GENESIS 30
30
1Uhpe dush Rachel kahwahbundung ewh kenegetuhmoowahsig Jacobun enewh ahbenoojeün Rachel oogegahwanemaun enewh oomissaün; oo‐oo dush keënaud Jacobun, Meezheshin ahbenoojeüg, kishpin meezhesewun ningahnib
2Jacob dush oogenishkanemaun enewh Rachelun: oo‐oo dush keëkedoo, Kesha‐Muhnedoong enuh neen nindenandahgooz, me suh owh kahenahkoonegad cheöonejahnesesewun?
3Oo‐oo dush keëkedoowun, Benuh oomah ahyah nebuhmeetahgun‐equam Bilhah, wepam suh owh; oogahahyahwaun dush ahbenoojeün kanuhmuhdahbenejin emuh necheengwuning, cheöonejahneseyaun dush, ween oonje.
4Oogemeenaun dush oobuhmeetahgun‐equamun Bilhahun chewedegamahnid: Jacob dush oogewepamaun enewh.
5Bilhah dush keünjegoo, kuhya oogenegetuhmoowaun Jacobun quewezansun.
6Rachel dush oo‐oo keëkedoo, ningetebahkoonig Kesha‐Muhnedoo, kuhya ningebezindaug, ningemeenig dush kaöogwisseyaun: me suh Dan kahoonjeëzhenekahnaud.
7Bilhah dush oobuhmeetahgun‐equamun owh Rachel menuhwah keünjegoo, kuhya oogenegetuhmahwaun Jacobun menuhwah pahzig quewezansun.
8Rachel dush oo‐oo keëkedoo, Ningekeche‐kuhgwajewahwah nemissa, ningemahmauzheäh dush. Naphtahli dush oogeëzhenekahnaun.
9Uhpe Leah kahwahbundung kepoone‐negeähwuhsood, oogeöo‐dahpenaun Zilpahun oobuhmeetahgun‐equamun, oogemeenaun dush enewh Jacobun cheweedegamahnid.
10Zilpah dush Leah oobuhmeetahgun‐equamun oogenegetuhmoowaun Jacobun quewezansun.
11Leah dush oo‐oo keëkedoo, Pebahtuhyenoowug suh: Gad dush oogeëzhenekahnaun.
12Zilpah dush Leah oobuhmeetahgun‐equamun oogenegetuhmoowaun Jacobun menuhwah pazhig quewezansun.
13Leah dush oo‐oo keëkedoo, Neshahwandahgooz shahwandahgooze mah ningahegoog egewh wadahnesemindjig: Asher dush oogeëzhenekahnaun.
14¶ Reuben dush keëzhah uhpe koo kaushkezhoond buhquazhegunushk, oogemekaunun dush mandrakun emuh mushkootang, oogepeetuhwaun dush enewh oogeen Leahun. Rachel dush oo‐oo oogeënaun Leahun Meezheshin kepahgoosanemin ahnind kegwis oomandrakemun.
15Oo‐oo dush oogeëgoon, Ahgahsandahgwud nuh ewh kemuhkuhmeyun nenahbam? kewemuhkum nuh kuhya ningwis oomandrakemun? Rachel dush oo‐oo keëkedoo, Kegahwepamig suh dush noongoom tebekuk oonje kegwis oomandrakemun.
16Jacob dush ketuhgwishin wanahgooshenig ketegauning keöonjebaud, Leah dush kesahgahum wenahquashkahwaud, oo‐oo dush keëkedoo, Kegahpeendigow suh; kegekishpenuhnin suh enewh ningwis oomandrakemun. Oogewepamaun dush ewh tebekuk.
17Kesha‐Muhnedoo dush oogebezinduhwaun enewh Leahun, keünjegoo dush, kuhya oogenegetuhmoowaun Jacobun enewh quewezansun me nahning.
18Leah dush oo‐oo keëkedoo, Kesha‐Muhnedoo ningemeenig netebahahmahgoowin, oonje kemeenug newedegamahgun nebuhmeetahga‐equamun; Issachar dush oogeëzhenekahnaun.
19Menuhwah dush Leah keünjegoo, kuhya oogenegetuhmoowaun Jacobun menuhwah pazhig quewezansun, me ningoodwahching.
20Leah dush oo‐oo keëkedoo, Kesha‐Muhnedoo ningemeenig keche‐meegewawin; zhuhyegwah dush ningahweedegamig newedegamahgun, oonje kenegetuhmahwug ningoodwahswe quewezansun: Zebulun dush oogeëzhenekahnaun.
21Bahmah dush oogeähyahwaun equazansun, Dinah dush oogeëzhenekahnaun.
22¶ Kesha‐Muhnedoo dush oogemequanemaun Rachelun, Kesha‐Muhnedoo kuhya oogebezinduhwaun, kuhya oogenesahkoonuhmoowaun puhyowene.
23Keünjegoo dush, kuhya oogeähyahwaun quewezansun; oo‐oo dush keëkedoo, Kesha‐Muhnedoo ningeëkoonuhmaug nedahbussanemegoowin:
24Joseph dush oogeëzhenekahnaun enewh; oo‐oo dush keëkedood, Menuhwah pazhig quewezansun ningahmeenig Jehovah.
25¶ Kepuggummeähyahmahgud dush uhpe Rachel kahnegeäud Josephun, Jacob oo‐oo oogeënaun Labanun, Mahjenahzhahooshin, cheëzhahyaun tebenuhwa ninduhkeem, kuhya emuh kahoondahdezeyaun.
