Juan 10
10
U Talinhaga nu Kulungan nu Tupa
1Nadid ay nagupos ti Jesus tu pamamagitan nu talinhaga. Kinagi na, “Kagiyan ko nikam u tatahoden, u sumáddáp tu kulungan nu tupa hide a awan maglakad tu pintuwan nan umunek tu kudal ay mágtakaw sakay mágbabono. 2Pero u maglakad tu pintuwan ay u pastol nu tupa hide. 3Pasáddáppán siya nu mágbantay tu pintuwan, sakay tukoy nu tupa hide u boses na. Dulawan na hide tu bawat ngahan de sakay iluwas na hide tu kulungan de. 4Ni meluwas na dán u tupa na hide ay mágdipalongo siya nide sakay umusoseg be u tupa hide dipo tukoy de u boses na. 5Pero u iba a tolay ay awan de sunudán nan adeyuwan dipa iye, dipo awan de tukoy u boses na.”
6Kinagi ni Jesus i talinghagaan iye tu tolay hide, pero awan de naintendiyan u gusto na a kagiyán.
Ti Jesus u Mabait a Pastol
7Kanya nagupos a huway ti Jesus nide, “Kagiyan ko nikam u tatahoden, hikán u pintuwan a lállakadán nu tupa hide. 8U nedipalongo hide nikán a tagapagtoldu ay u kapareho de ay mágtakaw sakay mágbabono. Pero awan hide sinaneg nu tupa ko hide. 9Hikán u pintuwan. U deyaman a sumáddáp tu pamamag-itan ko ay maligtas. Magin kapareho siya nu tupa a malaya a makasáddáp sakay makaluwas tu kulungan, sakay atádden ko siya ti makan na. 10Dumemát u mágtakaw para magtakaw, mamuno sakay mangsida. Pero dimmemátták para magkahod u tolay hide ti biyag a masagana sakay malaya.
11Hikán u mabait sakay matapat a mággalaga a pastol #10:11 U pastol tu panahun ni Jesus ay u mángngatád tu kailangan nu tupa na hide sakay mángprotekta nide tu mágkatapang a hayup aldew ay ti gibi. Sakay bakán la itod nan tukoy-tukoy na be u tupa na hide. Ni dulawan na hide ay umadene hide nikuna. U mabait sakay matapat a mággalaga ti tupa ay handa na a iyatád u biyag na para tu tupa hide. 12Pero u áupaan, ni ketan na u matapang a aso ay ginanan na hide. Kanya duklusán na u tupa hide sakay mamágkawatak-watak u tupa hide. 13Lakaden na u tupa hide dipo áupaan la, kanya awan ti malasakit tu tupa hide. 14Hikán u mabait sakay matapat a pastol. Tukoy-tukuyák nu tupa ko hide. Sakay tukoy-tukuyák di be. 15A konna bihod u Ama ko tukoy-tukuyák na sakay tukoy-tukoy ko be siya. Handa ko a iyalay u biyag ko para tu tupa hide. 16Tehhodák palla a agum a tupa a awan ti kudaláy. Kailangan ko be hide a pasaddapan sakay sanigan de u boses ko. Tu konna hod ay magin essa dan hide a gurupo sakay te essa hide a pastol.
17Mahalák nu Ama, dipo inyatád ko u biyag ko para nide, sakay káttapos ni iye ay mabiyagák a huway. 18Awan ti makaalap tu biyag ko, ni awan inkusa ko iye a inyatád. Tehhodák a karapatan a iyatád iye, sakay alapán iye a huway. Iye u inyutus nikán nama ko.”
19Dipo ti kinagiyan iye ni Jesus ay nagkahod dámman ti págtalo-talo u Judio hide. 20Makpal nide u nagkagi, “Magaheng siya sakay sináddáp ni madukás a ispirito. Bakin moy siya sássanigán?” 21Pero kinagi be nu agum, “Awan makapagupos ti konna hina u sináddáp ni madukás a ispirito. Makapagpapiyya beman u sináddáp ni madukás a ispirito?”
Umádden nu Judio hide ti Jesus
22Nadid ay odas dán nu kasayaan ti Jerusalem a paggala-ala de tu Templo. Ti panahunay a itod ay sákdágnen. 23Ummangay ti Jesus tu templo sakay naglakad tu parte a ni dulawán ay Balkon ni Solomon. 24U Judio hide ay naipun tu palebut na sakay kinagi de nikuna, “Hanggan nikasangan mo a itagu nikame ni ti deya ka a talaga? Ni hiko beman u Cristo, kagiyán mu dán nikame ti tapatan.” 25Timmábbeg ti Jesus nide, “Kinagi ku dán nikam, pero umád moy be a maniwala. U ginággimet ko a makataka-taka tu ngahan nu Ama ko u mangpatunay tungkul nikán. 26Pero umád moy a maniwala nikán, dipo awan kam kasale tu tupa ko hide. 27Mágsaneg nikán u tupa ko hide. Tukoy ko hide sakay sumunud hide nikán. 28Atádden ko hide ti biyag a awan ti kahád, sakay awan hide mepahamak. Awan ti makaagew nide tu kamát ko. 29Inyatád hide nikán nu Ama a makapangyariyan tu atanan. Awan ti makaagew nide tu kamát nu Ama ko. 30Hikán sakay u Ama ay eessa kame.”
31Nikuna a masaneg iye nu Judio hide ay huway hide a nangkáppot ti bito para batikalán de siya. 32Pero kinagi nide ni Jesus, “Impeta ko nikam u makpal a mágkaganda a gimet a impagimet nikán nu Ama. Hádya ti iye hide u dahilan para batikalánnák moy?” 33Timmábbeg hide, “Bakán a dipo tu mágkaganda mo a gimet kanya mi ka a batikalán, nan dipo tu páglapastangan mo tu Diyos. Dipo kinagi mo a hiko ay Diyos a tolay ka labe.” 34Timmábbeg ti Jesus, “Awan beman nakasulat tu Kautusan a kinagi nu Diyos a, ‘Kinagi ko, hikam ay Diyos’? 35Sakay awan tam dapat a bali awanán u Kautusan. Kanya ni dinulaw na a ‘diyos’ U inatádden na hide ti mensahe, 36bakin moy a kagiyán a lapastanganán ko u Diyos dipo tu kinagi ko a hikán ay Anak nu Diyos? Piniliyák nu Ama sakay pinaangayák na he ti munduwáy. 37Ni awan ko gimitán u ipagimet nu Ama, diyan kam maniwala nikán. 38Pero ni ginimet ko u ipagimet hide nu Ama ko, maski ni umád moy a maniwala nikán, maniwala kam tu ginimet ko hide para maintendiyan moy a u Ama ay katoy nikán sakay hikán be ay katoy tu Ama.”
39Nadid, u te tungkulin hide a Judio, pákkasaneg de ti itod ay laan di dámman siya a dakáppán, pero awan ta nakalakad siya.
40Nagsole ti Jesus tu dibilew nu dinom ti Jordan, tu lugar a pinagbawtismuwan tu itod ni Juan. Nágyan hod siya, 41sakay makpal a tolay u immangay hod nikuna. Kinagi de, “Maski ni pumensan ay awan naggimet ti makataka-taka ti Juan, pero atanan nu kinagi na tungkul ti tolayan iye ay tatahoden.” 42Kaya makpal u naniwala ni Jesus.
Currently Selected:
Juan 10: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
