انجیل لوقا 19

عیسی و زَکّای

1عیسی شهر اَریحا دِلَه دِرمَه و شَهری دِلَکا کایبَه دَیوَردِ. 2اَجگاکا مِردی اَمونیَه کن چَی نوم زَکّا بَه. زَکّا خَراج ویگِرون رَییس بَه و ثیروَتمَند بَه. 3زَکا اَپیش بَ بِوینِه عیسی کییَه، ولی یالَه جماعَتی خونِه اَ نَشایَه عیسی ویندِ اِمی خاطر کن فوتَر بَه. 4پس، نَرا ویریتهَ و چینارَ داریکا پِشَه تا عیسی بِوینِه، اِمی خاطِرکن قرار بَه عیسی اَ راکا دَیورِ. 5وَقتی عیسی اَ جگا را آرَستَه، کَفا دَیشتِشَه و بَی واتِش: «زَکّا، بِتاو و ویرا، اِمی خونه کن اومروج پی اِشتِه کَکا بِومونِم.» 6زَکّا نی جَخت ویرمَه و خشینَه عیساش اِشتَن کَرا بَردِشَه. 7مردوم وَقتی کن اِمی بَویندینَه، گرد قور ژِشونَه و واتِشون: «عیسی ایلَه گِناخکاری مِیمان بَیَه.» 8زَکّا اِشتَن جِگاکا راست آبَه و خداوند عیساش واتَه: «‌چمن سرور دَیَس، نصف اِشتَن مالی گیدَلیون بَبخشِستیم، و اَگَم کَسی کا نا حَقه چیی ایی ویگَتَم ببو، چار برابر بَی آمَگاردِنست.» 9عیسی بَی واتش: «اومروج نیجات اِم کَرا آمَه یَه، اِمی خاطر کن اِم مِرد نی ابراهیمِ پَیغَمبری نَتاجیکارَ. 10اِمی خونه کن اینسانی زوعَه آمَیَه تا گین آبه دوملَه بگَردِ و اَی نیجات بدَرِ.»

طِلِه اینَه سِکَه اون مَثَل

11هَتَه کن اَیِن اِم گَفون گوش اَکَرینَه، عیسی اِشتَن گَفی ایدامه کا، مَثَلی وَردشَه، اِمی خونه کن اورشلیمی نِزک بَه و مردوم گمون اَکَرینَه خِداپادیشاهی هَه زَمانیکا دیار آرَب. 12پس عیسی واتِش: «ایلَه نجیب‌زادَ ایی دورَ مَملَکَتیرا شَه تا اِشتَنرا مَقام پادیشایی بِه دَست بوعَرِ و چَی بَه دومله ویگَردِ. 13پس، دَ نفر اِشتَن پاسَریونکا خِلِه کَردِشَه و هرکَمی ایلَه طِلهِ اینَه سِکَّه آداشَه کن ایلَه کاریگَری سه ما مژد بَه، و اَیِنِش واتَه: ”تا چمن آگَردِسته اِمینَه کار بکَرَ.“ 14اَمّا مَردومِنی کن قرار بَه اَ مِرد چَوون سَردِرِ سَلطَنت بکَرِ، اَیکا نیفَرت دارین؛ اَیِن اَ مِردی پِشت آکَر قاصیدِنی عَندِشونه تا بواجن کن: ”اَمه نِپیستِمونَه اِم مِرد چَمَه سَر سَلطَنَت بکَرِ.“ 15وقتی اَ مِرد اِشتَن مَقام پادیشایی بِه دَست وَردِشَه ویگَردِستَه، و دَستور داشَه پاسَری یِنی کن اَیِنِش سِکَّه آدوعَش بَه، خِلِه بِکَن کن چَی وَر بان، تا بِزنِه هَر کَم چَنَه بَرَ کَردَشونه. 16اوّلی چَی وَرآمَه و واتِشَه: ” چمن سرور، اِشتِه سکۀ دَ گِلَه سکۀ بَرَ داشَه.“ 17پادیشا بَی واتِش: ”آفرین، چاکه پاسَری! اِمی خونه کن کَمه چیکا امانتدار بیشَه، دَ گلَه شهری حِکومَتی بَتِه آمَدا.“ 18دِوُّمی آمَه و واتِشَه: ” چمن سرور، اِشتِه سکۀ پِنج گِلَه سکۀ بَرَ آداشَه.“ 19پادیشا بَی نی واتِش: ” تِه نی پِنج شَهری سَردِرِ حُکمرانی بَکَش.“ 20چَی بَه دوملَه دیَری آمَه و واتِش: ”چمن سرور، بِفَرما اِم اِشتِه سکۀ! اَی پارَایکا پِپشتِمَه و غَم هَردِم. 21اِمی خونه کن بَتِکا اَترسیمَه، چون سختگیرَ مِردی هِستیش. اَچی کن آنوعَرنیَه، پِشَگَت، و اَچی کن کَشتَر نیه، بَدورنوستیش.“ 22پادیشا بَی واتِشَه: ” اَی آوشَرَ پاسَری، بَتِه اِشتِه واتَه گَفونَّه مَحکوم بَکَم. تِه کن بَموستیشَه سختگیرَ مِردی هِستیم، اَچیی کن نوعَم نی پِمَگَت و اَچی ایی کن کَشتَم نی بَدورنوستیم، 23پس چیرا چمن پولی صرّافون آنِدارَ تا وَقتی کن ویمَگَردِست اَی چَی بَرَنَه پس ویگِم؟“ 24پادیشا اَینی کن اَجگاکا مَند بینِش واتَه: ”سِکه اَیکا ویگِرَ و اَ کن دَگلَه سِکه دارِ بَی بدَرَ.“ 25اَیِن پادیشاشون واتَه: چَمَه سَروَر، اَ کن اِشتَن دَ گلهَ سکه دارِ!“ 26پادیشا جواب داشه: بَه شمَه باتیمَه، هرکَمی کن دارِ بَی ویشتَر آدوعِه بَبیَه؛ ولی اَ کن نیشَه، حتی هه کن دارِ نی اَیکا وینَّگَت. 27ایسَه چِمِن اَ غَنیمِن کن نَپیشون بَ چَوون سَردِرِ سَلطَنَت بکَم اِم جگا را بوعَرَ و چمن ناریکا چَوون مِلی دَبرَ.»

