ลามูลา 44
44
โยเซบ ตาฮัด เบนยามิน ตาโรฮ ดัฮ
1กะฆีเตอ_ โยเซบ ปือซัด ซือมียา ฮัจลีฮัจ รูมัฮ นะ ญา จะ_ “บรี เกา บอฮ ปาดี_ เดะ ฆูนี นะ กูญา_ บรี ปือนอฮ บือกะ อาโกจ บือเลฮ. บอฮ ดูเวะ นะ กูญา ซอก ซืออูรัก_ เดะ มูโลจ ฆูนี นะ กูญา. 2บอฮ เจาะ ปีระ นะ กู_ เดะ มูโลจ ฆูนี นะ นานะ นู บูซู_ บือซามา ฌางัน ดูเวะ นะ ญา” ญา จะ. ซือมียา ฮัจลีฮัจ รูมัฮ โปด_ บูวัจ ตูโรจ_ บือกะ ปือมือเลา นะ โยเซบ.
3วะตู บือบีฮัก_ มาตา อารี นะ ตรือเบะ_ ซือมียา ฮัจลีฮัจ รูมัฮ บรี โกะ อาดี บราดี ตรือเบะ บือฌาลัด ปี_ ฌางัน โกะ กูดา บาซา ดือมิ นะ กูญา. 4กาลา กูญา ตรือเบะ เดะ นังฆรี_ ปี เตด บราปา ฌาโวฮ_ โยเซบ มือเลา ฌางัน ซือมียา ฮัจลีฮัจ รูมัฮ นะ ญา จะ_ “บีกัซ ปี เลอ_ ตูโรจ โกะ ซือมียา อีตู. ตานา ดาปัจ กูญา ดัฮ_ กือนา มือเลา ฌางัน กูญา จะ_ ‘บูวัจ นามา_ กาเญา บูวัจ ลาฆู นู ฌาฮัจ_ บาลัซ ลาฆู นู บาฌิ?#44.4 ซูรัจ กาเลฮ ฌาดี บาซา กรีก ตามัฮ ปือมือเลา กะฆีนี_ จะ_ บูวัจ นามา กาเญา จูรี_ เจาะ ปีระ นะ กู.? 5กือปาลา นะ กู_ ญา บียาซา โอะ เดะ เจาะ อีตู_ บูกัด เฆอ? เดะ เจาะ อีตู_ ญา บือเลฮ ตูโดฮ_ บูกัด เฆอ?_ กาเญา บูวัจ กะฆีนี_ ฌาดี ลาฆู ซาลัฮ บาญะ เลอ’ ”_ ญา จะ.
6ซือมียา ฮัจลีฮัจ รูมัฮ อีตู_ ญา ปี ตูโรจ กูญา ดัด_ ญา มือเลา ฌางัน กูญา_ ตูโรจ บือกะ ปือมือเลา นะ โยเซบ. 7กูญา อีตู ตีกัฮ กะ ญา จะ_ “บูวัจ นามา_ กือปาลา นะ กามี_ มือเลา กะฆีเตอ? ซูโงฮ_ กามี เตด บรานี นะ บูวัจ ลาฆู กะฆีเตอ เลอ. 8ลีฮัจ เลอ_ ดูเวะ นู กามี ดาปัจ_ เดะ มูโลจ ฆูนี นะ กามี_ กามี อาเมด มาแรฮ อาตัจ ปาเระ_ เดะ นังฆรี คานาอัน_ บรี กะ เกา ดัฮ. กะฆีเตอ เลอ_ นู นะ จูรี_ ปีระ มัซ เดะ รูมัฮ นะ กือปาลา นะ เกา_ กามี ตีเมา บูวัจ เลอ. 9ดัฮ เกา ดาปัจ บารัก อีตู_ อาดา ฌางัน กามี ซืออูรัก โปด_ บรี ซือมียา อีตู มาตี_ บรี กามี ฌาดี ปราโซฮ_ นะ กือปาลา นะ เกา เลอ”_ กูญา จะ.
10ซือมียา ฮัจลีฮัจ รูมัฮ นะ โยเซบ_ ญา มือเลา จะ_ “บรี ฌาดี กะฆีนี เลอ. ดัฮ ดาปัจ บารัก อีตู_ อาดา ฌางัน ซาปา_ ซือมียา อีตู เลอ_ นะ ฌาดี ปราโซฮ นะ กู. ตาปี โซะ กาเญา นู ฮอย เจาะ เตอ_ ฮอย ซาลัฮ เลอ.”
