Maleko 8
8
Ko te fakaliuga pane. Ko tona tua lua aia
1I te u aho aia, uhi ko te tokolahi aupito o te hahai nee toe omai, pea mo tanatou hala mo mea kai, nee ina paui ana tisipulo pea nee folafola e ia kia natou: 2“E au ofa ki te hahai nei, he kua aho tolu tanatou nonofo mai pea e mole natou mau he mea kai. 3Kapau e au fekau ke natou liliu hee kai ki onatou api, e natou vaivai i te ala, pea e i ai niihi o natou nee omai mai mamao.” 4Nee tali‐age kia te ia e ana tisipulo: “Pe e mau maifea ni pane ke feauga moo fakamakona o te hahai nei, i heni, i he toafa?” 5Pea nee ina fehui‐age kia natou: “Pe e fia te u pane e koutou mau?” “E fitu”, ko tanatou tali aia. 6Pea nee ina fekau ki te hahai ke natou nonofo ki lalo; pea nee ina too ia pane e fitu, pea fai tana fakafetai, pea nee ina tofii mo ina foaki te u pane aia ki ana tisipulo ke natou vahevahe ia, pea nee natou tufaki ia ki te hahai. 7Nee mau foki mo niihi kii ika; pea i te osi o tana tapuaki ki ai, nee ina fekau ke toe tufa mo aia. 8Pea nee natou kakai o makokona ai, pea tanaki te u moi pane nee toe, o fonu ai kato e fitu. 9Kae nee natou tokofa afe ape. Pea nee ina fekau leva ke olo‐la natou. 10Pea nee hopo ki te vaka mo ana tisipulo, pea nee hau leva ia ki te koga fenua ko Talamanuta.
Ko te kau Faliseo e natou kole he fakailoga
11Nee omai te kau Faliseo pea nee natou kamata tanatou fetalanoaaki mo ia; nee natou kole‐age he fakailoga mai selo, ko tonatou fia ahiahi kia te ia. 12Nee lauga ia i te mamahi o tona loto mo ina fai te kupu aeni: “Kotea e kole‐mai e te tai tupu aeni he fakailoga? E mooni, e au tala‐atu, e mole tuku‐age he fakailoga ki te tai tupu nei.” 13Pea nee ina tuku natou pea toe folau ia ki te tahi kau vai.
Ko te mea fakatupu o te kau Faliseo pea mo Helote
14Nee galo ki te kau tisipulo te too o ni pane pea ko te foi pane e tahipe nee natou mau i te vaka, 15i te lakaga nee fai kia natou e Sesu te folafola tokoni aeni: “Koutou fakaava outou mata pea ke koutou fakamamao mai te mea fakatupu o te kau Faliseo pea mo te mea fakatupu o Helote.” 16Pea ko natou nee natou fai, ia natoupe, te fakakaukau aeni: “Ko tatou e mole tou mau ni pane.” 17Nee iloi e Sesu tanatou manatu aia, pea nee folafola ia kia natou: “Mooa te fai o te fakakaukau fenei: e mole ia koutou ni pane? Pe e mole koutou malama, pe heekimo mahino‐atu? Pe e mapunu aipe toutou atamai? 18Pe e koutou mau ni mata ke aua naa koutou sisio, mo taliga ke aua naa koutou logo? Pe e mole koutou manatui 19te temi nee au tofi ai ia pane e nima o uhiga mo tagata e tokonima afe, pe nee fia te u kato fofonu i te u koga pane nee koutou tanaki?” Pea nee natou tali‐age: “E hogofulu ma lua.” 20“Pea i te aho nee au tofi ai foi pane e fitu maa tagata e tokofa afe, pe e fia te u kato fofonu i te u toega pane nee koutou tanaki?” Pea nee natou tali‐age: “E fitu”. 21Pea nee toe folafola e ia kia natou: “Pe heeki mahino nei kia koutou?”
