یوحنا 6

عیسی پِنج هَزار نَفَری هَردَ چیی دَرِ

1ایی مودتی به دوملَه، عیسی دیراچۀ جلیلی اَ وَریرا شَه، کن هَه دیراچۀ اِ تیبِریه بَه. 2بَرکَه جَماعَتی چَی دوملَه رَونَه آبین، اِمی خونه کن اَ نِشونَه ان و موعجیزَ اِنی کن آزاریون شفا دوعِه را اَنجوم دوعَش به، ویندَشون بَه. 3پس عیسی کوایی کا پِشَه و اِشتَن شاگردونَّه اَجگا کا نشتَه. 4یَهودیون پِسَخَه عیید نِزِک بَه. 5وقتی عیسی اِشتَن کَلَّه راست آکردِشه، ویندشَه کن برکَه جَماعَتی چَی طَرَف کان آمِه. اَ فیلیپُسیش واتَه: «کِرَم جگا کا نون بِخِرم تا اِم آدَمِن بَرِن؟» 6اِمی واتِش تا اَی وردا وَرد بکَرِ، اِمی خونه کن عیسی اِشتَن بَموستیَه بَپیشَه چِبکَرِ. 7فیلیپُس جواب داشه: «اَگَم دویست دیناری قَدَرنون نی چَوونرا بخرَم کن ایلَه کارگَری شَش ماه مِژدَ چَوونرا آنییَرَست، حتی اَگَم هرکَم نونَه پِسَه ایی بَرن.» 8ایله دیَرَ شاگردونکا کن چَی نوم آندریاس بَه و شَمعون پِطروسی برا بَه، واتِشه: 9«زوعَه ایی اِم جگا کا مَندَ کن پِنج گله ژَ نون و د مای دارِ، ولی اِم کییا اِم جماعتیرا وَس بومَی؟» 10عیسی واتِش: «آدَمون بنشامونَه.» اَجگا برکَه ایسبیتی بَه. پس اَیِن کن نِزِک بِه پِنج‌ هَزار مِرد بینَه نشتین. 11اَموقه عیسی نونون پِگَتِش و شکرکَردِ بَه دوملَه، اَیِنی کن نشت بینَه چَوون دلَکا رَسَت کَردِشَه و هِنتَه مایون نی هِنترَ کَردِش و هَرکَمی هَرچَنَه کن اَپیش بَه بَی آداشونَه. 12وَقتی کن جَماعَت هَردِشونَه و سیر آبین، عیسی اِشتَن شاگِردِنِش واتَه: « خِردَ نونِنی کن مَندَیه گرد آکَرَ تا چی ایی هیچ آمَبو.» 13پس اَیِن دانزَ چَرگَه خِردَ نونِنی کن اَ پِنج گله ژَ نونیکا کن جَماعت هَردَشون بَه، جَمع آکَردِشون.

14وقتی مردوم اِم نِشونَه و موعجیزَ کن عیسی اَنجوم دوعَش بَه ویندِشون واتِشون: «واقییَن کن اَ هَه پَیغمبرَ کن پی دِنیا را با.» 15وَقتی کن عیسی سَر آگِنَه اَیِن بَپیشونَه بان، زورینه اَی ببَرِن وپادیشا آکرِن، اَجگا کا بِرِن شَه و اِشتَن تاکَه کورا شَه.

عیسی آوی سَردِرِ گَل بَژَی

16دیَرمازی موقِه، عیسی شاگردن دَیراچَه طَرَفیرا شین، 17لاتیکَکا دَنشتینه ودَیراچه اَوَریرا، شَهرِ کَفَرناحومیرا رَونَه آبین. هوا تاریک آبَه بَه و عیسی هَنوزَنی چَون وَر آمَه نِبَه. 18هَه موقه دَیراچَه اِمی خونه کن بَرکَه وایی راست آبَه بَه خراو آبه. 19وَقتی کن حِدود، شَش کیلیومتر پارو ژَشون بَ، عیساشون ویندَ کن دَیرا سَریکا کا گَل ژِ و لاتیکَکا کا نِزِک آبِه، پس ترسستینَ. 20ولی عیسی اَینِش واتَه: «اَزیمَه؛ مَترسه.» 21دومله اَیِن اَپیشون به عیسی لاتیککا دَنِشامونِن کن لاتیکه جَخت جگا اییرا آرَستَه کن اَیِن اَپیشون بَه بِشون.

