انجیل لوقا 6
6
عیسی موقَدَسَه شَنبَه صاحیبَه
1یَهودیون ایلَه موقَدَسَه شَنبَه روجونکا، وَقتی عیسی گَندمهَ باغون دِلَکا دَیوریَه، چَی شاگردِن گَندمهَ جومبورَاون اَچینینَه و اِشتَن دَستَه کَفینَه سونین، و هَرین. 2اَمّا چَنگِله فَریسیون فِرقَه عالیمونکا واتشون: «چیرا کاری بَکَرون کن شَرعَا چَی اَنجوم موقدسَه شَنبَه روجیکا دِرِست نییَه؟» 3عیسی جواب داشه: «مَگَم خَندَرون نی اَموقه کن داوود پادیشا و اَیِنی کن بَینَه دَرِ بین اَنشتا بینَه داوود چِش کَردَ؟ 4چَنتَه داوود خدا کَه دلهَ دَرمَه و مُوقدسَه نونی پِگَتِشَه و هَردِش و اِشتَن هَمراهون نی آداشَه، هَه نونی کن چَی هَردِ، شَرعا غَیر اَز مَعبَدی کاهینِن کَسیرا دِرِست نیَه.» 5و عیسی اَیِنِش واتَه: «اینسانی زوعَه موقَدسَه شَنبَه صاحیبَه.»
عیسی موقدسَه شَنبَه روجیکا شفا بَدای
6ایلَه دییَرَ موقَدَسه شَنبَه کا، عیسی یَهودیون عیبادَتگا دِلَه دَرمَه و آموج اَدَریَه. مِردی اَ جِگاکا بَه کن چَی راسته بال لَم بَه. 7توراتی موعَلیمِن و فَریسیون فِرقَه عالیمِن، چَمِشون عیسی کا بَ تا بِوینِن موقَدَسَه شَنبَه روجیکا کَسی شفا بَدایَه یا نِه؛ تا بشان رِقنَه ایی چَی موتَهَم کَردِرا پَیدا بِکَن. 8ولی عیسی کن چَوون فِکرون اَزنیَه، اَ مِردی کن چَی بال لَم بَه واتشَه: «پِب و اِم جِگاکا پا بِمون.» اَ مِرد نی راست آبَه و اَجگاکا پامَندَ. 9عیسی اَیِنش واتَه: «اَزشمَکا دَمَپَرسِست شرعا موقَدَسَه شَنبَه روجیکا چاکی کَردِ دِرستَه یا بَدی کَردِ؟ کَسی جانی نیجات دوعِه یا اَی نیفیت آکردِ؟» 10عیسی آدَمِنی کن چَی دووریکا بینَه گِردی دَیَشتِشَه و اَ مِردی واتِش: «اِشتِه بالی دراز اَکَن!» اَ نی اِنتَرَ کردِشَه وچَی بال سِی آبَه. 11ولی توراتی معَلیمِن و فَریسیِن بَرک آسرَنگِستین و یَندِنه گَفَ ژَنِه اَکَرینَه تا بِوینِن عیسی نَه پی چِبکَرن.
دانزَ گِلَه رَسولی اینتخاب کَردِ
12ایلَه اَ روجونکا، عیسی دِوا کَردِ خونِه کورا شَه و شَو دِرازَ تا صِب خدا حِضوریکا دِوا کَردِش. 13وَقتی صِب آبَه اِشتَن شاگردون خِلِه کَردِشَه، و چَوون دلَکا دانزَ نفرش اینتخاب کردَ و چَوون نومش رَسولِن پِناشَه: 14شَمعون (کن چَی نومی پِطروس پِناشه)، آندریاس پطروسی برا، یعقوب، یوحنا، فیلیپُس، بَرتولْما، 15مَتّی، توما، یعقوب حَلْفای زوعَه، شَمعون کن بَی وَطَن پَرَست خِلِه اَکَرینَه، 16یعقوبی زوعَه یَهودا، و یهودا اَسْخَریوط کن عیساش خَیانت کردَ.
خَشی شِمَه حالیرا
17عیسی اَوونَّه کوکا ویرمَه و ایسبیتیکا پابِند آبَه. یالَه جَماعَتی چَی شاگردونکا و ورَ آدَمِنی کن وِلَتِ یهودیَه گِردِ جِگا اونکا، شهر اورشلیمی کا و شَهرِنِه صور و صیدونیکا کن دَیرا کَناریکا بینَه، اَجِگارا آمَه بین. 18اَیِن آمه بین تا عیسی گَفون دَرَسن و اِشتَن آزارونکا شفا بیگِن؛ و اَ آدَمِنی کن شَیطونیَه روحونکا عَذاب اَکَشینَه، شفا اَگِرینَه. 19جَماعَت گرد تَقلَّا اَکَرین تا عیسی دَست آسا بِکَن، اِمی خاطر کن خِنَری اَیکا بِرون آی کن گردی شفا اَدَریَه.
