Maleko 5
5
Ko te tagata mai Selasa nee ulu sino ki ai he laumalie kovi
1Nee natou tau‐age ki te tahi kau vai, i te fenua o te kau Selasa. 2Pea, i te tuu uta a Sesu, nee hau‐atu aipe kia te ia he tagata nee nofo i te u fale maka, nee ulu sino ki ai he laumalie kovi. 3Nee mau nofoaga ia i te u fale maka pea nee mole i ai he tahi nee ina lavai te hai o te tagata aia, akipe lava he seini, 4he nee ina motuhi te u seini mo ina maumaui te u mea nee hai‐aki ona u vae, pea nee mole he tahi nee ina lavai ia. 5Pea nee nofo mau ia, i te po mo te aho, i te u fale maka pea mo te u mouga, o kalaga mo haehae tona sino aki ni maka masila. 6Nee sio ia kia Sesu mai mamao pea lele ia mo punou‐ifo i ona mua, 7pea kalaga leo lahi: “Kotea tou loto kia te au, e Sesu, ko te Alo o te Atua Maoluga? E au kole mamahi atu, i te huafa o te Atua, aua naa ke fakakinakinai au.” 8He, ko Sesu nee folafola‐age ki ai: “Mavae mai te tagata nei, laumalie kovi.” 9Pea nee ina fakalavelave ki ai: “Koai tou higoa?” Pea nee ina tali‐age: “Ko toku higoa ko Kaugamalie, koteuhi e matou tokohahai.” 10Pea nee ina kole mamahi kia te ia ke aua naa ina kapusia natou mai te fenua.
11Ka, nee i te potu aia, i te mouga, he faga puaka nee lolotoga kakai. 12Pea, ko te u laumalie kovi nee natou kole mamahi kia Sesu o ui: “Ke ke fekau ke matou olo ki te u puaka aena pea ke matou hu ia natou.” 13Pea nee ina fakagafua kia natou. Pea nee natou mavae mai te tagata o ulu sino ki te faga puaka pea nee natou fakato mai te potu maoluga ki te loto tai; nee natou lua afe ape pea nee natou malelemo fuli i te tai. 14Ko te kau tauhi puaka nee natou feholaki pea nee natou ave te logo i te kolo pea mo te u api o te hahai gaue kele; pea nee omai te hahai, ko te fia sio ki te mea kua hoko. 15Nee natou tau‐age kia Sesu pea nee natou sisio ki te tagata nee ulu sino ki ai te laumalie kovi, kua heka ia, kua kofu lelei pea kua atamai poto foki, ia ae nee nofo ai mua te Kaugamalie pea nee natou matataku aupito. 16Ko natou nee natou sisio tonu ki te mea aia nee natou fakamatala‐age kia natou pe nee feafeai te mea nee hoko ki te tagata nee kua ulu sino ki ai te laumalie kovi pea mo te mea nee hoko ia ki te faga puaka. 17Pea koia nee natou kole leva kia Sesu ke fakamamao ia mai tonatou fenua.
18Pea, i tana alu o heka ki te vaka, nee kole kia te ia e te tagata nee ulu sino ki ai te laumalie kovi ke nofo mo ia. 19Pea nee mole tali tana kole e Sesu, kae nee folafola ia ki ai: “Alu‐la ki tou api, ki ou kaiga, pea ke ke fakaha kia natou te u mea fuli nee fai e te Aliki o uhiga mo koe, i tona manavaofa.” 20Pea nee alu ia mo ina fakaha leo lahi, i te u kolo o te Tekapole, ia mea fuli nee fai e Sesu o uhiga mo ia, pea nee ofo lahi ai te hahai fuape.
Ko te fakamalolo o he fafine nee alu te toto ia te ia pea mo te fakatuu‐ake o te ofafine o Sailo
21Nee heka ia Sesu i te vaka pea i tona hoko‐age ki te tahi kau vai, nee tokolahi te hahai nee omai kia te ia, pea nee nofo ia i te mata tai. 22Pea nee tau‐age kia te ia he tahi o te u pule o te sinakoka nee higoa ko Sailo, pea i tana sio ki ai nee fakatomapee i ona takafalu, 23pea nee ina kole mamahi ki ai: “Ko toku ofafine kua tau tugaki, ke ke haele‐age o hilifaki ou takafalu kia te ia, koteuhi ke malolo ai pea ke mauli.” 24Nee alu ia Sesu, fakatahi mo ia, pea nee hahai aupito ia natou nee natou mulimuli kia te ia o fakaefihi ki ai mai ia faahi fuli.
