یوحنا 4

عیسی و سامِریَه ژِن

1وَقتی عیسی سَر آگِنَه کن فَریسیون فرقَه عالیمِن دَرَستَشونَه اَ یحیی کا ویشتَر شاگِرد دارِ و اَوون غُسل تعمید دَرِ، 2- هر چَنَه کن عیسی شاگردِن تعمید اَدَرینَه نِه اِشتَن - 3وِلَته یهودیَه کا شَه و ایکَرَ دییَر وِلتِه جَلیلیرا رَونَه بَه، 4و پی جَلیلی شِه را منطقَه اِ سامِرَکا دَیوَریَه. 5پِس سامِرَ ایلَه شَهرونرا آرَستَه کن چَی نوم سوخار بَه، اَ تیکَّه زَمینی نِزِکی کن یعقوب اِشتَن زوعَه یوسوفی آدوعَش بَه. 6یعقوبی آوَ چال اَجِگا کا بَه؛ عیسی کن سَفَریکا ویخِتَه بَه چالی وَر نِشته. ذِوالَه به ساعت دانّزَکا نِزِک بَه.

7ایلَه ژِن کن سامِرَ آدَمونکا بَه، آمَه تا چالیکا آو پِراکنه. عیسی بَی واتِش: «تیکَلیی آو بَمن بِدَ بنجِم،» 8اِمی خاطر کن چَی شاگردِن غذا وَردِرا شهریرا شَه بینَه. 9اَ سامِریَه ژن عیساش واتَه: «چِنتَرَیَه، ته کن یهودی ایشَه، بَمنکا کن ایلَه ژِن سامِری ایمَه، آو بَپیرَ؟» اِمی خونِه کن یهودیِن سامِریونَّه شِه آمِه نینَّکَرد. 10عیسی اَ ژنی جواب داشَه: «اَگَم خدا خَلا اَزنیشَه و اَزنیشَه کیَه کن بَتِه باتیَه تیکَلیی آو بَمن بِدَ تا بِنجِم، تِه اِشتَن اَیکا بَپیر بَه، اَ آویی کن زندَگی بَبَخشِستی بَتِه اَدَریَه.» 11اَ ژن عیساش واتَه: «آقا، تِه چی ایی نیرَ کن بَینَه آو پِراکِنی وچال نی کن دولَه. پس اَ آویی کن زندَگی بَبَخشِستی، کِرَم جگا کا بوعَردیش؟ 12مَگَم تِه، چَمَه بابا یعقوبیکا یال تَریشَه؟ یعقوب اِم چالی اَمه آداشَه و اَ اِشتَن و چَی زوعَه اِن و چَی رَمه اِن اِمیکا هِنجین. 13عیسی واتِش: «هَر کم اِم آویکا بِنتی، هَنی تِشیش بَبی. 14ولی هر کم اَ آویکا کن، اَز بَی آمَدا بِنجِه، دِ هرگز تشیش آنیَبن، اَ آوی کن اَز بَی آمَدا، چَی دِلَکا ایلَه خونی بَبیَه کن تا زَیرونَه زندَگی، بَگِلِستیَه.» 15اَ ژِن عیساش واتَه: «آقا، اِم آویکا بَمن بِدَ تا دِ، نِه تِشیم ببو، نِه آو پِراکِنِستِه خونه اِم جِگارا بام.» 16عیسی بَی واتِش: «بش، اِشتِه شو خِلِه بِکَه و اِم جِگارا آگَرد.» 17ژن جواب داشَه: «شووم نیَه.» عیسی اَش واتَه: «راست باتیشَه کن شوور نیَه، 18اِمی خونه کن پِنج شوو داشتَرَ و اَکَن ایسَه هِستِرَ، اِشتِه شو نی. اَچی ایی کن واتِرَ، راستَه!» 19ژن واتِش: «آقا، بَویندیمَه کن تِه ایلَه پَیغَمبَریشَه. 20چَمَه بابا اِن اِم کوکا پَرستِش اَکَرینَه، ولی شمَه یَهودییِن باتیرون، اَ جگایی کن مَردوم پی پرستش بکَن، شهرِ اورشلیمَه.» 21عیسی واتِش: «اَی ژِن، باور بکَ، ایی زمانی آرَرَست کن آستامونییَه دَدَ، نِه اِم کوکا پرستِش بَکَرون نِه اورشلَیمیکا. 22شمَه اَچی ایی کن آنینَّموست پرستِش بَکَرون؛ اَمه اَچی ایی کن آزنَم پرستش بَکَمون، اِمی خونه کن نیجات، قام یَهودی واسیطَنَه آ. 23ولی ایی زمانی آرَرَست و ایسَه آرَستَیه، اَیِنی کن حَییقتا پرستِش بَکَن، روح و حَییقتی دلَکا، آستامونیَه دَدَ پرستِش بَکَنَه، اِمی خونه کن آستامونیَه دَدَ کَسِنی دوملَه بَگَردِستی کن اِنتَرَ بَی پَرستش بِکَن. 24خدا، روحَه و اَیِنی کن خدا پرستش بَکَنَه پی اَی روح و حَییقتی دلَکا پرستش بکَن.» 25اَ ژِن عیساش واتَه: «بَموستیم کن وعدَ آدوعَه ماشییَح کا آمِه، کن اَ، هَه وعدَ آدوعَه مسیحَ، وَقتی کن اَ با، گردِ چیون چمَرا باتیَه.» 26عیسی بَی واتِشَه: «اَز کن بَتنَه گَف بَژَم، هَه ایمَه.»

