บราเกะ ลารี 6
6
ตูฮัด บือฌาญี ปูลัก จะ_ นะ ปลือปัซ อิซราเอน
(บราเกะ ลารี 3.1—4.17)
1กะฆีเตอ ตูฮัด บือซัยํ เดะ อาตัซ_ มือเลา ฌางัน มูซา จะ_ “วะตู อีนี เลอ_ เกา นะ บือเลฮ ลีฮัจ_ ลาฆู นู กู นะ บูวัจ กะ ราฌา ฟาโร_ ฌาดี จะ_ กู นะ ปรือกัด ญา ฌางัน ตางัน นู มือฆัฮ นะ กู_ เออ กรานา ตางัน นู มือฆัฮ นะ กู เตอ เลอ_ ญา นะ โปรฮ โกะ ลูมอฮ ซือมียา บรี ตรือเบะ เดะ นังฆรี นะ ญา.”
2ตูฮัด ญา มือเลา ฌางัน มูซา ปูลัก จะ_ “กู นี_ ฌาดี ตูฮัด บือซัยํ เดะ อาตัซ เลอ. 3กู ปลีฮัจ กะ อับราฮัม_ กะ อีซัก_ กะ ยาโกบ_ เดะ ปือนามา จะ_ ตูฮัด นู มือฆัฮ_ ตาปี กู เตด บือเลฮ ปลีฮัจ กะ กูญา_ บรี กูญา กราลา ปือนามา นะ กู จะ_ ตูฮัด บือซัยํ เดะ อาตัซ เลอ. 4ลือเบฮ เดะ อีนี ฌูฆา_ กู บือเลฮ บูวัจ ปือมือเลา บือฌาญี บือตือตู นะ กู ฌางัน กูญา จะ_ กู นะ อาเกะ นังฆรี คานาอัน บรี กะ กูญา_ ฌาดี นังฆรี นู กูญา บือเลฮ มือนูปัก ดูโดะ บือกะ ซือมียา บักซา อาซิก เลอ. 5ลือเบฮ เดะ อีตู ปูลัก_ กู ดืองัยํ ซือวารา มือนาแงฮ บือปาโตด นะ ลูมอฮ ซือมียา บักซา อิซราเอน_ นู โกะ บักซา อียิบ กานัก ตาโรฮ บรี ฌาดี ปราโซฮ_ บูวัจ บรี กู อีงัจ กะ ปาซัน ปือมือเลา บือฌาญี บือตือตู นะ กู ฌางัน กูญา. 6ซาเบะ กะฆีนี เลอ_ กือนา มือเลา กะ ลูมอฮ อิซราเอน จะ_ ‘กู นี เลอ_ ฌาดี ตูฮัด บือซัยํ เดะ อาตัซ_ กู นะ บาวา กาเญา บรี ลือปัซ เดะ ลาฆู บือกรือฌา นู บรัจ โตระ นะ ลูมอฮ อียิบ_ นู ซูโรฮ กาเญา กรือฌา เตอ_ นะ บรี กาเญา ลือปัซ เดะ ลาฆู ฌาดี ปราโซฮ นะ กูญา. กู นะ อาเงา ตางัน ตูโลก ตือบุซ กาเญา_ อาดา ฌางัน ลาฆู กรัจ ฮูโกบ นู บือซัยํ โตระ เลอ. 7กู นะ ซาโมจ กาเญา_ ฌาดี ลูมอฮ ซือมียา นะ กู_ กู นะ ฌาดี ตูฮัด นะ ลูมอฮ กาเญา. กาเญา นะ บือเลฮ ตาฮู จะ_ กู ฌาดี ตูฮัด บือซัยํ เดะ อาตัซ_ ตูฮัด นะ ลูมอฮ กาเญา_ นู บาวา กาเญา บรี ลือปัซ เดะ ลาฆู บือกรือฌา นู บรัจ โตระ_ นู ลูมอฮ อียิบ ปรือกัด บรี กาเญา บูวัจ เลอ. 8กู นะ บาวา ลูมอฮ กาเญา ปี_ กะ นังฆรี นู กู บือเลฮ อาเกะ มือเลา ดัฮ จะ_ นะ บรี กะ อับราฮัม_ กะ อีซัก_ กะ ยาโกบ. กู นี เลอ_ ฌาดี ตูฮัด บือซัยํ เดะ อาตัซ_ กู นะ อาเกะ นังฆรี อีตู บรี ฌาดี นะ กาเญา.’ ”
9กะฆีเตอ มูซา ญา อาเมด ปือมือเลา อีตู_ ปี มือญาเระ กะ ลูมอฮ อิซราเอน ดืองัยํ_ ตาปี กูญา ฮอย เตด ปือจายา กะ มูซา_ กรานา กูญา ฮอย เตด จาดัก เดะ ลาฆู มานามา ดัฮ. กูญา ตาฮัด เดะ ลาฆู ฌาดี ปราโซฮ ฮอย เตด บียัซ ดัฮ.