عیسی، زندَگی نونَه

22سَوسَه، جماعتی کن دَیراچَه اَوَریکا مَند بین، سَر آگِنینَه کن اَجِگاکا فقط ایلَه لاتیکَه بَه و عیسی نی اِشتَن شاگِردونَّه اَ لاتیکَه کا دَنِشتَه نِبَه، بَلکَم چَی شاگِردِن تنخا شَه بینَه. 23دییَرَلاتیکَه اِنی تیبِریهَ دَیراچَکا آمینَه و اَ جگایی نِزِکی آرَستین کن، اَ آدَمِن، خداوندی شکر کردِ به دوملَه نون هردَشون بَه. 24پس وَقتی مردووم ویندشونَه کن نِه عیسی اَجگا کار و نِه چَی شاگردِن، اَ لاتیکه اون سَردِرِ دَنشتینَه و عیسی دوملَه گَردستِه خونه کَفَرناحومیرا شینَه.

25وَقتی اَیِن عیساشون دَیراچَه اَوَریکا بَویندین، بَی واتِشون: «اِستا، کَینی اِم جگارا آمَه ایشه؟» 26عیسی جواب داشه: «حَییقتا بَه شمَه باتیمَه، چمن دوملَه بَگردستیرون، ولی نِه چمن نِشونَه اون و موعجیزَاون خونه کن ویندَرونَه، بَسکَم اَ نونی خونه کن هَردِرون و سیر آبیرون. 27هَردَ چی ایی را کن هیچ آرَب کار مَکَرَ، بَلکَم هَردَ چی ایی خونه کار بکَرَ کن تا زَیرونَه زندَگی بَمَندیه، هَردَچی ایی کن اینسانی زوعَه بَه شمَه آرَدا. اِمی خونه کن خدا، هَه آستامونیه دَدَ، اینسانی زوعَه سَر مهر تَایید ژِشَه.» 28اَموقه عیسی کا دَپَرسِستین: «اَمه پی چِبکَرَم؟ خدا بَپیشَه کن اَمه چِه کارِنی اَنجوم بدَرَم؟» 29عیسی اَیِنِش جواب دوعَه: «خدا کار اِمَه کن، اَ کَسی سَردِرِ کن رَونَه آکَردَشه ایمان بوعَرَ.» 30پس اَیِن عیساشون واتَه: «چه نِشونَه و موعجیزَ ایی چمَرا بَکَشَه تا اَمه بِوینَم و بَتِه ایمان بوعَوَرم؟ چِه موعجیزَ ایی بَکَشَه؟ 31چَمه بابا اِن وَیاوونیکا مَنّا هَردشون، اَ نونی کن آستامونیکا وارِستَه. هَته کن موقدسَه نِوِشتَه اونکا نِوشتَه آبَه یَه کن: ”موسی، آستامونیکا، اَیِنِش نون داشَه تا بَرن.“ 32عیسی جواب داشَه: «حَییقتا بَه شمَه باتیمَه، موسی نِبه کن اَ نونی آستامونیکا بَه شمَه آداشَه، بَلکَم چمن دَدَ یَه کن حَقیقیَه نونی، آستامونیکا بَشِمَه دَرِ. 33اِمی خونه کن خدا نون، هَیَه کن آستامونیکا ویرَرا و بَه دِنیا زندَگی دَرِ.» 34پس اَیِن عیسی واتِشون: «آقا اوزون اِم نونی اَمه بدَ.» 35عیسی اَیِنِش واتَه: « اَ نونی کن زندَگی بَبَخشستی اَزیمَه. هر کم چمن وَربا اَنشتا آنیَب و هر کم بَمن ایمان بوعَرِ هرگز تِشیش آنیَبن. 36ولی هَته کن بَشمَه واتِم، هر چَنَه کن شِمَه بَمن ویندَرونَه، اَمّا هَنوزَنی ایمان نینَّوَرد. 37گِردِ اَیِنی کن ددَ بَمن دَرِ، چمن وَر بومَنَه؛ و اَکَن چمن وَربا، اَز هرگز اَی رَد نِمَکرد. 38اِمی خونه کن آستامونیکا ویرمَه نیمَه تا اِشتَن خاستَه اَنجوم بِدرم، بَلکَم آمَه ایمَه تا دَدَ خواستَه کن بَمِنِش رَونَه آکَردیَه اَنجوم بدَرم. 39و دَدَ خواستَه کن بَمنش عَندَیَه، اِمهَ کن هیچ کِرَم اَیِنیکا کن اَ بَمن دوعَشَه از دَست نِدَرم، بسکم اَوون دیوون کَردِ روجیکا زِندَ آکَم. 40اِمی خونه کن خواست چمن دَدَ اِمه کن هر کم زوعَه دَیَسه و بَی ایمان بوعَرِ زَیرونَه زندگی بِدارِ، و اَز دیوون کَردِ روجیکا اَی زَندَ آمَکَرد.»

