Juan 18
18
U Pángdakáp de ni Jesus
(Mateo 26:47-56; Markos 14:43-50; Lukas 22:47-53)
1Nadid, tu káttapos ni Jesus a magdasal ay immangay hide ay tu disepulus na hide ti Kidron. Sakay immangay hide tu lugar a makpal a kayo a olibu. 2Ti Judas a mángtokyon ni Jesus ay tukoy na i lugaran itod, dipo pirme hod a maipun di Jesus sakay u disepulus na hide. 3Kanya immangay hod ti Judas, kaguman na u makpal a sundalo a Romano sakay u guwardiya hide tu templo#18:3 Templo: Eessa la u Templo sakay ketan la iye ti Jerusalem. Iye ay tunay ti kadakál a bilay a gimet ti bito, hod a magalay, maghandug sakay magdasal u Judio hide. a pinaangay hod nu puno nu Saserdote hide sakay Pariseo. Tehhod hide a tawed a simbuwan sakay te mga armas hide. 4Tukoy ni Jesus u atanan a mangyare nikuna, kanya tinagbu na hide sakay tinanung, “Ti deya ehyukán moyay?” 5Timmábbeg hide, “Ti Jesus a taga-Nazaret”
Kinagi ni Jesus nide, “Hikán itod.”
U mángtokyon ni Jesus a ti Judas ay kaguman hod.
6Nikuna a kagiyán ni Jesus a siya u ehyukán de ay neatras hide sakay natumba tu luta. 7Kanya nagtanung a huway ti Jesus, “Ti deya u ehyukán moy?”
Timmábbeg hide a huway, “Ti Jesus a taga-Nazaret.”
8Kinagi nide ni Jesus, “Awan beman kinagi ku dán nikam a hikán itod? Ni hikán ngane u ehyukán moy ay pakultaden moy dán a lumakad i kakagumanan kuwe hide.” 9Kinagi itod ni Jesus, tán matupad u dasal na, “Ama awan ti maski essa a nepahamak tu inyatád mo nikán,” 10Binagut ni Simon Pedro u áttak na, sakay tinegpas na u alipin nu pinakapuno nu Saserdote hide. Nahipang u kawanan a talinga nu utusan a u ngahan na ay Malco. 11Kinagi ni Jesus ni Pedro, “Isahungan mo i áttak muwe. Tu ileng mu beman ay awan ko tiisán u pághirap a iyatad nikán nu Ama?”
12Kanya dinakáp nu sundalo hide a Romano ti Jesus, pinagdipalonguwan hide nu kapitan de, kaguman u guwardiya hide a Judio sakay pinungo de siya. 13Inyangay de siya tu kán Anas a katugngan ni Caifas. Ti Caifas u pinakapuno nu Saserdote hide ti itod a taon. 14Siya u nagpayo tu puno nu Judio hide a mas maganda a essa la u matay a tolay kasera mepahamak u buo a bansa.
Inpamen ni Pedro ti Jesus
(Mateo 26:69-70; Markos 14:66-68; Lukas 22:55-57)
15Ti Pedro ay immunonod ni Jesus, kaguman na u essa a disepulus. Sakay tukoy nu disepulus u pinakapuno a Saserdote kaya nakasáddáp siya tu kudal a kaguman ni Jesus. 16Pero ti Pedro ay nagwahak a te taknág tu pintuwan nu kudal. U disepulus a kilala nu pinakapuno a Saserdote ay simmole tu luwas sakay nákpágguhon tu bábbey a mágbantay tu pintuwan sakay pinasáddáp na ti Pedro. 17Kinagi nu bábbey ni Pedro, “Awan beman essa ka tu disepulus ni tolayan ina?”
Timmábbeg ti Pedro, “Awan!”
18Nadid, ti itod a gibi ay madágnen, kanya mágtaknág tu lebut nu apoy u utusan hide sakay u guwardiya hide para magendu, maski ti Pedro ay nákhalo bi hod nide para mákpagendu.
