مَرقُس 7
7
رَسمِن وحِکمِن
1فَریسیون فرقَه عالیمِن، بَعضی توراتی موعَلیمونَّه کن شَهراورشَلیمیکا آمَه بین، عیسی وَر جَم آبین. 2اَیِن ویندِشون، عیسی بَعضی گِلَه شاگِردن جیفینینَه بالونَّ یعنی اَنَشورَ بالونَّ غَذا بَردین. 3اِمی خونه کن فَریسییِن و گِردِ یَهودییِن، ایسبیَه ریشون سِنَّتی نَه اِشتَن بالون قَشَنگینَه نِشورن، هَردَ چی نینَّرد. 4وَقتی بازاریکا بومَن، تا مَشورِن چیی نینَّرد. و هِنتهَ وِرَ دییَررَسم و رسومِون نی اَنجوم دَرِن. هِنتَه، قَدرَ اون، غَذونِن، مِسَه غَبون و صَندلیون شوشتِه شیوار. 5فَریسیِن و توراتی موعَلیمِن عیسی کا دَپَرسِستین: «چیرا اِشتِه شاگِردِن ایسبیَه ریشون رَسم و رسومون واتَنَه رَفتار نینَّکَرد و جیفینینَه بالینَه غَذا بَردین؟» 6عیسی جواب داشَه: «اَشَعیا پَیغمبَرشِمَه دِ سَرَ کَرچَنگون خونِه چَنَه چاک پیشگویی کَردِش! هَتَه کن نِوشتَه آبَه یَه،
«”اِم قام اِشتَن لِوونَه چمن حُرمَتی غَم بَردینَه،
اَمّا چَوون دِل منکا دورَ.
7اَیِن دَدار بَمن پَرَستش بَکَن،
و اَیِن خدا حِکمون عَوَض، اینسانیَه حِکمون مَردومی آموج بدان.“
8شِمَه خدا حِکمی آهَشتَرونَه و اینسانی رَسمو رسومی دَچِکِسته ایرون.»
9چَی بَه دوملَه عیسی واتِش: «شِمَه زیرَنگینَه خدا حِکمی رَد بَکَرون تا اِشتَن رَسم رسومی آمبَست آکَرَ! 10اِمی خونه کن موسی اِ پَیغَمبَرواتِش، ”اِشتَن دَدَ و نَنَه ایحترام بِنَه،“ و ”هَرکَم اِشتَن دَدَ یا نَنَه زَمون بدَرِ، پی بِمِرِ.“ 11ولی شمَه باتیرون آدَم بَشایَه اِشتَن دَدَ یا نَنَه بِواجِه: ”هَر کُمَکی کن پی شِمَه بکرم، قربان هِستَه، یعنی خدا را وَقف بَیَه“ 12و اِنتَرَکِه شِمَه نینَّشت اَ آدَم، هیچ کاری اِشتَن دَدَ یا نَنَرا اَنجوم بدَرِ. 13شمَه اِنتَرَ، اِشتَن رَسمو رسومینَه، کن اَوون دییَر کَسون نی باتیرون، خدا کَلامی باطیل بَکَرون و اِنتَرَ کارون وِر اَنجوم دَرَ.»
14عیسی ایکَرَ دییَر مردومی اِشتَن وَر خِلِه کَردِشَه و اَیِنِش واتَه: «شِمَه گِرد بَمن گوش آدَرَ و اِمی بِفَهمَه: 15هیچ چییی آدَمی بِرنیکا نیَه کن بِشا، چَی وجودیکا دِلَه دَشِه نَه بَی جیفینین آکَرِ، بَلکَم اَ چییِنی کن اینسانی وِجودیکا بِرن بومَی، بَی جیفینین بَکَی. 16هر کم کن چَی گوش دَرَرَست، دَرَسِه!»
