici gega-hadewa u gega-hvhi. 12Chena ini grsagigi vlami ulrqefi; chena nihki matvhfwi-gita-ne-swi biaki, macimi Rmaskvwi nihki mahsa-lagiki, wvhsi manvwvhga nihki nili udawa-nafv chena gryrukv belasgi hr-wrci macimi gigah-si-wrci, chena mvmu-wrci wihfane-wa : xvga utvsi kit vpipa tvh pvpsqvhgigi, u talr-wrli nihki. 13Pvyaqv Melahku wvh meci-wrci u talvhi. Ni bonrpa mvtv vlikv tfwi nyrlvnwi wapsqadawvli macimi neswi nvmahfvki; waciwaphi ni hr-yrga chena tapanv-mvwvgita wihfanewa jrivhki iuhkumv lanvwaki, iwvki nihki. 14Xxga nihki nvwitu nyrlvna-matvhfana-tabawa ilaneki. Macimi, Lamvtvp-hahku wvh de-tfwalu-wrci, nvwitu mrsv nyrlvnwr-pitvgi, u talvhi u kvgahgimrfhi. 15Macimi nihki yone si lvweki, chena u lamvtvphr-wvhi jrivhki nihi. 16Chena u tah mvmanv nili nyrlvnwi wapsqa-dawvli macimi nihi neswi nvmafhi, chena spamagi manqvtugi pami lrpi, u gisrci-ludrnv nili, chena u puskunrnv; macimi u melvhi nihi kvgahgimrfhi wvhsi pvgfanvma-lici ya-lvhfvme-lici nihi mah-sala-lici. 17Chena nihki wihfaneki, macimi jrivhki dabholoki : chena ’n’tvsi mrwvtunv-mrqeki sa-sqvdodagi baxkvhki, matvh-fwigita-neswi sosona.

18Chena ini biamikvtwi, yasi bami mvmrtumaci tabrna, nihi kvgahgimrfhi weci : macimi u nvtuhtv-wvhi, Nafvwa iwvki neiv nihki mahsala-giki? isiwa. 19Chena pami rpvfsaki nihki, Cah Jrne inv Fvfvhqi-ulalhiwanv; wakv nrlatv Elvicv iwvki; chena kutvkvki, yasi inv nakuti nihki pvsidowi mrmosigesqacki pami unsgrci nuhgi, isiwaki. 20Wakv gelvwv nafvwa ki taiupwv nelv? u talvhi. Macimi Betv pami rpvfsa, Ca hinv u Klvisde-mvli Mvnatu, isiwa. 21Pvyaqv ud ryeci-mvhi macimi u tapimvhi wvhsi bur yomv wetvmvwr-wrci ilaneli; 22Hinv u Qihfvli ilani qelvhi wa hvhqi-nvmwv maci wiahi, macimi wa hrlvwina-kuhi nihi gigi-lanihi chena ugimrwi mkvtaukulviahi chena yr-ivwiga-lici, macimi wa nfaqi, chena ini mvwi-nfuku-nvgiga wa hunsgr-nofu, isiwa. 23Chena jrivhki u talvhi, Qahqi wiyafv ilani nih biaci vhgoqv welrni inv girda-latvga weiv, chena u kuqitanv ud rsitahfage-mi tfana wrpvgi, macimi ni nakvlaqv. 24Xvga goqa-nafv-grci wi wrpvnastu u ta lanvwawewa wah wvntu ini; wakv goqa-nafv-grci wah wvntu u ta lanvwawewa xvga nelv uci, henv wa wrpvnastu ini. 25Xvga nahiwa ilani mkvhfu, qahqi kvtvwih-kvga ini malsga ya-lakuqvh-kvmigigi, macimi u wvntu walr u pvgidrnv nahvlwrkv weiv? 26Xvga goqa-nafv-grci nah taqah-aqv macimi ni kvlvwewa, nileni inv u Qihfvli ilani wah taqahrli, ina birta nahvlwrkv u wvhfrci-makufewa-nagi, macimi ini u wvhfrci-makufewa inv Ufimv, chena nihki ufapi ancvleki. 27Pvyaqv dabwawa gi talapwv, Hvbeki nihki nrlatv na-nepvwicki utvsi, nihgeni mvtv wah wiahisi kutvdr-nrwv nabowa, brluhi u nama-nrwv nihki ini ugimrwi-drmkumi Mvnatu. 28Chena ini biamikvtwi nvwitu nfwrsig-fuku mviuhqrci yolumv iyowanv, ud rmwalvhi Betvli chena Jrneli chena Jamseli, macimi beci ini maqvhgigi si kuqicsinwv wvhsi mvmrtumaci. 29Chena yasi pami mvmrtumaci, ini yagi u ta Irbawa kutvgi-inwi chena u betanikv via wvhkvnvgir macimi pami wvhfeqfo-wvtwi. 30Chena wrpvmahku, ’n’tvsi u ge-kvlola-kuhi neswi ilanihi, nihgeni Mosise chena Elvicv; 31nihki wvhfrci-makufewa-nagi nvukufeki, macimi ud rtudr-nrwv u ta sinvmowa wrsv inv mahci lutvgi Culosalamegi. 32Huwa Betv chena nihi ba-pvh we j e-makuci kufakufeki kvtuqrmowa : pvyaqv ia’ uqrwi si vmvmu-wrci nihki, u nama-nrwv u wvhfrci-makufewa-nilici, macimi nihi neswi ilanihi wa-weci-grpvwe-makuci inv. 33Chena ini biamikvtwi, yasi nili uci pami tabrna hrwrci nihki, Betv u talrli Jesiseli, Mastala, ca huwasv ini utvsi vpivqa : macimi welrni na husdopa nfwi rjewi-kvmiku; nakuti gelv, chena Mosise welv nakuti, chena Elvicv welv nakuti : mvtv u wrkutv bami iuci. 34Chena iahaiahu-waci yolumv wiahi, ’n’tvsi biaiv brfqvhgi, macimi ut vwikvnsgr-ku-nrwv : chena kupa-naki yasi utitvmu-wrci ini brfqvhgi. 35Chena ini brfqvhgi uci luhfaiv kvlvwih-simowa, Henv yrmv ni Qihfv, ni mvmrwanv : notv-wahku gelvwv, iyoiv. 36Chena iah biayrgi ini klvwih-simowa, nrnsihkv mgofu Jesise. Macimi nola-weki nihki, chena mvtv u wetvmvwr-wrli ilaneli ini uci wiahi mviahci namu-wrci nala grsagiki.

