Mateo 23

Magingat tu Maisto nu Kautusan sakay tu Pariseo Hide

(Markos 12:38-39; Lukas 11:43, 46; 20:45-46)

1Nadid káttapos ay kinagi ni Jesus tu tolay hide sakay tu disepulus na hide, 2“U maisto hide nu Kautusan ni Moises sakay u Pariseo hide u tinenggi a tagapaliwanag nu Kautusan 3Kaya gimetan moy u itáttoldo de sakay sunudán moy u inyutos de. Pero dyan moy ahigán u gimet de dipo awan de gimetán u itáttoldo de. 4Naghanda hide ti madágge a karga sakay pinabaklay de tu tolay hide pero maski ni toldo man ay umád de iyahikad para tumulong. 5Puro a pagpakunware u gimet de hide. Pinalabang de u págdattonan de ti bersikulo#23:5 Pilakterya: U pilakterya ay babadit a pitaka a te lasán a bersikolo a gábwat tu Dati a Tipan. U bersikolo hide ay Exodus 13:1-13, 11-16; Deut. 6:4-9; 11:13-21. Ginimet de iye dipo tu págsunod tu Deut. 6:8 sakay 11:18. de sakay pinaatakdug de u garayan nu damit de hide para mapansin hide nu tolay a mágserbi hide tu Diyos. 6U gugusto di ay hide u paetnudán tu págetnudan a para tu mataas a tolay tu handaan sakay u pinakanimportante a lugar tu sinagoga hide. 7U gusto di pa ay igalang hide tu kakarsada sakay dulawan hide a maisto nu tolay hide. 8Pero hikam ay dyan kam padulaw a maisto dipo essa la u Maisto moy sakay hikam a atanan ay matkaka. 9Sakay dyan moy dulawan a ama u deya man a tolay tu luta dipo essa la u Ama moy, u Ama a atoy ti langit. 10Dyan kam padulaw a amo dipo essa la u amo moy, u Mesias. 11U pinakamataas nikam ay dapat u magin utusan moy. 12U nagpakataas ay medibbe sakay u nagpakababa ay melangkaw.”

Pinagkagiyan ni Jesus U Maisto Hide Nu Kautusan sakay U Pariseo Hide

(Markos 12:40; Lukas 11:39-42, 44, 52; 20:47)

13Nadid pinagkagiyan ni Jesus u maisto hide nu Kautusan ni Moises sakay u Pariseo hide, “Kakagbi kam! Mapagkunware kam! Hadlangán moy u tolay hide para awan hide mapaghariyán nu Diyos. Umád moy a magpasakop tu pághare nu Diyos ay hadlangan moy pa u masoh a magpasakop! 14Kakagbi kam sakay mapagkunware kam! Inalap moy u ariarian nu bábbey a bilo sakay u págdasal moy ay pinaatakdug moy para awan de mahalata u págkunware moy! Dipo tu gimet moy a iye ay lalo pa a dumagge u parusa moy!

15Kakagbi kam a talaga, maisto hide nu Kautusan ni Moises sakay Pariseo hide! Mapagkunware kam! Ahabisan moy u diget sakay angayan u iba a bansa, makaakit kam la ti essa a awan maniwala tu relihiyon moy. Sakay ni maakit moy dán ay ginimet moy pa a mas madukás nan nikam. Kanya nagin doble u dahilan para siya ay parusaan ti impiyerno.

16Kakagbi kam, buhák a tagagiyya! Itáttoldo moy a ni manumpa ka tu ngahan nu Templo ay maari mo a awan tupadán u panantu mo. Pero ni manumpa ka tu ginto nu Templo ay dapat mo a tupadán u panantu mo. 17Loko kam a buhák! Awan kam talaga ti tukoy! Anya u mas mahalaga, u ginto oni u Templo a nángpalinis tu ginto? 18Kagiyan moy pa be a ni ti deya man u manumpa tu págalayan ay maari a awan tupadán u panantu na. Pero ni manumpa ka tu alay a atoy tu pággalayan, dapat mo a tupadán u panantu mo. 19Awan moy talaga naintendiyán! Anya beman u mas mahalaga, u alay oni u pággalayan a nángpalinis tu alay? 20Kaya ni nanumpa ka tu págalayan ay bilang nanumpa ka dán be tu atanan nu alay a hod hod. 21Ni nanumpa ka tu ngahan nu Templo ay bilang nanumpa ka dán be tu ngahan nu Diyos a mágyan hod. 22Sakay ni ipinanumpa ni ti deya man u langit, ipinanumpa na u págyanan nu Diyos sakay u Diyos a mismo.

