มาระโก 4
4
เยซู จรือตา ลาฆู นะ ซือมียา ปรัก บีฌี ตาโระ
(มัดทัย 13.1-9; ลูกา 8.4-8)
1ซือกาลี ลาฆี_ เยซู เตอ_ ญา ปี อาฌัยํ_ เดะ บีดิก ลาโวจ. อาดา โกะ ลูมอฮ ซือมียา บาญะ ซูโงฮ_ กูญา มาแรฮ บือมุน_ กือลีลิก เยซู. กะฆีเตอ_ เยซู เตอ_ ญา ปี ญาแญะ กะ อาตัซ ปราฮู. ญา ดูโดะ เดะ ปราฮู_ เดะ บีดิก ลาโวจ_ ตาปี โกะ ลูมอฮ ซือมียา บาญะ อีตู ซือมูฮา_ กูญา ดูโดะ โซะ ปาตัย.
2กะฆีเตอ_ เยซู ญา จรือตา อาฌัยํ กะ กูญา_ บาญะ ลาฆู. ญา อาฌัยํ โกะ ซือมียา บาญะ_ มือเลา จะ_ 3“มือนีงัย เลอ. อาดา ซือมียา ซืออูรัก_ ญา ปี ปรัก บีฌี ตาโระ เดะ กือโบด. 4ตานา ญา ปรัก กะฆีเตอ_ อาดา บีฌี ซือตืองัฮ_ ญา ฆูโฆยํ เดะ บีดิก ฌาลัด. กะฆีเตอ_ อาดา กาวัด บูโรก_ ปาคัจ มาแรฮ ปาโตะ มากัด บีฌี อีตู_ ปี ดัฮ.” ญา จะ.
5“อาดา บีฌี ซือตืองัฮ ฌูฆา_ ญา ฆูโฆยํ เดะ ตานัฮ_ นู อาดา บาตู บาญะ_ อาดา ตานัฮ กิดีกิ เตอ. บีฌี อีตู โปด_ ญา บือตูโมฮ งัจบางัจ_ ซาเบะ ตานัฮ เตด ดาลับ. 6ตานา มาตา อารี ตือลาลู ฮางัจ เตอ_ ปูโฮด อีตู_ ญา ลายู ตูโฮยํ ดัฮ_ กรานา ฮอย ฌากัยํ. 7อาดา บีฌี ซือตืองัฮ_ ญา ฆูโฆยํ เดะ ตืองัฮ ปูโฮด บือดูรี. ปูโฮด บือดูรี อีตู ญา บือตูโมฮ_ ญา ตูโดก บูวัก ปูโฮด ตาโระ อีตู. กะฆีเตอ_ ปูโฮด ตาโระ ฮอย เตด บือตามัฮ บูวัฮ ลาลู. 8อาดา บีฌี ซือตืองัฮ_ ญา ฆูโฆยํ เดะ ตานัฮ นู บาฌิ. กะฆีเตอ_ ญา บือบูวัฮ บาฌิ_ ญา บือตูโมฮ บาฌิ_ บือตามัฮ บูวัฮ บาญะ. ซือตืองัฮ บือตามัฮ ตีฆา ปูโลฮ บีฌี_ ซือตืองัฮ นัม ปูโลฮ บีฌี_ ซือตืองัฮ รอจ กะ ซือราตุซ บีฌี เลอ.”_ ญา จะ.
9กะฆีเตอ เลอ_ เยซู ญา มือเลา จะ_ “ซาปา อาดา ตือลีงา_ นู ดืองัยํ บือเลฮ_ บรี ญา มือนีงัย เลอ.”
ซาเบะ นามา เยซู ญา จรือตา อาฌัยํ กะฆีเตอ
(มัดทัย 13.10-17; ลูกา 8.9-10)
10กาลา โกะ ซือมียา บาญะ ปาคัจ ปี ดัฮ_ โกะ ซือมียา นู อาดา ฌางัน เยซู_ บือซามา ฌางัน โกะ มูเระ ดูวา บือลัซ อูรัก อีตู เตอ_ กูญา ตาญา เยซู_ ปาซัน ลาฆู จรือตา อาฌัยํ อีตู. 11กะฆีเตอ_ เยซู มือเลา ฌางัน กูญา จะ_ “โซะ ลูมอฮ กาเญา เตอ_ ตูฮัด บือเลฮ บรี ตาฮู_ ลาฆู ดาลับ ซูโงฮ ปาซัน ลาฆู นู ตูฮัด ฌาดี ราฌา_ นู ปือบือลา ดือนียา อีนี. ตาปี โซะ ลูมอฮ ซือมียา วัยํลูวัยํ เตอ_ ลาฆู อีนี ซือมูฮา_ ฌาดี ลาฆู จรือตา เลอ. 12กะฆีเตอ_ นะ ฌาดี กะฆีนี
“ ‘บรี กูญา ลีฮัจ_ ตาปี ซือรูปา ลีฮัจ ดัฮ_ เตด บือฆารี นามา_
นะ บรี กูญา ดืองัยํ_ ตาปี ซือรูปา ดืองัยํ ดัฮ_ เตด มาโซะ เดะ ฮาตี ลาลู.