41اَموقه یهودیِن چَی خونه غور ژِشونه، اِمی خونه کن عیسی واتَش بَه «اَزیمَه اَ نونی کن آستامونیکا ویرمَیَه.» 42اَیِن اَواجینه: «مَگَم اِم مِرد، یوسوفی زوعَه، عیسی نیَه کن اَمه چَی دَدَ ونَنَه آزنَم؟ پس چِنتَه ایسَه باتییَه کن، ”اَزآستامونیکا ویرمَه ایمَه“؟» 43عیسی جَوابیکا واتِش: «اِشتَن دِلَکا غور مَژَنَه. 44هیچ‌ کَس نیَشا چمن وَر با غَیراَز اَ کن، دَدَ کن بَمن رَونَه آکردشَه، اَی چمن طَرَف دَراکِنِه، و اَز دیوون کَردِ روجیکا اَی زندَ آمکَرد. 45پَیغَمبرون نِوشتَه اونکا نوشتَه آبَه یَه کن ”گردِ اَیِن خدا کا آموج بَگَتینَه.“ پس هر کَم خدا کا دَرَستَشَه و اَیکا آموج گَتَشَه، چمن وَر آ. 46هیچ کَم دَدَ ویندَش نیی، مَگَم اَ کن خدا طَرَفیکا ببو؛ اَ، دَدَ ویندَشه. 47حَییقتا بَه شمَه باتیمَه، هر کَم ایمان دارِ زَیرونَه زندَگی دارِ. 48اَزاَ نونیمَه کن زندَگی بَبخشستی. 49شمه بابااِن، وَیاوونیکا مَنّا هَردِشونَ ولی هَنی مَردینه. 50اِم اَ نونیَه کن آستامونیکا ویرمَه، تا هَر کَم اِم نونیکا بَرِ، مَمِرِ. 51اَزیمَه اَ زِندَ نون کن آستامونیکا ویرمَه. اَگَم کَسی اِم نونیکا بَرِ تا ابد زِندَ بَمَندیَه. نونی کن اَز دَرِم تا دِنیا زندَگی بدارِ، چمن جَندکَ.»

