ลามูลา 5
5
ลาฆู บือแนฮ นะ อาดับ รอจ กะ โนอา
(1 จรือตา 1.1-4; ลูกา 3.36-38)
1อีนี ฌาดี ซูรัจ ลาฆู บือแนฮ นะ อาดับ. กาลา ตูฮัด เดะ อาตัซ บือฌาดี อูมัจ ซือมียา เตอ_ ญา บือฌาดี_ บรี ซือรูปา กะ ตูฮัด_ 2บรี อาดา กีลากี_ อาดา นีบีนี. เดะ อารี นู ญา บือฌาดี เตอ_ ตูฮัด บรี ซือลามัจ กะ กูญา_ บลาโลก ลูมอฮ กูญา จะ_ อูมัจ ซือมียา. 3ตานา อาดับ อูมอยํ_ ซือราตุซ ตีฆา ปูโลฮ (130) ตาโฮด_ ญา อาดา นานะ กีลากี ซืออูรัก_ ตูโรจ ซือรูปา บือกะ ญา_ ตืองะ ปือนามา จะ_ เซด. 4ลือปัซ เดะ อาดับ อาดา นานะ ปือนามา เซด_ ญา อาดา อูมอยํ ลาฆี_ ลาปัด ราตุซ (800) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 5อูมอยํ นะ อาดับ ซือมูฮา_ ซือมีลัด ราตุซ ตีฆา ปูโลฮ (930) ตาโฮด_ ญา บารู มาตี.
6ตานา เซด อูมอยํ ซือราตุซ ลีมา (105) ตาโฮด_ ญา อาดา นานะ กีลากี_ ปือนามา จะ เอโนด. 7ลือปัซ อีตู_ เซด ฮีโดะ ลาฆี ลาปัด ราตุซ ตูโฌฮ (807) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 8อูมอยํ นะ ญา ซือมูฮา_ ซือมีลัด ราตุซ ดูวา บือลัซ (912) ตาโฮด ดัฮ_ ญา บารู มาตี.
9ตานา เอโนด อูมอยํ_ ซือมีลัด ปูโลฮ (90) ตาโฮด_ ญา อาดา นานะ กีลากี_ ปือนามา จะ เคนัน. 10ลือปัซ อีตู_ เอโนด อาดา ฮีโดะ ลาฆี_ ลาปัด ราตุซ ลีมา บือลัซ (815) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 11อูมอยํ นะ ญา ซือมูฮา_ ซือมีลัด ราตุซ ลีมา (905) ตาโฮด ดัฮ_ ญา บารู มาตี.
12ตานา เคนัน อูมอยํ_ ตูโฌฮ ปูโลฮ (70) ตาโฮด_ ญา อาดา นานะ กีลากี_ ปือนามา จะ มือฮาลาเลน. 13ลือปัซ อีตู_ เคนัน อาดา ฮีโดะ ลาฆี_ ลาปัด ราตุซ ปัจ ปูโลฮ (840) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 14อูมอยํ นะ ญา ซือมูฮา ซือมีลัด ราตุซ ซือปูโลฮ (910) ตาโฮด_ ญา บารู มาตี.
15ตานา มือฮาลาเลน อูมอยํ_ นัม ปูโลฮ ลีมา (65) ตาโฮด_ ญา อาดา นานะ กีลากี_ ปือนามา จะ ยาเรด. 16ลือปัซ อีตู_ มือฮาลาเลน อาดา ฮีโดะ ลาฆี_ ลาปัด ราตุซ ตีฆา ปูโลฮ (830) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 17อูมอยํ นะ ญา ซือมูฮา_ ลาปัด ราตุซ ซือมีลัด ปูโลฮ ลีมา (895) ตาโฮด_ ญา บารู มาตี.
18ตานา ยาเรด อูมอยํ_ ซือราตุซ นัม ปูโลฮ ดูวา (162) ตาโฮด_ ญา อาดา นานะ กีลากี_ ปือนามา จะ เอโนก. 19ลือปัซ อีตู_ ยาเรด อาดา ฮีโดะ ลาฆี_ ลาปัด ราตุซ (800) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 20อูมอยํ นะ ญา ซือมูฮา ซือมีลัด ราตุซ นัม ปูโลฮ ดูวา (962) ตาโฮด_ บารู ญา มาตี.
21ตานา เอโนก อูมอยํ_ นัม ปูโลฮ ลีมา (65) ตาโฮด_ ญา อาดา นานะ กีลากี_ ปือนามา จะ มือทูเซลา. 22ตะเดะ เอโนก อาดา นานะ อีตู_ ญา บือฌาลัด ตูโรจ กะ ตูฮัด_ ตีฆา ราตุซ (300) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 23อูมอยํ นะ เอโนก ซือมูฮา_ ตีฆา ราตุซ นัม ปูโลฮ ลีมา (365) ตาโฮด. 24เอโนก ญา บือฌาลัด ตูโรจ กะ ตูฮัด_ กะฆีเตอ ญา ลือแงะ ดัฮ_ ซาเบะ ตูฮัด ซาโมจ ญา บือปี.
25ตานา มือทูเซลา อูมอยํ_ ซือราตุซ ลาปัด ปูโลฮ ตูโฌฮ (187) ตาโฮด_ ญา อาดา นานะ กีลากี_ ปือนามา จะ ลาเมก. 26ลือปัซ อีตู_ มือทูเซลา อาดา ฮีโดะ ลาฆี_ ตูโฌฮ ราตุซ ลาปัด ปูโลฮ ดูวา (782) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 27อูมอยํ นะ ญา ซือมูฮา_ ซือมีลัด ราตุซ นัม ปูโลฮ ซือมีลัด (969) ตาโฮด_ บารู ญา มาตี.
28ตานา ลาเมก อูมอยํ_ ซือราตุซ ลาปัด ปูโลฮ ดูวา (182) ตาโฮด_ ญา อาดา นานะ กีลากี ซืออูรัก 29ตืองะ ปือนามา จะ_ โนอา_ มือเลา จะ_ “นานะ อีนี ฌาดี ซือมียา_ นู นะ บูวัจ บรี กีตา ซือนัง บาฌิ. กีตา ซือมูฮา_ กือนา บือกรือฌา ซูซัฮ ปายัฮ โตระ_ ซาเบะ ตูฮัด บือซัยํ เดะ อาตัซ อาโบยํ ตานัฮ ดัฮ_ ตาปี ซือมียา อีนี_ นะ บรี กีตา ลือปัซ”_ ญา จะ. 30ลือปัซ อีตู_ ลาเมก ฮีโดะ ลาฆี_ ลีมา ราตุซ ซือมีลัด ปูโลฮ ลีมา (595) ตาโฮด_ อาดา นานะ กีลากี_ นานะ นีบีนี_ บาญะ อูรัก ลาฆี. 31อูมอยํ นะ ลาเมก ซือมูฮา_ ตูโฌฮ ราตุซ ตูโฌฮ ปูโลฮ ตูโฌฮ (777) ตาโฮด_ ญา บารู มาตี.
32ตานา โนอา อูมอยํ บือเลฮ_ ลีมา ราตุซ ตาโฮด (500 ปี)_ ญา อาดา นานะ กีลากี_ ตีฆา อูรัก_ ปือนามา จะ_ เชม_ ฮาม_ ฌางัน ยาเฟด.
Currently Selected:
ลามูลา 5: ULBIBLE
Highlight
Share
Copy
Want to have your highlights saved across all your devices? Sign up or sign in
