ลูกา 1
1
ปือมือเลา อาตัจ ซูรัจ บรี กะ เทโอฟีโล
1เทโอฟีโล เออ_ เกา นู โกะ ซือมียา ตูเฮะ ซูโงฮ_ เกา ตาฮู ดัฮ จะ_ อาดา บาญะ ซือมียา กือวาซา ฆาแรฮ ลาฆู จรือตา อีตู_ ตะเดะ ลามูลา_ ปาซัน ลาฆู นู ซุจ ฮาบิฮ ดัฮ_ เดะ ตืองัฮ โกะ ลูมอฮ กามี. 2นู กูญา ฆาแรฮ กะฆีเตอ_ กูญา ตูโรจ กะ โกะ ซือมียา อีตู_ นู บือเลฮ ลีฮัจ บือฆารี เดะ มาตา นะ กูญา ตะอาซิก ดัฮ_ ตะเดะ ลามูลา. กูญา อีนี เลอ_ ฌาดี ซือมียา นู บือเลฮ มือญาเระ ลาฆู อีตู บรี กามี ตาฮู ดัฮ. 3กะฆีเตอ_ เทโอฟีโล เออ_ กู โปด บือเลฮ ซาซัจ บรี ตาฮู ลาฆู ซือมูฮา_ ตะเดะ ลามูลา_ ฌู ฮาบิฮ ดัฮ. กู อีงัจ บาฌิ ดัฮ จะ_ นะ ฆาแรฮ โกะ ลาฆู อีตู บรี บาฌิ_ นะ กีเรบ บรี กะ เกา ฌูฆา เลอ. 4กู บูวัจ กะฆีนี_ บรี เกา นะ บือเลฮ ตาฮู ปือนอฮ ดัฮ_ ลาฆู นู ซูโงฮ เตอ_ ปาซัน โกะ ลาฆู อีตู_ นู กูญา บือเลฮ บรี กะ เกา ตาฮู ดัฮ.
ฮูลู บาลัก นะ ตูฮัด ปลีฮัจ กะ ซะคารียา
5กาลา เฮโรด ฌาดี ราฌา_ เดะ นังฆรี ยูเดีย เตอ_ อาดา ซามี ซืออูรัก_ เดะ ซือลูมอฮ นะ อาบียา_ ซามี อีตู ปือนามา ซะคารียา. บีนี นะ ญา ปือนามา เอลีซาเบด. ญา ฌูฆา ฌาดี ซือมียา เดะ บือแนฮ นะ อาโรน. 6กูญา ลากี บีนี_ ฌาดี ซือมียา บาฌิ ตือปัจ โซะ ฮือลด มูคา นะ ตูฮัด. กูญา ตูโรจ โกะ ปือมือซัด นะ ตูฮัด ซือมูฮา_ ฮอย จือลัฮ นู นะ บือเลฮ มืออูปัจ กะ กูญา เลอ. 7กูญา ฮอย นานะ_ กรานา เอลีซาเบด ญา ฌาดี ซือมือโฆจ. กูญา_ ลากี บีนี โปด_ ตูฮา ดัฮ เลอ.
