Juan 13

Inugisan ni Jesus u Tika-tikád nu Disepulus na hide

1Nadid ay dispiras dán nu kasayaan nu pággala-ala tu Págtaleb nu Anghel, tukoy dán ni Jesus a odas na dán a lumakad ti munduway dipo soli dán ti langet tu Ama na. Mahal na a tahod u disepulus na hide ti munduwáy, kanya hanggan tu katapusan ay impeta na nide ni sakodya na hide a kamahal.

2Ti gibiyan itod ay nangapon di Jesus sakay tu disepulus na hide. Nemula dán ni Satanas tu isip ni Judas Iscariote a anak ni Simon a itokyon na ti Jesus. 3Tukoy ni Jesus a inyatád dán nikuna nu Ama u atanan a kapangyariyan. Sakay tukoy na be a gábwat siya tu Diyos sakay sole siya tu Diyos. 4Timmaknág ti Jesus mentaras a kuman hide sakay ineklas na u pangluwas na a badu sakay nagkaen ti tuwalya. 5Káttapos ay nángbulak siya ti dinom tu essa a palanggana, sakay nagsapul siya a naguges tu tikád nu disepulus na hide, sakay pinahidan na tu tuwalya a nagkaen na. 6Tu káadene ni Jesus tu kán Simon Pedro ay kinagi nikuna ni Simon, “Panginoon, bakin hiko pa i magugisay ti tika-tikád kuwáy?” 7Timmábbeg ti Jesus nikuna, “Awan mo naintendiyan i gimitán kuwáy nadid, pero maintendiyan mu labe ina tu dimodyan.” 8Kinagi ni Pedro nikuna, “Umád ko! Awan maare a hiko i maguges ti tikád kuwáy hide.” Timmábbeg ti Jesus, “Ni umád mo a ugisan taka ay awan ka dán mebilang a disepulus ko.” 9Kanya kinagi ni Pedro, “Ni konna hod, Panginoon ay bakán la i tikád kuwáy i ugisan muway nan pate dán i kamát kuwáy hide sakay ulo kuwáy!” 10Kinagi ni Jesus nikuna, “U nágdigus dán ay malinis dán u buo na a bágge, maliban dálla tu tikád na hide. Dipo malinis dán u buo na a bággi. Malinis kamon, pero bakán a atanan.” 11Kinagi ni Jesus a awan hide atanan ay malinis dipo tukoy na ni ti deya u mángtokyon nikuna.

12Nikuna a maugisan dán ni Jesus u tika-tikád de ay huway na a insulot u damit na sakay nagsole tu puwesto na. Káttapos ay tinanung na hide, “Naintendiyan moy beman u ginimet ko nikam? 13Dáddulawánák moy a Maisto, sakay Panginoon, tama kam dipo ina u tatahoden. 14Ni hikán a Maisto moy sakay Panginoon moy, ay naguges tu tika-tikád moy, dapat ay konna bi hod u gimitán moy tu bawat essa. 15Impeta ko nikam u halimbawa a dapat moy a ahigán kanya gimitán moy iye tu kaguman moy hide. 16Kagiyan ko nikam u tatahoden: Awan ti alipin a mas higit tu amo na sakay awan be ti alipin a mas higit tu nagutus nikuna. 17Ta tukoy moy dán iye hide a bagay ay pagpalaan kam nu Diyos ni iye u gimitán moy.

18Awan ko makagi iye para nikam a atanan, dipo tukoy ko u pinile ko hide pero kailangan a matupad u kinagi tu Kasulatan a, ‘Intokyunák nu tolay a páppakanán ko.’ 19Kagiyán ku dán iye nikam nadid bagu a mangyare, para ni mangyare dán iye ay maniwala kam a hikán ngane u Cristo. 20Kagiyan ko nikam u tatahoden: U mangtanggap tu tolay hide a inutusan ko ay timmanggap nikán, sakay u mangtanggap nikán ay mangtanggap tu nángpaangay he nikán.”

Kinagi ni Jesus a te Mángtokyon Nikuna

(Mateo 26:20-25; Markos 14:17-21; Lukas 22:21-23)

21Tu pákkakagi he ni Jesus ay nabalisa siya, “Kagiyan ko nikam u tatahoden: U essa nikam u mángtokyon nikán.” 22Nagilingan u disepulus na hide, sakay naguluwan hide ni ti deya u gusto na a kagiyán. 23Ti itod be ay kadatig ni Jesus u pinakamamahal na a disepulus. 24Kanya sininyasan siya ni Simon Pedro a tanungán ti Jesus ni ti deya u gusto na he a kagiyán. 25Kanya mentaras a kasadát na ti Jesus ay tinanung na siya, “Panginoon, ti deya u kákkagiyán mo?” 26Timmábbeg ti Jesus, “U atádden ko ti tinapay, káttapos ko a ilábláb ay siya itod.” Kanya nangalap ti Jesus ti tinapay sakay pángllábláb na ay inyatád na ni Judas a anak ni Simon Iscariote. 27Nikuna naalap dán ni Judas u tinapay ay simmáddáp nikuna ti Satanas. Kinagi ni Jesus nikuna, “Gimitán mu dán a agad u gimitán mo.” 28Awan naitendiyan nu agum a disepulus ni Jesus ni bakin kinagi na itod ni Judas. 29U akala nu agum ay inutusan la siya ni Jesus a mamale tu kailangan de tu kasayaan oni mangatád ti limus tu mágkahirap hide, dipo siya u mágsaddi tu pilak de. 30Tu kákkan ni Judas tu tinapay ay pagdaka siya a limmakad ti gibiyan itod.

U Bigu a Utus

31Nadid, nikuna a makalakad ti Judas, kinagi ni Jesus, “Hikán a Anak nu tolay ay odas dán a iyatád nikán nu Diyos u karangalan ko. Sakay mehayag dám be u karangalan nu Diyos dipo tu ginimet ko. 32Ni mehayag u karangalan nu Diyos dipo nikán ay ihayag be a pagdaka nu Diyos u karangalan tu Anak sakay gimitán na itod a pagdaka.” 33Kinagi pa ni Jesus, “Anak ko hide, sabaditák moy dálla a odas a makaguman. Ehyukánnák moy, pero konna tu kinagi ko tu pinuno nu Judio hide, awan kam makaangay tu angayan ko. 34Kanya essa a bigu a utus u iyatád ko nikam. Magmahalan kam, ni kodya takam a minahal ay konna bi hod u dapat moy a gimitán a págmahal tu bawat essa. 35Ni magmahalan kam ay matukuyan nu atanan a tolay a disepulus takam.”

36Nagtanung ti Simon Pedro ni Jesus, “Panginoon, hádya ka a angay?” Timmábbeg ti Jesus, “Nadid ay awan ka palla makaangay tu angayan ko, pero tumagubet ka be tu dimodyan a aldew.” 37Nagtanung pa ti Pedro, “Panginoon, bakin a awanák maare a mákkuyog niko nadid? Handaák la be a matay para niko.” 38Timmábbeg ti Jesus, “Talaga beman a handa ka a matay para nikán? U tatahoden, bagu a magtarakket u tandang a manok ay tállowák mo a beses a ipamen a awanák mo tukoy.”

Currently Selected:

Juan 13: MBJC

Highlight

Copy