ลูกา 19

ซักคียัด ดาปัจ เยซู

1กะฆีเตอ_ เยซู ญา มาโซะ กะ นังฆรี เยรีโค_ นะ ลาลู ลือปัซ ปี ปูลัก. 2อาดา ซือมียา ซืออูรัก ปือนามา จะ_ ซักคียัด. ญา เตอ_ ฌาดี กือปาลา ลูมอฮ ซือมียา มูงอจ อาเซน ซืออูรัก_ นู ฌาดี อูรัก กายา เลอ. 3ญา ซูกา นะ ลีฮัจ เยซู จะ_ ฌาดี ซือมียา ดีฮา. ตาปี ญา ลีฮัจ เตด บือฆารี_ กรานา โกะ ซือมียา ตือลาลู บาญะ นู กรือจัจ_ ซาเบะ จะ_ ญา ญาวา รือนัฮ เลอ. 4กะฆีเตอ_ ญา บลารี ปี โซะ ฮือลด_ ญาแญะ ปูโฮด กายู_ บีดา ญา นะ ลีฮัจ บรี บือฆารี เยซู_ กรานา เยซู นะ ลาลู ปี ฌาลัด อีตู. 5ตานา เยซู มาแรฮ รอจ กะ ตือปัจ อีตู_ ญา ลางอฮ_ ลีฮัจ กะ อาตัซ_ มือเลา จะ_ “ซักคียัด เออ. บรี เกา ตูโรด มาแรฮ งูฆางู เลอ. อารี อีนี กู กือนา นะ บราดู เดะ รูมัฮ นะ เกา.”

6กะฆีเตอ ซักคียัด_ ญา ฆางู ตูโรด มาแรฮ_ ญา ซูกา ฮาตี ซูโงฮ_ ซาโมจ เยซู ปี กะ รูมัฮ นะ ญา. 7ตานา โกะ ซือมียา ลีฮัจ_ กูญา ซือมูฮา ปาคัจ มือเลา บือซูงุจ จะ_ “เยซู มาโซะ ปี ดูโดะ เดะ รูมัฮ อูรัก บือดูซา เลอ.”

8ตาปี ซักคียัด บือดีรี_ มือเลา ฌางัน ตูฮัด เยซู จะ_ “ลีฮัจ เลอ ตูฮัด_ ซือบารัก นะ กู ซือมูฮา_ กู นะ ฮาฆิ ซือตืองัฮ_ บรี กะ โกะ อูรัก ฮาฌะ. นู กู บือเลฮ กีจอฮ โกะ ซือบารัก นะ ซาปา เตอ_ กู นะ บรี ปาเระ ลือเบฮ เดะ อีตู_ ปัจ บาฮาเฆด เลอ.”

9กะฆีเตอ_ เยซู มือเลา กะ ซือมียา อีตู จะ_ “อารี อีนี เลอ_ โกะ ซือมียา ซือรูมัฮ อีนี_ ฮีโดะ ลือปัซ บาฌิ ดัฮ_ กรานา จะ ซือมียา อีนี เตอ_ ญา ฌาดี บือแนฮ นะ อับราฮัม ฌูฆา. 10ซาเบะ จะ กู_ นู นานะ นะ อูมัจ ซือมียา อีนี_ กู มาแรฮ ดัฮ_ นะ ซารี ซือมียา ซือซัจ ฌาลัด_ นะ ตูโลก ญา บรี ฮีโดะ ลือปัซ บาฌิ เลอ.” เยซู ญา จะ.

