Lukas 2

U Kákkeenak ni Jesus

(Mateo 1:18-25)

1Nadid, ti panahunan itod ay nagutus ti Agusto a Emperador ti Roma a dapat a magparihistro u atanan a tolay a nasakupan na. 2Iye u kadipalonguwan a págparehistro nikuna a ti Cirenio palla u gubernador ti Siria. 3Kanya u atanan a tolay ay nagsole tu sadile de a banuwan para magparihistro.

4Kanya ti Jose a mágyan ti Nazaret a banuwan ni Galilea ay immangay ti Judea, ti Betlehem u banuwan a neenakan ni hare a David, dipo gábwat siya tu lahe ni David. 5Kaguman ni Jose ti Maria a magin kabanga na a angay magparihistro. Nadid ti itod be a bulan ay taráeenakan dán. 6Mentaras katoy hide ti Betlehem ay dinemát dán nu pággenak ti Maria. 7Inyenak na u panganay na a anak a lállake. Binalutan na ti lampen u anak sakay pinakatdug na tu bahahungan, dipo awan dán hide ti tulusan dipo putat dán u págkaseruwan hide a bilay.

Pimmeta u Anghel hide tu Pastol hide

8Nadid ti lugaran itod ay tehhod a mággalaga ti tupa a katoy tu parang a magdamag a magbantay tu tupa de hide. 9Bigla a timmaknág u essa a anghel nu Panginoon tu atubang de, kanya nagdemlag u palebut de tu demlag nu Panginoon. Kanya grabi u ánteng de. 10Pero kinagi nu anghel nide, “Dyan kam manteng! Dipo tehhodák a maganda a baheta para nikam. Mangatád iye ti dakál a kasayaan tu atanan a tolay. 11Dipo neenak nadid a aldew ti Betlehem tu banuwan ni David u Tagapagligtas, u Cristo a Panginoon. 12Iye u tanda para matengge moy siya: tehhod kam a ketan a anak a nabalutan ti lampen sakay kekatdug tu bahahungan.”

13Káttapos nu anghel a magupos ay bigla dálla a lummitaw u grabi't kakpal a anghel a gabwat ti langet a magkansiyon ti págpure tu Diyos.

14“Puriyán u Diyos a katoy ti langet,

Sakay tehhod dán a kapayapaan tu tolay hide a kinasayaan na a katoy ti lutaáy!”

15Nikuna makalakad dán u kaanghelan a tamo ti langet ay namágguhon u mággalaga hide ti tupa, “Kadtamon ti Betlehem! Angay tam ilingan u inbaheta nikitam nu anghel nu Panginoon.” 16Pagdaka hide a immangay ti Betlehem, káddemát di hod ay netan de di Maria ay ti Jose sakay u anak a kekatdug tu bahahungan. 17Pákketa de nikuna ay inyistorya de di Jose u kinagi nu anghel tungkul tu anak; 18kaya nagtaka u atanan nu nakasaneg tu inbaheta nu mággalaga hide ti tupa. 19Pero tináttandaan ni Maria u atanan a nasaneg na sakay pinagisipan na ti mapiyya iye hide a bagay. 20Nagsole tu parang u mággalaga hide ti tupa a makán puriyán tu kadakilaan nu Diyos dipo tu atanan a nasaneg sakay netan de, dipo natupad u inbaheta nu anghel hide nide.

Nginahanan ti Jesus

21Nadid nikuna a walo dán a aldew u anak ay tinure di dán siya sakay nginahanan de a Jesus. Iye u ngahan a kinagi nu anghel bagu siya a inlihe ni Maria.

Inyangay de ti Jesus tu Templo

22Nikuna dummemát dán u aldew a pangtupad di Jose ay ti Maria tu Kautusan ni Moises a páglinis ay immangay hide tu Templo ti Jerusalem. Kaguman de u anak tánni mealay tu Panginoon. 23Dipo sigun tu sumássulat tu Kautusan nu Diyos, “U atanan a panganay a lállake ay kailangan a mealay tu Panginoon.” 24Sakay náng-alay bi hide sigun tu kinagi nu Kautusan nu Panginoon. U maare a iyalay ay duwwa a kalapate oni duwwa tu iba a kalase ni manok.

25Nadid, tehhod a essa a lállake a magyan ti Jerusalem a Simeon u ngahan na. Malinis siya a tolay sakay te ánteng tu Diyos sakay u Banal a Ispirito ay katoy nikuna. Makán uhayán siya ni nikán a dumemát u Cristo a mángligtas tu lahe ni Israel. 26Inhayag dán nikuna nu Banal a Ispirito a awan siya matay mentaras a awan na ketan u Cristo a inpananto nu Panginoon. 27Ti itod be a aldew ay inggiya siya nu Banal a Ispirito a angay tu Templo. Nikuna iyangay dán hod ni Jose sakay ti Maria ti Jesus para iyalay tu Panginoon a sigun tu Kautusan ay netan ni Simeon u anak. 28Kinálkál na u anak sakay nagpure siya tu Diyos. Kinagi na,

29“Nadid Panginoon, alapán mu dán ti mapayapa i tagapagserbi muwáy,

dipo natupad dán u inpananto mo nikán.

