ลามูลา 27
27
อีซัก บรี ซือลามัจ_ กะ ยาโกบ_ นานะ นะ ญา
1ตานา อีซัก ตูฮา ดัฮ_ มาตา นะ ญา บือดาบู_ ลีฮัจ เตด บือฆารี. ญา บลาโลก เอซาว_ นานะ ซูโลก นะ ญา_ มือเลา ฌางัน ญา จะ_ “นานะ เออ.”_ เอซาว ตีกัฮ จะ_ “ปะ เออ_ กู อาดา ปัจ อีนี.”
2อีซัก มือเลา จะ_ “ลีฮัจ เลอ_ ปะ ตูฮา ดัฮ. เตด ตาฮู_ อารี ดีฮา_ ปะ นะ มาตี. 3เกา กือนา อาเมด_ ปานัฮ ฌางัน ปรูลู ปานัฮ นะ เกา_ ปี กะ ฮูตัด_ ซารี ลูลู กีฌัก_ 4ฆูลัย บรี ญามัน_ บือกะ ปะ ซูกา_ อาเมด มาแรฮ บรี กะ ปะ นะ มากัด_ บีดา ปะ นะ บรี ซือลามัจ กะ เกา_ ดูลู เดะ นู ปะ นะ มาตี”_ ญา จะ.
5ตานา อีซัก มือเลา ฌางัน เอซาว_ นานะ นะ ญา_ เรเบคา ญา มือฮือนะ มือนีงัย. กาลา เอซาว ปี กะ ฮูตัด ดัฮ_ นะ ซารี ลูลู กีฌัก อีตู_ 6เรเบคา มือเลา ฌางัน ยาโกบ_ นานะ นะ ญา_ จะ_ “กู ดืองัยํ_ นู ปะ เดะ เกา_ มือเลา ฌางัน เอซาว_ กากา เดะ เกา_ มือเลา จะ_ 7‘ปี เลอ_ อาเมด ลูลู กีฌัก มาแรฮ เลอ_ ฆูลัย บรี ญามัน_ บรี ปะ นะ มากัด. กะฆีเตอ_ ปะ นะ บรี ซือลามัจ กะ เกา_ โซะ ฮือลด ตูฮัด บือซัยํ เดะ อาตัซ_ ดูลู ปะ นะ มาตี’_ ญา จะ. 8กะฆีเตอ นานะ เออ_ กือนา มือนีงัย ปือมือเลา นะ มะ เลอ. 9ปี เลอ_ กะ กาวัด แบะ_ อาเมด อานะ แบะ นู บาฌิ_ ดูวา อีโกยํ_ มาแรฮ บรี กะ มะ. มะ นะ ตืองะ ฆูลัย บรี ญามัน_ บือกะ นู ปะ เดะ เกา ซูกา นะ มากัด. 10เกา กือนา บาวา บือปี_ บรี กะ ปะ เดะ เกา มากัด. กะฆีเตอ_ ปะ เดะ เกา_ นะ บรี ซือลามัจ กะ เกา_ ดูลู เดะ ญา นะ มาตี”_ เรเบคา ญา จะ.
11ตาปี ยาโกบ มือเลา ฌางัน เรเบคา_ มะ เดะ ญา จะ_ “ลีฮัจ เลอ_ เอซาว_ กากา นะ กู_ อาดา บูลู เดะ ญาวา บาญะ_ ตาปี กู นี_ ฮอย บูลู เดะ ญาวา. 12กู ตาโกจ จะ_ ปะ นะ ราบา ญาวา นะ กู_ นะ ลีฮัจ จะ_ กู ตืองัฮ มืออูปัย กะ ญา. กะฆีเตอ_ ปะ เตด บรี ซือลามัจ กะ กู_ ตาปี ญา นะ ซูปัฮ กะ กู”_ ญา จะ.
13ตาปี มะ เดะ ญา_ มือเลา ฌางัน ญา จะ_ “นานะ เออ_ บรี ลาฆู นู ปะ ซูปัฮ กะ เกา_ นะ กือนา เดะ มะ ตะอาซิก. กือนา บูวัจ ตูโรจ_ บือกะ ปือมือเลา นะ มะ เลอ. ปี อาเมด อานะ แบะ_ ดูวา อีโกยํ อีตู มาแรฮ_ บรี กะ มะ เลอ.”