ลาฆู จรือตา ปาซัน ดูเวะ นู กีเรบ ดัฮ

(มัดทัย 25.14-30)

11ตานา กูญา ตืองัฮ ดืองัยํ ลาฆู กะฆีเตอ_ เยซู บือเลฮ มือเลา ปูลัก_ ฌาดี ลาฆู จรือตา อาฌัยํ บรี กะ กูญา ดืองัยํ_ ซาเบะ จะ_ เยซู มาแรฮ ดาปิก กะ นังฆรี เยรูซาเลม ดัฮ. กะฆีเตอ_ กูญา อาคา จะ_ ตูฮัด เดะ อาตัซ นะ มาแรฮ ปลีฮัจ ฌาดี ราฌา ดัดดัด. 12กะฆีเตอ_ เยซู มือเลา จะ_ “อาดา ซือมียา ซัยํบือซัยํ ซืออูรัก_ นะ ปี กะ นังฆรี ฌาโวฮ_ บีดา นะ ซาโมจ ปือมือฆัฮ ฌาดี ราฌา เดะ นังฆรี นะ ญา_ บารู นะ บาลิ ปาเระ มาแรฮ ปูลัก. 13กะฆีเตอ ญา บลาโลก ปราโซฮ นะ ญา_ ซือปูโลฮ อูรัก_ บรี ดูเวะ กะ กูญา_ ซืออูรัก ซือราตุซ รีเงะ ปีระ.#19.13 รีเงะ ปีระ อีตู ฌาดี บือกะ รือฆา อูปัฮ ซืออารี_ นะ ซือมียา บือกรือฌา ญา ปือซัด กะ กูญา จะ_ ‘กือนา อาเมด ปี บูวัจ ตาฆัด_ บีดา นะ ปี บือลี ฌูวัน โกะ ซือบารัก_ ตือดะ กู นะ ปาเระ มาแรฮ ปูลัก เลอ.’ 14ตาปี ลูมอฮ ซือมียา เดะ นังฆรี_ กูญา บือชี กะ ซือมียา อีตู. กูญา ซูโรฮ ซือมียา ปี ตูโรจ มือญาเระ จะ_ ‘กามี ตีเมา บรี ซือมียา อีนี มาแรฮ ปือบือลา_ ฌาดี ราฌา นะ กามี เลอ.’

15“ตานา ญา ซาโมจ ปือมือฆัฮ ฌาดี ราฌา ดัฮ_ ญา บาลิ มาแรฮ_ ญา บลาโลก โกะ ปราโซฮ อีตู_ นู ญา บือเลฮ กีเรบ ตาโรฮ โกะ ดูเวะ เตอ_ บีดา นะ บือเลฮ ตาฮู จะ_ กูญา ซูโรฮ ดูเวะ บือลี ฌูวัน โกะ ซือบารัก_ บือเลฮ อูโตก ดีกิ บาญะ ตารา ดีฮา เลอ. 16โซะ ซือมียา ลามูลา มือญาเระ จะ_ ‘ราฌา เออ_ ดูเวะ นะ เกา ซือราตุซ รีเงะ อีตู_ กู บือเลฮ อูโตก ซือรีบู รีเงะ เลอ.’ 17กะฆีเตอ_ ซือมียา อีตู มือเลา ฌางัน ญา จะ_ ‘บาฌิ ดัฮ เลอ_ เกา ฌาดี ปราโซฮ นู บาฌิ. กรานา เกา รือมัก ฌางัน โกะ ซือบารัก นู ดีกิ ตอจ_ กะฆีเตอ_ กู นะ บรี กะ เกา อาดา มือฆัฮ_ ปือบือลา ซือปูโลฮ ตูโปะ เลอ.’ 18ปราโซฮ นู ดูวา มาแรฮ มือญาเระ จะ_ ‘ราฌา เออ_ ดูเวะ นะ เกา ซือราตุซ รีเงะ_ กู บือเลฮ อูโตก ลีมา ราตุซ รีเงะ เลอ.’ 19กะฆีเตอ_ ซือมียา อีตู มือเลา ฌางัน ญา ฌูฆา จะ_ ‘เกา โปด_ นะ บือเลฮ ปือบือลา ลีมา ตูโปะ เลอ.’