عیسی ایلَه شاه شیوار اورشَلیمی دِلَرا آمَه

28وقتی عیسی اِم گَفِنِش ژَ، اَوونکا ناتَر اورشلیمی طَرَف رادَگِنِستَه. 29وَقتی عیسی آوادی اِنِه بِیت‌فاجی و بِیت‌عَنْیا کن، کوه زَیتونیکا بینَه، نِزِک آبَه، دِ نفراِشتَن شاگردونکا رَونَه آکَردِشَه و اَیینش واتَه: 30«آوادی ایرا کن شمه ناریکارَ، بِشَه. وَقتی آوادی دِلَه دَشیرون، آبَستَه خَرَ کِرَایی بَویندیرون، کن تا ایسَه کَسی چَی سَریکا دَنِشتَه نیَه. اَی آکَرَ و اِم جگا را بوعَرَ. 31اَگَم کَسی شِمَکا دَپَرسِستَه: ”چیرا اَی آج بَکَرون؟“ بواجَه: ”خداوَند بَی لازم دار.“‌» 32پس اَ دِ نَفَر شینَه و گردِ چییون هَته ویندِشون کن عیسی واتَش بَه. 33وَقتی کن خَرَکِرَ لافندی آرَکَرینَه، چَی صاحیبِن، اَیِنِشون واتَه: «چیرا خَرَکِرَ لافندی آج بَکرون؟» 34اَیِن جواب داشون: «خداوند بَی لازم دارِ.» 35اَیِن خَرَکِرَ عیسی وَر وَردشون. چَی به دوملَه اِشتَن ردااون خَرَکِرَ سَریکا ویرَفندشون و عیساشون چَی سَردِرِ نشام نیشون. 36هِنتَه کن عیسی راه کا اَشیهَ مردوم اِشتَن رداون چَی راه سَریکا جیرَکَرین. 37وَقتی عیسی کوه زَیتونی ایشپَه ویرَ نِزِک آرَبیَه، چَی شاگردون جَماعَت گِرد، خَشینهَ ، گِردِ موعجیزَ اِنی خونه کن بَیکا ویندَشون بَه، تَتَّه لَسَّه نَه خدا ستایش اَکَرینَه 38و اَواجینَه:

«موتبارَکَ پادیشاایی کن خداوندی نومینَه آ.

صلح و سلامتی آستامونیکا و شِکوه و جلال عرشِ بَرینیکا ببو!»

39بَعضی فَریسیونکا کن جمعیتی دلَکا بین عیساشون واتَه: «اِستا، اِشتِه شاگردون تَشَر بِژَن!» 40عیسی جواب داشَه: «بَه شمهَ باتیم اَگَم اِمِن نی ساکیت آبون، اِم سِه اِن لَسَّه بَژَن.

41وَقتی کن عیسی اورشلیمیکا نِزک آبهَ و شهرِش ویندَ چَیرا بِرَمِستَه 42و واتِش: «کاش کن تِه، ها، تِه اومروج اَزنیشَه کن چِه چیِنی تِرا صلح و سَلامتی وَرِ. ولی ایسَه اِم چییِن اِشتِه چَمیکا نون آبَه اینَه. 43چون روجِنی بومَنَه کن اِشتِه غَنیمن اِشتِه دوور سَنگَر سِی آنَّکَرد و بَته محاصیرَ بَکَنه، و هَر وَریکا بَتِه فشار بوعَردینَه؛ 44و بَتِه خاکینَه یَکسان بَکَن، تِه و خِردَنِنی کن اِشتِه دِلَکانَه. اَیِن نینَّشت کن سِه ایی سِه سَر بومونِه. چون اَ زَمانی کن خدا اِشتِه آرَستِه آمَه سَرآنِگِنیشَه.»

عیسی مَعبَدی دِلَکا

45عیسی مَعبَدی دِلَه دَرمَه و اَیِنی کن اَ جِگاکا کاسبی دَرِ بین، دَمَندَ اَوون بِرِن بَرکَردِ، 46و اَیِنِش واتَه: «موقدسَه نِوِشتَه اونکا نِوِشتَه آبَیَه کن ”چمن که، کَه اِ عیبادَت بَبیَه،“ ولی شِمَه، اَی پِتارچییون لونَه سِی آکَردَرونَه.»

47عیسی هَمَه روج معبَد یکا آموج اَدَریَه. سران کاهینِن و توراتی موعَلیمِن و قامِه یَهودی رَییسِن ایلَه راهی دوملَه بینَه تا عیسی نیفیت آکَرِن. 48ولی اِشتَن کاری اَنجوم دوعِه را راهی پَیدا نِکَردِشون، اِمی خاطر کن گِردِ آدَمِن صِدقِه دِلینَه عیسی گَفون گوش اَدَرینَه.

Currently Selected:

انجیل لوقا 19: CTB

Highlight

Copy