14กะฆีเตอ_ ยาโกบ ญา ปี อาเมด อานะ แบะ_ ดูวา อีโกยํ_ มาแรฮ บรี กะ มะ เดะ ญา. มะ เดะ ญา บูวัจ อาเย ฆูลัย ญามัน_ นู ปะ เดะ ญา ซูกา มากัด. 15กะฆีเตอ_ เรเบคา อาเมด กาเยด นู บาฌิ ซูโงฮ นะ เอซาว_ นานะ ซูโลก นะ ญา_ นู อาดา เดะ รูมัฮ นะ ญา_ มาแรฮ บือปากัย บรี กะ ยาโกบ_ นานะ บูซู นะ ญา. 16ญา อาเมด บูลู อานะ แบะ อีตู มาแรฮ_ บอฮ เดะ ตางัน นะ นานะ อีตู_ เดะ ลีเฮ นะ ญา ฌูฆา. 17ญา อาเมด อาเย ฆูลัย นู ญามัน_ ฌางัน ตือโปก โรตี นู ญา บูวัจ ดัฮ_ บรี กะ ยาโกบ_ นานะ นะ ญา.
18กะฆีเตอ_ ยาโกบ มาโซะ ปี ซารี ปะ เดะ ญา_ มือเลา จะ_ “ปะ เออ.”_ ปะ เดะ ญา ตีกัฮ จะ_ “กู อาดา ปัจ อีนี. นานะ เออ_ เกา ฌาดี ซาปา?”
19ยาโกบ มือเลา ฌางัน ปะ เดะ ญา จะ_ “กู นี_ เอซาว_ นานะ ซูโลก นะ ปะ เลอ. กู บูวัจ ตูโรจ_ บือกะ นู ปะ ปือซัด กู ดัฮ. กะฆีเตอ_ บีกัซ เลอ_ ดูโดะ_ มากัด ลูลู กีฌัก นะ กู_ บรี ซือลามัจ กะ กู ฌูฆา”_ ญา จะ.
20ตาปี อีซัก มือเลา_ ฌางัน นานะ นะ ญา จะ_ “นานะ เออ_ นู นานะ ดาปัจ ลูลู กีฌัก_ จือปัจๆ กะฆีนี_ ฌาดี กะฮามี?”
ยาโกบ ตีกัฮ จะ_ “ตูฮัด บือซัยํ เดะ อาตัซ_ ตูฮัด นะ ปะ_ ตูโลก กู ดัฮ.”
21กะฆีเตอ_ อีซัก มือเลา ฌางัน ยาโกบ จะ_ “มาแรฮ ดาปิก เลอ_ นานะ เออ. บรี ปะ มือราบา ญาวา นะ เกา_ นะ ลีฮัจ จะ_ เกา ฌาดี เอซาว_ นานะ นะ กู_ ซูโงฮ เฆอ?”
22กะฆีเตอ_ ยาโกบ มาโซะ ปี ดาปิก อีซัก_ ปะ เดะ ญา. อีซัก มือราบา ญาวา นะ ญา_ มือเลา จะ_ “ซือวารา ฌาดี ซือวารา นะ ยาโกบ เตอ_ ตาปี ตางัน ฌาดี ตางัน นะ เอซาว เลอ.”
23ปะ เดะ ญา เตด กราลา นานะ อีตู_ ซาเบะ ตางัน นะ ญา_ อาดา บูลู_ ซือรูปา ตางัน นะ กากา เดะ ญา. กะฆีเตอ_ ญา นะ บรี ซือลามัจ กะ ญา. 24ญา ตาญา นานะ จะ_ “เกา ฌาดี เอซาว_ นานะ นะ ปะ_ ซูโงฮ เฆอ?”
นานะ ตีกัฮ จะ_ “ซูโงฮ เลอ.”
25กะฆีเตอ_ อีซัก มือเลา จะ_ “อาเมด อาเย ฆูลัย อีตู มาแรฮ กะ ปะ เลอ_ บรี ปะ นะ มากัด ลูลู กีฌัก นะ เกา_ นะ บรี ซือลามัจ กะ เกา.”
ยาโกบ อาเมด อาเย ฆูลัย อีตู มาแรฮ_ บรี กะ ปะ เดะ ญา. ปะ เดะ ญา มากัด กือญัง. ยาโกบ อาเมด อาระ อางุน_ บรี กะ ปะ เดะ ญา โอะ ฌูฆา. 26กะฆีเตอ_ อีซัก_ ปะ เดะ ญา_ มือเลา ฌางัน นานะ จะ_ “นานะ เออ_ มาแรฮ ญาเเปะ_ จีโยบ ปะ เลอ.” 27ยาโกบ ญา ญาเเปะ_ จีโยบ ปะ เดะ ญา. ปะ ญา บือบาวู กรือซัย กาเยด นะ นานะ_ บือบาวู บาฌิ_ ญา บรี ซือลามัจ กะ ญา_ มือเลา จะ
“ลีฮัจ เลอ_ นานะ นะ กู_ บือบาวู บาฌิ_ ซือรูปา บือบาวู กรือซัย เดะ บือนัก_
นู ตูฮัด บือซัยํ เดะ อาตัซ_ บรี ซือลามัจ ดัฮ.