20“นู ซืออูรัก มาแรฮ มือญาเระ จะ_ ‘ราฌา เออ_ นี เลอ_ ดูเวะ นะ เกา ซือราตุซ รีเงะ_ กู บือเลฮ บูกุซ ตาโรฮ เดะ กาเยด ดัฮ. 21ซาเบะ จะ_ กู ตาโกจ เดะ เกา_ กรานา เกา ฌาดี ซือมียา กรัซ. เกา มูงอจ บาฮาเฆด นู เกา ฮอย เตด บือเลฮ ตรือเบะ อูรัจ_ เกา กือตับ ปาดี นู เกา ฮอย เตด บือเลฮ ตานัม เลอ.’ 22ราฌา ตีกัฮ กะ ญา จะ_ ‘เกา เออ_ ปราโซฮ นู ฌาฮัจ เลอ_ กู นะ อาเมด ปือมือเลา นะ เกา ตะอาซิก_ มาแรฮ กรัจ ฮูโกบ เกา เลอ. เกา ตาฮู ดัฮ จะ_ กู ฌาดี ซือมียา กรัซ_ มูงอจ บาฮาเฆด_ นู กู ฮอย เตด บือเลฮ ตรือเบะ อูรัจ_ กือตับ ปาดี_ นู กู ฮอย เตด บือเลฮ ตานัม. 23ซาเบะ กะฆีเตอ เลอ_ บูวัจ นามา เกา ฮอย เตด บือเลฮ กีเรบ ดูเวะ นะ กู_ ตาโรฮ เดะ รูมัฮ กีเรบ ดูเวะ เตอ? กะฆีเตอ_ วะตู กู มาแรฮ_ กู นะ บือเลฮ อาเมด ดูเวะ อีตู_ ฌางัน บูงา นะ ญา ซามา เลอ.’ 24กะฆีเตอ_ ราฌา ปือซัด กะ ซือมียา นู บือดีรี โซะ อีตู จะ_ ‘กือนา อาเมด ดูเวะ_ เดะ ซือมียา นู อาดา ซือราตุซ รีเงะ อีตู_ บือปี อาตัจ บรี กะ ซือมียา นู อาดา ซือรีบู รีเงะ เลอ.’ 25โซะ ซือมียา อีตู มือเลา จะ_ ‘ราฌา เออ_ ญา อาดา ดูเวะ ซือรีบู รีเงะ ดัฮ.’ 26ญา ตีกัฮ จะ_ ‘กู มือญาเระ กะ กาเญา จะ_ ราตา ซือมียา นู อาดา ซือตืองัฮ ดัฮ_ นะ บือตามัฮ บรี กะ ญา ลาฆี. ตาปี ซือมียา ดีฮา นู ฮอย_ มีเซ จะ_ นู ญา อาดา เตอ_ นะ กือนา อาเมด ปี เดะ ญา เลอ. 27ตาปี โซะ ลูมอฮ ซือตรู นะ กู_ นู ตีเมา บรี กู ปือบือลา ฌาดี ราฌา นะ กูญา เตอ_ กือนา บาวา กูญา มาแรฮ กะ อีนี_ บูนอฮ กูญา โซะ ฮือลด มูคา นะ กู เลอ.’ ราฌา ญา จะ.”

เยซู มาโซะ กะ นังฆรี เยรูซาเลม_ ซือรูปา ฌาดี ราฌา

(มัดทัย 21.1-11; มาระโก 1.1-11; โยฮัน 12.12-19)

