HINI UWASI-BIADRCIMOWA ya-sfadoci MAFIYO 21

1Chena mrlrqvhi Cuiosalame ia hvlamfa-wrci, macimi Pafaje si biaki, ini Vlifiwi maqvhgigi, ina uwa Jesise u tah wrwe-nvhi neswi kvgahgimrfhi, 2Nhrkuna ini udawanahi ya-dagi ya-lvhfvme-yaqa, macimi walanv ga mkv-wrwv jagefv gjepifu, chena mvhgotalafv weci nili : palhuhku nihki macimi biatv-wiku. 3Chena qahqi wiyafv wiahi ilal-wrqa, Inv Dabalami-watv skvtv u talala-mvhi, ga hilrwv; macimi walanv utvhfv wa sfv-hvhi nihi, u talvhi nihi. 4Huwa yomv biami-kvtwi, wvhsi ini manvwvh’ uqrufagi ya-iugi srpwi inv mrmosigesqatv,

5Wetvmv-wahku gelvwv nili u drnah-fvli Srivni,

Wrpvmi, g’Ugimr-mv g’utfaqv,

Nvnvhbr-jelafi, chena u pami nvia-goli jagefvli,

Macimi usgici mvhgotala-fvli u nejrnvli jagefv :

iupi. 6Chena nihki kvgahgimrfvki wapfaki, macimi datapilvhi si Ivweki yasi maku-wrci Jesiseli, 7chena u bialr-wrli nili jage-fvli, macimi nili mvhgotala-fvli, chena u tvpkvwhr-wvhi nihi u betanikv-nwv; macimi inv u nvia-kuhi. 8Chena nihki vliwi tfwi mahsa-lagiki u sakvtanr-nrwv u betanikv-nwv yala myawigi; chena kutvkvki u gisgi-biadhr-nrwv nili mtaku, macimi u sakvtanr-nrwv nili ini yala myawigi. 9Chena nihki mahsa-lagiki yala negr-nelici, macimi udrnrgi wa-malici, Hosanv cahi inv u qihfvli Dapide. Gisrda-lamakufi ca hinv ba-birtv ini u wefowa-nagi inv Dabalamiwatv; Hosanv cahi wihkuci Ispi, lvhotv-moki 10Chena Cuiosalame iah si birci, jrivhgi ini udawa tvtvwrnwi, Nafvwa yrmv? iupi. 11Chena nihki mahsa-lagiki, Henv yrmv mrmosigesqatv, Jesise, Nrsalafi Galalewi-drmqa uci, iwvki.

12Chena ini u mvmrtumawi-kvmiqi Mvnatu si becfa Jesise, macimi u luhfa pvgi-lvhi nihi jrivhki wa-wedge-lici macimi da-pani-galici befiga in mvmrtumawi-kvmiqi, chena u kulapi-pvgitvmv-wvhi nili u dapvle-mwv nihki muni-rsonigah-feki, macimi nili ut pvbe-wa-nwv nihki mr-myagi-nrcki nihi myrsi-pvwefhi; 13macimi, Mahtv-wigapi ini, u talvhi, Ni wegiwr-pimi mvmrtumawi-kv wah sidota : wakv gelvwv jekuniwah-feki u wrsrlvku-mwv ki ta sdo-nrwv ini, u talvhi nihi. 14Chena nihi gakvgabe-qalici chena nihi ma-myrlvgigr-da-lici utfa-kuhi betiga ini mvmrtumawi-kvmiqi : macimi u gega-hvhi. 15Pvyaqv nihki ugimrwi mkvtaukulv-yaki chena nihki yr-ivwigacki iah namu-wrci nili lvkuqahdrni wiahi yasi Ivwelici nili, macimi nihi vpalufhi, Hosanv cahi inv u qihfvli Dapide, bami lvhotv-malici betiga ini mvmrtumawi-kvmiqi, gisfadewa mrci-tahaki nihki, 16macimi, Hv gi notv-wrki iuhkumv ya-iuwrci? u takuhi. Macimi Jesise, Hvnkv : hv mvtv lrqv gelvwv ki Irbrtudr-nrwv, Nili u do-nwv vpaluhfa-fvki chena na-nono-ficki g’uci bonv gelv mafdota wi-vwrci-madewa? u talvhi. 17Chena u nvkv-lvhi nihi, macimi via wapfa luhfa ini udawa Pafana hawv, chena ’n’tvsi gigahsi.

