ST. LUKE 23
23
1Kuhkenuh dush anduhchewaud kepuhsegwewug keëzheweduhmahwahwaud dush enewh Pilateün.
2Oogemahje‐bahtahmahwaun dush, oo‐oo keëkedoowaud, Ningemekahwahnaun wah‐owh enene wuhnishemaud enewh ahnishenahban, kuhya kenahahmahwaud chemeenahsewemind oogemah‐shooneyaun enewh Cæsarun, ekedood ween tebenuhwa cheähwid Christ keche‐oogemah.
3Pilate dush oogeguhgwajemaun, oo‐oo keëkedood, Keen, nuh kedow oodoogemahmewaun egewh Jewyug? Oogenuhquatuhwaun dush oo‐oo keënaud, Kedekid suh keen.
4Medush Pilate oo‐oo kahenaud keche‐sahsahgewejega‐wenenewun kuhya enewh ahnishenahban, Kahween nemekahwahse mahbuh enene ningood kemujjeëzhechegad.
5Ashkum dush kekeche‐ahquahdezewug, oo‐oo keëkedoowaud, Oomegooshkahjeäun enewh ahnishenahban, pabahkuhgequad anegookwaug Judea duhzhe uhkee, Galileeing keoonjemahjaud nahnauzh egoo oomah.
6Uhpe dush Pilate kahnooduhwaud Galilee chewahweenduhmenid, kekuhgwadwa, Galilee‐wenenewe nuh mahbuh enene?
7Uhpe dush kahkekandung ewh chedebandahgoozid emuh Herod oodoogemahwewining, oogeëzhenahzhahmahwaun Herodun, ahyahgoobunan owh emuh Jerusaleming ewh uhpe.
8Uhpe dush Herod kahwahbuhmaud Jesusun kekeche-minwandum: kenooazh mah oogenundahwandaun chewahbuhmaud, kenahnoondum muh nebewah keuhyenahjemememind; kenundahwandum dush chewahbuhmaud gagoo chemuhmaundahwejeganid.
9Me dush kekuhgwajemaud nebewah ekedoowinun; kah dush kuhnuhga oogenuhquatahgooseen.
10Egewh dush keche‐sahsahgewejega‐wenenewug; kuhya egewh oozhebeëga‐wenenewug kenebahwewug kuhya oogekeche‐bahtahmahwaun.
11Owh dush Herod kuhya ooshemahguneshemun oogebah‐penuhduhwahwaun, kuhya kemujje‐guhnoonahwaud, kuhya kepesuhkoonahwaud suhsagahwine‐pesekoowahgun, kuhya nayaub keëzhenahzhahmahwaud Pilateün.
12Me dush ewh kezheguk owh Pilate kuhya Herod keweejekewaïndewaud: mawezhah muh kenishkanindebuneeg.
13Pilate dush, uhpe kahmahwunzoomaud keche‐sahsahgewejega‐wenenewun kuhya wagemahwenejin kuhya ahnishenahban,
14Oo‐oo keënaud, Kegepeetahmahwim wah‐owh enene, debishkoo owh wanishemaud ahnishenahban; benuh, ningeguhgwajemah emuh anahsuhmeyag, kah kush ningemekahmahwahse ningood kemujje‐ezhechegad enewh kahahnahmahmagoon:
15Kahween kuhya Herod; kegeëzhenahzhahoonenim chenahzekahwag; benuh dush, kah ningood keëzhechegase kaöonjenesindebun.
16Ningahpuhzhunzhawah dush, me dush kapuggedenug.
17(Kenundahwandahgwud muh chepuhgedenahmahwaud pazhik uhpe wahwekoonding.)
18Mahmahwe dush kepepahgewug, oo‐oo dush keëkedoowaud, Mahjeweesh mahbuh, puhgedenahmahweshenaum dush Barabbas:
19(Owh kahmegahzookummegezid emuh keche‐oodanaung, kuhya kahneshewad kahoonjekebahquahoond.)
20Pilate dush, keënandum chepuggedenaud enewh Jesusun, menuhwah oogeguhnoonaun.
21Me dush kahezhepepahgewaud, oo‐oo keëkedoowaud, Ahgwahkwah, ahgwahkwah.
22Menuhwah nesing oo‐oo oogeënaun, Ahneeshwin, wagoonan mujje‐uhyewish kahezhechegad? kahween nemekuhmahwahse ningood keëzhechegad kaöonjenesindebun: ningahpuhzhunzhawah suh goo, me dush chepuhgedenug.
