Maleko 2
2
Ko te fakamalolo o he tagata sino mate
1Hili he temi siipe, ka kua osi hu ia Sesu ki Kafanaume, nee logoi e te hahai e nofo ia i te loto fale. 2Pea uhi ko te tokolahi aupito o te hahai nee fakatahi ki ai, nee mole kei i ai he kii ava o aupe ki te gutu matapa, pea nee ina fakaha kia natou te folafola. 3Nee aumai kia te ia he tagata sino mate nee fata ia e te u tagata e tokofa. 4Pea nee mole natou lavai te tuku‐age o te mahaki aia i mua o Sesu, he nee hahai fau foki, nee natou vete te ato i te potu nee feauga mo te mea nee nofo ai ia Sesu, pea i te osi puhi o te ato aia, nee natou tuku‐ifo te fata nee takoto ai te mahaki. 5Ko Sesu, i tana fofoga‐ifo ki tanatou tui, nee folafola‐age ki te tagata sino mate: “Gaata, kua osi fakamolemole au agahala.” 6Kae, i te lotolotoga o te hahai, nee i ai niihi sekilipa nee natou manatu fenei i tonatou loto: 7“Pe e lava feafeai ke lea feia te tagata aeni? E lau kovi ia ki te Atua; koai e ina lavai te fakamolemole o te u agahala? Pe e mole ko te Atua tokotahipe?” 8Pea, i te lakaga tonu aia nee iloi e Sesu, i tona loto, tanatou manatu aia, pea nee folafola‐age kia natou: “Kotea e koutou manatu feia i toutou loto? 9Kotea e faigafua‐age i te lau ki te tagata‐nei: Kua fakamolemole au agahala, pe ko te lau ki ai: Tuu‐ake, too tou moeaga pea ke haele? 10Pea koia, koteuhi ke koutou iloi ko te Foha o te tagata e ina mau, i malama‐nei, te pule i te fakamolemole te u agahala, 11e au fekau‐atu, ko tana folafola aia ki te tagata mahaki, tuu‐ake, too tou moeaga pea alu ki tou api.” 12Nee tuu‐ake te tagata, pea nee ina too‐atu aipe tona moeaga, pea alu ki tua, i mua o te hahai fuli; pea ko natou fuli nee natou punamauli aupito pea nee natou fakakololia ki te Atua, o ui maa natou: “Hekimo matou sio ki he mea feia.”
Ko te paui o Levi
13Ko Sesu nee toe fou‐age i te ma ta tai, pea ko te hahai fuli nee omai kia te ia, pea nee ina akonaki natou. 14I tana haele‐age nee sio ia kia Levi, foha o Alefeo, nee heka ia i te laupapa o te fale tute, pea nee folafola ia kia te ia: “Mulimuli‐mai kia te au.” Pea nee tuu‐ake ia o mulimuli kia te ia.
Ko te taumafa mo te kau agahala
15I te nofo a Sesu i te laupapa kai, i te fale o Levi, nee tokolahi te u popelikano pea mo te kau agahala nee nonofo mo ia mo ana tisipulo, i te laupapa aia, he nee tokolahi natou nee mulimuli kia te ia. 16Ko te kau sekelipa, mai te faahi o te kau Faliseo, i tanatou sio ki tana taumafa mo te u agahala pea mo te u popelikano, nee natou ui‐age ki ana tisipulo: “Kotea e kai fakatahi ai ia mo te kau popelikano pea mo te kau agahala?” 17Nee logoi e Sesu tanatou lea aia, pea nee ina fai kia natou te lea aeni: “E mole ko natou e malolo lelei e aoga ki ai he toketa, kae e aoga ia kia natou e mahaki. Nee mole au hau o paui te agatonu, kae ko te kau agahala.”
Ko te talaga o uhiga mo te sesunio
18I te tahi aho, nee sesunio ai te u tisipulo o Soane pea mo te kau Faliseo, nee omai niihi o tala‐age kia Sesu: “Ko te u tisipulo o Soane pea mo te u tisipulo o te kau Faliseo e natou sesunio, kae kotea e mole sesunio ai au tisipulo?” 19Nee tali e Sesu kia natou: “Pe e gali mo te u kaumea o te tagata ohoana ke natou sesunio lolotoga tona kei nofo mo natou? I te kei nofo a te tagata ohoana ia natou, e mole gali mo natou ke natou sesunio. 20E hoko anai te u aho e too‐mai ia natou te tagata ohoana, pea e hoki natou sesunio ai leva i te aho aia. 21E mole he tahi e ina tui he moi kie foou ki he mutui kofu afea; kanapau e feia, ko te moi kie foou e ina haei gafua te koga kie afea, pea e asili ai tana mahae. 22E mole he tahi e ina ai he vino foou ki ni hina kili‐i‐manu afea, ka na aua la ko te vino foou e ina haei te u hina kili‐i‐manu aia o maumau ai te vino, o tatau mo te u hina kili‐i‐manu. Kae aoga ni hina kili‐i‐manu foou ki te vino foou.”
Ko te tau fulumeto i he aho sapato
23I he aho sapato nee fealuaki ia Sesu i te lotolotoga o te u gaueaga fulumeto, nee haga ana tisipulo o fasi te u fuhiga fulumeto. 24Pea nee ui‐age e te kau Faliseo kia te ia: “Sio‐la koe! Kotea e natou fai, i te aho sapato, he mea e mole gafua i te aho aia?” 25Pea ina tali‐age kia natou: “Pe nee mole koutou lau, i he temi, te mea nee fai e Tavite, i he lakaga nee nofo ai i te faigataa pea mo te fia kai ia ia mo ona kaumea, 26tana hu ki te fale o te Atua, i te temi o te aliki o te faahiga tauhi ko Apiatale, o ina kai te u pane nee faa tuku i te sagatualio, pane aia nee gafuape tona kai e te kau matua tauhi, pea nee ina foaki‐age te u pane aia ki ana kaumea?”
27Pea nee ina ui‐age kia natou: “Ko te sapato nee fakatuu ia uhi ko te tagata, kae nee mole fakatupu te tagata uhi ko te sapato. 28Pea koia foki e pule te Foha o te tagata ki te sapato.”
Currently Selected:
Maleko 2: WLS1971
Highlight
Share
Copy
Want to have your highlights saved across all your devices? Sign up or sign in
Published by the Bible Society in New Zealand 1971
