Okyɔɔkyɔ 19
19
Agaba mgbi iPol ongwu ta
1Ngwi Apolo ka dzɛ iKorinti nɛ, iPol nyɛ ongwi afɛɛsɛ wa kaka Efesu. Mmanana o tu ama onoyɛyɛ angbeka 2di byi ma gbɛɛ, <<Ema gbɛ Onodzi Osaan onɔ ngwi ema noyɛyɛ ma wɛ?>>
A gbɛɛ, <<Ei, eyi fwo kpaa gbɛɛ Onodzi Osaan dzɛ ma ba.>>
3Nɛ iPol byi ma gbɛɛ, <<Nghama li ali itɔ iBatisima ngwi a kyɔ ema?>>
A nu uka gbɛɛ, <<IBatisima mgbi iJɔn.>>
4IPol si gbɔgbɛɛ, <<IBatisima mgbi iJɔn li iBatisima itukwu okyata-kyata. IJɔn nya inggisɛ ntona gbɛɛ nu ma noyɛyɛ mbi ongwu nka wa ba mi iyikpa ongwu mani, li iYesu waali.>> 5Ngwi a fwo odzɛ nɛ nɛ, a kyɔ ma iBatisima mi iyi mgbi Otsɛ iYesu. 6Dafi iPol kye abɔ dɔ ma ikye nɛ, Onodzi Osaan kaka mboma, a si gbɔ ondudzɛ angbeka di yegbɔ. 7Mmbwo mgbi ama duu mɛ iwyodefa.
8IPol kaka ozu okwakye mgbi emi iJuda di gbɔdzɛ yi ama mi ododa nghataa ofyia eta, le tangwodzɛ di biibɛ yi ama mi ikye odzɛ esutɔ mgbi Imgbasho. 9Nghaduu angbeka mi ifu ma fyumfye ikye di fwa onoyɛyɛ, di kwu Ofɛ mgbi Otsɛ fyito mi ododa. Nɛ iPol dzita ma di kyi gbelu ama onoyɛyɛ ntona wafɔ biyan lu kale tso ma alegbe mi ozu otsuungwɔ mgbi iTiranu. 10Ungwɔnɛ kiyayi mɛ onova efa, nghataa emi iJuda bɛyi emi iGriki ama nto ayɛsɛ mgbi Asia duu fwo elodzɛ mgbi Otsɛ.
11Imgbasho nyɛ ikpewo iPol kyungwɔ ama okwulewo, 12Nghanɛ gbaka ayangwuto ofwɔ inɛ bɛyi ishisha angwuto ngwi a kye gbo iPol ewo kpaa, ni a kye kɛ ni emi ootse kye abɔ gbo efu ootse mgbi ama li ngyɛ onodzi ibwubwe kpaa li tɔ dzamata.
13Emi iJuda angbeka ama ntole gaaga tsili kyɛ le lɔ onodzi ibwubwe onya, a fya okwu mi iyi mgbi Otsɛ iYesu mi ikye ama ngwu esɛ dɔ ma ikye gbɛɛ ni esɛ tɔ lu. A le gbɔgbɛɛ, <<Mi iyi iYesu, ongwu iPol li le gbeesɔ mgban na, tasɛ lu na.>> 14Emi ongwɛ iSkeva, ongyukwo inggisɛ ofifɛ mgbi emi iJuda, nghi egyafa, tole kyungwɔnɛni. 15Egbe oka nɛ onodzi ibwubwe nu ma uka gbɛɛ, <<iYesu ani yen, iPol kpaa ani ye odzan, nghama ema li ele?>> 16Nghanɛ inggisɛ ndzɛ yi onodzi obube bulu gyɛ ma di ngha ma yi mfye. O sulu ma onikyibe, a si tsinya dzata udɛ mgban ibiba yi eyi mi ewo.
17Onɔ ngwi emi iJuda bɛyi emi iGriki nto Efesu wa ye ungwɔnɛ nɛ, imio wo ma, ta iyi mgbi Otsɛ iYesu si gye mmwɛ kpakpa. 18Ibyi inggisɛ ama nnoyɛyɛ tɔ ba mi ododa wa fwi ali ibwubwe ngwi ama kyɔ mani. 19Inggisɛ ibyibyi ama okyɔ obudei, gbe afɛ ofulu-fulu mgbi ama kwakye gbe toola mi inɛ ibyi inggisɛ. Ngwi a kyi gbɔlu mmya mgbi umbwo afɛ ntona nɛ, i mɛ iDracama idubu ngwusefa dɔn iwyo.#19:19 IDracama onyi li udza okpa idɔ mi egbe onyi 20Mi itɔ ofɛ nɛ elodzɛ mgbi Otsɛ gbɔfwɛ di nghao fyumfye.
21Ngwi ungwɔ ntonɛ duu kyɔ nyɛ nɛ, iPol wewo olu iJerosalin, o nyɛ ongwi iMasidonia bɛyi Acaya. O gbɛɛ, <<Ni ani ka kaka iJerosalin yɔ, n ka kɛ iRoma kpaa kyɛmɛ-kyɛmɛ.>> 22O dɔ ama okyidɔ biyan nghi efa, iTimoti bɛyi Erastu, kɛ iMasidonia, ongwu yɔ tila dzɛ mi ayɛsɛ mgbi Asia ongwonɔ gwee se.
