Juan 1
1
U Upos a Biyag
1Bago u sapul átna dán u Upos. Kaguman nu Upos u Diyos sakay u Upos ay mismo a Diyos. 2Kaguman dán siya nu Diyos sapul pa tu sapul. 3Tu pamamag-itan na ay nalalang u atanan a bagay, sakay awan ti ányaman a nalalang ni awan tu pamamag-itan na. 4Hod nikuna u biyag, sakay u biyag a iye u mangatád ti demlag tu isip nu tolay. 5U demlag ay siya u mangdemlag tu kadiklamman, sakay awan siya matatalo nu kadiklamman. 6Nadid, pinaangay nu Diyos u essa a tolay a u ngahan na ay ti Juan. 7Pinaangay na ti Juan tu tolay hide, para ikagi na nide u ngángngahanan tam a demlag, para maniwala hide nikuna a atanan. 8Bakán a ti Juan u demlag nan immangay la he siya para mángpatunay tungkol tu demlag. 9U tunay a demlag ay ti Jesu-Cristo. Immangay he siya ti munduway para demlagan u isip nu tolay hide.
10Ti Jesus unanggimet ti munduway, pero nikuna immmangay he siya ti munduway, ay awan siya natenggi nu tolay hide. 11Immangay siya tu sadile na a banuwan, pero awan siya tinanggap nu kalugaran na hide. 12Pero u atanan a timmanggap sakay naniwala nikuna ay inatádden na hide ti karapatan a magin anak nu Diyos. 13Nagin anak ngane hide nu Diyos, bakán a tu pamamagitan nu pangpilas a kákkeenak oni tu kagustuwan nu tolay, nan dipo tu kaluuben nu Diyos.
Nagin Tolay u Upos
14Nagin tolay u Upos sakay nákpágyan siya nikitam. Netan me u kapangyariyan na sakay kadakilaan na, bilang kaessa-essa a anak nu Ama. Hod nikuna u págmahal sakay u katapatan, sakay atanan nu kinákkagi na ay tatahoden.
15Nagpatunay ti Juan tungkul nikuna, sakay iye u kinagi na: “Siya u gusto ko a kagiyán, nikuna a kinagi ko, ‘Tehhod a essa a dumemát a sumunud nikán a mas higit nan nikán, dipo baguwák a neenak ay katoy dán siya.’”
16Nadid, dipo mahal na kitam a tahod, kanya nakatanggap kitam a atanan ti sunud-sunud a págpapala. 17Pero inyatád nikitam nu Diyos u Kautusan tu pamamag-itan ni Moises, pero u kagbi sakay u tatahoden ay neatád nikitam tu pamamag-itan ni Jesu-Cristo. 18Maski nikan ay awan palla ti naketa tu Diyos Ama, pero impakilala siya nikitam nu Diyos Anak, u kaessa-essa a Anak a minahal nu Ama.
U Katungkulan ni Juan
(Mateo 3:1-12; Markos 1:1-8; Lukas 3:1-18)
19Nadid ti Juan ay nagbawtismo tu tolay hide ti Bitania. Nagutus u puno nu Judio hide ti Jerusalen tu agum hide a Saserdote sakay Levita, kinagi de a, “Tanungán moy ni siya dán i tagapagligtasay.” 20Awan na inpamen ni ti deya siya. Kinagi na, “Bakán a hikán u Cristo.” 21“Ni konna hod ti deya ka?” Kagi de.
“Hiko beman ti Elias?”
“Bakán a hikán ti Elias,” kagi na.
“Hiko beman u Propeta a áuhayán me?”
Timmábbeg siya, “Bakán.” 22Kinagi de, “Ni konna hod, ti deya ka? Kagiyán mo nikame para makagi me tu nagpaangay he hide nikame. Ánya u makagi mo tungkul tu sadile mo?” 23Timmábbeg ti Juan, “Hikán u tolay a kinagi ni Propeta Isaias tu itod.
Nikuna a kinagi na, ‘Masaneg u pákhaw nu essa a tolay tu parang,’
Kagiyán na, ‘Ayusán moy u lakadán nu Panginoon.’”
24U nángpaangay tu tolay hide a immangay tu kán Juan ay u Pariseo hide. 25Tinanung de a huway ti Juan, “Bakin a magbawtismo ka ni bakán bál a hiko u Cristo oni ti Elias oni u Propeta?” 26Timmábbeg ti Juan, “Hikán ay magbawtismo la ti dinom, pero te essa a hod ti bállog moye a awan moy matengge. 27Siya u kinagi ko a, ‘Dumemát a sumunud nikán, pero awanák karapat dapat maski mangibut tu igut nu sapatus na.’”
28Atananan iye ay nangyare ti Betania, tu dibilew nu dinom ni Jordan a nagbawtismuwan ni Juan.