8อาดา ซืออารี_ ซะคารียา ญา บือกรือฌา ฌาดี ซามี_ เดะ รูมัฮ มือญือมัฮ ตูฮัด_ วะตู ซือลูมอฮ นะ ญา มาโซะ ปี บือกรือฌา. 9อารี อีตู ญา ยิบละ กือนา ปีเลฮ ดัฮ_ ตูโรจ กะ ฮาดัจ นะ โกะ ซามี เตอ_ กือนา ปีเลฮ_ ฌาดี ซือมียา มาโซะ ปี จูโจฮ โกะ กือมียัน_ เดะ ดาลับ บาลัย นะ ตูฮัด. 10โกะ ซือมียา บาญะ ซือมูฮา_ กูญา อาดา บือซาโวจ โซะ ลูวัยํ เลอ_ วะตู ญา ตูนู กือมียัน มือญือมัฮ กะ ตูฮัด เตอ. 11อาดา ฮูลู บาลัก นะ ตูฮัด ซืออูรัก_ มาแรฮ ปลีฮัจ กะ ซะคารียา. ฮูลู บาลัก อีตู บือดีรี โซะ ซือบือลัฮ กานัน เดะ ตือปัจ อาซะ กือมียัน. 12ตานา ซะคารียา ลีฮัจ ดัฮ_ ญา ตือกือฌุจ_ ญา ตาโกจ ซูโงฮ. 13ตาปี ฮูลู บาลัก อีตู_ ญา มือเลา ฌางัน ซะคารียา จะ_ “เกา ฌางัน ตาโกจ เลอ. ตูฮัด ญา ดืองัยํ ดัฮ_ นู เกา บือเลฮ บือซาโวจ มีตา เดะ ญา. เอลีซาเบด_ บีนี นะ เกา_ นะ บือเลฮ นานะ กีลากี เลอ. เกา กือนา ตืองะ ปือนามา นะ นานะ อีตู จะ_ โยฮัน. 14เกา นะ ซูกา ฮาตี บาญะ ซูโงฮ เลอ. โกะ ซือมียา บาญะ โปด_ กูญา นะ ซูกา ฮาตี ฌูฆา_ กรานา นานะ นู นะ มาแรฮ บือฌาดี เตอ. 15ซาเบะ ญา เลอ_ นะ ฌาดี ซือมียา บือซัยํ_ โซะ ฮือลด มูคา นะ ตูฮัด. ญา นะ เตด โอะ อาระ อางุน_ เฆอ จะ_ อาระ มานามา โปด. ญา นะ ปือนอฮ ฌางัน ซือมืองัจ นะ ตูฮัด ตะเดะ โปรจ นะ มะ เดะ ญา เลอ. 16ญา นะ บาวา โกะ ซือมียา บักซา อิซราเอน บาญะ อูรัก_ บราเลฮ ฮาตี ปาเระ_ มาแรฮ มียา ตูฮัด บือซัยํ เดะ อาตัซ_ ตูฮัด นะ กูญา เลอ. 17ญา นะ ปี ดูลู เดะ ตูฮัด_ อาดา ฮาตี นู ตือฆัยํ อูรัจ_ นู มือฆัฮ_ บือกะ เอลียา เลอ. ญา นะ บรี โกะ อาโปก_ นะ บาลิ บาฌิ ปาเระ_ ฌางัน โกะ นานะ นะ กูญา. ญา นะ บรี โกะ ซือมียา บาตัฮ_ นะ อาดา ฮาตี นู ปานัย อากัน_ บือกะ โกะ ซือมียา นู บาฌิ ตือปัจ เลอ. ญา นะ บูวัจ กะฆีเตอ_ บีดา นะ ซียะ โกะ ลูมอฮ ซือมียา นะ ตูฮัด_ บรี ตูฮัด นะ มาแรฮ เลอ.” ฮูลู บาลัก ญา จะ.
18ซะคารียา_ ญา ตาญา ฮูลู บาลัก จะ_ “กู นะ ตาฮู บือเลฮ กะฮามี เลอ_ นู ลาฆู อีนี นะ ฌาดี ซูโงฮ? ซาเบะ กู นี_ ฌาดี อูรัก ตูฮา. บีนี นะ กู โปด_ ญา ตูฮา ฌูฆา ดัฮ.”
19โซะ ฮูลู บาลัก_ ญา ตีกัฮ จะ_ “กู ฌาดี ฆาบรีเอน_ นู บือดีรี นาตี ฌาดี ปราโซฮ_ โซะ ฮือลด มูคา นะ ตูฮัด บือซัยํ เดะ อาตัซ. ญา เลอ_ บือเลฮ ซูโรฮ กู มาแรฮ มือเลา ฌางัน เกา_ บาวา บรีตา นู บาฌิ อีนี_ มาแรฮ มือญาเระ กะ เกา เลอ. 20เออ_ กรานา เกา ฮอย เตด ปือจายา เดะ ปือมือเลา นะ กู_ นู นะ ฌาดี ดัฮ รอจ วะตู นะ ญา เตอ_ กะฆีเตอ ลีฮัจ เลอ_ เกา นะ เตด บือเลฮ มือเลา ลาลู_ ตือดะ รอจ กะ อารี อีตู_ นู ลาฆู กะฆีนี นะ ซุจ ฮาบิฮ ดัฮ เลอ.” ญา จะ.