18Huwa ini qa-lvhwhr-pvgi yasi patagi ini udawa-nagi hrci, sqrlvwa. 19Macimi mr’ u tah nama gicimesi ini pvkvckvnv, ini si biawv, chena mvtv-wiahi u mkv ’n’tvsi, wakv msisga pahi; macimi, Welrni mvtv-lrqv mvwifowa ivhdawi gelv uci yoci goqa-lrqvsi, u tatv ini. Chena walanv ini gicimesi naputa. 20Macimi iah namu-wrci ini nihki kvgahgimrfvki, qvqahdrni-tahaki, Nahiwa si walanv naputa ini gicimesi? iwvki. 21Chena rpvfsa Jesise macimi, Tapilo gi talapwv nelv, Qahqi bonv-maqa dapwah-sawa, macimi tagi rnwah-saku, mvtv ini gicimesi ya-panvdo-dagi pahi gah si lvwe-pwv, wakv weginrqi qahqi yomv maqvhgigi, Mvmo-fulu macimi ini msi-na-pigi ipvgilo-fulu, ga hidr-nrwv, ini wa ipanvdota. 22Macimi jr-ivhki wiahi, goqa-nahi-grci gelvwv gah nvtudr-nrwv, mvmrtumawa-nagi, pami dapwahsa-yaqa, ga hutfaku-nrwv gelvwv, u talvhi.

23Chena iah birci betiga ini mvmrtumawi-kvmiqi, utfa-kuhi nihi ugimrwi mkvtaukulviahi chena nihi u gigilane-mwvhi nihki lanvwaki yasi pami kvgahgimi-waci, macimi Drniwa uci makufewa g’uci yolumv wiahi si Ivwi? chena nafvwa gi melaqv yomv si makufewa u takuhi. 24Chena rpvfsa Jesise macimi, Nahfrpi nelv gah nvtuhdo-lapwv nakudwa-lanv nvtuhdwr-dewa, ini qahqi gelvwv wetvmvwi-yaqa, nahfrpi nelv gah wetvmo-lapwv ini si makufewa wv uci yolumv wiahi si lvweiv, u talvhi. 25Hini u fvfvhqi-ulalhiwawa Jrne, drniwa uci ini? hv wafapvh-kvmigigi uci walr tuga ilaneki uci? u talvhi. Macimi nihki mamagini-tahaki pasiqi welvwv, qahqi Wafapvh-kvmigigi uci ga hiupa; Gociwa chena mvtv ki dapwahtv-wrwv? ga hikunv. 26Wakv qahqi Ilaneki uci ga hiupa; ki kufrpa nihki mahsa-lagiki; xvga mrmosi-gesqatv u ta lvgimr-wrli Jrneli, iwvki. 27Chena ud rpvftvwr-wrli Jesiseli macimi, Mvtv ni wrkudrpa, u talr-wrli. Nahfrpi mvtv nuhgi nelv gi tvh wetvmo-lapwv ini si makufewa wv uci yolumv wiahi si lvweiv, u talvhi. 28Pvyaqv nahiwa ki tasi taha-pwv gelvwv? Nakuti ilani u bonvhi neswi u qifhi; chena nhawv nili nhihtv, Uqihfimv, nhrla pakvta-filu inugi grsagigi ini mfvlo-mi-gtigr-nagi, u talrli. 29Chena inv rpvfsa, Mvtv, iwv : pvyaqv mviuhqrci inv mvtveni si taha welv, macimi nhawv. 30Chena nili mvwi-neswi hawv, macimi ivskv ini ya-iuci. Chena inv rpvfsa macimi, Ni nahv, yalaniwivni, u tagoli : macimi mvtv nhawv. 31Dr-nvwa nihki neswi yasi tahalici u fvli si lvwi? u talvhi. Hinv nhihtv, iwvki nihki. Tapilo gi talapwv nelv, yasi nihki daxewi-mrwvtu-nigah-feki macimi nihki nrkvhowi-iqaki becfr-wrci ini Mv-natu ugimrwi-drmku-mi ya-lvhfvme-yaqa gelvwv. 32Xvga Jrne g’utfakuwv, biaci matamia ini mvyrwela-fewa, macimi gelvwv mvtv ki da-pwahtv-wrwv inv; wakv nihki daxewi-mrwvtu-nigah-feki chena nihki nrkvhowi-iqaki u dapwahtvwr-wrli nili : chena gelvwv, iah nama-yaqa ini, mvtv muhci mviuhqrci mvtveni ki tasi tahapwv geyrwv, wvhsi manvwvhga dapwahtv-waqa inv, u talvhi Jesise.