ตีเมา บรี กูญา นะ อาเลฮ มาแรฮ กะ ตูฮัด ปูลัก_
บรี ตูฮัด นะ อาเกะ ดูซา นะ กูญา #
อซย 6.9-10
.’ ” ญา จะ.
เยซู มือญาเระ บรี มาโซะ เดะ ฮาตี_ ปาซัน โกะ บีฌี ตาโระ
(มัดทัย 13.18-23; ลูกา 8.11-15)
13กะฆีเตอ_ เยซู เตอ_ ญา มือเลา ฌางัน กูญา จะ_ “ดัฮ ลาฆู กู จรือตา อาฌัยํ ซีงี_ ฮอย เตด มาโซะ เดะ ฮาตี นะ กาเญา_ ลาฆู จรือตา อาซิก นะ มาโซะ เดะ ฮาตี_ บือเลฮ กะฮามี เลอ? 14ซือมียา นู ปรัก บีฌี ซีงี เตอ_ ซือรูปา ญา ปรัก ปือมือเลา นะ ตูฮัด. 15โซะ บีฌี นู ฆูโฆยํ เดะ บีดิก ฌาลัด ซีงี เตอ_ ฌาดี จะ_ ซือรูปา ปือมือเลา อีตู_ กือนา ปรัก เดะ ฮาตี ลูมอฮ ซือมียา. ตานา กูญา ดืองัยํ ดัฮ_ ดัดดัด อีตู กือปาลา ฮาตู ซีตัด เตอ_ ญา มาแรฮ จาปัย ปือมือเลา อีตู นู ปรัก_ เดะ ฮาตี นะ กูญา_ บือปี ดัฮ.
16“กะฆีเตอ_ โกะ บีฌี นู ปรัก เดะ ตือปัจ อาดา บาตู บาญะ ซีงี เตอ_ ซือรูปา บือกะ ลูมอฮ ซือมียา_ ตานา ดืองัยํ ลาฆู นะ ตูฮัด ดัฮ_ ดัดดัด กูญา ซูกา ฮาตี ซาโมจ ลาฆู ปือมือเลา อีตู เลอ. 17ตาปี ปือมือเลา อีตู_ ญา ฮอย เตด บือฌากัยํ_ เดะ ดาลับ ฮาตี นะ กูญา เตอ_ นะ ตาฮัด เตด ลามา เลอ. วะตู โกะ ซือมียา อีตู_ กือนา ซูซัฮ ปายัฮ เตอ_ กือนา ปรือกัด เตอ_ กรานา กูญา ซาโมจ ปือมือเลา อีตู ดัฮ_ ดัดดัด กูญา นะ มืองือละ บูวัก. 18กะฆีเตอ_ บีฌี อาซิก_ นู ปรัก ฆูโฆยํ เดะ ตืองัฮ ปูโฮด บือดูรี ซีงี เตอ_ ซือรูปา บือกะ ลูมอฮ ซือมียา_ นู ดืองัยํ ปือมือเลา อีตู_ 19ตาปี ตานา กูญา ฆาโดฮ ฮาตี_ ปาซัน ลาฆู โซะ ดือนียา เตอ_ ตานา กูญา บือคานะ ซูกา โกะ บือนา บารัก_ อาดา ฮาตี ฆาละ นะ บือเลฮ บาญะ เตอ_ ลาฆู อีตู ซือมูฮา เตอ_ ญา ซือรูปา ปูโฮด บือดูรี_ มาแรฮ ตูโดก ปือมือเลา อีตู_ บูวัจ บรี ญา ฮอย เตด บือบูวัฮ ดัฮ เลอ. 20ตาปี โกะ บีฌี อีตู_ นู ปรัก ฆูโฆยํ เดะ ตานัฮ บาฌิ ซีงี เตอ_ ซือรูปา บือกะ โกะ ซือมียา นู ดืองัยํ ปือมือเลา อีตู เตอ_ ซาโมจ บาฌิ_ บรี ลือกัจ เดะ ฮาตี. กูญา เลอ_ บือบูวัฮ บาญะ_ ซือตืองัฮ บือตามัฮ ตีฆา ปูโลฮ บีฌี เตอ_ ซือตืองัฮ นัม ปูโลฮ_ ซือตืองัฮ รอจ กะ ซือราตุซ บีฌี เลอ.” เยซู ญา จะ.