11กูญา ซอก ซืออูรัก_ งูฆางู อาเกะ ฆูนี นะ กูญา_ ตืองะ เดะ ตานัฮ_ บูกา บรี ลีฮัจ. 12กะฆีเตอ_ ซือมียา อีตู ซารี เดะ ฆูนี นะ โกะ กากา_ รอจ กะ ฆูนี นะ อาดี นู บูซู. ญา ดาปัจ เจาะ อีตู_ เดะ ฆูนี นะ เบนยามิน. 13กะฆีเตอ_ โกะ กากา นะ ญา ซูซัฮ ฮาตี_ จูลัด บาฌู นะ กูญา_ บรี จีแจะ. กูญา ปือโดะ บารัก เดะ กูดา ปูลัก_ บาลิ ปี กะ นังฆรี.
14กาลา ยูดา_ ฌางัน โกะ อาดี บราดี นะ ญา_ รอจ กะ รูมัฮ นะ โยเซบ_ ญา อาดา ปัจ อีตู ลาฆี. กูญา ซือมูฮา_ มือนูโนะ รอจ กะ ตานัฮ_ โซะ ฮือลด ญา. 15โยเซบ ตาญา กูญา จะ_ “กาเญา_ บือเลฮ บูวัจ ลาฆู นามา กะฆีนี? กาเญา เตด ตาฮู เฆอ_ นู ซือมียา บือกะ กู นี_ นะ ตูโดฮ ลาฆู กะฆีนี_ บือเลฮ?”
16ยูดา ตีกัฮ กะ ญา จะ_ “กามี นะ มือเลา นามา_ ฌางัน กือปาลา นะ กู? นะ มือญาเระ นามา? กามี นะ อูฆัย ลาฆู ซาลัฮ นะ กามี กะฮามี? ตูฮัด เดะ อาตัซ_ ญา ตาฮู_ ปาซัน ลาฆู ซาลัฮ นะ กามี. ลีฮัจ เลอ_ กามี ซือมูฮา_ ยอม ฌาดี ปราโซฮ นะ เกา. กามี ซือมูฮา เลอ_ ฌางัน ซือมียา นู ดาปัจ ดัฮ_ อาดา เจาะ อีตู_ เดะ ตางัน นะ ญา.”
17ตาปี โยเซบ ตีกัฮ จะ_ “กู เตด บูวัจ กะฆีเตอ เลอ. ซา ซือมียา นู อาดา เจาะ อีตู_ เดะ ตางัน นะ ญา เตอ_ ญา เลอ_ นู นะ ฌาดี ปราโซฮ นะ กู. ตาปี กาเญา เตอ_ บาลิ ปี_ กะ ปะ เดะ กาเญา_ บรี ซือนัง ซือลามัจ เลอ.”
ยูดา ปูโฌะ มีตา บรี ปลือปัซ เบนยามิน
18กะฆีเตอ_ ยูดา ปี ญาเเปะ โยเซบ_ มือเลา จะ_ “กือปาลา นะ กู เออ_ บรี กู มือเลา ปือมือเลา ซือปาตัฮ_ เดะ ตือลีงา นะ เกา เลอ. ฌางัน บรี เกา บืออีเซด_ ฌางัน กู. ซาเบะ เกา เลอ_ ฌาดี ซือรูปา ราฌา ฟาโร ตะอาซิก. 19เกา ตาญา กามี จะ_ ‘เกา อาดา ปะ เฆอ? อาดา อาดี เฆอ?’ 20กามี มือเลา ฌางัน เกา จะ_ ‘กามี อาดา ปะ_ นู ตูฮา โตระ. อาดา อาดี นู ดือมิ ลาฆี_ นู บือฌาดี ดัฮ_ วะตู ปะ ตูฮา ดัฮ. กากา นะ ญา มาตี ฮาบิฮ ดัฮ. อาดา อาดี ซา อูรัก ญา_ นู ฌาดี นานะ นะ มะ เดะ ญา. ปะ เดะ ญา_ ซายัก ญา โตระ’ กามี จะ. 21กะฆีเตอ_ เกา มือเลา ฌางัน กามี จะ_ ‘กาเญา กือนา บาวา นานะ อีตู_ มาแรฮ ดาปัจ กู เลอ_ บรี กู นะ ลีฮัจ ญา.’ 22ตาปี กามี มือเลา ฌางัน กือปาลา นะ กามี จะ_ ‘นานะ อีตู_ นะ ตีงัน ปะ_ เตด บือเลฮ. ดัฮ ญา นะ ตีงัน ปะ_ ปะ เดะ ญา_ นะ มาตี.’ 