21โซะ โกะ ซือมียา ซือมูฮา_ กูญา อาดา นาตี ซะคารียา. กูญา ปือและ ฮาตี_ กรานา ญา ดูโดะ เดะ ดาลับ บาลัย นะ ตูฮัด_ ลามา ตือลาลู เลอ. 22ตานา ญา ตรือเบะ ดัฮ เตอ_ นะ มือเลา ฌางัน กูญา โปด_ เตด บือเลฮ. กะฆีเตอ โกะ ซือมียา ซือมูฮา ตาฮู ดัฮ จะ_ อาดา ลาฆู มานามา บือเลฮ ปลีฮัจ กะ ญา_ เดะ ดาลับ บาลัย นะ ตูฮัด. ญา อูซิ บูวัจ ตางัน ฌางัน กูญา_ ซาเบะ ญา ฮอย เตด บือเลฮ มือเลา ดัฮ.
23ตานา ลาฆู บือกรือฌา นะ ญา ฮาบิฮ ดัฮ_ ญา บือเลฮ บาลิ ปี กะ รูมัฮ นะ ญา. 24ลือปัซ อีตู_ เอลีซาเบด_ บีนี นะ ญา_ ญา บือโปรจ ดัฮ. กะฆีเตอ ญา ปี ซือลูนี เดะ รูมัฮ_ ลีมา บูลัด ดัฮ_ ญา มือเลา จะ_ 25“วะตู อีนี เลอ_ ตูฮัด บือเลฮ ตือจีฮัด กะ กู_ บือเลฮ ตูโลก กู ดัฮ. ญา บูวัจ บรี กู เตด ฆาโดฮ จือและ เดะ ซาปา_ ซาเบะ กู ฮอย นานะ เลอ.” ญา จะ.
ฮูลู บาลัก นะ ตูฮัด ปลีฮัจ กะ มารียา
26ลือปัซ นัม บูลัด เตอ_ ตูฮัด เดะ อาตัซ ซูโรฮ ฮูลู บาลัก นะ ญา_ ฆาบรีเอน_ ปี กะ ตูโปะ นาซาเรด_ เดะ นังฆรี ฆาลิลี. 27ญา ปี ดาปัจ นีบีนี ราดารา ซืออูรัก_ ปือนามา มารียา. นีบีนี อีตู ฌาดี ตูนัง นะ โยเซบ_ นู ฌาดี บือแนฮ นะ ราฌา ดาวิด. 28ฮูลู บาลัก ญา มาแรฮ รอจ กะ นีบีนี อีตู_ มือเลา จะ_ “ซือลามัจ เลอ_ เกา. ตูฮัด บือซัยํ เดะ อาตัซ ดูโดะ บือซามา ฌางัน เกา_ ญา บรี ซือลามัจ กะ เกา ดัฮ.”
29โซะ มารียา_ ญา ตือกือฌุจ_ กรานา ปือมือเลา นะ ฮูลู บาลัก อีตู. ญา บือฮีมัจ เดะ ฮาตี จะ_ ปือมือเลา กะฆีเตอ ฌาดี นามา เลอ?
30กะฆีเตอ ฮูลู บาลัก_ ญา มือญาเระ กะ ญา จะ_ “มารียา เออ_ ฌางัน ตาโกจ เลอ. ตูฮัด ญา ฮาลัย บรี ซือลามัจ กะ เกา ดัฮ. 31นี เลอ_ เกา นะ บือโปรจ_ นะ ดูโดะ เดะ อาปี_ นานะ กีลากี. กือนา ตืองะ ปือนามา กะ นานะ อีตู จะ_ เยซู. 32นานะ อีตู นะ ฌาดี ซือมียา บือซัยํ. ญา เตอ_ นะ บือเลฮ ปือนามา จะ_ ฌาดี นานะ นะ ตูฮัด เดะ อาตัซ ซือซูโงฮ เลอ. ตูฮัด บือซัยํ เดะ อาตัซ นะ บูวัจ บรี ญา ฌาดี ราฌา_ ซือรูปา ราฌา ดาวิด_ อาโปก เดะ ญา_ กาลา นูตู. 33ญา นะ ปือบือลา ฌาดี ราฌา เดะ บักซา นะ ยาโกบ ซือลาลู. นู ญา ฌาดี ราฌา เตอ_ เตด ดือละ นะ ฮาบิฮ เลอ.” ญา จะ.