37Chena ini biamikvtwi, ini wvyrpvgi, iah biaci brlvcsinu-wrci ini maqvhgigi uci, maci mahsala-lici u nvxgr-kuhi. 38Chena wrpvmahku, ilaneli nihi mahsala-lici utv hotvmoli, Ga-gahgimiwa, gi nvnvhbrci-mala wvhsi wrpvmvci ni qihfv; xvga inv pahi nit vpaluhfamv : 39macimi wrpvmi, wia-lafewanvli u masana-goli, chena gikvmoci wr-wivkohotv-mwv; chena nili u mr-mrtvkus-kvha-goli waciganvhi br-pihda-wafi, macimi fvgrgi weiv wv uci srwali nili, ulrmi u pami kvgissima-goli. 40Macimi ni nvnvhbrci-mrki gi kvgahgimrfvki wvhsi luhfa-pvgilr-wrci nili; chena rlwi kvtv-wafeki, iwvli. 41Chena Jesise rpvfsa macimi, 0buryr dapwah-srkvnitv macimi mvmyrsi-mvmelowafitv sqelanvwa, drniwa lrqvsi gah weci vbemalapwv gelvwv, macimi wesigi-tahah-dolapwv? biasi utvsi inv gi qihfv, isiwa. 42Chena yasi inv gawvgi pami birci, inv wvninahfi svhgigi ut ipvgilrli nili, macimi ut vhqi-mrtvkuskv-hrli. Pvyaqv Jesise u kutalrli nili wivgilah-feli, macimi u gega-hrli nili sgilvwahfefvli, chena patagi u fvli si meliwa nili. 43Macimi jrivhki nihki u qvqahdrna-ladr-nrwv ini u mvgeciwafewa Mvnatu.