52اَموقه یهودیون دِلَکا خَرا خِلِه ایی راست آبَه و اَواجینَه: «اِم مِرد چِنتَ بَشای اِشتَن جَندَکی اَمه آدَرِ تا بَرَم؟» 53عیسی اَیِنِش واتَه: «حَییقتا بَه شمَه باتیمَه کن تا اینسانی زوعَه جَندَکی مَرَ و چَی خونی مَهِنجَه اِشتَن وجودیکا زندَگی نیرونه. 54هر کم چمن جَندَکی بَرِ و چمن خونی بِنجِه زَیرونَه زندَگی دارِ و اَز دیوون کَردِ روجیکا اَی زندَ آمَکَرد. 55اِمی خونه کن چمن جَندَک حقیقیَه هَردَنین و چمن خون حَقیقیَه هِنتَنیه. 56کَسی کن چمن جَندَکی بَردی و چمن خونی بِنتی، اَ چمن دِلَکا بَمَندی و اَز، چَی دِلَکا. 57هَته کن دَدَ ای کن زندَگی بَبخشستی بَمن رَونَه آکَردِشَه و اَز دَدَ خونِه زِندَایمَه، پس هَرکم کن بَمنکا بَردی، اَ نی چمن خونِه زندَ بَبیَه. 58اِمَه نونی کن آستامونیکا ویرمَیَه؛ نِه اَ نونی شیوار کن شمه دَدَ اِن هَردِشون اِم حالینه مَردین؛ هَر کَم اِم نونیکا بَرِ تا ابد زِندَ بَمَندیَه.» 59عیسی اِم گَفون وقتی کن شهر کَفر ناحومیکا آموج اَدَریَه، یَهودیون عیبادَتگا کا ژِشَه.

پطروسی ایعتراف کرده

60عیسی خَیلی شاگردونکا وقتی اِم گَفنِشون دَرَستَه واتِشون: «اِم چَتینَه آموجییَه، کی بَشایَ اَی قِبول کَردِ؟» 61ولی عیسی بَموستیَه کن چَی شاگِردِن اِم گَفی خونه کایبین غور ژِ و اَیِنِش واتَه: «اِم گَف شِمَه بَرضَخ آرَکَرد؟ 62پس اَگَم شمَه بِوینَه کن اینسانی زوعَه اَ جگا ایرا کن چیمی بَه نَه مند بَه، کَفا بَشیَه چه بَکَرون؟ 63خدا روحَه کن زندَگی دَرِ؛ جَندَک اَصلا نییَشا زندَگی بَدرِ. گَفِنی کن اَز شِمَرا واتِمَه روح و زِندَگیَه. 64ولی شمَه دِلَکا بعضیِن هستنینَه کن ایمان نینَّوَرد.» اِمی خونه کن عیسی اَوَّلیکا اَزنیَه کن کیین ایمان نینّورد و کییَه اَ کن بَی خَیانَت بَکَیَه. 65چَی بَه دوملَه عیسی واتِشه: «اِمی خاطِر بَه کن شمَه واتِم کن هیچ‌کَم نیَشا چمن وَر با مَگم اِمکن آستامونیَه دَدَ وَریکا بَی آدوعَشون ببو.»

66اِمی به دوملَه، عیسی خَیلی شاگردونکا آگَردستینه و دِ چَی دوملَه نِشین. 67پس عیسی اَ دانزَ شاگردی واتِش: «شمَه نی بَپیرونَه بشَه؟» 68شَمعون پِطروس جواب داشَه: «آقا چیکی وَر بشَم؟ زَیرونَه زندَگی گَفن، اِشتِه وَریکارَ. 69اَمه ایمان وَردَمونه و سَر آگِنَه ایمون کن ته، خدا اَ قدوسیشه.» 70عیسی اَوون جواب داشه: «مَگَم شمَه دانزَ نفری من اینتخابم کَردَ نی؟ با اِم حال، ایلَه شمَکا اِبلیسَه.» 71عیسی شمعون اسخریوطی زوعَه یهودا خونه کن ایلَه اَ دانزَ گِلَه شاگردیکا به گَف ژِشَه، کن اَ اَپیش بَه عیسی تسلیم بکَرِ.

Currently Selected:

یوحنا 6: CTB

Highlight

Copy