33Notv-muku nuhgi kutvgi pamrtuwawa : hvpiwv ilani ba-bonvkv ya-drci wegiwv, u titu mvlomi-gitikv, macimi u wvghv gryrukv ini, chena wrlga wvinewi fegija-picikv betiga ini, chena upvtanv tvwadawi-kv, macimi gitigawi-lanihi u tvuhvhi ini, chena pvivgilv vsisgi si rci. 34Chena ina nrnami ini lrqv tv hvtidaki ini mvwifowa, u ta laskvmv-wvhi nihi gitigawi-lanihi ut vlolrkvnhi, wvhsi utvhpan-nvgi u mvwifowa. 35Chena nihki gitigawi-laneki u masanr-wvhi ut vlolrkvnhi, macimi u pgitawhr-wrli nakuti, chena u nfr-wrli nakuti, macimi u sekunwhr-wrli nuhgi nakuti. 36Nuhgi, u ta laskv-wvhi kutvkhi ut vlolrkvnhi vlikv tfwi notv ini wasgi : macimi nihki ini ivskv ya-panvlr-wrci nihi. 37Pvyaqv mv-iuhqrci u ta laskvmv-wvhi u qihfvli, Wa hutvgalamr-wrli galv ni qihfvli nihki, iwvpi. 38Pvyaqv nihki gitigawi-laneki, iah nawr-wrci nili uqihfi-mrli, Vlv-yrmv inv lvyrpi-tabalatvkv; birku, nfr-drku, macimi mvma-drku ini Irpi u wiahe-mi, ideki alagenv welvwv. 39Macimi u masanr-wrli nili, chena ini mfvlomi-gitikv uci luhfa pvgilr-wrli, macimi u nfr-wrli. 40Hina waciganvhi inv dabalatvkv ini mfvlomi-gitikv wah biawv, nahiwa wa ipanv-lvhi inv iu-humv gitigawi-lanihi? u talvhi. 41Wah mvmyadrqi nfvhi inv iu-humv mvmyatvh-qayi ’lanihi, macimi wa hvuhvhi kutvkhi gitigawi-lanihi ini mfvlomi-gitikv, nihi wvh me-lakuci nili mvwifowanv lrqv tv hvtidaki, u takuhi. 42Hv mvtv-lrqv ki lrbrtudr-nrwv nili tapilo awigrda-wvli,

Nili sekunvli ya-lvwinvwrwrci nihki wrgigrcki,

Hinv ivskv machofu u wesiwi ini bojrgi;

Yrmv inv Dabalamiwatv uciwi,

Macimi inv vnhiwawi-nrkufi ki sgesakunrki?

u talvhi Jesise. 43Waciganvhi gi talapwv nelv, Ini u gimrwewa Mvnatu gah mvmr-gopwv, macimi wah melofu kutvgi si lanvwa ini waci pami biadotv ini mvwifowa. 44Chena inv usgici yolumv sekunvli yasi pansikv wah puhpusqih-sinwv : wakv goqa-nafvli-grci inv wah si pansinwv, wah Ifwaskv-wrli nili brsi paqi. 45Chena ina nihki ugimrwi mktaukulv-yaki chena Palaseki iah notvmvwr-wrci u pamrtuwawa, mosi-tahaki nihki yasi nihi inv rcimrci. 46Macimi iah wesv nihki masanr-wrci nili, u kufr-wvhi nihi mahsa-lalici, xvga nihki mrmosigesqatv u ta lalamr-wrli nili.

Currently Selected:

HINI UWASI-BIADRCIMOWA ya-sfadoci MAFIYO 21: SJW

Highlight

Copy