10ตูฮัด บือซัยํ เดะ อาตัซ มือเลา ฌางัน มูซา จะ 11“กือนา ปี มือญาเระ กะ ฟาโร_ ราฌา นะ นังฆรี อียิบ_ บรี กะ ญา ปลือปัซ ลูมอฮ บักซา อิซราเอน_ บรี ตรือเบะ เดะ นังฆรี นะ ญา.” 12ตาปี มูซา ญา มือเลา ฌางัน ตูฮัด จะ_ “โกะ ลูมอฮ อิซราเอน โปด_ กูญา ฮอย เตด มือนีงัย กะ กู_ ราฌา ฟาโร เตอ_ ญา นะ มือนีงัย กะ กู กะฮามี เลอ? ซาเบะ กู ฌาดี ซือมียา มือเลา เตด บราปา ปานัย.” 13กะฆีเตอ เลอ_ ตูฮัด บือซัยํ เดะ อาตัซ_ ญา มือเลา กะ มูซา ฌางัน อาโรน_ ปือซัด บรี กูญา ปี มือญาเระ กะ ลูมอฮ บักซา อิซราเอน_ ฌางัน ราฌา ฟาโร_ จะ_ ตูฮัด บือเลฮ ซูโรฮ กูญา ดูวา อูรัก_ มาแรฮ บาวา ลูมอฮ อิซราเอน บรี ตรือเบะ เดะ นังฆรี อียิบ เลอ.
บือแนฮ บักซา นะ มูซา ฌางัน อาโรน
(ลามูลา 46.8-27)
14ตะเดะ อีนี ฌาดี บีลาแก นะ โกะ บือแนฮ บักซา นะ กูญา.
นานะ นะ รูเบน_ นู ฌาดี นานะ ซูโลก นะ อิซราเอน_ ปือนามา จะ_ ฮาโนก_ ปาลู_ เฮซะโรน_ ฌางัน คาระมี. กูญา อีนี ฌาดี บือแนฮ ปาลัฮ นะ นานะ รูเบน เลอ.
15นานะ นะ ซีเมโอน_ ปือนามา จะ_ เยมูเอน_ ยามีน_ โอฮัด_ ยาคีน_ โซฮา_ ฌางัน ซาอูน นู บือโปรจ ดาตัก เดะ นีบีนี คานาอัน. กูญา อีนี ฌาดี บือแนฮ ปาลัฮ นะ ซีเมโอน.
16ตะเดะ อีนี ฌาดี ปือนามา นานะ นะ เลวี_ ตูโรจ กะ บือแนฮ บักซา นะ กูญา_ ปือนามา จะ_ เกอโชน_ โคฮาด_ ฌางัน เมรารี. เลวี เตอ_ อูมอยํ นะ ญา บือเลฮ ซือราตุซ ตีฆา ปูโลฮ ตูโฌฮ (137) ตาโฮด ดัฮ. 17นานะ นะ เกอโชน ปือนามา ลิบนี_ ฌางัน ชิเมอี_ ตูโรจ กะ บือแนฮ นะ กูญา เตอ.
18นานะ นะ โคฮาด ปือนามา อัมราม_ อิดซะฮา_ เฮโบรน_ ฌางัน อูซีเอน. โคฮาด เตอ_ อูมอยํ นะ ญา บือเลฮ ซือราตุซ ตีฆา ปูโลฮ (130) ตาโฮด ดัฮ.