34ตาปี มารียา_ ญา ตีกัฮ กะ ฮูลู บาลัก จะ_ “ปาซัน อีนี นะ ฌาดี กะฮามี เลอ? กู นี_ เตด ดือละ บือซามา ฌางัน กีลากี โปด.”
35ฮูลู บาลัก ญา มือเลา จะ_ “ ซือมืองัจ นะ ตูฮัด นะ ตูโรด มาแรฮ_ เดะ อาตัซ เกา. นู ปือมือฆัฮ นะ ตูฮัด เดะ อาตัซ ซือซูโงฮ_ นะ ฌาฆา เกา. กะฆีเตอ เลอ_ นานะ นู นะ บือฌาดี เตอ_ ญา นะ กือนา บลาโลก จะ_ ซือมียา นู บาฌิ บือซรี_ จะ_ นานะ นะ ตูฮัด เดะ อาตัซ เตอ เลอ. 36นี เลอ_ เอลีซาเบด_ วา เดะ เกา นู ตูฮา ดัฮ_ ญา บือโปรจ นานะ กีลากี ฌูฆา. ญา นู กูญา บลาโลก จะ_ ฌาดี ซือมือโฆจ เตอ_ วะตู อีนี_ ญา บือโปรจ นัม บูลัด ดัฮ. 37ซาเบะ จะ_ ฮอย นามา เลอ_ นู ตูฮัด เดะ อาตัซ นะ บูวัจ เตด บือเลฮ.” ญา จะ.
38กะฆีเตอ_ มารียา ญา มือเลา จะ_ “กู นี_ ฌาดี ปราโซฮ นะ ตูฮัด บือซัยํ เดะ อาตัซ เลอ. บรี ฌาดี บือกะ ปือมือเลา นะ เกา เลอ.”
กะฆีเตอ ฮูลู บาลัก ญา ลือแงะ ปี เดะ ญา ดัฮ.
มารียา ปี ฌือเงาะ ลีฮัจ วา เดะ ญา
39วะตู อีตู_ มารียา ญา บีกัซ_ ฆางู ปี กะ ซา ตูโปะ_ นู อาดา เดะ ตืองัฮ โกะ บูเกะ_ โซะ นังฆรี ยูเดีย. 40ตานา รอจ ดัฮ_ ญา มาโซะ รูมัฮ นะ ซะคารียา_ มือเลา บรี ซือลามัจ กะ เอลีซาเบด. 41ตานา เอลีซาเบด ดืองัยํ นู ญา มือเลา กะฆีเตอ_ นานะ เดะ ดาลับ โปรจ ญา มืองูตัยํ.
เอลีซาเบด โปด_ ญา ปือนอฮ ฌางัน ซือมืองัจ นะ ตูฮัด_ 42ญา บือซูระ ซือวารา บือซัยํ จะ_ “เกา เลอ_ นู ซือลามัจ ซูโงฮ_ ลือเบฮ เดะ โกะ ลูมอฮ นีบีนี ซือมูฮา. นานะ เดะ ดาลับ โปรจ นะ เกา_ ญา ซือลามัจ ซูโงฮ ฌูฆา. 43ฌาดี กะฮามี เลอ_ นู กู กือนา ลาฆู บาฌิ กะฆีนี ดัฮ จะ_ เอด เดะ ตูฮัด นะ กู เตอ_ ญา มาแรฮ ฌือเงาะ ลีฮัจ กู ดัฮ เลอ? 44ซาเบะ จะ_ ตานา ซือวารา มือเลา นะ เกา_ มาโซะ เดะ ตือลีงา นะ กู ดัฮ_ นานะ เดะ ดาลับ โปรจ นะ กู_ ญา มืองูตัยํ ซูกา ฮาตี ซูโงฮ เลอ. 45ซือนัง ซือลามัจ ซูโงฮ เลอ_ นีบีนี นู บือเลฮ ปือจายา ดัฮ จะ_ ปือมือเลา นะ ตูฮัด_ นู มาแรฮ รอจ กะ ญา_ นะ ฌาดี รือมัก ดัฮ.” เอลีซาเบด ญา จะ.