23เกา มือเลา ฌางัน กามี จะ_ ‘ดัฮ อาดี นู บูซู นะ กาเญา_ เตด มาแรฮ บือซามา ฌางัน กาเญา_ กาเญา นะ ลีฮัจ มูคา นะ กู_ เตด บือเลฮ ดัฮ’_ เกา จะ. 24ตานา กามี บาลิ ปี_ กะ ปะ ดัฮ_ บือตาฮู กะ ญา_ ปาซัน ปือมือเลา นะ เกา ดัฮ. 25กาลา ปะ เดะ กามี_ มือเลา จะ_ ‘ปี เลอ_ บือลี บารัก มากัด ซือตืองัฮ_ บรี กะ ลูมอฮ กีตา.’ 26กามี ตีกัฮ จะ_ ‘กามี ปี เตด บือเลฮ. ดัฮ อาดี นู บูซู_ ปี ซามา_ กะฆีเตอ_ กามี โปด นะ ปี. ซาเบะ ดัฮ อาดี นู บูซู เตด ปี_ บือซามา ฌางัน กามี_ กามี นะ ลีฮัจ มูคา นะ ซือมียา อีตู_ เตด บือเลฮ ดัฮ’_ กามี จะ. 27กะฆีเตอ_ ปะ เดะ กามี_ ญา มือเลา ฌางัน กามี จะ_ ‘กาเญา ตาฮู จะ_ บีนี นะ กู_ อาดา นานะ กีลากี_ ดูวา อูรัก. 28ซือมียา ซืออูรัก_ ญา มือนีงัน กู ดัฮ. กู มือเลา จะ_ ซูโงฮ_ อาดา บือนาตัก เดะ ฮูตัด_ ฆรูมง ฆีเฆะ จูลัด ญา_ บรี มาตี ดัฮ. ตะเดะ อีตู_ กู เตด ลีฮัจ บือฆารี ญา ลาลู เลอ. 29ดัฮ กาเญา นะ บาวา นานะ อีนี_ ปี เดะ กู_ นะ กือนา ลาฆู ฌาฮัจ เตอ_ กาเญา นะ บูวัจ บรี กู นู โบะ บือฮูบัด_ นะ ปี กะ นังฆรี ฮาตู_ ฌางัน ลาฆู ซูซัฮ ฮาตี เลอ’ ปะ ญา จะ.”
30ยูดา มือเลา ลาฆี จะ_ “กะฆีเตอ เลอ_ ดัฮ กู นะ บาลิ ปี_ กะ ปะ เดะ กู_ ฮอย นานะ อีตู ปี ซามา_ 31กาลา ปะ ลีฮัจ จะ_ นานะ อีตู_ ฮอย ดัฮ_ ปะ นะ มาตี_ ซาเบะ ฮาตี นะ ปะ ซายัก กะ นานะ อีตู ซูโงฮ. กะฆีเตอ_ กามี นะ บูวัจ บรี ปะ นู โบะ บือฮูบัด_ นะ ปี กะ นังฆรี ฮาตู_ ซูซัฮ ฮาตี เลอ. 32ซาเบะ กู ยอม ซาโงะ ซาลัฮ_ ปาซัน นานะ อีนี_ ฌางัน ปะ เดะ กู_ มือเลา ฌางัน ปะ จะ_ ‘ดัฮ กู เตด บาวา นานะ อีนี_ บาลิ มาแรฮ ดาปัจ ปะ ปูลัก_ กะฆีเตอ_ กู นะ ซาโงะ ปาซัน ลาฆู ซาลัฮ_ โซะ ฮือลด ปะ_ ซือมาญัก รอจ’ กู จะ. 33กะฆีเตอ เลอ_ กู มีตา เดะ เกา_ บรี กู นะ ดูโดะ ปัจ อีนี_ ฌาดี ปราโซฮ นะ เกา_ ฆาตี นานะ อีนี. บรี นานะ อีนี_ บาลิ ปี มารือมา ฌางัน โกะ กากา เดะ ญา เลอ. 34ดัฮ อาดี เตด บาลิ ปี_ บือซามา ฌางัน กู_ กู นะ ดาปัจ ปะ เดะ กู_ บือเลฮ กะฮามี เลอ? กู ตาโกจ นู นะ ลีฮัจ ปะ กือนา ลาฆู ซูซัฮ กะฆีเตอ”_ ยูดา ญา จะ.
Currently Selected:
ลามูลา 44: ULBIBLE
Highlight
Share
Copy
Want to have your highlights saved across all your devices? Sign up or sign in
