Mateo 28
28
Huway a Nabiyag ti Jesus
(Markos 16:1-10; Lukas 24:1-12; Juan 20:1-10)
1Kállipas nu Aldew nu Káimang, nikuna dimadimang palla a tahod tu dipalongo a aldew nu simba ay ummangay tu naglábbangan de ni Jesus ti Maria Magdalena sakay u essa pa a Maria. 2Káddemát de hod ay bigla a naglinog ti mabegsák dipo ummogsad gábwat ti langet u essa a anghel nu Panginoon. Ingulong na u bito a nakatakáp tu lábbang sakay immetnud tu dibbew na. 3U hupa na ay makasili a kumán a kilat, pareho be tu pudew nu damit na. 4Nagpágpág ti ánteng u bantay hide sakay natumba a konna tu essa a patay nikuna netan de u anghel.
5Pero kinagi nu anghel tu bábbey hide, “Dyan kam manteng. Tukoy ko a ehyokan moy ti Jesus a nepako tu kudus. 6Awan dán siya he dipo huway dán siya a nabiyag a konna tu kinagi na. Kamon dán, ilengán moy u nángdáttonan nikuna. 7Alistuwan moy a angay ibaheta tu disepulus na hide a siya ay huway a nabiyag sakay mágdipalongo ti Galilea. Metan moy siya hod! Pakatandaan moy u kinagi ko nikam.” 8Kanya nagalisto hide a hinumektat tu lábbang. Naghalo u bábbatiyan de, anteng sakay grabe a saya. Nagginan hide a immangay tu disepulus hide para ibaheta u nangyare.
9Pero bigla hide a tinagbu ni Jesus sakay binati. Immadeni hide ni Jesus, kinábkabban de u tikád na sakay sinamba de ti Jesus. 10Kinagi nide ni Jesus, “Dyan kam manteng! Angay kam sakay kagiyan moy tu kákkapatkákka ko hide a umangay hide ti Galilea sakay ketanák de hod!”
U Imbaheta nu Bantay Hide
11Nikuna nakalakad dán u bábbey hide, ummangay be tu banuwan u sangan tu bantay nu lábbang sakay inbaheta de tu pupuno hide nu saserdote u atanan nu nangyare. 12Nagipun-ipon hide sakay káttapos a makpágguhon tu pinuno nu banuwan, sinuhulan de ti makpal a pilak u sundalo hide. 13Sakay inutusan hide a kona he u ibábbaheta de, “Alay me a natdug tu gibi he, immangay u disepulus na hide sakay tinakaw de u bangkay.” 14Kinagi pa nu pupuno nu saserdote nide, “Dyan kam mabalisa, maski masanig man iye nu gobernador, hikame u bahala a mángpaliwanag!.” 15Tinanggap nu bantay hide u pilak sakay ginimet de u inyutus nide. Kaya hanggan nadid iye pade u iyá-istorya tu Judio hide.
Inutusan ni Jesus u Sapulo ay ti Essa a Disipulos
(Markos 16:14-18; Lukas 24:36-49; Juan 20:19-23; Gimet 1:6-8)
16“U sapulo ay ti essa a disepulus ay immangay ti Galilea, tu buked a intoldo nide ni Jesus. 17Nikuna a netan de ti Jesus ay sinamba de siya. Maski u agum ay nag-alinlangan padi. 18Ummadeni ti Jesus sakay kinagi na nide,” Inyatád dán nikán u atanan a kapangyariyan ti langit sakay ti lutaáy. 19Kanya angay kam sakay gimitán moy a disepulus ko u atanan a tolay tu atanan a bansa. Bawtismuwan moy hide tu ngahan nu Ama sakay nu Anak sakay tu Banal a Ispiritu. 20Sakay tolduwan moy hide a sumunud tu atanan a inyutus ko nikam. Pakatandaan moy: Hikán ay kakaguman moy hanggan tu katapusan nu mundo.
Currently Selected:
Mateo 28: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