27هَه موقه، عیسی شاگردِن ویگَردِستین. اَیِن حَیرون بینَه کن اَ ایلَه ژنینَه گَف دَرِ. ولی هیچ‌کم دَنِه پَرسِستَه کن: «چِه بَپیرَ؟» یا «چیرا بَینه گَف بَژَش؟» 28اَ ژن اِشتَن آوَ کَتلَه آهَشتِشَه و شهریرا شَه و مردمی واتِش: 29«بِرَ مِردی بِوینَه کن هر چی ایی تا ایسَه کردَم بَه، مِرا جیگیر کَردِشَه. ایمکان دارِکن اِم مِرد هَه وَعدَ آدوعَه مسیح ببو؟» 30پس اَیِن شهریکا بِرِن بَرمینَه و کایبین عیسی وَر شِه.

31اِم مینَکا، شاگردِن عیسی کا خاشتو خاز اَکَرینَه و اَواجینَه: «اِستا، چی ایی بَ.» 32ولی عیسی اَیِنِش واتَه: «اَز هَردَچیی ایی، هَردِرا هِستِمهَ کن شمَه اَیکا چی ایی نینَّموست.» 33شاگردِن یَندِنَه واتِشون: «مَگَم کَسی چَیرا چیی ایی وَردَشَه تا بَرِ؟» 34عیسی اَیِنِش واتَه: «چمن هَردَ چی اِمَه کن، خدا ایرادَ کن بَمنِش عَندَیه بجا بوعَرم وچَی کاری کامیل اَنجوم بدَرم. 35مَگَم اِم گَفی دَرَستَرون نی کن، تا دورنوستِه هَنوزنی چارما مَندیَه؟ “ دیَسَه اَز بَه شمَه باتیمَه، اِشتَن چَمون آکرَو بِوینَه کن ایسَه بِجارِن، دورنوستِرا آمادَاینَه. 36ایسَه، اَ کن بَدورنوستی اِشتَن مِژدی ویرَگَت و اَکینی ایی جِگا جَم بَکَی، تا اَ کن بَکَشتی و اَ کن بَدورنوستی، یَندِ نَه خَشی بِکَن. 37اِم گَف کن باتی ”ایلَه بَکَشتی و دیَیری بَدورنوستی“ اِم جِگاکا صدق بَکَی. 38اَز شمَه عَندِمَه تا اَکینی بِدورنَه کن شمَه زَحمَت کَشتَه نیَه. دیَرَ کَسِن زَحمَت کَشتِشونه و شمه چَوون زَحمَت کَشتَه، پِنَّگَت.»