นะ บอฮ ปลีตา ปัจ ดีฮา
(ลูกา 8.16-18)
21กะฆีเตอ_ เยซู มือเลา ฌางัน กูญา จะ_ “ปลือกัจ ปลีตา ดัฮ เตอ_ นะ อาเมด มาแรฮ บอฮ ปัจ ดีฮา? นะ บอฮ เดะ บาวัฮ เตง เฆอ? นะ บอฮ เดะ บาวัฮ ตือปัจ ตีโนะ เฆอ? โงฮซูโงฮ_ นะ บอฮ เดะ อาตัซ ซือลีแป_ บรี ซูโลฮ จรัฮ ราตา. 22กรานา จะ_ ลาฆู นามา_ นู ตูโดก บูนี ดัฮ เตอ_ ญา บูนี ดัฮ บีดา นะ กือนา บูกา บรี ลีฮัจ ปูลัก. ลาฆู นามา นู ลีนง ตาโรฮ ดัฮ เตอ_ ญา ตาโรฮ ดัฮ กะฆีเตอ_ บีดา นะ กือนา อาเมด มาแรฮ_ บรี ลีฮัจ บือฆารี ซัฮ เลอ. 23กะฆีเตอ_ ซือมียา อาดา ตือลีงา_ นู นะ ดืองัยํ บือเลฮ เตอ_ มือนีงัย เลอ.” ญา จะ.
24กะฆีเตอ_ เยซู มือเลา ฌางัน กูญา จะ_ “กาเญา กือนา ฌาฆา บรี บาฌิ_ นะ มือนีงัย ลาฆู นามา. กาเญา นะ ตูวัก ฌางัน มาโกะ นู ดีฮา_ ตูฮัด นะ ตูวัก บรี กะ กาเญา ฌางัน มาโกะ นู อีตู เลอ#4.24 ฌาดี จะ “ดรัซ มือนีงัย บาญะ กะฮามี_ ดรัซ มาโซะ เดะ ฮาตี บาญะ กะฆีเตอ.” ลือเบฮ เดะ อีตู โปด_ ตูฮัด นะ บือตามัฮ บรี กะ กาเญา. 25กรานา จะ_ ซือมียา ดีฮา นู ตาฮู ซือตืองัฮ เตอ_ ญา นะ ซาโมจ ลาฆี. ตาปี ซือมียา นู เตด ตาฮู นามา ลาฆี_ นู ญา ตาฮู นู ดีกิ ตอจ เตอ_ นะ กือนา อาเมด ปี เดะ ญา ดัฮ เลอ.” ญา จะ.
โกะ บีฌี บือตูโมฮ กะฮามี
26กะฆีเตอ_ เยซู มือเลา จะ_ “ลาฆู นู ตูฮัด เดะ อาตัซ_ ญา นะ มาแรฮ ปือบือลา ฌาดี ราฌา เตอ_ ญา ฌาดี ซือรูปา บือกะ ลาฆู นะ ซือมียา_ นู ปรัก บีฌี เดะ ตานัฮ ดัฮ. 27ญา ตีโนะ โซะ มาลับ_ บีกัซ โซะ ปาฆี_ ตาปี นู บีฌี อีตู_ บือตูโมฮ เดะ ตานัฮ_ บือตูโมฮ ตีงี กะฮามี เตอ_ ซือมียา อีตู_ ญา เตด ตาฮู ลาฆู นามา โปด. 28กรานา ตานัฮ ตะอาซิก_ บรี บีฌี อีตู บือตูโมฮ. อาดา ตูนัซ ดูลู. ลือปัซ อีตู_ อาดา ตากัย. ปือญูดัฮ_ อาดา บีฌี ปาดี_ ปือนอฮ เดะ ตากัย. 29วะตู ปาดี มาซะ ดัฮ_ ดัดดัด_ ซือมียา ซีงี เตอ_ ญา ซูโรฮ โกะ ซือมียา ปี กือตับ ปาดี_ กรานา รอจ วะตู กือตับ ดัฮ.” เยซู ญา จะ.