28มีตา เดะ ตูฮัด_ นะ บรี เกา อาดา อาเย ฮือโมด_ นู ตูโรด เดะ ลาแงะ
บรี อาดา บือนัก_ นู บือบูวัฮ บาญะ_
บรี อาดา ปาดี_ อาดา อาระ อางุน_ บาญะ เลอ.
29บรี ลูมอฮ ซือมียา มาแรฮ_ ฌาดี ปราโซฮ นะ เกา.
บรี ลูมอฮ บักซา ตาราตา_ มาแรฮ มือนูโนะ มือญือมัฮ_ กะ เกา เลอ.
บรี เกา ฌาดี ราฌา_ ปือบือลา ลูมอฮ อาดี บราดี นะ เกา เลอ.
บรี ลูมอฮ นานะ นะ มะ เดะ เกา_
นะ มาแรฮ มือนูโนะ_ กะ เกา เลอ.
บรี ซือมียา นู ซูปัฮ กะ เกา_ นะ กือนา ซูปัฮ ฌูฆา.
บรี ซือมียา นู บรี ซือลามัจ กะ เกา_ นะ บือเลฮ ซาโมจ ลาฆู บรี ซือลามัจ_ ฌูฆา เลอ”
อีซัก ญา จะ.
เอซาว ฮอย ลาฆู ซือลามัจ
30กาลา อีซัก บือเลฮ บรี ซือลามัจ กะ ยาโกบ ดัฮ_ ตานา บาฌิ_ ยาโกบ บารู ตรือเบะ มืองรือละ เดะ อีซัก_ ปะ เดะ ญา_ ปี ซือฌูรุซ ดัฮ_ เอซาว_ กากา เดะ ญา โปด_ บาลิ มาแรฮ ดาตัก เดะ ฮูตัด. 31ญา ฌูฆา_ บือเลฮ บูวัจ อาเย ฆูลัย ญามัน ดัฮ_ อาเมด อาเย ฆูลัย อีตู มาแรฮ_ บรี กะ ปะ. ญา มือเลา กะ ปะ เดะ ญา จะ_ “ปะ เออ_ บีกัซ เลอ_ มากัด ลูลู กีฌัก นะ นานะ. บรี ซือลามัจ กะ กู เลอ.”
32อีซัก_ ปะ เดะ ญา_ ตาญา จะ_ “เกา ฌาดี ซาปา?”
ญา ตีกัฮ จะ_ “กู ฌาดี นานะ นะ ปะ_ นานะ นู ซูโลก เตอ_ กู นี เอซาว.”
33กะฆีเตอ อีซัก ตือกือฌุจ_ ญาวา กือตัยํ_ มือเลา จะ_ “ฌาดี ซาปา ซีงี_ นู ปี บรูเซ บือนาตัก_ อาเมด ลูลู กีฌัก มาแรฮ_ บรี กะ กู ดัฮ? กู มากัด ดัฮ_ ซือมูฮา_ ดูลู เดะ เกา มาแรฮ ซีงี. กู บรี ซือลามัจ กะ ญา ดัฮ. ซูโงฮ เลอ_ ตูฮัด นะ บรี ซือลามัจ กะ ญา”_ อีซัก ญา จะ.
34กาลา เอซาว ดืองัยํ_ ปือมือเลา นะ ปะ เดะ ญา ดัฮ_ ญา บือซูระ_ ซือวารา บือซัยํ_ ซูซัฮ ฮาตี โตระ. ญา มือเลา ฌางัน ปะ เดะ ญา จะ_ “โอ ปะ เออ_ บรี ปะ_ นะ บรี ซือลามัจ กะ กู ฌูฆา เลอ.”
35ตาปี ปะ เดะ ญา ตีกัฮ จะ_ “อาดี เดะ เกา_ มาแรฮ มืออูปัย กะ กู ดัฮ. ญา จูรี อาเมด_ ลาฆู นู ปะ นะ บรี ซือลามัจ กะ เกา.”
36เอซาว มือเลา ฌางัน ปะ เดะ ญา จะ_ “นู ญา อาดา ปือนามา_ ยาโกบ#27.36 ปือนามา “ยาโกบ”_ ฌาดี จะ_ “ซือมียา นู ราปัซ.”_ กือนา ดัฮ. ดูวา กาลี อีนี_ ญา กีจอฮ กู ดัฮ. ดูลู_ ญา อาเมด ลาฆู นู กู ฌาดี นานะ ซูโลก ดัฮ. วะตู อีนี_ ลีฮัจ เลอ_ ญา อาเมด ปี_ ลาฆู นู ปะ นะ บรี ซือลามัจ_ กะ กู ดัฮ. ปะ เตด บือเลฮ ตาโรฮ ลาฆู_ นะ บรี ซือลามัจ กะ กู ฌูฆา เฆอ?”_ ญา จะ.