39پس اَ ژنی شَهادَتی خونه کن واتَش بَه «هر چی ایی تا ایسَه کردَم بَه، مِرا جیگیر کَردِشه،» خَیلی سامرَ آدَمونکا کن اَ شهریکا اَمونین، بَه عیسی ایمان وَردِشونَه. 40وَقتی اَ سامرییِن، عیسی وَرآمینَه، اَیکا اَپیشون بَه چَوون وَر بومونهِ. پس عیسی دِ روج اَجگا کا مَندَ. 41خَیلی دیَرکَسونکا عیسی گَفون خونه ایمان وَردِشونَه. 42اَیِن اَ ژِنی واتِشون: «دِ تاکَه اِشتِه گَفون خونِه ایمان نِوَرَم، اِمی خونه کن اَمه اِشتَن چَی گَفون دَرستَمونهَ و بَموستیمون کن اِم مِرد واقییَن دِنیا نیجات دَرِ.»

43اَ دِ روجی، بَه دوملَه، عیسی وِلَته جلیلی طرَف رادَگنستَه، 44اِمی خونه کن عیسی اِشتَن شهادَت دوعَش بَه کن: «پَیغَمبَر اِشتَن شهریکا حرمَتِش نیَه.» 45وَقتی عیسی ولَتِه جلیلیرا آمه، جلیلیِ آدَمِن اَیکا ایستیقبال کَردِشون، اِمی خونِه کن اَیِن نی پِسَخه عیدیرا شهر اورشلیم شَه بینَه و گردِ اَ کارِنی کن عیسی، عیدیرا اورشَلیمیکا کَردَش بَه، ویندشونَ بَه.

عیسی ایلَه یالَه شخصی زوعَه شفا دَرِ

46عیسی هَنی آوادی قانارا آمَه کن وِلَته جَلیلیکا به، هَه جگا ایرا کن آوی شَراو آکَردَش بَه. شهر کَفَر ناحومیکا ایلَه دَرباری آدَمونکا اَمونیَه کن آزاریَه زوعَه ایی داری. 47وَقتی اِم مِرد دَررَست عیسی یهودیَکا جلیلیرا آمَه یَه، چَی وَر شَه و بَیکا خاشتو خاز کردشَه کن با و چَی زوعَه شفا بدَرِ، اِمی خونه کن چَی زوعَه کایبَه مَردِ. 48عیسی بَی واتِش: «تا نِشونَه اون و عجیبَ چییون نِوینَه، ایمان نینَّوَرد.» 49اَ مِرد کن درباری آدَم بَه، عیساش واتَه: «آقا چمن خِردَنی مَردِ بَه نَ، بِه.» 50عیسی بَی واتِشَه: «بش؛ اِشتِه زوعَه زِندَ بَمَندی.» اَ مِرد عیسی گَفی قِبول کَردشَه و را دَگنستَه. 51هنوزَنی راکا بَه کن چَی پاسَریِن چَی پیشواز آمینَه، واتِشون: «اِشتِه زوعَه زِندَیه و سَقَه.» 52اَ مِرد اَوونکا دَپرسِستَه: «چِه ساعتیکا دَمندَ سِی آبِه؟» پاسَرییِن واتِشون: «ایزِر ذِوالَه ساعت یَکیرا بَه کن چَی تَو قطع آبَه.» 53اَموقه دَدَ سَر آگِنَه کن اِم هَه ساعتی بَه کن عیسی بَی واتَش بَه: «اِشتِه زوعَه زِندَ بَمندی.» پس اَ اِشتَن و گردِ چَی کَه آدَمِن ایمان وَردشونَه. 54اِم دوّمین نِشونَه و موعجیزَایی بَه کن عیسی هَنگومی کن یهودیَکا جلیلیرا آمَه، اَنجوم داشَه.

Currently Selected:

یوحنا 4: CTB

Highlight

Copy