Kitaaba Seera Dadaa 25
25
Abrahaam Niitii Dhibii Fuudhe
(1 Dab. 1:32-33)
1Abrahaam niitii dhibii ta, «Qexuuraa» jedhantu fuudhe. 2Isiin Zimraan, Yokshaan, Medaan, Miidiyaan, Ishibaakii fi Shuwaa isaaf deette. 3Yokshaan Sheeba'aa fi Dedaan uumate; sanyii Dedaanii Ashuriim, Letushiimii fi Le'umiim. 4Ilmaan Miidiyaanii Efaa, Efer, Henok, Abiidaa fi Elda'a. Isaan kun martinuu ilmaan Qexuura'aa ti.
5Abrahaam waan qabu mara Yisihaqiif kenne. 6Ammoo adoo jiruu, ilmaan dubartooti dhibiin isaa deetteef kennansa kenneefii, gara lafa baya adu'uu Yisihaq irraa akka isaan fagaatanu godhe.
Du'a Abrahaamii
7Barri Abrahaam le'e woggaa dhibbaa fi torbaatamii shan. 8Abrahaam guddoo dulloomee, baralle quufee, gara worra isaa ka addee dhuga'aa jiruu gale. 9Ilmaan isaa Yisihaqii fi Ishimaa'el goda Makfela'aa fichaa Efronii ilma Zohaarii Heetichaa, ka Mamree irraa gara aduun baatuu san keessatti isa awwaalane. 10Abrahaam fichaa san worra Heetotaa irraa bitate; inni niitii ifii Saaraa biratti achitti awwaalame. 11Abrahaam du'een duuba Waaqi ilma isaa Yisihaq eebbise. Yisihaqille «Be'er-Lahaayi-Ro'i»#25:11 Be-er-Lahaayi-Ro'i: Afaan Ibrootaatiin Baleessa Waaqa jiraataa na dhagguu jechu'u. addee jedhantu baleessa bisaanii bira le'e.
Sanyii Ishimaa'elii
12Hiddi dhaloota sanyii Ishimaa'elii, ta Aggaariin nama biyya Gibxi'ii, tajaajiltuun Saara'aa, Abrahaamiif deette, 13ilmaan Ishimaa'el uumate, akka gogeessa dhaloota isaaniititti asii gaditti galmowaneeran. Isaanille ilma Ishimaa'elii angaficha Nabaayoot, Qedaar, Adbi'el, Miibsaam, 14Miishimaa, Dumaa, Maasaa, 15Hadaad, Temaa, Yetuur, Nafiishii fi Qedimaas. 16Ilmaan Ishimaa'elii tun, abbootii gosa kudhanii lamaa ti; maqaan isaanii ollootaa fi addee quttuma isaaniitiin waamama. 17Ishimaa'el woggaa dhibbaa fi soddomii torba le'ee du'e. 18Sanyiin Ishimaa'elii biyya Gibxii irraa gara aduun baatu, karaa Asoor geessu, Awiila'aa fi Shuur odduu le'ane; isaan sanyii Abrahaamii dhibii woliin diinumma'aan wol irraa fagaatanee le'aniiyyu.
Dhaloota Esaawu'uutii Fi Yaaqoobii
19Hiddi dhaloota sanyii Yisihaqii ilma Abrahaamii kana: Abrahaam Yisihaq uumate. 20Yisihaqille nama woggaa afurtamaa yennaa te'e, Ribqaa fuudhe; isiin intala Batu'elii, obboleettii Laabaanii worra Sooriya'aa ka Aaram biyya bisaan lama oddu'uu keessa le'uu ti. 21Ribqaan maseena waan teeteef, Yisihaq marroo isi'iitiif Mootii Waan Maraa daadimate. Mootiin Waan Maraalle daadimata isaa dhage'ee, niitiin isaa Ribqaan ulfootte. 22Isiin lakkuu waan ulfootteef, Annoolleen gadhaa isi'ii keessatti wol dhiibane; isiille, «Wonni akkasii maaf na irratti teete?» jettee, Mootii Waan Maraa gaafatte.
23Mootiin Waan Maraa si'iin,
«Gosa biyya adda addaa lamatti
gadaamessa keeti keessa jira;
isaan woliif diina hin te'an.
Gosi takkaan taan caalaa hin jabaatti;
angafi maandhicha hin tajaajila» jedhe.
24Yennaan isiin deettu geennaan, Rebqaan lakkuu deette. 25Ka dura dhalate diimaa, nafi isaa duudiin woyaa dabbasittii waan fakkaattuuf, maqaa isaa, «Esaawuu#25:25 Esaawu: Afaan Ibrootaatiin Dabbasicha jechu'u.» jedhane. 26Annuun lammeesso'oo yennaa dhalate, jimuu Esaawuu waan qabateeruuf, maqaa isaa, «Yaaqoob#25:26 Yaaqoob: Afaan Ibrootaatiin Gufachiisaa jechu'u.» jedhane. Yennaa isaan dhalatane san Yisihaq nama woggaa jaatamaa ti.
27Ijoolleen yennaa guddatte, Esaawu nama adamoo beeku, ka ala oolu te'e; Yaaqoob ammoo nama cadhisaa qe'ee oolu te'e. 28Yisihaq, bineensa Esaawu adamsee ijjeesu waan nyaatuuf isa jaalate; Ribqaan ammoo Yaaqoob jaalatte.
29Gaafa tokko Yaaqoob unata#25:29 Unata: worri gariin ittoo jedha. bilcheeffatuun, Esaawu guddoo beelowee adamoo irraa dhufee, ol seenee, 30Yaaqoobiin, «Ani waan gaggabeeruuf, unata diimaa kana irraa naa kenni» jedhe. Tanaaf inni, «Edoom#25:30 Edoom: Afaan Ibrootaatiin Diimaa jechu'u.» jedhame.
31Yaaqoob deebisee, «Ati dursii angafummaa teeti natti gurgur» jedheen.
32Esaawulle, «Kunoo, ani amma beelaan du'aara; angafummaan tun maan naa gooti» jedheen.
33Yaaqoob ammoo, «Dursii naa kakadhu» jedhe. Maarre inni isaaf kakatee angafummaa ifii Yaaqoobitti gurgurate.
34Achiin duuba Yaaqoob daabbo'oo fi ittoo san kenneefii, inni nyaatee unee, ka'ee deeme. Akka kanaan Esaawu angafummaa ifii tuffate.
Currently Selected:
Kitaaba Seera Dadaa 25: guj
Highlight
Share
Copy
Want to have your highlights saved across all your devices? Sign up or sign in
The Word for the World International and Bible Society of Ethiopia
