کارَل رسولَل 7
7
قصَه‌ل استیفان اِبِرُوَر شورا یهود
1اَسَه کاهن اعظم پِرسی اَژی: «یانی ایی چیئِلَ راسَ؟»
2استیفان وِتی: «اِاِ بِرال، اِاِ باوَه‌ل، گوش بِگِرنَ مِه! خداءِ پِرجِلال، وخدی ظاهر بی اَر باوَه‌مو ابراهیم گه او اِ وِلات بین‌النهرین بی، ئو هَنی بار نَهَردوئیتی اَرِه شیَر حَران، 3خدا وِتون: ”اژ وِلات ووژت ئو اژ تک قومِ‌خویشَلِت بورَ دِریر، ئو بِچُ اِرَه وِلاتی گه نشونتَ میَم.“
4«اِسَه اژ وِلات کَلدانیَل بار کِردی چی ئو لیز گِرتیِ وِلات حَران. دُما مِردِن باوِه، خدا او جاواز کِرد اِرَه ایی وِلاتَ گه هُمَه ایمِرو لیزتو گِرتیَس اِنوم. 5وَه ایی حالا خدا اژ ایی وِلاتَ هُیچ میراتی نائون جُ‌جُ چَن یِه جاپا؛ مِنتائای وَدَه داتی گه اَوَه مِهِئَه هِن ابراهیم ئو دُما ابراهیم هِن نسِل او، وَه‌یاآگه ابراهیم اَ موقَع هَنی آویلی ناآشدی. 6خدا وِتون: ”نسِل تو اِ وِلات بیگونَه خَریویَ مَکیشِن ئو چوارصد سال میَرِنونَ اسیری ئو ظلمَ مَهَن اَرینو.“ 7ئو خدا وِتی: ”مِن اَر اَ قومَ گه اونِلَ مَهَنَ اسیر ووژو، داوریَ مَهَم، ئو دُما اَوَه، قوم مِن اژ اَ وِلاتَ مَهَنَ دِریر ئو اَر ایرَه مِنَ مَپِرَسِن.“ 8ئو خدا عَت ختینَه داتیَ ابراهیم. اَسَه ابراهیم بیَ صائای اسحاق ئو اِ روژ هشتِم، اسحاق ختینَه کِردی، ئو اسحاق بیَ صائای یعقوب، ئو یعقوب بیَ صائای دوازَه پاتْریارْک یانی باوَه‌ل قوم اسرائیل.
9«ئو باوَه‌ل ایمَه اژ حَسوئی، یوسِفو فِروتَ مصر. مِنتائای خدا وَه‌گَرد یوسف بی 10ئو او اژ کُل سخدیَلی، آزادا کِرد، حکمت دائون، ئو اَر وَر چیَم فرعون عزیزگرامیا کِرد، هُنَ گه کِردیَ حکِمرو وِلات مصر ئو رِئیس دربار ووژ.
11«اَسَه قیَطی ئو سخدی کَلِنگی هات اَرسر کُل وِلات مصر ئو کنعان، هُنَ گه باوَه‌لمو چیئونی اَرِه هُاردِن نَهَردَ دی. 12مِنتائای وخدی یعقوب شنَفتی گه اِنوم مصر گَنِمَ ماوَ دی، گِل اول باوَه‌لمو کِل‌کِرد اِرَه اورَه. 13گِل دوئِم، یوسف ووژ اَر بِرالی شناسونی ئو فرعون اژ کسِ‌کارَل یوسف خَوَردارا بی. 14اَسَه یوسف کِل‌کِردی باوَه ووژ یعقوب ئو کُل کسِ‌کاری گه اَرسر یَک هفتاد ئو پنج نفر بین، دَنگ کِردِنی اَرِه اورَه. 15اُهُنَ، یعقوب هات اِرَه مصر ئو هم او هم باوَه‌لمو، هَر اَر اورَه مِردِن؛ 16مِنتائای لَشَلو بِردونَ اِرَه هیال شِکیم ئو نائون اَر نوم لَحَکی گه ابراهیم وَه نَسَخ نُخِرَه اژ کُرَل حَمور خِروئیتی.
17«هَرهُنَ گه زَمو اَنجوم وَدَه خدا، نزیکا موئیا اَر ابراهیم، قوم ایمِه‌یش اِنوم مصر ویشتِرا موئیا، 18تا یَگه پاتِشای‌تِر گه یوسف نِمَشتاسیاتی رَسیَ پاتِشائی. 19او وَه رِنگَریا وَه‌گَرد قوم ایمَه رفدار کِردی ئو ظلم فِرِه اَر باوَه‌لمو کِردی ئو نا اَر مِلو گه آیلَلو بِنِنِ در تاگَه زِنی نَمینِن.