Ko te fakamalolo o he tagata kivi i Petesaita
22E natou tau‐age ki Petesaita pea nee aumai kia te ia he tagata kivi, mo natou kole‐age ke kapa ia ki ai. 23Pea nee ina puke te nima o te tagata kivi mo ina taki ia ki tua kolo. Pea i tana osi aanu ki ona mata mo hilifaki ona takafalu kia te ia, nee ina fehui‐age ki ai: “Pe e ke sio ki he mea?” 24Pea ko te tagata kua kamata sio, nee ina tali‐age kia te ia: “E au sio ki ni hahai, e au sio ki tanatou haele e hage ko ni fuu akau.” 25I te osi o te mea aia, nee toe ai e Sesu ona takafalu ki te u mata o te tagata kivi pea nee sio lelei ia, pea malolo foki pea nee siope lava ki mamao. 26Pea ko Sesu nee ina fekau ke liliu ia ki tona api, o ina tala ki ai: “Aua naa ke hupe ki te loto kolo.”
Ko te fakaha e Petelo tana tui
27Ko Sesu nee alu mo ona tisipulo o fakahaga tonatou fagona ki te u kolo nee kau ki Sesalea o Filipo, pea i te ala, nee ina fai ki ana tisipulo te fehui aeni: “Koai ia au, i te lau a te hahai?” 28Nee natou tali kia te ia: “Ko Soane Patita; e lau e niihi ko Elia, pea e lau e niihi kehe ko he tahi o te u polofeta.” 29“Kae, kia koutou, ko tona fehui aia, koai ia au?” Pea lea‐age kia te ia e Petelo, o ui: “Ko koe ko Kilisito.” 30Pea nee ina fekaui fakamalohi ke aua naa natou talanoa o uhiga mo ia ki he tahi.
Ko te uluaki fakaha fakakikite o te Pasio
31Pea nee ina kamata ako kia natou te amanaki mamahi lahi o te Foha o te tagata, mo tona siakina e te kau matua mo te kau aliki o te faahiga tauhi pea mo te u sekelipa, mo tona fakapogi ia, pea i te hili o aho e tolu e toe tuu‐ake ia; 32pea nee ina fai fakahagatonupe tana fakaha o te u mea aia. Pea ko Petelo nee ina tohoi‐mai kia te ia pea nee ina valoki ia. 33Kae ko ia nee mafuli‐age, pea i tona fofoga‐age ki ana tisipulo nee ina taute ia Petelo mo ina ui‐age ki ai: “Alu ki muli, Satana, koteuhi ko au fakakaukau e mole ko te u fakakaukau a te Atua, kae ko ae a te u tagata.”
Ko te u mea aoga moo mulimuli‐age kia Sesu
34Nee paui ki te hahai, fakatahipe mo ana tisipulo pea nee ina fai kia natou te folafola aeni: “Kapau e fia mulimuli‐mai kia te au he tahi, ke ina siaki ia ia, pea ke ina fua tona koluse, pea mulimuli‐mai ia. 35E mooni foki, ko ae e ina fia haofaki tona mauli e ina fakapuli ia, ka ko ae e ina fakanoai tona mauli koteuhi ko au pea mo te Logo Lelei, e ina haofaki ia. 36Kotea tona aoga ki te tagata ke ina mau te malama‐nei katoa, kae e ina maumaui tona mauli? 37Pea kotea te mea e feala ke foaki e te tagata o fetogi‐aki tona mauli totonu? 38He ko ae nee ufiufi uhi ko au pea mo aku lea, i te lotolotoga o te tai tupu nei, agatuu mo agahala, ko te Foha o te tagata e toe ufiufi anai mo ia, uhi ko te tagata aia, moka e toe haele‐mai ia i te kololia o tana Tamai mo te kau aselo maonioni.”
Currently Selected:
Maleko 8: WLS1971
Highlight
Share
Copy
Want to have your highlights saved across all your devices? Sign up or sign in
Published by the Bible Society in New Zealand 1971