19นานะ นะ เมรารี_ ปือนามา มาลี ฌางัน มูชี_ กูญา อีนี ฌาดี บือแนฮ บักซา นะ ลูมอฮ เลวี.
20โซะ อัมราม ญา บือเลฮ ฌางัน โยเคเบด_ อาดี เดะ ปะ เดะ ญา_ ฌาดี บีนี นะ ญา_ กะฆีเตอ ญา ดูโดะ เดะ อาปี_ บือเลฮ นานะ ปือนามา จะ_ อาโรน ฌางัน มูซา. อัมราม เตอ_ อูมอยํ นะ ญา บือเลฮ ซือราตุซ ตีฆา ปูโลฮ ตูโฌฮ (137) ตาโฮด ดัฮ.
21นานะ นะ อิดซะฮา ปือนามา โครา_ เนเฟก ฌางัน ซิกรี.
22นานะ นะ อูซีเอน ปือนามา มิชาเอน_ เอนซาฟาน_ ฌางัน ซิดรี.
23โซะ อาโรน ญา บือเลฮ ฌางัน เอลีเซบา_ นานะ นะ อัมมีนาดับ_ อาดี นีบีนี นะ นาโชน_ ฌาดี บีนี นะ ญา. กูญา บือเลฮ นานะ ปือนามา จะ_ นาดับ_ อาบีฮู_ เอเลอาซา_ ฌางัน อีทามา.
24นานะ นะ โครา ปือนามา อัดซีระ_ เอนกานัฮ_ ฌางัน อาบียาซาบ. กูญา อีนี ฌาดี บือแนฮ บักซา นะ ลูมอฮ โครา.
25โซะ เอเลอาซา_ นานะ นะ อาโรน_ บือเลฮ ฌางัน นานะ นีบีนี นะ ปูตีเอน ซืออูรัก_ ฌาดี บีนี นะ ญา. กูญา บือเลฮ นานะ ปือนามา ฟีเนฮัด. กูญา อีนี ฌาดี บีลาแก นะ โกะ บือแนฮ บักซา นะ เลวี.
26อาโรน ฌางัน มูซา_ ดูวา อูรัก อีนี เลอ_ นู ตูฮัด บือซัยํ เดะ อาตัซ บือเลฮ มือเลา ฌางัน กูญา จะ_ “กือนา บาวา ลูมอฮ อิซราเอน_ ตรือเบะ เดะ นังฆรี อียิบ_ ตูโรจ บือกะ โกะ กาวัด นะ กูญา.” 27มูซา ฌางัน อาโรน เตอ_ กูญา ดูวา อูรัก อีนี โปด_ นู ฌาดี ซือมียา ปี มือเลา ฌางัน ราฌา ฟาโร_ ราฌา นะ นังฆรี อียิบ_ ปาซัน นู นะ บาวา ลูมอฮ อิซราเอน_ ตรือเบะ เดะ นังฆรี อียิบ เลอ.
มูซา ฌางัน อาโรน บูวัจ ตูโรจ กะ ปือมือซัด นะ ตูฮัด
28เดะ อารี อีตู_ นู ตูฮัด บือซัยํ เดะ อาตัซ_ ญา มือเลา ฌางัน มูซา_ เดะ นังฆรี อียิบ เตอ_ 29ญา มือเลา ฌางัน มูซา จะ_ “กู ฌาดี ตูฮัด บือซัยํ เดะ อาตัซ. เกา กือนา มือญาเระ กะ ฟาโร_ ราฌา นะ ลูมอฮ อียิบ_ ตูโรจ บือกะ ปือมือเลา นู กู บือเลฮ มือญาเระ กะ เกา ดัฮ.” 30ตาปี มูซา มือเลา ฌางัน ตูฮัด บือซัยํ เดะ อาตัซ จะ_ “กู ฌาดี ซือมียา นู มือเลา เตด บราปา ปานัย_ ราฌา ฟาโร ญา นะ มือนีงัย กะ ปือมือเลา นะ กู บูวัจ นามา เลอ?”
Currently Selected:
บราเกะ ลารี 6: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