จรือตา ปาซัน บีฌี ตาโระ นู ดือมิ ตอจ
(มัดทัย 13.31-32,34; ลูกา 13.18-19)
30กะฆีเตอ_ เยซู มือเลา จะ_ “ลาฆู นู ตูฮัด เดะ อาตัซ_ ญา นะ มาแรฮ ปือบือลา ฌาดี ราฌา เตอ_ กีตา นะ ปือซามา ฌาดี ซือรูปา ลาฆู นามา? กู นะ จรือตา ลาฆู นามา_ อาฌัยํ ปาซัน ลาฆู อีตู เลอ? 31เออ_ ญา ซือรูปา กะฆีนี เลอ_ อาดา บีฌี ตาโระ ซือบีฌี. ตานา บีฌี อีตู ตานัม ดัฮ_ ฌาดี บีฌี นู ดือมิ เดะ กาวัด ซือมูฮา_ เดะ ดือนียา. 32ตานัม ดัฮ_ ตาโระ อีตู บือตูโมฮ_ ฌู ฌาดี ปูโฮด ตาโระ ตีงี เดะ กาวัด ซือมูฮา. ปูโฮด อีตู_ อาดา ฌามัยํ บือซัยํ_ บรี โกะ บูโรก เดะ อาตัซ_ มาแรฮ มืองาตอจ_ บูวัจ ซารัก เดะ ลีโนฮ ปูโฮด อีตู.” เยซู ญา จะ.
33กะฆีเตอ_ เยซู มือญาเระ ปือมือเลา อีตู กะ กูญา_ ฌาดี ลาฆู จรือตา อาฌัยํ กะฆีเตอ_ บาญะ ลาฆู_ บือกะ กูญา มือนีงัย บือเลฮ. 34ญา เตด บือเลฮ มือเลา มาจับ อาซิก_ อูซิ จรือตา กะฆีเตอ เลอ. ตาปี วะตู ฮอย ซือมียา ดัฮ_ ญา มือญาเระ ลาฆู ซือมูฮา_ บรี กะ ลูมอฮ มูเระ นะ ญา_ บรี มาโซะ เดะ ฮาตี นะ กูญา.
เยซู บลารัก รีโบจ
(มัดทัย 8.23-27; ลูกา 8.22-25)
35ปะฮือญา อารี อีตู_ เยซู ญา มือเลา ฌางัน โกะ มูเระ นะ ญา จะ_ “โฌฮ_ กีตา ฌรือมัก ปี_ โซะ ซรือบัก เลอ.”_
36กะฆีเตอ_ โกะ มูเระ เตอ_ กูญา ตีงัน โกะ ลูมอฮ ซือมียา บาญะ อีตู_ กูญา ญาแญะ กะ ปราฮู_ ปี ฌางัน เยซู ดัฮ. อาดา ปราฮู อาซิก ซือตืองัฮ_ ปี ซามา. 37กูญา ปี กะฆีเตอ_ กูญา กือนา รีโบจ_ อาเงน ตือฆัยํ โตระ. อาดา อูมะ ตือโปะ มาโซะ กะ ปราฮู_ ฌู ปราฮู ซารัจ_ ดาปิก นะ ตาลับ. 38ตาปี เยซู เตอ_ ญา ตีโนะ ลีนา เดะ บาตัน_ โซะ กือมูดี. โกะ มูเระ เตอ_ กูญา ฆระ เยซู_ มือเลา จะ_ “ บูมอยํ เออ_ กีตา มาจับ นะ มาตี ดัฮ เลอ. เกา เตด ปือดูลี เฆอ?”
39เยซู เตอ_ ญา บีกัซ_ ญา บลารัก อาเงน_ บรี ตือโดฮ. ญา มือเลา ฌางัน ลาโวจ จะ_ “กือนา ซืองะ เลอ. ฌางัน บูริ.”
กะฆีเตอ อาเงน ฮอย ดัฮ_ ตือโดฮ บลีนัง ฮาบิฮ เลอ. 40กะฆีเตอ_ เยซู เตอ_ ญา มือเลา ฌางัน กูญา จะ_ “บูวัจ นามา ปะ_ กาเญา ตาโกจ กะฆีนี? กะฮามี_ กาเญา เตด ปือจายา เฆอ?”
41ตาปี โกะ มูเระ อีตู เตอ_ กูญา ตาโกจ โตระ. กูญา ปาคัจ มือเลา ซามา กูญา จะ_ “ซือมียา อีนี ฌาดี ซาปา_ ฌู อาเงน อูมะ โปด_ ตูโรจ กะ ปือมือซัด นะ ญา?”
Currently Selected:
มาระโก 4: ULBIBLE
Highlight
Share
Copy
Want to have your highlights saved across all your devices? Sign up or sign in
