ST. JOHN 11
11
1Keähkooze suh pazhik, Lazarus azhenekahzood, emuh Bethanyïng kahoodatood, oodoodanahwewaung owh Mary kuhya enewh wedegequaun Marthaün.
2(Mesuh goo owh Mary kahnuhmuhkoonahpun enewh Tabaninganejin ewh nuhmuhquewin keähyood, kuhya dush kekahsesittawaud enewh wenesissun keähyoopun; me suh enewh kahoodahwamahjin Lazarusun uhyahkoozenid.)
3Kemejejedwawun dush enewh oodahwamaun, oo‐oo keëkedoonid, Tabaningayun, benuh, ahkooze owh suhyahgeüd.
4Uhpe kahnoondung owh Jesus, oo‐oo keëkedoo, Kahween cheneboong enandahgwussenoon oo‐oo ahkoozewin, cheöonjepeshegandahgooïnd atuh Kesha‐Muhnedoo, kuhya Oogwissun Kesha‐Muhnedoochetuhgoo‐peshegandahgooïnd emuh.
5Jesus dush oogesahgeäun enewh Marthaün, kuhya enewh oowedegequaunene, kuhya enewh Lazarusun.
6Uhpe dush kahnoondung ewh ahkoozenid, kayahbe neezhoogoon keduhneze emuh ayahpun.
7Me dush uhpe oo‐oo enaud enewh ookekenooähmahgunun, Umba menuhwah ezhahdah ewede Judeäïng.
8Oo‐oo dush oodegoon enewh kekenooähmahgunun, Rabbi, noomuhyuh kegenunduhpemwahsenuhegoog egewh Jewyug, menuhwah dush kedezhah ewede?
9Jesus dush oogenuhquatuhwaun, Kah nuh ween metauswe‐ahshe‐neezhoo tebahegunasenoon pazhik kezhegud? Kishpin ahweyah bemoosad magwah kezheguk, kahween puhkedashinse, ewh wahbundung oomah uhkeeng duhzhe wahsayahzewin.
10Kishpin dush ahweyah bemoosad magwah tebekudenig, puhkedashin suh, kah muh ookekishkunseen ewh wahsayahzewin.
11Oonoo uhyeëen keëkedoo: nahguj dush oo‐oo oodenaun enewh, Nebah suh kejekewaënaun Lazarus; neen dush nindezhah, cheähmuddenug.
12Oo‐oo dush oogeëgoon enewh ookekenooähmahgunun, Tabaningayun, kishpin nebahgwan, tahmenoo‐bemahdeze.
13Jesus dush oogeduhzhindaun ewh ooneboowin: keenanduhmoog dush wenuhwah, emuh nebahwining keäunwabenid keëkedood.
14Me dush uhpe Jesus mezheshuh keëkedood, Keneboo owh Lazarus.
15Ahnahwe dush newahwezhandum kenuhwah oonje ewede keähyahsewaun, cheöonjedabwayanduhmag; umba dush ezhahdah ewede.
16Thomas dush Didymus azhenekahzood oo‐oo oogeënaun enewh weejekekenooähmahgunun, Ezhahdah kuhya kenuhwind cheweejeneboomung.
17Uhpe dush kahtuhgwishing owh Jesus, oogemekahwaun ahzhuh newoogoon keshingeshenenid emuh chebaguhmigoong.
18Cheguhyeëe dush keduhgoomahgud ewh Bethany emuh Jerusaleming, koonemah metauswe‐ahshe‐naunoo‐tebahbaunsun apeechaug:
19Nebewah dush egewh Jewyug oogepenaunzekahwahwaun enewh Marthaün kuhya Maryun, cheöonjemenoodaäähwaud, ewh keneboonid enewh oodahwamahne.
20Martha dush, uhpe kahnoondung ketuhgwishenenid Jesusun, oogeähwenuhquashkahwaun: Mary dush ween kepezaunuhbe peendig emuh wegewauming.
21Martha dush oo‐oo oogeënaun enewh Jesusun, Tabaningayun, kishpin oomah ahyahyunbun, kahween tahgeneboose nindahwamahbun.
