Maleko 12
12
Ko te folafola fakatata o te kau gaue vite fakapo
1Nee kamata leva tana lea kia natou, aki ni folafola fakatata: “Ko he tagata nee ina to he vite, nee ina takatakai ia aki he a, nee ina gaohi he tatauaga o te u fua‐ivite, pea nee ina laga he fale leo; pea nee ina totogi fakatemi tana vite ki ni tagata gaue vite, pea folau leva ia ki he fenua mamao. 2I te hoko o te temi taukai vite, nee ina fekaui hana tagata fakalogo ke alu ia ki te kau tagata gaue vite ke ina mau foki tona inasi i te u fua o te vite. 3Pea nee natou puke o tai ia, pea nee natou fekau ke alu, e gaasipe ona nima. 4Pea nee ina toe fekau kia natou he tahi tagata, pea tataupe tona gaohi: nee natou tai tona ulu pea nee natou taukae ia. 5Pea nee ina toe fekaui he tahi kehe: pea ko te tagata aia nee natou tamatei ia, o mate osi; pea fekaui leva niihi tagata kehe: nee natou haha niihi pea tamatei niihi. 6Nee kei toepe te tokotahi, ko tona foha ofaina. Pea nee ina fekaui ia kia natou, mo ina uipe maana: E natou fakaapaapa anai ki toku foha. 7Kae ko te kau gaue vite nee natou feuiaki e natou: Koeni ia ae e ina mau anai te tofia o tona tamai; tou o, tou tamatei ia pea e tou mau anai tona tofia. 8Pea nee natou puke ia, pea tamatei, pea nee natou li‐age ki te tua gaueaga vite. 9Kotea te mea ka fai anai e te matua pule o te vite? E hau anai ia, pea e ina fakaauha te kau gaue vite, pea e ina foaki tana vite ki niihi tagata kehe. 10Pe nee heeki koutou lau te koga tohi aeni o te Tohi tapu: Ko te maka nee siaki e te kau tufuga, kua liliu ia ko te maka tuliki. 11Ko te gaue aena o te Aliki, pea e fakaofo ia ki otatou mata.”
12Pea nee natou faiga ke natou puke ia, kae nee natou matataku ki te hahai. He, nee mahino foki kia natou ko natoupe nee uhiga ki ai tana folafola fakatata aia. Pea nee natou tuku ia pea olo leva.
Ko te tukuhau kia Sesale
13E natou fekaui leva kia te ia niihi Faliseo mo niihi Helotiano, ke natou fai he puleaki kaka ke natou mau niihi hala i ana lea. 14E natou omai pea e natou ui‐age kia te ia: “Aliki, e matou iloi ko koe e ke hagatonu aipe i au lea, pea e mole ke fakameamea ki he tahi; he e mole ke tokagai te tuulaga o te kaiga, kae e ke akoi aki he loto hagatonu te ala o te Atua. Pe e gafua pe kailoa te totogi o te tukuhau kia Sesale? Pe e tonu ke matou totogi pe kailoa?” 15Kae ko ia, i tana iloi lelei tonatou malualoi, nee folafola‐age ia kia natou: “Mooa tautou ahiahi kovi mai kia te au? Aumai kia te au he tenalio kau sio ki ai.” 16Pea nee natou aumai te fala fefeka e tahi pea nee ina fehui‐age kia natou: “Ko te fakatata aeni o ai? Pea mo te tohi o ai?” Pea nee natou tali‐age: “O Sesale.” 17Pea nee toe folafola e Sesu kia natou: “Koutou tuku kia Sesale te mea a Sesale, pea koutou tuku ki te Atua te mea a te Atua.” Pea nee natou punamauli aupito o uhiga mo ia.
Ko te tuu‐ake o te u mate
18Pea nee omai leva kia te ia niihi Satuseo — niihi o te hahai e natou fakafisi ki te tuu‐ake — pea nee natou fai kia te ia te u fehui, o fenei: 19“Aliki, ko Moisese nee ina fai mai te fakatotonu aeni: Kapau e i ai he tahi kua mate tona tehina, ka heekimo mau hana tamasii i tona ohoana, e tonu ke ohoana ia mo te fafine aia, koteuhi ke mau he hako o tona tehina. 20Nee i ai ni tautehina e tokofitu. Ko te uluaki nee kua ohoana ia, pea nee mate ia, heeki mau hana fanau. 21Ko tona tehina nee ohoana ia mo te vitua pea nee mate mo ia, heeki mau hona hako, pea nee feiape mo tona tokotolu; 22e mole he tokotahi o te tokofitu aia nee ina tuku hona hako. Pea nee mate leva mo te fafine. 23I te temi o te tuu‐ake, ko te fafine aia e ui ko te ohoana o te tagata fea? He ko natou tokofitu nee natou ohoana mo ia.”