28ตานา มือเลา ปือมือเลา กะฆีเตอ ดัฮ_ เยซู ญา ฌาลัด ดูลู โซะ ฮือลด_ บาวา กูญา ปี กะ นังฆรี เยรูซาเลม. 29กะฆีเตอ_ ตานา มาแรฮ ดาปิก ตูโปะ เบดฟายี_ ฌางัน ตูโปะ เบดทานี_ เดะ บูเกะ นู บลาโลก จะ_ บูเกะ กือดูโนด เตอ_ เยซู ญา ซูโรฮ มูเระ_ ดูวา อูรัก_ ปี ดูลู_ 30ปือซัด จะ_ “กือนา มาโซะ ตูโปะ โซะ ฮือลด อีตู. มาโซะ ดัฮ_ กาเญา นะ ดาปัจ_ อานะ กูดา ซืออีโกยํ_ นู กือนา อีกัจ ดัฮ. อานะ กูดา อีตู เตอ_ ฮอย ซาปา ดือละ ญาแญะ. กือนา อูฆัย อีเระ มาแรฮ กะ อีนี เลอ. 31ดัฮ ซือมียา ดีฮา ตาญา จะ_ ‘กาเญา อูฆัย บูวัจ นามา?’_ กือนา จาเระ จะ_ ‘ซาเบะ ตูฮัด นะ อาเมด ซูโรฮ เลอ.’ ” เยซู ญา จะ.

32กะฆีเตอ_ มูเระ นู เยซู ซูโรฮ ปี เตอ_ กูญา ปี ดัฮ_ ดาปัจ ลาฆู นู ซือรูปา บือกะ เยซู บือเลฮ มือเลา เลอ. 33ตานา กูญา อูฆัย อานะ กูดา อีตู_ โกะ ตูฮัด กูดา_ กูญา ตาญา จะ_ “กาเญา อูฆัย อานะ กูดา_ บูวัจ นามา เลอ?”

34กูญา ตีกัฮ จะ_ “ซาเบะ ตูฮัด นะ อาเมด ซูโรฮ เลอ.” 35กะฆีเตอ_ กูญา อีเระ อานะ กูดา มาแรฮ_ รอจ กะ เยซู. กูญา อาเมด บาฌู นะ กูญา_ อาปัยํ เดะ บลากัก กูดา. กูญา บรี เยซู ญาแญะ_ ดูโดะ เดะ อานะ กูดา อีตู. 36ตานา เยซู ปี_ โกะ ซือมียา กูญา อาปัยํ บาฌู นะ กูญา เดะ ฌาลัด.

37ตานา ญา มาแรฮ ดาปิก นังฆรี เยรูซาเลม_ รอจ กะ ฌาลัด_ นู ตูโรด เดะ บูเกะ กือดูโนด เตอ_ โกะ ลูมอฮ มูเระ ซือมูฮา_ บาญะ อูรัก_ กูญา ซูกา ฮาตี ซูโงฮ_ มือโอจ กะ ตูฮัด เดะ อาตัซ_ ซือวารา บูริ_ ซาเบะ ลีฮัจ ลาฆู มือฆัฮ ซือมูฮา_ นู เยซู บือเลฮ บูวัจ ดัฮ. 38กูญา มือเลา จะ “ซือลามัจ เลอ_ ราฌา นู มาแรฮ เดะ ปือนามา นะ ตูฮัด เดะ อาตัซ#มปต 118.26. ซือนัง ซือลามัจ เลอ_ เดะ โซะ อาตัซ ลาแงะ. ปูฌี กะ ตูฮัด นู ตีงี เดะ อาตัซ ซูโงฮ.”

39เดะ ลูมอฮ ซือมียา บาญะ อีตู_ อาดา โกะ ลูมอฮ ฟาริซี ซือตืองัฮ. กูญา มือเลา ฌางัน เยซู จะ_ “บูมอยํ เออ_ กือนา บลารัก_ ลูมอฮ มูเระ นะ เกา เลอ.”

40ตาปี เยซู ตีกัฮ จะ_ “กู มือญาเระ กะ กาเญา จะ_ ดัฮ ลูมอฮ อีนี นะ ซืองะ_ ลูมอฮ บาตู โปด_ นะ อาดา บือซูระ บูริ ลาฆี.”