22Noongoom dush nekekandaun kishpin gagoo nundooduhmahwud owh Kesha‐Muhnedoo, kegahmeenik Kesha‐Muhnedoo.
23Jesus dush oo‐oo oodenaun, Tahahbejebah suh kedahwamahbun.
24Martha dush oo‐oo oodenaun, Nekekandaun cheähbejebaud emuh ahbejebahwining uhpe ashquah‐kezheguk.
25Jesus dush oo‐oo oogeënaun, Neen suh nindow ewh ahbejebahwin, kuhya ewh bemahdezewin: owh dush duhyabwanemid, ahnoo ween goo kenebood tahbemahdeze,
26Ahwagwan dush bamahdezegwan, kuhya duhyabwanemegwan, kah wekah tahneboose. Kedabwataun nuh oo‐oo?
27Oo‐oo oodenaun, Aahe, Tabaningayun, nindabwayandum keen cheähweyun owh Christ, Oogwissun owh Kesha‐Muhnedoo, wahpeëzhahgoobunan oomah uhkeeng.
28Uhpe dush oo‐oo kahekedood, keemooj oogeähwenundoomaun enewh wedegequaun Maryun, oo‐oo ekedood, Ketuhgwishin suh owh kakenooähmahgad, kenundoomik dush.
29Uhpe dush nwaundung, waweeb kepuhsegwe oogepenaunzekahwaun dush.
30Kah muhshe ketuhgwishinsebun owh Jesus emuh oodanaung, kayahbe ahyahbun emuh kahnuhquashkahgood enewh Marthaün.
31Egewh dush Jewyug kahweeduhbemahjig emuh wegewauming, kemenoodaähwaud dush, wuhyahbuhmahwaud enewh Maryun waweeb kepuhsegwenid, kesahguhumenid dush, oogenoopenuhnahwaun, oo‐oo keëkedoowaud, Ezhah suh ewede chebaguhmigoong cheduhzhe‐mahwid emuh.
32Uhpe dush owh Mary kahtuhgwishing anduhzhe‐ahyahnid Jesusun, wuhyahbuhmaud dush, keähpuggezoo emuh oosittahning, oo‐oo keënaud, Tabaningayun, kishpin oomah ahyahyunbun, kahween tahgeneboose nindahwamahbun.
33Jesus dush uhpe wuhyahbuhmaud ewh mahwenid, kuhya enewh Jewyun waujewegoojin mahwenid, kemahmahdwa emuh oojechaugoong kuhya kemegooshkahdandum.
34Oo‐oo dush keëkedoo, Ahneende keähsag? Oo‐oo oodenahwaun, Tabaningayun, pewahbundun.
35Jesus kemahwe.
36Me dush Jewyug keëkedoowaud, Benuh suh menik kahsahgeäud!
37Ahnind dush oo‐oo keëkedoowug, Kah nuh ween wah‐owh enene, kahwahbetood ooshkinzhegoone enewh kakepeenganejin, oodahgekushketooseen cheënahkoonegad chegeneboosigebun wah‐owh enene?
38Jesus dush menuhwah mahmahdwa peenjenuh, ketuhgwishin emuh chebaguhmigoong. Weembahnekahdanebun dush, kuhya ahsin ahtabun emuh.
39Jesus dush oo‐oo ekedoo, Ekoonahmook ewh ahsin. Oo‐oo dush oodegoon enewh Marthaün oodahwamaun owh kahnebood, Tabaningayun, ahzhuh suh menahgoozedoog: newoogoonuhgud muh kahahkoo‐nebood.
40Jesus dush oo‐oo oodenaun, Kah nuh ween kegeënesenoon, Kishpin dabwayanduhmun kegahwahbundaun ewh Kesha‐Muhnedoo oopeshegandahgoozewin?
41Oogeëkoonahnahwah dush ewh ahsin emuh shingeshinenid enewh kahneboonejin. Jesus dush oogeöombenaunun ooshkinzhegoon kezhegoong enuhkuhkayah, oo‐oo dush keëkedood, Noosa, kemahmooyahwuhmin ewh kebezinduhweyun.