37อีซัก มือเลา ฌางัน เอซาว จะ_ “กู บือเลฮ ตืองะ ญา_ บรี ฌาดี ราฌา นะ เกา ดัฮ. กู บรี ลูมอฮ อาดี บราดี นะ ญา_ นะ ฌาดี ปราโซฮ นะ ญา. กู บรี ญา อาดา ปาดี บาญะ_ อาระ อางุน บาญะ_ บรี ญา กือญัง ดัฮ. นานะ เออ_ กู นะ บรี ลาฆู อาซิก นามา เลอ_ กะ เกา?”
38เอซาว มือเลา ฌางัน ปะ จะ_ “ปะ อาดา ลาฆู บรี ซือลามัจ_ แนฮ ซา ลาฆู เฆอ? โอ ปะ เออ_ มีตา ปะ_ นะ บรี ซือลามัจ กะ กู ฌูฆา เลอ.”_ เอซาว มือเลา กะฆีนี_ ซาแมน มือนาแงฮ_ มือญือซัน โตระ.
39กะฆีเตอ อีซัก_ ปะ เดะ ญา_ ตีกัฮ กะ ญา จะ_
“ลีฮัจ เลอ_ ตือปัจ ตานัฮ นะ เกา_ นะ ดูโดะ ฌาโวฮ เดะ บือนา_ นู บือบูวัฮ บาฌิ เตอ
ฌาโวฮ เดะ อาเย ฮือโมด_ นู ตูโรด มาแรฮ_ เดะ ลาแงะ โซะ อาตัซ.
40ตาปี เกา นะ ฮีโดะ_ ฌางัน ปือดัก นะ เกา.
เกา นะ ฌาดี ปราโซฮ_ นะ อาดี เดะ เกา.
ตาปี กาลา เกา นะ มืองูตัย บรี ลือปัซ
เกา นะ ลือกับ ปืองานัยํ นะ ญา_ บรี ปาตัฮ_ เดะ ลีเฮ นะ เกา เลอ”_ อีซัก ญา จะ.
ยาโกบ ลารี เดะ ลาฆู มูซัยํ นะ เอซาว
41กะฆีเตอ_ เอซาว ญา บือชี กะ ยาโกบ_ ซาเบะ ปะ บรี ซือลามัจ กะ ญา ดัฮ. เอซาว อีงัจ เดะ ฮาตี จะ_ “วะตู รอจ อารี บูวัจ ลาฆู บือซูซัฮ นู ปะ นะ มาตี_ มาแรฮ ดาปิก ดัฮ. ลือปัซ อีตู เลอ_ กู นะ บูนอฮ ยาโกบ_ อาดี เดะ กู.”
42ตาปี อาดา ซือมียา มือญาเระ_ ปือมือเลา นะ เอซาว ซีงี_ กะ เรเบคา_ มะ เดะ ญา. กะฆีเตอ_ เรเบคา_ ญา บลาโลก ยาโกบ มาแรฮ_ มือญาเระ กะ ญา จะ_ “ลีฮัจ เลอ_ กากา เดะ เกา_ เอซาว_ ญา ปูโฌะ ฮาตี นะ ญา ตะอาซิก_ อีงัจ นะ บูนอฮ เกา. 43กะฆีเตอ_ นานะ นะ กู เออ_ กือนา มือนีงัย กะ ปือมือเลา นะ มะ. ปี เลอ_ กะ ลาบัน_ กากา นะ มะ_ เดะ นังฆรี ฮาราน_ 44ดูโดะ ฌางัน ญา_ ซือฌูรุซ_ ตือดะ กากา เดะ เกา_ ฮอย มูซัยํ_ ตือดะ ญา ลูปา_ นู เกา บูวัจ นามา กะ ญา. 45วะตู อีตู_ มะ นะ ซูโรฮ ซือมียา ปี_ อาเมด เกา บือมาแรฮ_ เดะ โซะ อีตู. มะ ตีเมา บรี นานะ นะ มะ_ ดูวา อูรัก_ นะ มาตี_ เดะ ซา อารี อีตู” ญา จะ.
46กะฆีเตอ_ เรเบคา มือเลา ฌางัน อีซัก จะ_ “กู ฌือมู ญาวา นะ กู_ ซาเบะ ลูมอฮ นีบีนี บักซา เฮด. ดัฮ ยาโกบ นะ บือนีกัฮ_ ฌางัน นีบีนี บักซา เฮด ซืออูรัก_ ฌาดี นีบีนี ซืออูรัก เดะ นังฆรี อีนี เตอ_ ญาวา นะ กู นะ อาดา รือฆา นามา บีดา กู”_ ญา จะ.
Currently Selected:
ลามูลา 27: ULBIBLE
Highlight
Share
Copy
Want to have your highlights saved across all your devices? Sign up or sign in