Ti Jesus u Tupa nu Diyos
29Nadid, tu essa a aldew ay netan ni Juan ti Jesus a paadene nikuna, kanya kinagi na tu tolay hide, “Atoy dán u Tupa nu Diyos a iyalay para mangibut tu kasalanan nu tolay ti munduway! 30Siya u gusto ko a kagiyán nikuna a kinagi ko a, ‘Tehhod a essa a dumemát a sumunud nikán a mas higit nikán, dipo atoy dán siya baguwák a neenak.’ 31Tu dipalongo ay awan ku be siya talaga kilala ni ti deya siya. Pero nadid ay hodák he a magbawtismo tu dinom para ipakilala siya ti Israel.” 32Káttapos ay kinagi ni Juan, “Netan ko u Banal a Ispirito a ummogsad a gábwat ti langet a konna tu essa a kalapate sakay nágyan nikuna. 33Tu itod ay awan ku be siya talaga kilala ni ti deya siya, pero u Diyos a nagutus nikán a magbawtismo ti dinom u nagkagi nikán, ‘Ni ketan mo a umogsad u Banal a Ispirito sakay mágyan tu essa a tolay, i tolayan ina ay magbawtismo ti Banal a Ispirito.’ 34Netan kudán ngane siya a mismo, sakay páppatunayan ko a siya u anak nu Diyos.”
35Nadid, tu sumunud a aldew ay hod a huway di Juan kaguman u duwwa tu tagasunud na hide. 36Nikuna a ketan na ti Jesus a magtaleb ay kinagi na, “Atoy dán u Tupa nu Diyos!” 37Tu pákkasaneg nu duwwa a disepulus tu kinagi ni Juan ay tinagubet de ti Jesus. 38Simmuleg ti Jesus sakay nikuna a ketan na hide a umunonod ay tinanung na hide, “Ánya i kailangan moyay?”
Timmábbeg hide, “Maisto hádya páppágyanan muway?”
39Kinagi nide ni Jesus, “Mákkuyog kam tán ketan moy.”
Kanya nákkuyog u duwwa kaya netan de u páppágyanan na. Magalas kuwatro dán ti itod a apon, kanya hod dán hod hide a nagpalipas ti gibi. 40U essa tu duwwa a nakasaneg tu kinagi ni Juan sakay simmunud ni Jesus ay ti Andres a kapatkákka ni Simon Pedro. 41Kanya tu kadimadimangan ay inehyok a agad ni Andres u kapatkákka na a ti Simon sakay kinagi na nikuna, “Netan me u Mesias.” (U gusto a kagiyán ni iye a upos ay Cristo.) 42Ingkuyog na ti Simon tu kán Jesus. Sakay nikuna a makademát hide tu kán Jesus ay inileng ni Jesus ti Simon sakay kinagi na, “Hiko ti Simon a anak ni Juan, pero sapul nadid ay dulawán ka dán a Cefas.” (U Cefas ay kapareho labe nu ngahan a Pedro, a ugusto na akagiyan ay bito.)
U Pángdulaw ni Jesus di Felipe sakay ti Nataniel
43Nadid, tu sumunud a aldew ay naisip ni Jesus a umangay ti Galilea. Káddemát na hod ay netan na ti Felipe kanya kinagi na nikuna, “Mákkuyog ka nikán.” 44(Ti Felipe ay taga-Betsaida, a konna di Andres sakay ti Pedro.) 45Nadid ay inehyok ni Felipe ti Nataniel sakay kinagi na nikuna, “Netan mi dán u tolay a kinagi ni Moises a insulat na tu Kautusan, sakay konna be tu insulat nu prupeta hide. Siya ay ti Jesus a taga-Nazaret a anak ni Jose.” 46Kinagi nikuna ni Nataniel, “Tehhod beman a maganda a maggábwat ti Nazaret?”
Timmábbeg ti Felipe, “Kadon he ta ilingán mo.”
47Pákketa ni Jesus ni Nataniel a paadene nikuna ay kinagi na, “Saáy u tunay a Israelita, a matapat.” 48Tinanung siya ni Nataniel, “Kodyaák mo a natukuyan?”
Timmábbeg ti Jesus, “Bagu ka a inangay ni Felipe ay netan taka dán a te sidum tu ponan nu kayo a igus.” 49Timmábbeg ti Nataniel, “Maisto, hiko u Anak nu Diyos! Hiko be u hare ti Israel!” 50Kinagi nikuna ni Jesus, “Maniwala ka beman nikán dipo tu kinagi ko a netan taka tu ponan nu kayo a igus? Higit pa he u mapatunayan mo.” 51Sakay kinagi pa ni Jesus nikuna, “Pakatandaan moy: ketan moy u langet a bumukas sakay tulos-tulos u anghel hide a umogsad sakay sumangkay tu páppágyanan nu anak nu tolay.”
Currently Selected:
Juan 1: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