มารียา มือญาญี ปูฌี กะ ตูฮัด
46มารียา มือเลา จะ
“ฮาตี นะ กู_ ปูฌี กะ ตูฮัด บือซัยํ เดะ อาตัซ
47อีซี ญาวา นะ กู โปด_ ซูกา ฮาตี กรานา ตูฮัด เลอ_ นู บูวัจ บรี กู ฮีโดะ ลือปัซ บาฌิ.
48กรานา จะ_ ตูฮัด ญา ลีฮัจ ลาฆู ปายัฮ รือนัฮ ซูโงฮ_ นะ นีบีนี ปราโซฮ นะ ญา.
นี เลอ_ ตะเดะ อีนี ปี_ โกะ ซือมียา ราตา อูมอยํ_ นะ บลาโลก กะ กู จะ_ ฌาดี ซือมียา ซือนัง ซือลามัจ เลอ.
49กรานา จะ_ ตูฮัด นู มือฆัฮ บือเลฮ บูวัจ ลาฆู บือซัยํ ฌางัน กู
ปือนามา นะ ตูฮัด โปด_ บาฌิ บือซรี เลอ.
50ตูฮัด ซายัก ตือจีฮัด_ กะ ซือมียา นู มือนูโนะ กะ ญา
ราตา อูมอยํ นะ โกะ อูมัจ ซือมียา ปี เลอ.
51ตูฮัด ญา บูวัจ ลาฆู มือฆัฮ ฌางัน ตางัน นะ ญา.
โกะ ซือมียา ฮาตี งันตืองัน เตอ_ ญา บูวัจ บรี กูญา จัฮบือลัฮ ดัฮ.
52ตูฮัด ญา ปือตูโรด โกะ ซือมียา ซัยํบือซัยํ_ เดะ ตือปัจ ดูโดะ ตีงี นะ กูญา
ญา อาเกะ ซือมียา รือนัฮ ปี ดูโดะ ฆาตี.
53ตูฮัด ญา บรี ซือมียา บือตาฮัด บือเลฮ มากัด ซือบารัก บาฌิ ฌู กือญัง_
ญา บรี ซือมียา นู กายา ปี_ ฮอย ซือบารัก นามา เดะ ตางัน เลอ.
54ตูฮัด ญา ตูโลก อิซราเอน_ นู ฌาดี ปราโซฮ นะ ญา_
ญา บรีงัจ จะ_ นะ ซายัก ตือจีฮัด เตอ_
55กะ อับราฮัม ฌางัน บือแนฮ นะ ญา_ ซือลาลู ปี
ตูโรจ บือกะ นู ญา บือเลฮ มือเลา ฌางัน โกะ บีลาแก นะ กีตา ดัฮ เตอ.”
56มารียา ญา ดูโดะ ฌางัน เอลีซาเบด_ บือเลฮ ฆามะ ตีฆา บูลัด_ บารู ญา บาลิ ปี กะ รูมัฮ นะ ญา.
โยฮัน_ ซือมียา นู บรี ซือลับ เดะ อาเย_ ญา ดูโดะ เดะ อาปี
57ตานา ฆือนะ วะตู ดัฮ_ เอลีซาเบด ญา ดูโดะ เดะ อาปี_ บือเลฮ นานะ กีลากี. 58โกะ ซือมียา นู ดูโดะ ดาปิก_ ฌางัน โกะ นะบรานะ นะ ญา_ ดืองัยํ จะ_ นู ตูฮัด บือเลฮ ตือจีฮัด กะ เอลีซาเบด_ บาญะ ซูโงฮ ดัฮ. กะฆีเตอ_ กูญา ซือมูฮา ปาคัจ มาแรฮ ซูกา ฮาตี ฌางัน ญา ฌูฆา.
