HINI UWASI-BIADRCIMOWA ya-sfadoci MAFIYO 2
2
1Huwa ina usgi-negi Jesise Paflihami tvsi beci drmqa Cudia, ina kvgesakvnami Halade inv ugimv, wrpvmahku, Laburwi-laneki ini watvhkufvgi uci Culosalame si biaki, 2Drnvwa inv wasgi negitv Ugimrmwrli Josvki? xvga ini watvhkufvgi ni tah nawrpa ut vlrkumvli, macimi ni birpa wvhsi usvsilvwahv-kici, iwvki. 3Chena ina Halade inv ugimv iah notvgi ini, patfvgi taha, macimi jrivhgi Culosalame u wecjemaku. 4Chena u tapatwi mrwvtunvhi jrivhki nihi ugimrwi mkvtaukulvya-mwvhi macimi ud awiga-mwvhi nihki lanvwaki, u nvtuh-tvwvhi nihi tvsi wvhtv husgi negici Klvisde. 5Macimi nihki, Pa-flihami tvsi beci drmqa Cudia, u talrwrli : Xvga ini yalvwigagi srpwi inv mrmosigesqatv,
6Chena gelv Paflihami, ut vsisgemi Jotv,
Mvtv wiahisi gi tasi gcimrcilofi alagenv ugimr-osrkvnhi Jotv :
Xvga geyrgi wa huci luhfa ya-lrpvmatv,
Wvh geganrtv ni ta lanvwamhi Iswelvhi.
7Hina uwa Halade u gemi utvhpimvhi nihi Laburwa-lanihi, macimi nihi uci wrkutafi ini mvyrwi lrqv inv vlrqv dapinrkufici. 8Macimi Pa-flihamigi u ta laskvwvhi nihi, Nhrkuna macimi mvyrwi nvtunahigaku inv mvyrni vpaluhfv si : chena mahci mkvwaqa inv nuhgi biatvwiku kvlvwewa, wvhsi nahfrpi manvwvhi biriv macimi usvsilvwahvgi, u talvhi. 9Macimi nihki, yasi mahci notvwrwrci nili ugimrli, wap-faki yahrwrci; chena, scih, inv vlrqv nihki ini watvhkufvgi yana-wrwrci, yalvhfvmelici nihi si wapfa, brlu’ hini biawv macimi vpiwv tapilv’ spamagi tv hvpici inv mvyrni vpaluhfv. 10Chena iah nawr-wrci nili vlrqvli nihki, usvsilabwrki vnhiwawi msi usvsilabwrwa. 11Chena becfaki ini wegiwv macimi u nawrwrli nili mvyrni vpaluh-fvli weci Male inv u gali; chena nihki svhgigi sfaki usvsilvwahrwrli nili; macimi u tvwanrnrwv u pvwrwanwv u pvgfanvmvwrwrli dap-hadewanv, ufrwi-muni chena botafvmrcikvni saqv chena mr. 12Chena dawvhi ut vlanakuwrli Mvnadoli vhpuwawa-nagi wvhsi tagi patagi hrwrci Haladeli, pvivgilv wvyaci si wapfaki nihki nahvlwrkv u drm-kumwrgi haki.
13Huwa ina iah srwawrci nihki, wrpvmahku, Joseli utfrli vh-puwawa-nagi inv Dabalamiwatv ut ancvlemvli, Hunsgrlu chena mvmi inv mvyrni vpaluhfv macimi u gali, chena Ecapde lasimulu, macimi ntvsi vpilu brluhi wetvmolv : xvga Halade wah nvtunawhrli nili mv-yrni vpaluhfvli wvhsi nfrci, u talrli. 14Macimi unskv inv chena u mvmrli nili mvyrni vpaluhfvli macimi u gali inv, chena Ecapde si srwa tapahgi; 15macimi ntvsi vpiwv brlu’ hini u nabowa Halade : wvhsi manvwv’ hini uqrufagi ga-kvlvwici inv Dabalamiwatv srpwi nili mrmosigesqalici, Ecapde ni utumv ni qihfv, iwv.
16Hina uwa Halade, iah namagi yasi inv wrpvlrcihakuci nihi Laburwi-lanihi, vnhiwawi wivkuwa, macimi wrwenga, chena u nfvhi jrivhki nihi sgilvwahfiwi vpalufhi yapilici Paflihamigi, macimi jrivhki ini sqriv tvsi, na-neswi-gikvdowilici macimi utvhpi, hini Irqv si vginvia nihi Laburwi-lanihi mviahci uci mvyrwi wrkutafici. 17Hina uwa uqrufanwi ini ga-kvlvwigi srpwi Calamriv inv mrmosi-gesqatv,
18Kvlvwawih-simowa nodrqvtwi lr Lamv,
Bami wihfvqagi macimi mvwagi,
Lacvli bami mvwimrci ut vpaluhfamhi;
Macimi inv rlwi manwi-tahasgofu, xvga mvtv-lrqv nihi, iwv.
19Pvyaqv ina iah napagi Halade, wrpvmahku, inv Dabalamiwatv ut ancvlemvli udfrli vhpuwawa-nagi Joseli Ecapdegi, 20Hunsgrlu chena mvmi inv mvyrni vpaluhfv macimi u gali, chena ini Iswelv ut vsisgemi hrlu : xvga nihki naboki na-tunahvgiki ini u ta lanvwawewa inv mvyrni vpaluhfv, u talrli. 21Macimi inv unskv chena u mvmrli nili mvyrni vpaluhfvli macimi u gali, chena ini Iswelv ut vsisgemi si biawv. 22Pvyaqv iah nodrgaci yasi Rgalavse vsuwa bami ugimru-tvgi Cudia iahgi tv hvpilici u fvli Haladeli, hu qitv wvhsi ini hrci; chena dawvhi ut vlanagoli Mvnadoli vhupwawa-nagi, ini lr Ga-lale si srwa, 23macimi biawv chena udawa-nagi dawv Nrsalafe si-dota; wvhsi manvwv’ hini uqrufagi ga-kvlvwigi srpwi nihki mrmosi-gesqacki, wvhsi inv Nrsalene sinofuci.
Currently Selected:
HINI UWASI-BIADRCIMOWA ya-sfadoci MAFIYO 2: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