Tinanung de ti Jesus tu Áatubangán nu Pinakapuno a Saserdote
(Mateo 26:59-66; Markos 14:55-64; Lukas 22:66-71)
19Tu disalad ay tinanung nu pinakapuno nu Saserdote hide ti Jesus, tungkul tu disepulus na hide sakay tu itáttoldu na hide. 20Timmábbeg ti Jesus, “Bulgaranák a magupos tu tolay hide. Pirmiyák a magtoldu tu Sinagoga hide, #18:20 U sinagoga ay págsambaan nu Judio hide sakay pággipun-ipunan.oni tu templo, ni hádya a magipun ipun u atanan a Judio hide. Awanák nagtoldu ti lihim. 21Bakinák moy a tanungán nadid? U dapat moy a tanungán ay u nakasaneg hide nikán, tukoy de ni ánya u kinákkagi ko.” 22Nikuna a makagi iye ni Jesus ay dinapang siya nu essa a guwardiya a adene nikuna. Kinagi nu guwardiya, “Bakin a konna ka hina a tumábbeg ti pinakapunuwe ni Saserdote?” 23Tinábbeg siya ni Jesus, “Ni te madukássák a kinagi, patunayan mo iye. Pero ni tatahoden u kinagi ko, bakinák mo a dinapang?”
24Ti Jesus mentaras a nakapungo ay impeangay ni Anas tu kán Caifas, u pinakapuno a Saserdote.
25Nadid, nikuna a mágtaknág ti Simon Pedro a adene tu apoy a magendu. Tinanung siya nadid nu katoy hod hide, “Awan beman essa ka be tu disepulus na hide?” Impamen iye ni Pedro, “Awan.” 26Tinanung be siya nu essa tu utusan nu pinakapuno a Saserdote, a panganakán nu hinipangan na ti talinga, “Awan beman netan taka a kaguman na hod tu lugar a makpal a ponan nu Olibu?” 27Pero impamen dámman itod ni Pedro, sakay ti itod bi la ay nagtarakket u tandang a manok.
Inyangay de ti Jesus tu kán Pilato
28Gábwat tu kán Caifas ay inyangay de ti Jesus tu páppágyanan nu gubernador. Magamulaldew dán ti itod. Awan simmáddáp u Judio hide tu páppágyanan nu gubernador dipo ayun tu Kautusan de, u sumáddáp tu bilay nu essa a bakán a Judio ay mebilang a madangat kanya awan maare a kuman. Tu pangapon tu pággala-ala tu kasayaan tu Págtaleb nu Anghel. 29Kanya ti Pilato a gubernador ay limmuwas sakay kinagi na, “Ánya i mebintang moyay ti tolayan iye?” 30Timmábbeg hide, “Ni awan siya naggimet ti madukás ay awan mi he siya inyangay.” 31Kinagi ni Pilato nide, “Hatulan moy dán siya tu sadile moy a Kautusan.” Timmábbeg u puno nu Judio hide, “Pero awan kame ti kapangyariyan a humatul ti kamatayan maskin ti deya.” 32Nangyari iye para matupad u kinagi ni Jesus, tungkul tu kákkatay na a danasán na. 33Huway a simmáddáp ti Pilato tu palasyo na sakay impadulaw na ti Jesus, sakay tinanung na, “Hiko beman u hare nu Judio hide?” 34Timmábbeg ti Jesus, “Hiko beman ginábwatanay ni ina a tanung oni tehhod la a nagkagi niko tungkul nikán?” 35Timmábbeg ti Pilato, “Judiowák beman? Inyangay ka he nikán nu kabanuwan mo hide sakay tu puno nu Saserdote hide. Ánya beman ginimet muway?” 36Kinagi ni Jesus nikuna, “U kahariyan ko ay bakán a he ti munduway. Ni katoy he u kahariyan ko ay u alagad ko hide ay mákpaglaban para awanák madakáp nu Judio hide. Pero bakán a he u kahariyan ko.” 37Kinagi ni Pilato, “Ni konna hod ay essa ka a hare?” Timmábbeg ti Jesus, “Tama u kinagi mo a hariyák. Sakay ina u dahilan ni bakin a neenakák sakay immangay he ti munduwáy ay para ibaheta u tatahoden. U atanan a makatukoy tu tatahoden ay mágsaneg nikán.” 38Tinanung siya ni Pilato, “Ánya beman u tatahoden?”
Gusto de a Bunuwán ti Jesus
(Mateo 27:15-31; Markos 15:16-20; Lukas 23:13-25)
Tu pákkakagi he ni Pilato ay limmuwas siya sakay kinagi na tu Judio hide, “Awanak ti ketan a kasalanan ni tolayan iye. 39Pero ayun tu kaugaliyan moy ay dapaták a magpalaya ti essa a pireso kada Kasayaan nu Pággala-ala nu Págtaleb nu Anghel. Kanya gusto moy beman a palayaan ko u Hare nu Judio hide?” 40Pimmákhaw u tolay hide, “Bakán a siya nan ti Barabas!” (Ti Barabas ay essa a tulisan.)
Currently Selected:
Juan 18: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
