ลามูลา 14
14
อับราม ตูโลก โลด
1เดะ ฮาดัจ นะ อัมราเฟน_ ราฌา นังฆรี ซีนา_ อารีโอก_ ราฌา นังฆรี เอนลาซา_ เคโด-ลาโอเมอ_ ราฌา นังฆรี เอลาม_ ฌางัน ทิดาน_ ราฌา นังฆรี โกยิม เตอ_ 2โกะ ราฌา อีนี_ กูญา บือปรัก ฌางัน เบรา_ ราฌา นังฆรี โซโดม_ ฌางัน บีระชา_ ราฌา นังฆรี โกโมรา_ ฌางัน ชินาบ_ ราฌา นังฆรี อัดมา_ ฌางัน เชเมเบอ_ ราฌา นังฆรี เซโบยิม_ ฌางัน ราฌา นังฆรี เบ-ลา (ฌาดี จะ โซอา.) 3โกะ ลูมอฮ ราฌา อีนี_ กูญา บือมุน โกะ กาวัด ตาฮัน_ ฌาดี ซา ลูมอฮ_ เดะ จือลัฮ บูเกะ ซิดดิม_ (ฌาดี จะ_ ลาโวจ ฆารับ.) 4โกะ ราฌา อีนี_ กูญา ยอม บือกรือฌา บรี กะ ราฌา เคโด-ลาโอเมอ_ ดูวา บือลัซ ตาโฮด_ ตาปี เดะ ตาโฮด นู ตีฆา บือลัซ_ กูญา บูวัจ กือบลากัก. 5เดะ ตาโฮด ปัจ บือลัซ_ เคโด-ลาโอเมอ_ ฌางัน ราฌา นู มาโซะ บือซามา ฌางัน ญา เตอ_ มาแรฮ บือปรัก ฌือนัฮ ลูมอฮ เรฟาอิม_ เดะ นังฆรี อัดซะทาโรด-คานาอิม_ ฌางัน ลูมอฮ ซูชิม_ เดะ นังฆรี ฮาม_ ฌางัน ลูมอฮ เอมิม_ เดะ นังฆรี ชาเวฮ คีริยัด-อายิม 6ฌางัน ลูมอฮ โฮรี_ เดะ บูเกะ เซอีระ_ นู ฌาดี นะ ลูมอฮ กูญา_ ฌู รอจ กะ นังฆรี เอนปาราน_ ดาปิก ตือปัจ ตานัฮ ตูโฮยํ นู ลือฆา_ 7บาลิ ปาเระ มาแรฮ รอจ กะ นังฆรี เอนมิซะปัด (ฌาดี จะ คาเดด)_ บือปรัก ฌือนัฮ ซือมูฮา_ นังฆรี นะ ลูมอฮ อามาเลก_ ฌางัน ลูมอฮ อาโมรี_ นู ดูโดะ เดะ ฮาชาโชน-ทามา. 8กะฆีเตอ ราฌา นังฆรี โซโดม_ ราฌา นังฆรี โกโมรา_ ราฌา นังฆรี อัดมา_ ราฌา นังฆรี เซโบยิม_ ฌางัน ราฌา นังฆรี เบ-ลา (ฌาดี จะ โซอา) โปด_ ตรือเบะ ปี กะ จือลัฮ บูเกะ ซิดดิม_ 9บือลาวัด บือปรัก ฌางัน เคโด-ลาโอเมอ_ ราฌา นังฆรี เอลาม_ ทิดาน_ ราฌา นังฆรี โกยิม_ อัมราเฟน_ ราฌา นังฆรี ซีนา_ ฌางัน อารีโอก_ ราฌา นังฆรี เอนลาซา_ ราฌา ปัจ อูรัก อีนี บือลาวัด ฌางัน ราฌา ลีมา อูรัก. 10เดะ จือลัฮ บูเกะ ซิดดิม_ อาดา ตลาฆา มีญะ ฮีตับ_ ปือนอฮ ราตา ตือปัจ. กาลา ราฌา นังฆรี โซโดม ฌางัน ราฌา นังฆรี โกโมรา_ ลารี ปี_ โกะ ซือมียา ซือตืองัฮ เดะ ลูมอฮ อีตู โปด_ ฆูโฆยํ เดะ ตลาฆา เลอ. โซะ ซือมียา นู ลือเบฮ เตอ_ ลารี ปี กะ อาตัซ บูเกะ. 11โกะ ซือตรู มูงอจ โกะ ซือบารัก ซือมูฮา_ เตด จะ โกะ ซือบารัก มากัด_ นะ ลูมอฮ นังฆรี โซโดม ฌางัน ลูมอฮ นังฆรี โกโมรา_ บือปี ฮาบิฮ. 12กูญา บือเลฮ รีฆะ โลด_ (นานะ นะ อาดี กีลากี นะ อับราม)_ นู ดูโดะ เดะ นังฆรี โซโดม_ ฌางัน โกะ ซือบารัก นะ ญา_ บือปี ฌูฆา.