25Pea nee i ai he fafine nee mahaki talu mai tau e hogofulu ma lua, ko te toto nee alu ia te ia, 26pea nee lahi tona fakamamahi e te u toketa tokolahi, pea nee mole ai ona koloa fuli, kae nee mole i ai hona fua, kae nee hagepe lava lelesili age te kovi o tona mahaki. 27Nee ina logoi ni talanoa o uhiga mo Sesu, pea nee hau ia o mulimuli kia te ia, i te lotolotoga o te hahai pea nee kapa ia ki tona kofu. 28He, nee ina ui i tona loto: “Kapau e au lava kapa ki ona u kofu, e au malolo ai anai.” 29Pea, i te lakaga tonu aia, nee gata atu aipe te alu o te toto pea nee ina logoi, i tona sino, kua osi malolo ia i tona mahaki. 30Pea nee logoi e Sesu kua mavae, i te lakaga aia, he malohi mai ia te ia, pea nee mafuli ia ki te hahai mo fehui‐age: “Koai nee ala ki oku kofu?” 31Pea nee tali‐age ki ai e ana tisipulo: “E ke siope ki te hahai e natou taotao ia koe mai ia faahi fuli pea e ke fehui‐mai: Koai nee kapa ki au?” 32Pea nee sio takafolifoli ia ke ina iloi pe koai ae nee ina fai te mea aia. 33Pea ko te fafine nee loto mataku pea tetetete ia, he nee ina iloipe te mea kua hoko kia te ia, pea nee hau ia o punou‐ifo i ona takafalu mo ina fakaha ki ai te mooni katoa. 34Pea nee folafola e Sesu ki ai: “Aloa, e ke mauli i tau tui; alu‐la i te fimalie pea ke ke malolo i tou mahaki.”
35Nee kei lolotoga faipe tana folafola mo te tau‐age, mai te api o te pule o te sinakoka, te u tagata nee natou ui‐age kia te ia: “Ko tou ofafine kua mate; mooa tau toe fakakinakina ki te Aliki?” 36Kae ko Sesu nee ina logoi te lea nee hoki osi tana lau, nee folafola‐age ki te pule o te sinakoka: “Aua naa ke manavasili; kae ke ke tuipe.” 37Pea nee mole ina tali ke i ai he tokotahi e mulimuli kia te ia, e gatape ia Petelo mo Sakopo pea mo Soane, tehina o Sakopo. 38Pea nee natou hoko‐atu ki te fale o te pule o te sinakoka pea nee fagono e Sesu ki te vake pea mo te fetagihi o te hahai pea mo tanatou kalaga. 39Pea, i tana hu ki te loto fale nee folafola‐age kia natou: “Mooa te logoaa aeni pea mo te tagi? Ko te tamasii‐nei heekimo mate, kae e moepe ia.” 40Pea nee natou vai ia. Kae nee ina fekaui natou fuli ke olo ki tua, pea nee ina too mo ia te tamai mo te fae a te tamasii, pea mo natou nee natou feoloaki mo ia, pea nee hu ia ki te potu nee i ai te tamasii. 41Pea, i tana puke te nima o te tamasii, nee folafola‐age ki ai: “Talitha koum” ko tona uhiga: “Taahine, e au fekau‐atu, tuu‐ake.” 42Pea nee mafuta‐ake aipe te taahine pea kamata haele ia, he nee tau hogofulu ma lua ia. Pea nee natou matataku aupito. 43Pea nee ina fekau malohi kia natou ke aua naa iloi te mea aia e he tokotahi; pea nee ina ui‐age ke foaki ki ai hana mea ke kai.
Currently Selected:
Maleko 5: WLS1971
Highlight
Share
Copy
Want to have your highlights saved across all your devices? Sign up or sign in
Published by the Bible Society in New Zealand 1971
