یوحنا 9
9
عیسی ایلَه مادر زادَ ناوینا ایی شفا درِ
1عیسی کن کایبَه راه کا شِه، مادر زادَ ناوینایی ویندِشَه. 2چَی شاگردن اَیکا دَپَرسِستین: «اِستا، کی گِناخ کردشَه کن اِم مِرد ناوینا دِنیا آمیَه؟ اَ اِشتَن یا چَی نَنه ودَدَ؟ 3عیسی جواب داشَه: «نِه اَ گناخ کردَشَه، و نِه چَی نَنه دَدَ؛ بسکَم اِنتَرَ بَیَه تا خدا کارِن اَیکا دیارآبون. 4تا روجیکا مَندَیَه پی چمن رَونَه آکَری کارون اَنجوم بِدَرَم؛ کا شَو آبِه و هیچ کس نِیَشا شویکا کار کَردِ. 5تا وَقتی کن دِنیاکا هِستیمَه، دِنیا نوریمَه.» 6اِمی واتشَه و زَمینی سَرتوو ویکَردِشَه و تو نَه گیلی سی آکَردِش، اَ گیلی اَ مِردی چَمون سَرمالِستِش 7و بَی واتِشَه: «بش و سیلوآمی حووضیکا بوشور.» (سیلوآمی معنی ”فرستادَیه“) پس اَ ناوینا اَ مِرد شَه و شوشتشَه و اَجگا کا چی چَمِن بینا آبین و ویگردِستَه.
8خمسوعَه اِن و کَسِنی کن چیمی بَه نَ اَمِردی گَدایی کَرد موقه ویندَشون بَه، اَواجینَه: «مَگَم اِم هَه نیَه کن اَنشیَه و گَدایی اَکَریَه؟» 9بعضی واتِشون: «هَیَه.» بعضی نی واتِشون: «نِه بَلکَم بَی بَمندی.» اَمّا اَ اِشتَن یَژَن اَواجیَه: «اَز هَه ایمَه.» 10پس، اَیکا دَپَرسستین: «چِنتَرَ اِشتِه چَمِن آج آبینَه؟» 11اَ جواب داشَه: «اَ مردی کن چَی نوم عیسی اَ گیلیی سِی آکَردِش و چمن چَمون سَرمالستش و بَمن واتِشَه ” سْیلوآمی حووضیرا بش و بُوشور.“ پس از شیمَه شوشتِمَه و چمن چَمن بینا آبین.» 12اَیِن بَی واتِشون: «اَ کرَم جگاکارَ؟» اَ مِرد جواب داشه: «نمَموست.»
13پس اَمِردی کن چیمی بَه نَ ناوینا بَه، فَریسیون فرقه عالیمون وَر وَردِشونَه. 14اَروج کن عیسی گیلی سِی آکَردشَه و چَی چَمِنِش بینا آکَردَ، یَهودیون موقدَسه شنبَه به. 15، پس فَریسیِن نی اَیکا دَپَرسستین کن چِنتَرَ چَی چَمن آج آبینَه. اَ مِرد جواب داشَه: «اَ چمن چَمون سَرگیلی مالستش و شوشتِمه و ایسَه کایمَه ویندِ.» 16بعضی فَریسیون فرقه عالیمونکا واتِشون: «اَ مِرد خدا کا نیَیه اِمی خونه کن موقدسه شنبه روجی قانونی غَم نیَرد.» ولی دییَرَ آدَمِن واتِشون: «چِنتَه گِناخکارَ آدَمی بَشایَه اِنتَرَ نِشونَه اِن و موعجیزَ اِنی اَنجوم بدَرِ.» و چَوون دِلَکا ایختلاف دَگنستَه. 17پس اَیِن دیَرَ کَرَرا اَ مِردی کن چیمی بَه نه ناوینا بَه واتشون: «ته اِشتَن چَی خونه چه باتیشَه؟ اِمی خاطر کن اَ اِشتِه چَمون بینا آکَردشَه.» اَ مِرد واتش: «اَ پَیغَمبریَه.»