Pvyaqv iahaiahi jrivhki pami qvqahdrna-latvmu-wrci ini jrivhki wiahi yasi Ivweci, u tah kvlolvhi u kvgahgimrfhi, 44We-lrni yolumv kvlvwewanv ki tvwvgr-wrgi si kufrbia-yrga : xvga inv u Qihfvli ilani nili u laciwv ilaneki wah si pvgfanofu, u talvhi, 45Pvyaqv yomv iyowa mvtv u nanuhdr-nrwv nihki, chena ini gigidrqeki wvhsi bur molalatvmu-wrci ini; macimi u kudr-nrwv wvhsi nvtuhtvwr-wrci nili yomv iyowa.

46Chena ’n’tvsi pvfaqeiv mamagini-tahawa alagenv nihki, drnvwa inv nihki vlikv mselafi. 47Pvyaqv iah namagi Jesise ini yasi mamagini-taha-yrgi u tahiwv, u tah mvmrli cvgi vpaluhfa-fvli, macimi pvkvci welv u tah lamvtvp-hrli nili, 48chena, Goqa-nafv-grci wa hutvhpa-nrli yolumv cvgi vpaluhfafvli ni wefowa-nagi ni utvpa-naqv nelv : macimi goqa-nafv-grci na hutvhpa-naqv utvhpa-nrli nili wa-wrwenilici : xvga inv gci-utvhbefv alagenv gelvwv jrivhki, henv mselafi u talvhi nihi.

49Chena Jrne rpvfsa macimi, Mastala, ni nawrpa nakuti bami luhfa-pvgi-lrci wvninahfihi gi wefowa-nagi; chena ni kuta-lrpa inv, xvga mvtv gi weci nakvla-kunv inv, isiwa. 50Pvyaqv Tagi kutalahku : xvga inv buryr pipahtanal-wrqa weciwi gelvwv, u talrli Jesise.

51Chena ini biamikvtwi, ina nili grsagiki nrnami biaiv wvhsi spamagi si utvhpa-nofuci, grgikv wvhsi Culosalamegi hrci Irpaskv, 52macimi ya-lvhfvme-qaci u ta laskvwvhi wa-wrwenrci : macimi nihki wapfaki, chena utidr-nrwv nihki Samalivki udawa-nafwv, wvhsi nvnvhi macfadr-kuci. 53Macimi nihki mvtv utvhpa-nrwrli nili, xvga u ta Irbawa yagi brsi waghi wesv Culosalamegi hawv. 54Chena u kvgahgimrfhi Jamseli chena Jrneli iah namalici yomv, Dabalamiwatv, hv gi tasi taha wvhsi itvmvqa skuta wvhsi manqvtwi uci svhgigi biayrgi, macimi jrkvmaku-wrci nihki? iwvki nihki. 55Pvyaqv kugewv, macimi u kutalvhi nihi. 56Chena kutvgi udawa-nahi haki.

57Chena yala lfawrci ini wvyaci, nr-nakuti ilaneli, Gah nakvlala goqa-grci wvyaci yahrivni, u tagoli. 58Macimi Jesise, Nihki wrkucahfeki u bonr-nrwv wrsrlvku, chena nihki manqvtwi uci wisgiluhfvki u bonr-nrwv ufihfv-nwv; wakv inv u Qihfvli ilani mvtv u bonv wvh tvh sagfadoci wesi, u talrli nili. 59Chena kutvkvli nuhgi, Nakvsilu u talrli. Pvyaqv, Dabalamiwatv, welrni la-lamilu wvhsi nhihtv nhriv macimi lakunvgi n’uhfv, isiwa inv. 60Pvyaqv, Nvkvsi nihki na-pagiki wvhsi lakunr-wrci nahvlwrkv u nabo-mwvhi; wakv gelv nhrla macimi lfwrcimulu mafhega ini ugimrwi-drmkumi Mvnatu, u talrli nili. 61Chena nuhgi kutvkvli nahfrpi, Gah nakvlala, Dabalamiwatv; pvyaqv nhihtv welrni la-lamilu wvhsi usilvwr-lvki nihki ya-driv wegiwv ya-picki, iwvli. 62Pvyaqv Mvtv ilani, u pami mahci foginv jegiga-picikv, macimi udrnrgi pami lrpi, ivh si uwas’sinwv ini ugimrwi-drmkumi Mvnatu, u talrli Jesise.

Currently Selected:

YASFADOCI LOKU 9: SJW

Highlight

Copy