مَتّی 7
7
قضاوت نَهَن
1«قضاوت نَهَن تاگَه قضاوت‌یشتون اَری ناو. 2اَرِیَگه هَراَ جورَ گه قضاوت اَر کسَلی‌تِر بِهِینو، قضاوت اَر هُمِه‌یشَ ماو، وَه اَ کیلَه گه مَپِیمُنینو، اَرِه هُمِه‌یشَ مَپِیمُنِن. 3اَرّا پر کیَه اِنوم چیَم بِراتَ موئینین، مِنتائای اژ کُتَلی گه ها نوم چیَم ووژت‌اِر خافِلین؟ 4یاگَه چطورَ مَتونین بوشینَ بِرات، ”بیلا پر کیَه اژ چیَمت اِربارِم،“ وخدی کُتَلی ها نوم چیَم ووژت‌اِر؟ 5اِاِ ریاکار، اول‌بار کُتَلِهَه اژ چیَم ووژت اِربار، اَسَه بیتِرَ موئینین تاگَه پر کیَه اژ چیَم بِرات اِربارین.
6«اَ چیئَه گه مقدّسَ، نیَنَ سگَل وِل ئو مِرواریَل ووژتو ناوژِنِ نوا خنزیلَل، تاناخواد لَخَ‌سائو کَن ئو گِلابیرِن ئو بِتِلیشِنِنتو.
بِتو، بِجورِن، بِکوئِن
7«بِتو، گه میَن‌ئونتو؛ بِجورِن، گه مِهِینونَ دی؛ بِکوئِن، گه در اژ رُیتو وازَ ماو. 8اَرِیَگه هر کی بِیتی، ماریَ دس ئو هر کی بِجوری، مِهِئَه دی ئو هر کی بِکوءِ، در اژ رُی وازَ ماوتی. 9کُماین اَژینتو اَرّ کُرِهِه نون اَژی بِیتی، کُچِکی مِیتی‌ئون؟ 10یاگَه اَرّ مای بِیتی، ماری مِیتی‌ئون؟ 11اِسَه اَرّ هُمَه گه شرَبارینو، مَذانینو گه چطور پیشکَشی خو بِینونَ آیلَلتو، چَنی ویشتِر باوَه هُمَه گه ها آسمون‌اِر، چیئَل خوءَ موئَشخِنیَ اونَلی گه اَژینو بِ. 12اِسَه اَجورَ گَرد مردِم رفدار کَن گه مِتو هُنَتونَ گَرد رفدار بِهَن. یَسَ سَردِرَبِر تورات ئو نُسَخ پِخَمَرَل.
رئی ژییاین
13«اژ در تنگ بورن اِنوم، اَرِیَگه اَ دِرَ گه وِشاءَ ئو اَ رئیَ گه پیَنَ، آخِری مَرَسی نابودی، ئو کسَلی گه مانی اِنوم فِرَه‌ن. 14مِنتائای تنگَ اَ دِرَ ئو سخدَ اَ رئیَ گه آخِری مَرَسی زِنِه‌ی، ئو کسَلی گه مَهَنیَ دی کَمِن.
دار ئو ثمری
15«اژ پِخَمَرَل دِروزِنِ دویرا بِگِرِن. اونَل وَه جِنِک میا مان اَرِه تک هُمَه، مِنتائای اِ باطنا گُرگَل دِرَّندَه‌ن. 16اونَل وَه ثمرَلونا مَشتاسینو. آیا انگویر اژ بوتِک خار، ئو انجیر اژ گیاءَ مَچِنِن؟ 17اِسَه هَرِ ایی جورَ، هر دار خوئی ثمر خوءَ ماری، مِنتائای دار گَن ثمر گَنَ ماری. 18دار خو نِمَتونی ثمر گَن باری، ئو دار گَن‌یش نِمَتونی ثمر خو باری. 19هر داری گه ثمر خو ناری، مُئری ئو مَکُوء اِنوم آگِر. 20هَرِ ایی جورَ، هُمَه اونَل وَه ثمرَلونا مَشتاسینو.
21«نه هر کی مِنَ ’اِاِ خداون، اِاِ خداون‘ هِنا کِ مَچو اِنوم پاتِشائی آسمونا، بلکِم اَوَه گه خواس باوَه‌م گه ها آسمون‌اِر باریَ جا. 22اِ اَ روژَ فِرَه کَسِلَ موشِن‌ئونِم: ”اِاِ خداون، اِاِ خداون، مَر وَه نُم تو نبوّتمو نَهَرد؟ مَر وَه نُم تو مِلاکَتَلمو نَهَردَ دِریر؟ مَر وَه نُم تو مُجِزَه‌ل فِرَه‌مونی اَنجوم نا؟“ 23مِنتائای اِلومَ مَهَم اَرِنو، ”هرگِس هُمَه‌م نَشتاسیَ. اژ مِه دویرا بِگِرِن، اِاِ گَنَ‌کارَل!“
مِمار دونا ئو مِمار نایو
24«اِسَه هر کی ایی قصَه‌ل مِنَ بشتوئی ئو اَنجومو دِ، چُی پیا دونای کَ گه پِ مال ووژ اَرسر کُچِک آوشدیِ. 25وارُ واری ئو لافاو کَتِ رئی ئو واهوفَه‌ل هاتِن ئو زورو آوِرد اَر مالِهَه، اِرنَرِمیا، اَرِیَگه پِ اَرسر کُچِک بیتی. 26مِنتائای هر کی ایی قصَه‌ل مِنَ بشتوئی، ئو اَنجومو نِ، چُی پیا نایونی کَ گه پِ مال ووژ اَرسر هُس آوشدیِ. 27وارُ واری ئو لافاو کَتِ رئی ئو واهوفَه‌ل هاتِن ئو زورو آوِرد اَر مالِهَه، اِررِمیا، ئو خِراوی فِرَه بیتی!»
28وخدی عیسی ایی قصه‌لَ تموم کِردی، مردِم اژ تیَلیم دائِن او بِلُجوئیو هات، 29اَرِیَگه وَه قدِرت‌واختیار تیَلیمَ ماتی، نه چُی مَلِمَل تورات.
Currently Selected:
مَتّی 7: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