30Netan ko dán a mismo u inyatád mo a Tagapagligtas,

31a inhanda mo para makilala nu atanan a tolay:

32siya u mangdemlag tu Hentil hide,

sakay siya be u mangatád ti karangalan tu pinile mo a lahe ni Israel.”

33Kanya nagtaka u ama sakay u ina ni Jesus dipo tu kinagi ni Simeon tungkul nikuna. 34Inaged ni Simeon a pagpalaán hide nu Diyos sakay kinagi na ni Maria, “Sanigán mo i kagiyán kuwáy, anakan iye ay pinile nu Diyos. Tu pamamag-itan na ay makpál u maligtas sakay makpal be u mahatulan tu lahe hide ni Israel. Siya u tanda a gábwat tu Diyos pero makpál be nikuna u mangkontara, 35para mehayag u áisipán de. Sakay hiko a mismo ay demáttan ni grabi a kalungkutan a kumán a sundang a indágkal ti puso muwe.”

36Katoy be tu Templo u essa a prupeta a bábbey, u ngahan na ay ti Ana a anak ni Fanuel a gábwat tu lahe ni Aser. Bakás dán siya a tahod. Pitto la hide a taon a nagagum ay tu kabanga na, 37sakay nadid ay walo a pulo ay ti áppat dán a taon a nabilo. Lagi siya tu Templo aldew ay ti gibi a mágpapuriyán tu Diyos tu pamamag-itan nu págkakulasyon sakay pakándasal. 38Ti odas biyan itod ay immadene be ti Ana tu kád Jose ay ti Maria, sakay nagpasalamat tu Diyos. Nagupos be siya tungkul ni Jesus tu maguhay hide tu págligtas nu Diyos tu lahe ni Israel.

Nagsole ti Jose sakay ti Maria ti Nazaret

39Nikuna natupad dán di Jose ay ti Maria u atanan a bagay tu Kautusan nu Panginoon ay nagsole dán hide tu banuwan a Nazaret a Galilea. 40Dimmakál u anak a mabegsak, malalake sakay kinasayaan nu Diyos.

Ti Jesus Sakay u Maisto hide tu Templo

41Nadid, kada taon ay angay mákpamiyesta u dáddakál hide ni Jesus ti Jerusalem tu Pággalaala tu Págtaleb nu anghel. 42Nikuna sapulo ay ti duwwa dán siya a taon ay ummangay dámman hide ti Jerusalem para mákpamiyesta, sigun tu kaugaliyan de. 43Káttapos nu piyesta ay naghektat dán hide a sole. Nagwahak ti Jesus ti Jerusalem a awan namalayan nu dáddakál na hide. 44Tu buong akala nu dáddakál na hide ay kaguman dila siya kanya dire-diretso la hide tu lakad de tu saldew. Nikuna matukuyan nu dáddakál na a awan siya kaguman ay inehyok de tu kákkapátkákka de sakay tu matengge de hide a tolay, pero 45awan de netan ti Jesus. Kanya nagsole hide ti Jerusalem para hed di hod a ehyukán ti Jesus. 46Káttapos nu tállo a aldew ay netan de ti Jesus tu Templo a mákpággetnod tu kamaistuwan nu Kautusan a mágsaneg sakay makán tanungan nide. 47Nagtaka u atanan a nakasaneg tu katalinuwan na a magtábbeg. 48Nikuna ketan siya nu dáddakál na ay nagtaka be hide. Kinagi nena na, “Anin, anak ko, bakin a kinonna mo kami he? Grabi u balisa me ay tama mo a makán ehyukán niko.” 49Timmábbeg ti Jesus, “Bakin ehyukánnák moy? Awan moy beman tukoy a dapat hedák tu bilay nama ko?” 50Pero awan de naintendiyan u tatahoden a kahulugan nu kinagi na.

51Káttapos ay nákkuyog dán ti Jesus tu dáddakál na hide a pasole ti Nazaret, sakay nagin masássunudán siya nide. Pinakatandaan nu ina na u atanan a bagay a nangyare. 52Mágdaka-dakál ti Jesus a malalake sakay lalo pa a kinasayaan nu Diyos sakay nu tolay hide.

Currently Selected:

Lukas 2: MBJC

Highlight

Copy