18اَمّا یهودین باور نَکَرینه کن اَ ناوینا بَه و چَی چَمن آج آبه اینه، تا اِمکن اَ مردی دَدَ نَنَه خِلِه کَردِشون 19و اَوونکا دَپَرسِستین: «اِم شِمَه زوعَیَه، هَه کن باتیرون ناوینا دِنیا آمَه؟ پس چِنتَرَ کن ایسَه بَویندیَه؟» 20چَی دَدَ نَنَه جواب داشون: «بَموستیمون کن اِم چَمه زوعَه یَه و بَموستیمون کن ناوینا دِنیا آمَیَه. 21ولی ایسَه اِم کن چِنتَرَ بینا آبه یَه، و یا کی چَی چَمون آج آکَردَشَه، اَمه نِزنَم. بَیکا دَپَرسَه. اَ اَلمَندَ و اِشتَن اِشتَن خونِه گَف بَژَیَه.» 22اَیِن اِمی خاطِراِنتَر واتِشون کن یهودیونکا اَتَرسینَه. اِمی خونه کن یهودیِن چیمی بَه نَ تَوافق کردَشون بَه کن هر کم اِشتَن زونی سَر بوعَرِ کن عیسی هَه وَعدَ آدوعَه مسیحه، اَی پی عیبادتگا کا ایخراج بِکَن. 23اِمی خاطِر بَه کن چَی نَنه دَدَ واتِشون: «اَ اَلمَندَ؛ بَیکا دَپَرسَه.»
24پس هَنی اَ مِردی کن چیمی بَه نَ ناوینا بَ، خِلِه کَردِشونَ و بَی واتِشون: «حَییقتی واتِنَه خدا جلال بِدَ، اَمه بَموستیمون کن اَ مِرد گِناخکارَ.» 25اَ جواب داشه: «چَی گِناخکاربِه نمَموست. تاکَه ایلَه چی بَموستیم، و اَ اِمَه کن ناوینا بیمه و ایسَه کام ویندِ.» 26اَیِن بَیکا دَپَرسستین: «اَ بَتنهَ چِش کردَ. چِنتَه اِشتِه چَمون آج آکَردشه؟» 27اَ مِرد کن چیمی بَه نَه ناوینا بَه، اَیِنِش جواب داشَه: «اَز کن ایسَه نی بَشمَه واتِمه، شمه گوش نینَّکَرد؛ چیرا اَپیرونَه هَنی درَسَه؟ مَگَم شمه نی بَپیرون چَی شاگِرد ببَه؟» 28اَیِن بَی زَمون آداشون و واتِشون: «ته چَی شاگردیشَه! اَمه موسی اِ پَیغَمبَری شاگردیمونَه. 29اَمه بَموستیمون خدا موسی نَه گَف ژَشَه. ولی نِزنَم کن اِم آدَم کِرَم جِگاکا آ.» 30اَ مِرد چَوون جَوابیکا واتِش: «عَجَب، اِم مِرد چمن چَمون سی آکردشه شمَه هَنوزَنی نینَّموست کرَم جِگاکا آ. 31اَمه بَموستیمون کن خدا گِناخکارون سَسی گوش آنییَدا، ولی اَگَم کَسی خدا پَرست ببو و چَی ایرادَ اَنجوم بدَرِ، خدا بَی گوش آرَدا. 32دِنیا شروو بِه کا تا ایسَه هرگز کَسی درَستَش نیَه کن، کَسی نَنَه زَندَ ناوینایی چَمون، آج آکَردَش ببو. 33اَگَم اِم مِرد خداکا نِبَه، کاری نَشایَه کَردِ.» 34اَیِن چَی جَوابیرا واتِشون: «ته ایی کن اِشتِه نافَه گِناخینه ژَشونه و گِناخی دِلَکا دِنیا آمَه ایشَه، اَمه کایشَه دَرس دوعِه؟» پس اَمِردی عیبادت گاکا بِرن بَرکردِشون.
35وَقتی عیسی دَرَستشَه کن اَ مِردی بِرن برکَردَشونه، اَش پَیدا کردَ و بَی واتش: «تِه اینسانی زوعَه ایمان داری؟» 36اَ مِرد جواب داشَه: «آقا، بواج اَ کِیَه تا بَی ایمان بوعَرِم.» 37عیسی بَی واتِش: «ته اَی ویندَرَ! هَیَه کن ایسَه بَتنَه گَف دَرِ.» 38اَ واتِش: «آقا، ایمان دارم.» و چی ناریکا زنگ ژِشه و اَی پرستش کردِشَه.
39عیسی واتِشَه: «اَز دیوون کرد خونه اِم دِنیا دِلَرا آمَه ایمَه تا اَیِنی کن نینَّویند بوینن، و اَیِنی کن بَویندین ناوینا آبون.» 40بعضی فَریسیون فرقه عالیمونکا کن چَی وَر بینَه، وَقتی اِم گَفِنِشون دَرَسته، دَپَرسِستین: «اَمه نی ناوینا ایمون؟» 41عیسی اَیِنِش واتَه: «اَگَم ناوینا بینهَ تغصیری نِداریرون؛ اَمّا ایسَه کن ایدعا بَکَرون کن، ”اَمه بَویندیمون“ تقصیرکار بَمَندیرون.
Currently Selected:
یوحنا 9: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