Onɔgbɛ tɔ mi Efesu
23Mi itɔnɔ na onikyeeye gbokyɛɛ mi ikye Ofɛ mgbi Otsɛ iYesu. 24Inggisɛ onda iyudza onzundzɛ okwɔkwɔ, iyin gbɛɛ iDemetriɔ, li ongwu mɛ ozoka Atemi, ungwɔnɛ li nu ma awuya ongyɛɛngyɛ ba, li mmya ongbungbɛ ba mbi ama onduufa. 25O kwu ama onduufa kwakye, bɛyi ama ndzɛ mi itɔ ofɛ idɔ pita li ungwonyi mani, si gbɛɛ: <<Engyulɔ, ema ye li mi idabɔ nɛ ngwi eyi li tu aludu mgbi eyi. 26Ema di diyɛ fwo, dafi iPol biibɛ yi ibyi inggisɛ mi Efesu mmɛnɛni wo ma ɛndɛ, sisi gwee ki li ayɛsɛ mgbi Asia duu. O gbɛɛ Imgbasho ama ngwu inggisɛ mɛ ma mɛɛmɛ mi abɔ ntonɛ duu, a yama li Imgbasho ba dududu. 27Odzɛ obube dzɛ ana, yama li idabɔ mgbi eyi nɛta ngwi iyi mgban osuse ka byulu ba, kpaa ozoka mgbi imgbasho ongyaa oshewo Atemi kpaa ka yɛɛ ungwɔ onyadi, ongwu imgbasho ongyaa abɔn ngwu a li sunun kpatsɛ ayɛsɛ Asia yi ɛsɛ olɔlɔ duu na, a ka kye bulu ugabaidu mgban oshewo nani.>>
28Ngwi a fwo ungwɔnɛ nɛ, itukwu gyaabyi loma man a wita owulu gbɛɛ: <<Oshewo li Atemi mgbi emi Efesu!>> 29Labɔlabɔ nɛta igeli yɛɛ onɔgbɛ-onɔgbɛ. Inggisɛ ntona kye bwalu iGayɔsu bɛyi Aristakɔ, ongwu li ongwɛ afokyɛɛ mgbi iPol kyɛ mi iMasidonia, a si wafɔ ondonyi dafi a li inggisɛ onyi mani kaka imbe okwakye okwukwo. 30IPol mina okye ewon tɔ iyayi ibyi inggisɛ, kpaa ama okyɛdɔ gbelon ba. 31Engyukwo emi idɔ angbeka mi ayɛsɛ na, ama nli oka iPol dɛsɔ tɛkyɛ nun gbɛɛ non ka yama lɛlɛ kye ewon kɛ imbe okwakye okwukwo na ba.
32Okwakye wɛndɛ. Angbeka tole wulu mi itɔdzɛ oka angbeka mi itɔdzɛ idzidza. Angbeka ye itɔdzɛ nkye ma kɛdzɛ imbe na ba. 33Emi iJuda tsamu Alekidzanda dzɛkiyayi ibyi inggisɛ man angbeka mi ibyi inggisɛ tole nyan odzɛ ngwi o ka gbɔ mani. O si kyɔ ma abɔ gbɛɛ nu ma dzɛ shilididi ikye ni ongwu natsondu onagbɛ ewon, mi inai ma. 34Ngwi a wa difwi gbɛɛ o li emi iJuda nɛ, ama duu wulu ondonyi mɛ dafi obyi efa hini gbɛɛ: <<Oshewo li Atemi mgbi emi Efesu!>>
35Ongye olɔɔlɔ mgbi ogalu okwukwo tukwu ma ondu, o nya ibyi inggisɛ gbɛɛ: <<Ema emi Efesu, li emɛ mi ɛsɛ ye gbɛɛ igeli mgbi Efesu li ogalu osunu angbodzi Imgbasho ongyaa Atemi ba di ye dafi onodzi mgban, nngwuta kyɛ esho ma dzɛ imbe nɛ ba? 36Nghanɛ, dafi a ka tangwɛ otsitsi nɛ gbɛ ba nɛ, li ayin ni ema yile itukwu bɛsɛ di kyɔ unkonyi mi ikwangha ba. 37Ema gbe engyulɔ ntonɛ ba mmɛnɛ, nghaduu a yama yi ozoka unkonyi hona kwu ashu mgbi eyi shanyɛ ba. 38Nghanɛ, kini iDemetriɔ bɛyi ama okyidabɔ yan dzɛ yi okakewo yi inggisɛ yɔ, opiikwɔ lasisa, emi ola kpaa to. Nu ma ka kwelikwɔ mmanani. 39Nghaduu ni odzɛ ka dzɛma ngwi ema mina okye ba yɔ, li kyɛmɛ ni a kye mɛlu mi okwakye ndzɛ mi ola mani. 40Dafi i dzɛ nghanɛ, ungwɔ nkyɔ inɛ nɛ a ka yagba maayi bɛ eyi gbɛɛ di li eyi teeye. Eyi ka yagba tangwɛ mi ikye onɔgbɛ nɛ naadi nu itɔdzɛ nka mɛ ba.>> 41Ngwi o gbɔdzɛ nɛ ngyɛ mata, o si nu okwakye ganya.
Currently Selected:
Okyɔɔkyɔ 19: UTR
Highlight
Share
Copy
Want to have your highlights saved across all your devices? Sign up or sign in
©2024 Initiative for the Translation and Development of African Languages