24Nee folafola e Sesu kia natou: “Pe e mole koutou fai hala ape, koteuhi e mole mahino‐atu te uhiga o te Tohi tapu pea mo te mafimafi o te Atua? 25He, ka hoko te tuu‐ake mai te mate, e mole kei ohoana mo he fafine pe ko he tagata, kae e hagepe ko ni aselo i selo. 26Pea ko te mea o uhiga ki te tuu‐ake o te u mate, pe nee mole koutou lau i te tohi a Moisese, i te talanoa ki te akau talatala nee vela, te folafola nee fai e te Atua kia te ia: Ko au te Atua o Apalahamo, te Atua o Isaake pea mo te Atua o Sakopo? 27E mole ko te Atua ia o te u mate, kae o natoupe e mauli. E koutou fai hala aupito.”
Ko te uluaki fekau
28Ko he tagata sekelipa nee fagono ia ki tanatou fetalanoaaki, i tana iloi te lelei o te tali nee fai e Sesu, nee fakaovi‐age mo ina fehui kia te ia: “Kotea te uluaki o te u fekau fuli?” 29Nee tali‐age e Sesu: “Ko te uluaki aeni: Fagono‐mai Iselaele, ko te Aliki totatou Atua, ko te Aliki tokotahipe ia, 30pea e ke ofa ki te Aliki, tou Atua, mo tou loto katoa, mo tou laumalie katoa, mo tou atamai katoa pea mo tou malohi katoa. 31Pea koeni tona lua: E ke ofa ki tou kaiga o hage ko tou ofa kia te koe. E mole i ai he tahi fekau e lahi‐age i te u fekau aia.” 32Ko te sekelipa nee ina ui‐age kia te ia: “Kua lelei aupito, Aliki, e tonupe tau lea ko ia tokotahipe pea e mole i ai he tahi kehe; 33ko te ofa kia te ia mo te loto katoa, mo te atamai katoa pea mo tota malohi katoa, pea mo te ofa ki te kaiga o hage ko tota ofa kia kita, e lelei‐age ia i te u failaulau pea mo te u sakilifisio fuli.” 34Ko Sesu, i tana iloi kua ina fai he lea fakapotopoto, nee folafola‐age kia te ia: “E mole ke mamao koe mai te Puleaga o te Atua.” Pea nee mole he tokotahi nee loto malohi o toe fakalavelave he mea kia te ia.
Ko Kilisito te alo pea mo te Aliki o Tavite
35I tana lea‐ake, nee fai e Sesu, i tana akonaki i te Fale tapu, te folafola aeni: “Pe e lava feafeai te lau a te kau sekelipa, ko Kilisito ko te Alo o Tavite? 36Ko Tavite totonu nee ina lau, akipe te Laumalie Maonioni: Ko te Aliki nee folafola ia ki toku Aliki: Ke ke afio i toku toomatau o aupe ki te temi e au tuku ou fili i lalo o ou tapuga vae. 37Ko Tavite totonu e ina fakahigoa ia ko te Aliki; pea, kapau koia, pe e lava feafeai ke higoa ia ko tona alo?” Pea ko te hahai fuli nee natou fagono kia te ia mo te loto fiafia.
Ko Sesu e ina fakamaui te kau sekelipa
38Nee ina toe fai i ana akonaki te folafola aeni: “Koutou fakamamao mai te kau sekelipa; e natou fiafia i te fealuaki mo te u kofu loloa, pea mo te tali o te u fakaapaapa i te u malae, 39mo te mau o te u hekaaga e tafa ki mua i te u sinakoka pea mo te uluaki nofoaga i te u taumafa‐aga, 40e natou kaihaa te u koloa o te u vitua, logope tanatou fai ni kole loloa; ko natou aia e natou amanaki maua ki he fakamau mamafa‐age.”
Ko te mea ofa o te fafine vitua
41I tana osi afio o haga ki te puha tanakiaga paaga, nee fofoga‐ifo ia ki te hahai nee natou ai ni kii paaga ki te puha, pea nee tokolahi te hahai mau koloa nee natou tuku ai, o lahi, ni paaga. 42Pea nee hau he fafine vitua masiva, o ina tuku ki ai ni kii fala fefeka e lua. 43Pea nee paui e Sesu ki ana tisipulo o folafola‐age kia natou: “E mooni, e au tala‐atu, ko te fafine vitua masiva aeni, e lahi‐age te mea ofa nee ina fai, i te mea ofa nee fai e te hahai kehe ki te tanakiaga paaga. 44Koteuhi ko natou aena nee natou ai te u paaga e mole aoga aupito kia natou, kae ko ia, e ina tuku ki ai he mea o tona masiva, nee ina tuku ki ai te mea katoa nee ina mau, mea katoa nee mea ke mauli‐aki ia.”
Currently Selected:
Maleko 12: WLS1971
Highlight
Share
Copy
Want to have your highlights saved across all your devices? Sign up or sign in
Published by the Bible Society in New Zealand 1971