20«اِ هُنَ روژِگاری بی گه موسیِ پِخَمَر هاتَ دی. او اِ چیَم خدا آویل فِرَه رنگینی بی. موسی سه مُنگ اِ مال باوِه کَلِنگ بی. 21وخدی گه موسی‌ئو نا اَر سر رئی، دِت فرعون او گِرتی ئو هَر چُی آویل ووژ کَلِنگ کِرد. 22اُهُنَ موسی کُل حکمت مصریَلا گِرتی ئو اِ قصَه کِردِن ئو رفدار تَوُناآ بی.
23«وخدی گه موسی چِل سال بیتی، هُنَ کَتیِ دل گه برَسیَ وضِ‌حال بِرال اسرائیلی ووژ. 24وخدی دیتی پیا مصری‌ای ظلمَ مِهِه اَر یَکی اَژینو، اِ پِشت اِرهاتی ئو اَ مصریَ کُشتی، ئو تَخاص اَ اسرائیلیَ کِردی. 25موسی گُمونَ مَهَردی بِرالی مَفیَمِن گه خدا مِیتی وَه دس او اونَل نجاد دِ، مِنتائای اونَل نَفیَمین. 26وَه صوایکا، موسی رَسیَ دو نفر گه وَه‌گَرد یَک قیو بی، ئو هِستی دوسیو دِ، ئو هُنَ وِتی: ”اِاِ پیال، هُمَه بِراینو، اَرِه‌چَه ظلمَ مِهِینون اَر یَکتِری؟“
27«مِنتائای اَ کسَ گه ظلم اَر هُمسا ووژَ مَهَردی، موسی داتیِ لا ئو وِتی: ”کی تو کِردیَسیَ حکِمرون ئو داور اَر سر ایمَه؟ 28مَری میا مِن‌یش بِکُشین، هَراَ جورَ گه دونَهَه اَ مصریتَ کُشت؟“ 29وخدی موسی یَه شنَفتی، حِیوای ئو اِ وِلات مِدیان اِ خَریوی زِنِه‌ی کِردی ئو اَر اورَه بیَ صائای دو کُر.
30«چِل سال اَژی چِتی. یِه روژ اِنوم بیاوو، هِناس کوی سینا، فریشدِه‌ی اِ بِلاچَه آگِری اِنوم بوتِکی اَر موسی ظاهر بی. 31وخدی موسی یَه دیتی، واقِ دَم پَریتی. وخدی چیِ نوا تاگَه اژ نزیک بوئینی، دَنگی اژ خداون رَسیتی‌ئون گه: 32”مِنِم خداءِ باوَه‌لِت، خداءِ ابراهیم، اسحاق ئو یعقوب.“ موسی هاتِ رِکَه ئو جورَت نَهَردی سِیل کِیتی.
33«اَسَه خداون وِتون: ”کِلاشَلت اژ پات اِربار، اَرِیَگه جای گه هوسیاینیَسی اَری زمین مقدّسی کَ. 34وَه زَقین، مِه روژِگار سی قوم ووژِم اِنوم مصرِم دیَ ئو نُیزَه‌م شنَفتِنَ، ئو اَرِه نجادو هاتِمَسَ هُار. اِسگَه بوری تاگَه کِلِت‌کَم اَرِه مصر.“
35«هَر ایی موسی گه قوم ایمَه نَچِنیِ گِرد ئو وِتون‌ئون: ”کی تو کِردیَسیَ حکِمرون ئو داور اَر سر ایمَه؟“ خدا او کِردیَ حکِمرون ئو نجاددهندَه، ئو وَه‌سونگَ فریشدِه‌ی گه اِنوم بوتِکی ظاهر بیتی اَری، کِل‌کِرد. 36هَر او بی گه وَه مُجِزَه‌ل ئو نشونَه‌لی گه چِل سال اِنوم مصر ئو لو دریا سوئر ئو اِنوم بیاوون اَنجوم داتی، قوم ایمَل اژ مصر آوِردیَ دِریر.
37«هَر ایی موسی وِتیَ قوم اسرائیل: ”خدا اِنوم بِرالتو، پِخَمَری چُی مِنتون اَرِه کِلَ‌مِهِه.“ 38یَه هَراَ موسیَ بیَ گه اِنوم بیاوون اِنوم جیَمیَت بی، ئو وَه‌گَرد فریشدِه‌ی گه اِ کوی سینا وَه‌گَرد قصَه کِرد، ئو وَه‌گَرد باوَه‌لمو؛ ئو کلوم زِنی گِرتی تاگَه بِ‌ئونمو.