20عیسی اِشتَن شاگردون دَیَشتَه و واتش:
«خَشی اَینی حالیرا کن گیدَلی ایرون،
اِمی خاطرکن خدا پادیشاهی شمَه شِنَه.
21خَشی شمه حالیرا کن ایسَه اَنشتا اییرون،
اِمی خاطرکن سیر آنَّب.
خَشی شِمَه حالیرا کن ایسَه کاینَه بِرَمِستِه،
اِمی خاطرکن بَخوروستیرونَه.
22«خَشی شمَه حالیرا اَموقه کن مردم، اینسانی زوعَه خونه شمه سَردِرِ نیفرت بیگِن و شمَه اِشتَن جَمعیکا رَت آکرن و زَمون بِدرِن و شِمَه بَد نوم بِکَرن. 23اَ روجیکا خَش بِبَه و خَشی خونِه دوش بکَرَ اِمی خاطر کن شمه پاداش آستامونیکا یالَه. چیرا کن چَوون بابا اِن نی پیغَمبَرونَّ اِنتَرَ رفتار کَردشونَه.
بِرامِّه شِمَه حالیرا
24«ولی بِرامِّه شمَه حالیرا کن ثیروَتمَندیرون،
اِمی خونه کن شِمَه اِشتَن دِلی خَشی ویگَتَرونَه.
25برامِّه شمَه حالیرا کن ایسَه سیریرون،
اِمی خاطرکن اَنشتا بَبیرون.
برامِه شِمَه حالیرا کن ایسَه بَخوروستیرون،
اِمی خونه کن عازیَه بَگَتیرون و بَبرَمِستیرون.
26برامِه شمَه حالیرا اَموقه کن مَردوم گِرد شِمَکا تَریف بَدانَه، اِمی خونه کن چَوون بابااِن نی دِروعهَ پَیغمبَرونَّ اِنتَرَ رفتار اَکَرینَه.
اِشتَن غَنیمون موحبت بکَرَ
27«ولی شمَه ایی کن چمن گَفی کان دَرَستِه، بَشِمَه باتیمَه کن اِشتَن غَنیمون موحبت بِکرَ و اَیِنیرا کن شِمَکا نیفرت دارن چاکی بکَرَ. 28کَسِنیرا کن بَشِمَه نفرین بَکَی، بَرَکتَه دِوا بکَرَ، و کَسِنیرا کن بَشِمَه اَیذَت بَکَی، خَیرَ دوا بکَرَ. 29اَگَم کَسی شمه صَفَتی ایوَری سِلَّه بژَنِه، صَفَتی دییَرَ وَری نی چَی طرف آگاردِنَه تا بِژَنِه. اَگَم کَسی اِشتِه ردا بَتکا ویگَتِش، اِشتِه شَوی نی بَی آدَ تا بِبَرِ. 30اَگَم کَسی چیی ایی بَتکا بَپیشَه بَی آدَ، و اَگَم کَسی اِشتِه مالی بَتِکا آبَرِ، اَیکا پس مَخا. 31مَردومینه هَته رفتار بکَه کن بَپیرونهَ اَیِن شمه نَه رفتار بکَرِن.
32«اَگَم تاکَه اَیِنی سَرمحبت بکَرَ کن شمه موحبت بَکَنَه، چه برتَری ایی بَداشتیرون؟ اِمی خونِه کن حتی گِناخکارِن نی، اَیِنی سَردِرِ کن اَوون رَی بَداشتینَه موحبت بَکَن. 33و اَگَم فقط کَسِنیرا چاکی بکَرَ کن شمَرا چاکی بَکَنَه، چه برتری بَداشتیرون؟ اِمی خونه کن حتی گِناخکارِن نی اِنتَرَ بَکَن. 34و اَگَم فقط کسِنی قرض آدَرَ کن چَی عَوَضی اینتظاری دارَ، چه برتری بَداشتیرون؟ حتی گِناخکارِن نی گِناخکاروون قرض آنَّدا تا روجی اَوونکا اِشتَن قَرضی پس ویگِن. 35اَمّا شمه، اِشتَن غَنیمون موحبت بکرَ، چَوون سَردِرِ چاکی بِکَرَو اَوون قَرض آدَرَ، بی اِمکن چَی پس ویگَتِه اینتیظاری بِدارَ، کن شمه اَجر یال بَبیَه، وخدایِه متعالی، خردنِن بَبیرون، اِمی خونِه کن خدا ناشُکرو آوشرَ آدَمونَّه مِرَبانَه. 36پس رَحم بکَرَ، هَتَه کن شمه آستامونیَه دَدَ رَحم بَکَیَه.
