HINI UWASI-BIADRCIMOWA ya-sfadoci MAFIYO 4
4
1Hina uwa Jessise nili Ucvjrlvhqvli ini belasgi u tasi wala-goli wvhsi kuci mvci-vshakuci nili mvci-mvnadoli. 2Chena ina iah mahci fvfvhqi ucigaci nyawrpitvgi tfuku gita nyawripitvgi tapuqa, inv vhkuwihi sqrlvwa. 3Macimi inv kucilahfi biawv chena, Qahqi geyrwivna nili u Qihfvli Mvnatu, tapigamulu wvhsi iuhkumv sekunvki tvkuwhrni-wiwrci, u tagoli. 4Pvyaqv inv rpvfsa macimi, Yalvwigagi ini, Mvtv tvkuwhv pahi wa huci lanvwawi ilani, wakv jrgi kvlvwewa ini u doni Mvnatu wa-moyrgi, u talrli.
5Hina uwa inv mvci-mvnatu ini ufapi udawa-nagi u tasi walrli nili; macimi inv ini vnvhqvsgi in mvmrtumawi-kvmiqi u tab lamvtvphrli nili, 6chena, Qahqi geyrwivna nili u Qihfvli Mvnatu, svhgigi ipvgitvnu geiv : xvga yalvwigagi ini,
Wah melvhi inv ut ancvlemhi tapimadewa gelv si : chena,
U laciwrgi nihki gab pvh-nemagoki,
Belaba ga pgitahfatu gi fici sekunagi,
u talrli. 7Tagi ga hustu gelv u kutvh-kuwrfowa inv Dabalamiwatv gi Mvnadomv, Ivwigapi ini nuhgi, u talrli Jesise. 8Nuhgi, inv mvci-mvnatu vnhiwawi sahpvtagi wvciwvhgi u tasi walrli nili, ma-cimi u wrpvtalrli jrivhki nili ugimrwi-drmqawvli ini yalakuqvh-kvmigigi, macimi nili uci wvhfrci-makufewa; 9chena, Jrivhki yo-lumv wiahi gah melala nelv, svhgigi sfrivna macimi usvsilvwahivna, u talrli. 10Hina uwa Jesise, Ylikv hrla, Satane : xvga Ga husv-silvwahv gelv inv Dabalamiwatv gi Mvnadomv macimi inv pahi gah mamaginilutvwv, Ivwigapi ini, u talrli. 11Hina uwa inv mvci-mvnatu u nvkvlrli nili; macimi wrpvmahku, ancvleki biaki macimi u mesvmvwrwrli nili.
12Huwa ina inv iah nodrgaci yasi Jrneli masanofulici, Galalegi si srwa; 13chena u nvkvtv Nrsalafe, Gabrnivme si biawv macimi ntvsi dawv, yadagi sqrbiagi ini msi-napi, beci-drmqa sqriv ini Sipulvne chena Niftale : 14wvhsi manvwv’ hini uqrufagi ga-kvlvwi-gi srpwi Visviv inv mrmosigesgatv,
15Hini Sipulvnewi vsisgi, chena ini Niftalewi vsisgi,
Hini msi-napi wvyaci, vlikv ini Jrtane,
U Galalemwv nihki Nvnvhkvwi-laneki,
16Nihki lanvwaki la-mvtvpicki Ir papagicv
U namanrwv mahsrgi wvivhfayrgi,
Chena nihki la-mvtvpicki ini Irwidrmqa macimi nabowi awikvgi,
Nihki si muhgaskv wvivhfayrgi,
iwvpi.
17Hina Irqv uci Jesise vlami nvnvhimiwa, macimi, Mvtveni si tahaku gelvwv; xvga ini wafapvh-kvmigigi ugimrwi-drmqa uwa mrlr-qvhi, isiwa.
18Chena brmfa pvkvci ini Galalewi msi-napi, inv u nawvhi neswi wa-janinrtihi, Svimvn’ Betv yr-lofutv, macimi u janinrli Andloli, bami ini msi-napigi ipvgitvmalici hrqvsqhrkv; xvga nr-nvmafgacki nihki. 19Chena Birku nrwvluskvwiku gelvwv, macimi ilanihi na-nvmafgrlrcki ga shalapwv, u talvhi nihi. 20Chena nih-ki walanv u nvkvdrnrwv nili rqvsqhrkvnv, macimi u nakvlrwrli nihi. 21Chena yoci vlikv hawv, u nawvhi neswi kutvkhi wa-janinrtihi, Jamse, nili u qihfvli Sapade, macimi u janinrli Jrneli, weci u fwrli Sapadeli ini ulvga-lagi, bami cvhtuqanvmuwrci ud rqsqhr-kvnwv; macimi u tah wihkumvhi nihi. 22Chena nihki walanv u nv-kvdrnrwv ini ulvgasi macimi u fwrli, chena u nakvlrwrli nili.
23Chena mafhega Ir Galale brmfa Jesise, kvgahgimiwa betiga u msi-kvmikumwrgi, chena nvnvhimiwa ini ugimrwi-drmqa uci uwasi-biadrcimowa, chena gegahiwa jrivhki yagi kvtunawa, macimi jrivhki yagi vhqilugawa alagenv nihi lanvwahi. 24Macimi ini u ta Irci-makufewa wapfaiv mafhega Ir Silia haiv : macimi nihki u biatvwr-wrli jrivhki ya-vhqilugalici, fvyoginakucki qvqatvgi si kvtunawa-nv macimi vhqilugawanv, la-kusgrkucki wvninahfihi, chena mr-mrtv-kusgrcki, chena na-nagificki; macimi u gegahvhi nihi. 25Chena ntvsi u nakvlrwrli nili mahsi mahsalagiki Galale uci chena Tiga-pulvse, chena Culosalame chena Cudia macimi vlikv ini Jrtane uci.
Currently Selected:
HINI UWASI-BIADRCIMOWA ya-sfadoci MAFIYO 4: SJW
Highlight
Share
Copy
Want to have your highlights saved across all your devices? Sign up or sign in
Published for Thomas Wildcat Alford in 1929