39«مِنتائای باوَه‌لمو نِهِستو فِربوبَر بوئنی، دَسو نا اَر سینه‌آ، ئو یَه اِ دِلو بی گه گِلابیرن اِرَه مصر. 40اونَل وِتونَ هارون: ”اَرِه ایمَه خدالی دُریس کَ گه اِ نوا ایمَه بِچِنَ رئیا، اَرِیَگه نِمَذانیم چَه هاتیَس اَر سر ایی موسای گه ایمَل اژ وِلات مصر آوِردیَ دِریر!“ 41اِ، اَ روژِلَ بیَ گه بِتونی وَه دائول گوَئر دُریس کِرد ئو قُرونیونی اَرِه کُشت ئو اَرِه اَ چیئَه گه وَه دَسَلو دُریسو کِردوئی، خَوشالیو کِرد. 42اَسَه خدایش رُی ووژ اَژینون اِرپِلونی ئو واگذار کِردِنی اَر ووژو تاگَه چیئَلی گه هان اِنوم آسمون‌اِر بِپِرَسِن؛ هُنَ گه اِنوم نُسَخ پِخَمَرَل هاتیَ:
«”اِاِ قوم اسرائیل، مَر اِ اَ چِل سالی گه
اِنوم بیاوو بینو،
قُرونی ئو پیشکَشیتون اَرِه مِه آوِرد؟
43هُمَه داوار بِت مُلوک،
ئو آسارَه خدا ووژتو، بِت رِفانتونَ
مَگِرت‌ِ کول.
مِجسمَه‌لی گه دُریستو کِرد تاگَه بِپِرَسینو.
اِسَه هُمَل تبعیدَ مَهَمَ اَ پر شیَر بابِل.“
44«باوَه‌لمون اِنوم بیاوو داوار شهادت‌یشو داشد، هَراَ داواری گه خدا فِربو داتیَ موسی، وِتون تاگَه مِطابق اَ نمونَه گه دیَسی، دُریس کِیتی. 45باوَه‌لمو وخدی گه وَه‌گَرد یوشَع وِلات کنعانو اژ قومَلی گه خدا اِ وَر چیَم اونَل کِردوئینیَ دِریر، سَن، اَ داوارونَ گَرد ووژو آوِرد ئو تاگَه زَمو داوودِ پاتِشا مَن اَر اورَه. 46داوود گه خدا لِفط اَری کِرد ئو لالکی تاگَه مالی اَرِه خداءِ یعقوب باوژی. 47مِنتائای سلیمان بی گه مالی اَرِه خدا آوشدی.
48«مِنتائای اَ خداءِ متعالَ، لیز نِمَگِری اِنوم مالَلی گه وَه دس کَتِنَ، هُنَ گه اِشعیا پِخَمَر وِتیَسی:
49«”خداونَ موشی:
’آسمو تخت پاتِشائی مِنَ ئو زمین‌یش،
کرسی ژیر پام!
چه مالی اَرِه مِنَ ماوژینو،
ئو جاگَه سِتار مِه هار کو؟
50مَر دس مِه کُل ایی چیئِلَ،
دُریس نَهَردیَسی؟“‘
51«اِاِ قومِ یاخی، اِاِ کسَلی گه دلَل ئو گوشَلتو ختینَه نوئیَ! هُمِه‌یش چُی باوَه‌لتو هَراَ موسینون اَر نوا روح‌القدس. 52کُماین پِخَمَرَ گه اژ دس باوَه‌لتو عذاو نکیشیِ؟ اونَل جُ‌جُ پِخَمَرَلونی گه هاتِن اَ پیا صالحونَ پیشگوئی کِرد، کُشت؛ ئو اِسگَه هُمِه‌یش هَر اوتو داءَ گیر ئو بینونیَ خوینی، 53هُمِه‌‌ی گه اَ شریعتَ گه وَه‌سونگَ فریشدَه‌ل رَسیَ دَستو، ناوِردتونَ جا.»
استیفان سنگسارَ ماو
54اونَل وخدی ایی قصَه‌لونَ شنَفت، هُنَ آگِرون اژ سر چی گه کَتِنِ دِنوریچَه. 55مِنتائای استیفان پِر اژ روح‌القدس، گِز کِردی اَر آسمو، جِلال خدا دیتی ئو عیسی گه هوسیائی اَر دس راس خداآ. 56اَسَه وِتی: «هَراِسگَه آسمونَ موئینِم گه تاقا بیَ ئو کُر اِنسونَ موئینِم گه هوسیاس اَر دس راس خداآ.»
57مِنتائای گوشَل ووژو گِرتو، وَه دَنگ کَلِنگ قارونو ئو کُل رِشیانیَ سراِرا 58اوُ کیشیَ تووسُرا اژ شیَر بِردونَ دِریر، ئو سنگسارو کِرد. شاتَل، جِنِکَل ووژو نا اَر وَر پال جِهالی گه نُم سولُس بیتی.
59وخدی اونَل داشدو استیفانو سنگسارَ مَهَرد، او دوعا کِردی وِتی: «اِاِ عیسیِ خداون، روحِ مِه قبول کَ!» 60اَسَه زُنی داتی ئو وَه دَنگ کَلِنگ دای داتی گه «اِاِ خداون، ایی گناءَ نَن اَر پائو.» یَه وِتی ئو اِنوم خداون حیوَت.
Currently Selected:
کارَل رسولَل 7: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