دییَرَ آدَمون سَر قیضاوت کَردِ
37«دیوون مَکَرَ تا شمَه سَردیوون مَبو. محکوم مَکَرَ تا مَحکوم آمَبَه. بِبَخشَه تا بَخشیدَ آبَه. 38بِدَر کن بَه شِمَه آدوعِه بَبیَه. ایلَه پَتلَمَه پَیمونَه اینَه کن، فِرچین وتَکان آدوعَشونَه و کوکورو آبَه یَه شِمَه دومَنَه کا دَنَّکَرد! اِمی خونه کن هر پَیمونه اینَه کن بدَرَ، هه پَیمونه نَه بَه شمَه آدوعِه بَبیَه.»
39عیسی اِم مَثَلی نی چَوونرا وَردِشَه: «مَگم ایلَه ناوینا بَشایَ دییَر ناوینا راه آمونِه؟ مَگم هر دِ چالی دِلَکا دَنِگِنن؟ 40شاگرد، اِشتَن اِستا کا کَفا تَرنیه، ولی هر کم چَی آموج و تربیت کامیل آبو، هنتَه اِشتَن اِستا شیوارآرَبن.
41«چیرا چینِپولی کن اِشتِه براچَمیکارَ بَویندیشَه، اَمّا اَ دارَکونَه ایی کن اِشتِه چَمی دِلَکارَ سَر آنیشَگِنِست؟ 42وَقتی اَ دارَ کونَه کن اِشتِه چَمیکارَ نیشَویند، چِنته بَشاشَه اِشتِه برا بواجی: ”برا، بَرزِن چینِپولی اِشتِه چَمیکا بَروَرم“؟ اَی دِ سَرَ کَرچَنگ، اوَلیکا اَ دارَ کونَه اِشتِه چَمیکا بَروَ، اَموقه بیتَر بَشاشَه ویندِ تا چینپولی کن اِشتِه براچَمیکارَ بَرکَری.
دار و چَی میوَه
43«هیچ چاکَ داریی، بَدَ میوَ اکین نیَوَرد و هیچ بَدَ داریی، چاک میوَ نیَدا. 44هر داریی چَی میوَکا بَبی آزنستِه. اِمی خاطر کن نِه چغیکا بَبی اِنجیل چییِه و نِه خِندِلَه بریکا بَبی اَنگِر چیِه! 45چاکَه آدَم اِشتَن دلی چاکَه خَزانَکا چاکیی برن بوعَردی و بَدَ آدَم اِشتَن دِلی بدَ خَزانَه کا بَدی بِرن بوعَردی. اِمی خونه کن زون، اَچی ایکا کن دل اَیکا کوکوروعَه، گَف بَژَی.
اَلمندَ میعمار و جائیلَه میعمار
46«چِیرا بَمن سروَرم، سرورم خِلِه بَکَرون، ولی اَچیی کن اَز بَشِمَه باتیمَه اَنجوم نینَّدا؟ 47بَشِمَه آمونم کن، اَ کن چمن وَر بومَی و چمن گَفون درَرَست و اَوون اَنجوم بَدای چیکی شیوارَ. 48اَ کَسی بَمَندیَه کن کَه سِی آکَردِ خونه، زَمینی دول کَندِ شَه و کَه هیمی کازَ مَغاری سَر آناشَه. وَقتی کن لَیس آمَه و لَیسآو اَ کَه سَرفشار وَردِش، نِشاستِشَه اَ کَه تم دَروَرِ، اِمی خونه کن آمبَست سِی آبَه بَه. 49اَمّا اَ کن چمن گَفون درَرَست ولی اَوون اَنجوم نییَدا، کَسی بَمَندیَه کن بی هیمَه کَه ایی، خاکی سَردِرِ سِی آکَردَشه. وَقتی لَیس آو اَ کَه سَر فشاروَردِشَه، جَخت اَ کَه ویرَریست و چَی خَراویی یال بَه.
Currently Selected:
انجیل لوقا 6: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