26Meezheshin nindequamug kuhya nenejahnesug, egewh kahoonjebuhmeetoonaun, kuhya puggedeneshin: kekekandaun mah nebuhmeetahgawin kahezhebuhmeetoonaun.
27Laban dush oo‐oo oogeënaun, Kepahgoosanemin, kishpin kahmekahmoowaunan minwandahgoozewin emuh anahsuhmeyun, oomah duhnezin; ninkekandaun mah Jehovah keshahwanemid keen oonje.
28Oo‐oo dush keëkedoo, Weenduhmooweshin ewh katebahahmoonaun, kegahtebahuhmoon dush.
29Oo‐oo dush oogeënaun, Kekekanim kahezhebuhmeetoonaun, kuhya kahezheähyahwaud kedoowahkahnug kahguhnuhwanemugig.
30Punge suh atuh kegeähyahwahbuneeg chebwah tuhgwishenaun, noongoom dush keche‐bahtuhyenoowug kedahyahahmug; kegeshahwanemig kuhya Jehovah pahahkoo tuhgwishenaun: ahneen suh dush uhpe kaöondenuhmoowugwah gagoo egewh ahyahjig emuh neen tebenuhwa newegewauming?
31Oo‐oo dush keëkedoo, Wagoonash katebahahmoonaun? Jacob dush oo‐oo keëkedoo, Kahween gagoo kegahtebahahmahwese: kishpin oo‐oo wahdoodahwewunan, menuhwah ningahahshummaug kuhya ningahguhnuhwanemaug kemahnishtahnishemug.
32Ningahshahbooshkahwaug kuhkenuh kemahnishtahnishemug noongoom kezheguk, ningooche dush ningahahsaug egewh katuhgezejig pezhekewug, kuhya kuhkenuh egewh wazahwezejig mahnishtahnishug kuhya egewh katuggezejig mesahboozoog; mesuh oogoo katebahahmahweyun.
33Me suh chekuhnoodahmahgooyaun tebenuhwa nemenoo‐ezhewabezewin bahmah, uhpe katebahahmahgooyaun ahnahsuhmeyun: kuhkenuh katuggezesigoog mesahboozoog, kuhya wahzahwezesigoog mahnishtahnishug, oogekemoodenun enewh ningahenanemegoo.
34Laban dush oo‐oo keëkedoo, Benuh nindenandum cheëzhewabuk debishkoo akedooyun.
35Ewh dush kezheguk ningooche oogeähsaun enewh buhyapashezenejin kuhya katuggezenejin ahyahba‐mesahboozoon, kuhya kuhkenuh enewh katugezenejin equa‐mesahboozoon, kuhya kuhkenuh enewh punge wahyahbishkezenejin, kuhya kuhkenuh enewh wazahwezenejin mahnishtahnishun, oogemeenaun dush enewh oogwissun.
36Nesoogoon dush kebemoosa ningooche dush keduhneze kenuhguhnaud enewh Jacobun: Jacob dush oogeähshummaun ahnind Laban oomahnishtahnishemun.
37¶ Jacob dush oogeöodahpenaun ahzaude‐metigoonsun, ashkahquudenig, kuhya enewh puhgaunemeezhe‐metigoonsun, kuhya keche‐ahzhahwamine‐metigoonsun; kuhya oogechegunahgaquahahnun enewh chewahwahbishkezenid enewh metigoonsun.
38Oogeähtoonun dush enewh metigoonsun kahchegunahgaquahungin emuh anahsummegahbuhwenid enewh mahnishtahnishun emuh nebekaug uhtanig enewh ahtoobaunun uhpe buhmenequanid enewh mahnishtahnishun, cheünjegoonid dush uhpe buhmenequanid.
39Egewh dush mahnishtahnishug keünjegoowug emuh anahsuhmesing enewh metigoonsun, oogenegeähwaun dush uhwahkaunun buhyapashezenejin, kuhya katuhgezenejin.
40Jacob dush oogepuhkagahbuhweäun enewh mahnishtahnisheensun, oogeëzhegahbuhweäun dush enewh mahnishtahnishun cheguhnuhwahbuhmahnid enewh buhyapashezenid, kuhya kuhkenuh enewh wazahwezenid oomahnishtahnishemun Laban; oogepuhkagahbuhweäun kuhya enewh ween tebenuhwa oomahnishtahnishemun, kahween dush oogeduhgoogahbuhweähseen emuh uhyahnid Laban ooduhwahkaunun.
41Kepuhgummeähyahmuhgud dush uhpe koo kahunjegoonejin enewh ahwuhkaunun nuhwuj mashkuhwezenejin, Jacob keähtood enewh metigoonsun emuh anahsuhmishkinzhegwanid enewh ahwuhkaunun emuh nebekaunig, cheünjegoonid dush magwa‐metigoonsing.
42Uhpe dush uhkoo nahnuhmezenid enewh uhwuhkaunun, kahween oogepenahseen: Laban suh dush oogetebanemaun enewh nuhwuj nanuhmezenejin, Jacob dush enewh nuhwuj mashkuhwezenejin.
43Owh dush enene ashkum kekechtwahweze, nebewah kuhya ahwuhkaunun oogeähyahwaun, kuhya buhmeetahgunequan, kuhya buhmeetahga‐enenewun, kuhya baquahwegunenejin, kuhya mamaungeshayun.
Currently Selected:
GENESIS 30: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