42Ningekekandaun suh moonzhug bezinduhweyun: ahnishenahbag kawetah‐kahbahwejig ningeöonjekekid, cheoonjedabwatuhmoowaud ewh keëzhenahzhahooyun.
43Uhpe dush kahekedood oonoo, kekeche‐pepahge, Lazarus, pesahguhun.
44Owh dush kahneboopun kesahguhum, minjemahpezood emuh oosittaung, kuhya emuh ooninjeeng enewh chebaguhmigoo‐ahgwewinun, kuhya keähgweengwabezood ewh kesingwaöon. Jesus dush oo‐oo oodenaun, Ahbahook, puhgedenik dush chemahjaud.
45Nebewah dush Jewyug kahpenaunzekahwahjig enewh Maryun, uhpe kahwahbunduhmoowaud ewh kahezheganid enewh Jesusun, oogedabwayanemahwaun.
46Ahnind dush ween oogeëzhahnahwaun enewh Phariseen, keweenduhmahwahwaud dush, ewh kahezhecheganid enewh Jesusun.
47Egewh dush keche‐sahsahgewejega‐wenenewug kuhya egewh Phariseeg oogemahwunzoomahwaun enewh kuhyahkekedoonejin, oo‐oo dush keëkedoowug, Ahneen azhechegayung? keche nebewah muh wah‐owh enene oodezhecheganun enewh mahmaundahwejegunun.
48Kishpin puggedenuhmoowung oo‐oo cheëzhechegad, oogahdabwayanemegoon suh kuhkenuh bamahdezenejin; tahpeëzhahwug dush egewh Romanug, oogahbahnahjetoonahwah dush maunduh kedoodanahwenaun, kuhya oogahmahjewenahwaun enewh ahnishenahban.
49Pazhik dush Caiaphas azhenekahzood, kahkeche‐sahsahgewejega‐wenenewid ewh uhpe kekenoonoowin, oo‐oo oogeënaun, Kah bahbahpish gagoo kekekanduhsenahwah.
50Kah dush kuhya kenahnahgahdahwanduhsenahwah, ewh nundahwandahgwuk pazhik enene chenebootahwaud enewh ahnishenahban, cheneboosigwah kuhkenuh egewh ahnishenahbag.
51Kahween ween tebenuhwa oodekedoowin keähwunsenoon oo‐oo kahekedood; kekeche‐sahsahgawejega‐wenenewe ewh uhpe kekenoonoowining, keäunwahjegad ewh wenebootahwaud owh Jesus oonoo ahnishenahban.
52Kah dush oonoo ahnishenahban atuh, chemahwunzoomaud dush ween kuhkenuh enewh saswashkahnejin oonejahnesun owh Kesha‐Muhnedoo.
53Me ewh uhpe kezheguk kemahje‐guhnoonindewaud ewh kaëzhenesahwaud.
54Jesus dush kahween menuhwah mezheshuh kebemoosase anduhzhe‐ahyahnid enewh Jewyun; ewede dush keöonjemahjah, keëzhah dush emuh cheguhyeëeng puhgwuhduhkummig emuh oodanaung Ephraim azhenekahdag; me dush emuh keähyaud kuhya ookekenooähmahgunun.
55Egewh dush Jewyug ookuhbekoosa‐wekoondewinewaun gagah wedebishkoosanegoobun, nebewah dush keëzhahwug ewede Jerusaleming, ooduhkemewaung keoonjeewaud chepwah kuhbekoosawine‐wekoonding, chepeneëdezoowaud.
56Medush keündoonawahwaud enewh Jesusun, kekuhgwajindewaud dush magwah nebahwewaud emuh keche‐ahnuhmeä‐weguhmigoong, oo‐oo keëkedoowaud, Ahneen ananduhmag? kah nuh tahpeëzhahse emuh wekoondewining?
57Egewh dush keche‐sahsahgewejega‐wenenewug kuhya egewh Phariseeg keënahkoonegagwahpun, kishpin ahweyah kekanemaud debe anduhnezegwan, chedebahjemood, cheoonjetuhkoonahwaud.
Currently Selected:
ST. JOHN 11: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