59ตานา รอจ กะ อารี ลาปัด ดัฮ_ กูญา ปาคัจ มาแรฮ มียา นานะ อีตู_ นะ บรี ญา มาโซะ ลาฆู กรัจ. กูญา นะ ตืองะ ปือนามา กะ นานะ อีตู จะ_ ซะคารียา_ ตูโรจ กะ ปือนามา นะ อาโปก เดะ ญา. 60ตาปี โซะ มะ เดะ ญา ตีกัฮ จะ_ “ตีเมา เลอ. ตาปี กือนา ตืองะ ปือนามา จะ_ โยฮัน.”
61กูญา ปาคัจ ตีกัฮ จะ_ “ฮอย ซือมียา ดีฮา โบะ_ เดะ ลูมอฮ นะบรานะ นะ เกา_ อาดา ปือนามา กะฆีนี เลอ.” 62กะฆีเตอ_ กูญา อูซิ บูวัจ ตางัน กะ ปะ เดะ ญา_ ตาญา จะ_ “เกา นะ ตืองะ ปือนามา นามา_ บรี กะ นานะ นะ เกา?”
63ปะ เดะ ญา มีตา ปาปัด ตือปัจ ฆาแรฮ_ ญา ฆาแรฮ จะ_ “ปือนามา นานะ นะ กู จะ_ โยฮัน.” กะฆีเตอ โกะ ซือมียา ซือมูฮา กูญา ปาคัจ ปือและ ฮาตี ซูโงฮ เลอ. 64ดัดดัด อีตู_ มูโลจ ฌางัน ลีดัฮ นะ ซะคารียา โปด_ ญา บาฌิ ปาเระ ดัฮ. กะฆีเตอ ญา มือเลา บรี ซือลามัจ กะ ตูฮัด เดะ อาตัซ เลอ. 65กะฆีเตอ โกะ ซือมียา นู ดูโดะ ดาปิก รูมัฮ_ กูญา ปาคัจ ตาโกจ. ลาฆู ซือมูฮา อีตู_ กรือจัย ปี ราตา โซะ บูเกะ นังฆรี ยูเดีย. 66โกะ ลูมอฮ ซือมียา นู บือเลฮ ดืองัยํ_ กูญา บรีงัจ เดะ ฮาตี_ ตาญา จะ_ “นานะ อีตู นะ ฌาดี กะฮามี เลอ?” กรานา จะ_ ตางัน นะ ตูฮัด ดูโดะ ฌางัน ญา.
ซะคารียา มือเลา ตูโดฮ
67ซะคารียา_ นู ฌาดี อาโปก_ ญา ปือนอฮ ฌางัน ซือมืองัจ นะ ตูฮัด_ ญา มือเลา ตูโดฮ จะ_
68“ซือลามัจ เลอ กะ ตูฮัด_ ตูฮัด บือซัยํ นะ ลูมอฮ อิซราเอน_
กรานา จะ_ ญา บือเลฮ มาแรฮ ฌือเงาะ ลีฮัจ ลูมอฮ บักซา นะ ญา_
บือเลฮ ตือบุซ กูญา บรี ลือปัซ ดัฮ เลอ.
69ญา บือเลฮ ซูโรฮ ซือมียา นู มือฆัฮ_ มาแรฮ ตูโลก บรี ลือปัซ_
นู ดาตัก มาแรฮ เดะ บือแนฮ นะ ราฌา ดาวิด ปราโซฮ นะ ตูฮัด เลอ_
70ตูโรจ กะ ลาฆู นู ญา บือเลฮ มือเลา ตะเดะ นูตู ดัฮ_
ฌางัน มูโลจ นะ โกะ ซือมียา จรัฮ บาฌิ_ นู ตูโดฮ ลาฆู นะ ตูฮัด.