13อาดา ซือมียา ซืออูรัก_ ลารี ตรือเบะ เดะ ตือปัจ บือปรัก อีตู_ มาแรฮ มือญาเระ บรี กะ อับราม_ ซือมียา ลูมอฮ ฮีบรู_ ตาฮู_ ซาเบะ อับราม ดูโดะ เดะ ลูมอฮ ปูโฮด กายู กรามัจ นะ มัมเร_ ซือมียา ลูมอฮ อาโมรี_ นะบรานะ นะ เอชะโคน_ ฌางัน อาเนอ. โกะ ลูมอฮ อีนี_ กูญา บาฌิ ฌางัน อับราม. 14กาลา อับราม ดืองัยํ จะ_ โกะ ลูมอฮ ซือตรู รีฆะ นะบรานะ นะ ญา_ บือปี_ กะฆีเตอ ญา บาวา โกะ ตาฮัน นู ปานัย บือปรัก_ นู บือโปรจ เดะ ตูโปะ นะ ญา_ ตีฆา ราตุซ ลาปัด บือลัซ (318) อูรัก_ ตูโรจ ปี ดัดๆ_ ฌู รอจ กะ นังฆรี ดาน. 15อับราม เตอ_ ญา บือปือจัฮ โกะ ตาฮัน ฌาดี บือกาวัดกาวัด_ เดะ วะตู มาลับ_ ญา ฌางัน ปราโซฮ นะ ญา โปด_ มาโซะ ปี บือปรัก ฌางัน ซือตรู_ อูเซ ปี รอจ กะ นังฆรี โฮบา_ โซะ อาตัซ นังฆรี ดามัดกัด. 16กะฆีเตอ_ ญา บาวา โกะ ซือบารัก ซือมูฮา_ บาลิ มาแรฮ ปาเระ ฮาบิฮ_ บาวา โลด_ นะบรานะ นะ ญา_ บาลิ_ ฆือนะ ฌางัน โกะ ซือบารัก นะ ญา_ ฌางัน โกะ นีบีนี_ โกะ ลูมอฮ ซือมียา ฌูฆา.
เมนคีเซเดก บรี ซือลามัจ กะ อับราม
17กาลา อับราม บาลิ_ เดะ ลาฆู บือปรัก ฌือนัฮ เดะ ราฌา เคโด-ลาโอเมอ_ ฌางัน โกะ ราฌา ซือมูฮา นู มาโซะ บือมุน ซือกาลี ฌางัน ญา เตอ_ ราฌา นังฆรี โซโดม โปด_ ตรือเบะ มาแรฮ ซาโมจ อับราม เดะ ตือปัจ จือลัฮ บูเกะ ชาเวฮ_ (ฌาดี จะ เดะ จือลัฮ บูเกะ นะ ราฌา.)
18อาดา เมนคีเซเดก_ ราฌา นะ นังฆรี ซาเลม_ ญา มาแรฮ ดาปัจ อับราม_ อาเมด โรตี ฌางัน อาระ อางุน มาแรฮ_ บรี กะ ญา. ญา เตอ_ ฌาดี ซามี นะ ตูฮัด เดะ อาตัซ_ นู ตีงี ซูโงฮ. 19ญา บรี ซือลามัจ กะ อับราม_ มือเลา จะ_
“มีตา เดะ ตูฮัด เดะ อาตัซ นู ตีงี ซูโงฮ_
นู บือฌาดี ลาแงะ_ บือฌาดี ดือนียา ดัฮ_
มีตา เดะ ญา_ บรี ญา นะ บรี ซือลามัจ กะ อับราม เลอ.
20บรี ซือลามัจ เลอ_ กะ ตูฮัด เดะ อาตัซ นู ตีงี ซูโงฮ.
ญา เลอ_ นู บูวัจ บรี กะ เกา ฌือนัฮ_ เดะ ลูมอฮ ซือตรู นะ เกา ดัฮ”_ ราฌา ญา จะ.
กะฆีเตอ_ อับราม มือญือมัฮ บือนา บารัก_ กะ ราฌา อีตู. บือนา บารัก อีตู_ ญา อาเมด ซา เดะ ดาลับ ซือปูโลฮ_ บรี กะ ราฌา อีตู.
21โซะ ราฌา นังฆรี โซโดม_ มือเลา ฌางัน อับราม จะ_ “ลูมอฮ ซือมียา อีตู_ บรี กะ กู เลอ. ตาปี โกะ บือนา บารัก อีตู_ อาเมด เลอ_ ฌาดี บารัก นะ เกา เตอ.”
22ตาปี อับราม มือเลา ฌางัน ราฌา นังฆรี โซโดม จะ_ “กู บือเลฮ บือฌาญี ฌางัน ตูฮัด บือซัยํ เดะ อาตัซ_ นู ฌาดี ตูฮัด นู ตีงี ซูโงฮ_ นู บือฌาดี ลาแงะ_ บือฌาดี ดือนียา ดัฮ. 23กู บือฌาญี เดะ ปือนามา นะ ตูฮัด_ มือเลา จะ_ กู ตีเมา อาเมด บือนา บารัก นะ เกา เลอ_ เตด จะ บือนัง ซา อูรัจ_ เฆอ จะ_ ตาลี ปะตาปะ ซา อูรัจ เตอ_ เฆอ จะ นามาๆ โปด_ นู ฌาดี นะ เกา. กู ตีเมา ซาโมจ เลอ_ ตาโกจ จะ เกา นะ มือเลา บือเลฮ จะ_ กู บูวัจ บรี อับราม กายา ดัฮ. 24ตาปี โกะ ซือบารัก นู ซือมียา นะ กู มากัด ดัฮ_ อาดา ฌูฆา บาฮาเฆด นะ ลูมอฮ ซือมียา_ นู ปี บือซามา ฌางัน กู ดัฮ. บรี กะ อาเนอ_ เอชะโคน_ ฌางัน มัมเร_ อาดา บาฮาเฆด นะ กูญา. ตาปี กู นี เลอ_ กู ตีเมา ซาโมจ นามาๆ โปด”_ ญา จะ.
Currently Selected:
ลามูลา 14: ULBIBLE
Highlight
Share
Copy
Want to have your highlights saved across all your devices? Sign up or sign in