23Kakagbi kam, maisto hide nu Kautusan ni Moises sakay Pariseo hide! Mapagkunware kam! Inyatád moy u ikapo maski u págrekado a awan ti halaga pero kinalimunan moy a igimet u mas lalo a mahalaga a adal tu Kautusan: Hikam ay magin pantay tu atanan a bagay, u magin makakagbiyan sakay u katapatan. Tama ngane a mag-ikapo kam pero dyan moy be kalimunan a gimetan u mas mahalaga tu Kautusan. 24Buhák kam a tagagiyya! Ibut moy u langaw tu ainuman moy pero itallán moy u maski u dakal a hayop konna tu kamelyo!

25Kakagbi kam, maisto hide nu Kautusan ni Moises sakay Pariseo hide! Mapagkunware kam! Lalinisán moy u luwas nu tasa sakay nu penggan moy pero u disalad nu puso moy ay putat ti daya, dámmot sakay págsamantala. 26Buhák kam Pariseo hide! Linisán moy pa u atoy disalad nu tasa sakay nu penggan moy sakay magin malinis labe u luwas!

27Kakagbi kam, maisto hide nu Kautusan ni Moises sakay Pariseo hide! Mapagkunware kam! U kapareho moy hide ay u pantiyong a pinaganda, maganda ngane tu luwas pero ti disalad ay putat ti buyok sakay tulang. 28Talaga konna kam tu páglábbángan! Tu pangeleng nu tolay ay magkabait kam pero u tatahoden, tunay kam a mapagkunware sakay madukás.”

Kinagi ni Jesus u Magin Parusa De

(Lukas 11:47-51)

29Kinagi pa ni Jesus nide, “Kakagbi kam, maisto hide nu Kautusan ni Moises sakay Pariseo hide! Mapagkunware kam! Nagpagimet kam ti páglábbángan nu propeta hide a binuno nu nuno moy hide. Sakay dinikorasyonan moy u lábbáng de. 30Sakay kagiyan moy nadid, ‘Ni hikame nakwa u biyag tu kapanahonan nu nuno mi hide ay awan mi impabuno u propeta hide.’ 31Dipo ti kinagi moyan iye ay inamin moy a hikam u aapo hide nu nangpabuno tu propeta hide tu itod! 32Sige! Tapusán moy u sinapulan nu nuno moy hide! 33Malinlang kam konna tu biklat! Awan kam talaga makaiwas, maparusaan kam ti impiyerno! 34Magpaangayyák nikam ti propeta hide, mágkalalaki a tolay sakay u maisto hide nu Kautusan ni Moises! Bunuwán moy u sangan nide sakay u agum ay ipako moy tu kudus. U agum ay haplitán moy tu sinagoga sakay u agum ay ehyokán moy tu banubanuwan tán madakáp moy. 35Dipo tu gimitán moy, dumemát nikam u parusa tu págbuno tu atanan nu tolay a matuwid tu buo a mundo. Magsapul tu págbuno tu awan ti kasalanan a ti Abel hanggan tu págbuno ni Zacarias a anak ni Baraquias. Binuno moy siya tu bállog nu págalayan sakay tu templo. 36Kagiyan ko nikam: u parusa nu atanan an iye ay meangay tu tolay hide tu kasalukuyan.”

U Págmahal ni Jesus ti Jerusalem

(Lukas 13:34-35)

37Kinagi pa ni Jesus, “Jerusalem, Jerusalem! Pinabuno mo u propeta hide sakay bábbudasán moy u pinaangay nu Diyos nikam! Sangan a beses ko a sinikap a alagaan u mágyan niko, konna tu paglákáp nu essa a inahin tu sepsep na hide pero inadiyán mo. 38Kaya nadid ay pabayan nu Diyos u Templo moy sakay awan dán ti mágyan. 39Kagiyan ko nikam: Awannák moy ketan hanggan awan dumemát u odas a kagiyan moy, ‘Pagpalaán u dumemát tu ngahan nu Panginoon!’ ”

Currently Selected:

Mateo 23: MBJC

Highlight

Copy