71ฌาดี จะ_ ซือมียา มือฆัฮ อีตู นะ บรี กีตา ลือปัซ_ เดะ ลูมอฮ ซือตรู นะ กีตา ซือมูฮา_
บรี ลือปัซ เดะ ตางัน นะ โกะ ซือมียา ซือมูฮา นู บือชี กะ กีตา.
72กะฆีเตอ_ ตูฮัด บูวัจ ตูโรจ กะ ลาฆู ตือจีฮัด อีตู_ นู บือเลฮ บือฌาญี ฌางัน โกะ บีลาแก นะ กีตา ดัฮ_
ญา บรีงัจ กะ ปือมือเลา บือปาคัจ นู จรัฮ บาฌิ_ นู ญา ตืองะ ดัฮ เลอ.
73ฌาดี จะ_ ปือมือเลา อาเกะ มือเลา บือฌาญี นะ ตูฮัด_
นู ญา บือเลฮ บือฌาญี ฌางัน อับราฮัม บีลาแก นะ กีตา_ จะ_
74ตานา กีตา ซือมูฮา ลือปัซ เดะ ตางัน ซือตรู นะ กีตา ดัฮ_
ญา นะ บรี กีตา บือกรือฌา ตูโลก ญา_ ฮอย เตด ตาโกจ นามา เลอ_
75บรี กีตา บือกรือฌา กะฆีเตอ_ อาดา ฮาตี จรัฮ บาฌิ_ ฮาตี รือมัก_
โซะ ฮือลด มูคา นะ ตูฮัด_ ตือดะ ฮาบิฮ อูมอยํ นะ กีตา เลอ.
76“โซะ เกา_ นานะ นะ กู เออ_ กูญา นะ บลาโลก กะ เกา จะ_ ซือมียา ตูโดฮ ลาฆู นะ ตูฮัด นู บือซัยํ เดะ อาตัซ_
กรานา จะ_ เกา นะ บือฌาลัด ปี ดูลู เดะ ตูฮัด_ บีดา นะ ซียะ ฌาลัด นะ ญา เลอ_
77บีดา นะ บรี กะ โกะ ซือมียา บักซา นะ ตูฮัด_ นะ ตาฮู จะ_
ตูฮัด นะ ตูโลก กูญา บรี ฮีโดะ ลือปัซ บาฌิ_
นะ อาเกะ ลาฆู ดูซา ซือมูฮา นะ กูญา เลอ.
78นู ฌาดี กะฆีเตอ_ ซาเบะ ตูฮัด บือซัยํ นะ กีตา_ ญา ตือจีฮัด ซายัก กะ กีตา เตอ_
ญา นะ บรี ซายา นู จรัฮ_ ดาตัก มาแรฮ เดะ โซะ ลาแงะ_ นะ ซูโลฮ กะ กีตา_
ซือรูปา กะ มาตาอารี เดะ วะตู มูกัยํ เลอ_
79นะ ซูโลฮ จรัฮ บรี กะ โกะ ซือมียา_ นู ดูโดะ โซะ กือลับ_
กะ ซือมียา นู ดูโดะ เดะ บายัก นะ ลาฆู ฌาฮานัม_
บีดา นะ บาวา กากี นะ กีตา_ ปี ตูโรจ กะ ฌาลัด นู ซือนัง ซือลามัจ เลอ.” ซะคารียา ญา จะ.
80โซะ นานะ อีตู_ ญา โปด_ บือซัยํ ซือรูโลยํ. นู โซะ ฮาตี โปด_ ญา ตือฆัยํ อูรัจ ฌูฆา เลอ. ญา ปี ดูโดะ เดะ ตือปัจ ปาดัก ตานัฮ ตูโฮยํ นู ลือฆา_ ตือดะ รอจ กะ อารี นู ญา นะ มาแรฮ ปลีฮัจ_ กะ ลูมอฮ อิซราเอน.
Currently Selected:
ลูกา 1: ULBIBLE
Highlight
Share
Copy
Want to have your highlights saved across all your devices? Sign up or sign in