17وقتی عیسی مَردومی وَریکا شَه و کَه دِلَه دَرمَه، چَی شاگِردِن اِم مثَلی مَعنی بَیکا دَپَرسِستین. 18عیسی واتِش: «شمه نی هَنوزنی سَر آنِگِنَه؟ مَگَم نینَّموست کن هر چیی کن بِرنیکا آدَمی وِجودیکا دِلَه دَرَش، نیشَا اَی جیفینین آکَردِ؟ 19اِمی خاطر کن چَی دِلیکا دَنیَش، بَلکَم چَی لَوَ کا دَرَش و چَی بَه دوملَه دَفع بَبی.» عیسی اِشتَن اِم گَفینَه، گردِ هَردَ چییِون پاجا اییلام کردِش. 20عیسی واتِش: «اَ چیی کن اینسانی وجودیکا بِرِن بومَی، هَیَه کن بَی جیفینین آرَکَرد. 21چون اَچییِ کن اینسانی وِجودیکا و دِلیکا بِرِن بومَی، اِمِنین: پَلیدَ فِکرِن، بی عِفَتی، پِتارستِه، آدَم کِشتِه، زینا، 22طمع، آوشَر گیری، حیله، هرزَگی، زِرَ بَردِ، توهمَت، یالَه نار بِه و حیماقت. 23اِم بَد چییِن گِرد، اینسانی وِجودیکا بِرن بومَن و اینسانی جیفینین بَکَنه.»
غیریهودیَه ژِنی ایمان
24عیسی اَجِگاکا بَرمَه بِرون و منطَقه اِنِه صور و صِیدونیرا شَه. عیسی ایلَه کَه ایی دِلَه دَرمَه: و نَپیش بَه کَسی بزنِه کن اَ اَجگاکا مندَ. ولی عیسی هنی نِشاستِش اِشتَن نون آکَرِدِ. 25ژِنی کن چَی گِچَه کِلَه شَیطونیه روح داری، وَقتی عیسی خونِه دَرَستِشَه، جَخت آمَه و عیسی لِنگون سَردِرِ بَرگِنِستَه. 26اَ ژِن یهودی نِبَه، بَسکَم اَ منطقَه اِ فینیقیَه سوریَه آدَمونکا بَه. اَ عیسی کا خاشتو خاز کَردِشَه کن اَ پَریانی چَی کِلَکا بِرن بَرکَرِ. 27عیسی بَی واتِش: «بَرزِن اَول خِردَنِن سیر آبون، اِمی خونه کن خِردَنون نونی ویگَتِه و عِسبَه اون نَ کا ویداشتِه درِست نیَه.» 28ولی اَ ژن جواب داشَه: «ها، چمن سَروَر، ولی حتی عِسبَه اِن نی، اَ نونَه خِردَاونیکا کن خِردَنون سِفرَکا بَرَگِنِست بَردینَه.» 29عیسی بَی واتِش: «اِشتِه اِم گَفی خونِه، ویگَرد و بش، کن اَ پَریان اِشتِه کِلَه کا بِرِن بَرمَه!» 30اَ ژِن کَرا شَه، و ویندِشَه کن خردن اِشتَن جِگاکا دِراز آبَه یَه و پَریان اَیکا بِرِن آمَیَه.
عیسی ایلَه کَرخته مِردی شفا دَرِ
31چَی به دوملَه عیسی منطقَه اِ صوریکا ویگَردِستَه و صیدونی راه نَه، جَلیلی دَیراچَه طَرَف شَه. اَ، منطقَه اِ دِکاپولیسیکا دَیوَردَ. 32اَجِگاکا ایلَه مِردِشون عیسی وَر وَردِشونَه کن هِم کَرَخت بَه و هِم جوت. اَیِن عیسی کا خاشتو خاز کَردِشونَه تا اِشتَن بالی چَی سَریکا بِنَرِ. 33عیسی اَ مِردی جَمعیَتی دِلَکا بِرِنیرا و قِرَقیرا بَردِش و اِشتَن اَنگِشتَه اون چَی گوشون دِلَکا آناشَه. چَی بَه دوملَه تو ویکَردِشَه و اَمِردی زونی دست آسا کردِش. 34اَموقه آستامونی دَیَشتِش، آهی کَشتِشَه واَ مِردی واتِش: «اِفَّتَح!» یعنی «آج آب!» 35جَخت اَ مِردی گوشِن آج آبینَه و چَی جوت گیری سِی آبَه و راحَتینَه گَف ژِشَه. 36عیسی اَیِنِش قَدِغَن کَردِشَه تا اِم ایتفاقی خونِه کَسیرا چیی نِواجِن. ولی هَر چَنَه ویشتَر اَوون قَدَغن اَکَری، اَیِن ویشتَر اِم ایتفاقی خونِه گَف اَژَنینَه. 37آدَمِن کن برک تعجوب کردَشون بَه، اَواجینَه: «هَرکاری کن اَ کَردَشَه، چاکَه؛ حتی کَرَختون گوشی و گِنگون زونی آج بَکَی!»
Currently Selected:
مَرقُس 7: CTB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