เยซู มือนาแงฮ ปาซัน ลาฆู นะ เยรูซาเลม

41ตานา มาแรฮ ดาปิก_ บือกะ นะ ลีฮัจ บือฆารี นังฆรี เยรูซาเลม เตอ_ เยซู ญา มือนาแงฮ_ บรีงัจ ตือจีฮัด กะ นังฆรี อีตู. 42ญา จะ “เออ_ ดัฮ เกา บือเลฮ ตาฮู เดะ อารี อีนี จะ_ ลาฆู นามา นู นะ บรี ดูโดะ ซือนัง ซือลามัจ เตอ_ กะฆีเตอ เลอ_ บาฌิ. ตาปี วะตู อีนี_ ลาฆู อีตู_ บูนี ตาโรฮ เดะ มาตา นะ เกา ดัฮ. 43กรานา จะ_ อาดา ซา อารี นู นะ มาแรฮ เตอ_ ตานา โกะ ซือตรู นะ เกา_ ญา บูวัจ รูมัฮ บือปรัก กือลีลิก เกา_ ปาฆัยํ กานัก เกา ตาโรฮ_ ตีเมา บรี ซาปา มาโซะ ปี_ ตรือเบะ มาแรฮ_ ราตา ตือปัจ. 44กะฆีเตอ_ กูญา นะ ปรูโตฮ เกา บรี ซามา ซือรูปา บือกะ ตานัฮ_ นะ บูนอฮ โกะ นานะ นะ เกา ซือมูฮา_ นู ดูโดะ เดะ เกา. กูญา นะ ตีเมา บรี อาดา บาตู บือซูโซด เดะ ดาลับ เกา ลาลู_ ซาเบะ จะ เกา ฮอย เตด ตาฮู_ วะตู นู ตูฮัด บือเลฮ มาแรฮ ตูโลก เกา.” เยซู ญา จะ.

เยซู ปี กะ รูมัฮ มือญือมัฮ ตูฮัด

(มัดทัย 21.12-17; มาระโก 11.15-19; โยฮัน 2.13-22)

45ลือปัซ อีตู_ เยซู ญา มาโซะ ปี กะ ดาลับ รูมัฮ มือญือมัฮ ตูฮัด_ ญา โปรฮ โกะ ซือมียา นู ฌูวัน โกะ ซือบารัก เดะ ลามัน รูมัฮ อีตู. 46ญา มือเลา กะ กูญา จะ_ “อาดา ฆาแรฮ ดัฮ_ เดะ ซูรัจ ปือมือเลา นะ ตูฮัด_ จะ ‘รูมัฮ นะ กู_ นะ ฌาดี รูมัฮ ตือปัจ บือซาโวจ กะ ตูฮัด.’ ตาปี กาเญา บือเลฮ บูวัจ_ บรี ฌาดี บือกะ ซารัก ลูมอฮ อูรัก ปือญามุน เลอ#อซย 56.7; ยรม 7.11 .” เยซู ญา จะ.

47เยซู ญา อาดา อาฌัยํ เดะ รูมัฮ มือญือมัฮ ตูฮัด_ บีลัก อารี. ตาปี ลูมอฮ ซามี ซัยํบือซัยํ_ ฌางัน โกะ ซือมียา อาฌัยํ ลาฆู ปือมือซัด นะ ตูฮัด_ โกะ ซือมียา ซัยํบือซัยํ ฌูฆา เตอ_ กูญา มียา จือลัฮ นะ บูนอฮ เยซู บูวัก. 48ตาปี เตด ดาปัจ จือลัฮ_ นะ บูวัจ นามา เตด บือเลฮ เลอ. ซาเบะ จะ_ โกะ ซือมียา ซือมูฮา_ กูญา ซูกา นะ มือนีงัย กะ เยซู บาญะ.

Currently Selected:

ลูกา 19: ULBIBLE

Highlight

Copy