23Ahpeche dush kewedabwawug kekeche‐pepahgewaud, keëkedoowaud cheähgwahquahoomind. Kuhya dush kemushkahwezemahgudenewun oodinwawinewah kuhya keche‐sahsahguhwejega‐wenenewug oodinwawinewah.
24Pilate dush keënahkoonega cheëzhewabudenig ewh kahezhenunduhwanduhmoowaud.
25Oogepuggedenuhmahwaun dush kahmegahzookummegezenid, kuhya kahneshewanid kahoonjekebahquahoondebun, enewh kahnunduhwanemahwahjin; medush kepuhgedenaud Jesusun emuh oonunduhwanduhmoowinening.
26Magwah dush uhnemahjewenahwaud, oogetuhkoonahwaun pazhik enenewun, Simonun Cyrenia duhzhe enenewun, duhnuhkeewining oonjebahnid, oogepemoondahahwaun dush ewh ahzhedayahtik, chepemoonduhmenid ishquayaung Jesusun aneëzhahnid.
27Oogenoopenuhnegoon dush kache‐mahmahwenoonejin ahnishenahban, kuhya equawun, kahmahwenejin ewh kemahwemegood.
28Jesus dush quakekahbahwetuhmahwaud oo‐oo keëkedoo, Kenuhwah wadahnesemegooyag emuh Jerusaleming, kagoo mahwemeshekagoon, mahwindezooyook suh, kuhya mahwetuhwik kenejahnesewaug.
29Benuh suh, peëzhahmahgudoon enewh kezhegudoon, uhpe cheëkedoong, Shahwandahgoozewug suh egewh wanejahnesesigoog equawug, kuhya equawug wekah kahnegeähwuhzoosigoog, kuhya kahnoonahwahzoosigoog.
30Me dush chemahje‐eduhmoowaud enewh wahjewun, Puhtuhgwunishkahweshenaum; kuhya dush wahjewansun, ahgwahnahooëshenaum.
31Kishpin muh oonoo andooduhwaud ashkahkoozenejin metikoon, ahneen dush kadoodahmoowaud ewh buhyahtag?
32Neezh dush bakahnezejig ketuhgoo‐mahjenahzhahwahwug, chenesindwah mujje‐ezhechegawin oonje.
33Uhpe dush kahtuhgwishenoowaud ewede ooshtequaunekauning azhenekahdag, me emuh keduhzhe‐ahgwah-gwahwahwaud, kuhya dush enewh majeëzhecheganejin, pazhik emuh ookechenikahning, pazhik dush emuh oonuhmunjenikahning.
34Me dush uhpe Jesus keëkekood, Noosa, ahbwayanim; kah muh ookekanduhsenuhwah ewh azhechegawaud. Kemahdahoonedewug dush enewh oodahgwewinun, kuhya dush keähtahdewug.
35Egewh dush ahnishenahbag kenebahwewug, kuhya keguhnuhwahbuhmahwaud. Kuhya dush oogemaug mahmahwe oogebahpenuhdahwahwaun, oo‐oo keëkedoowaud, Oogebemahjeäun bakahnezenejin, mahnoo tahbemahjeëdezoo, kishpin ahyahwegwan owh Christ, Kesha‐Muhnedoo kagegenahjin.
36Egewh dush shemahguneshug oogenahnahpuhgaunzoomahwaun, kepemeenahahwaud ewh shewahboo,
37Oo‐oo dush keëkedoowaud, Kishpin kagate keche‐oogemahkundahwudwahnan egewh Jewyug, bemahjeëdezoon.
38Emuh dush oogejuhyeëe kahahgoonind oo‐oo këzhebeëgahda emuh Greek inwawining, kuhya Latin inwawining, kuhya Hebrew inwawining MESUH WAH‐OWH OOKECHE‐OOGEMAHMEWAUN EGEWH Jewyug.
39Pazhik dush majeëzhewabezid kahahgoonind oogenahnahpahgaunzoomaun, oo‐oo keëdedood, Kishpin ahyahwewunan owh Christ, bemahjeëdezoon kuhya dush bemahjeëshenaum nenuhwind.
40Owh dush bakaunedezid oogenuhquatuhwaun kenuhnebekemaud, oo‐oo dush keëkedood, Kah nuh ween kekoosahse Kesha‐Muhnedoo, kekanduhmun cheähyahyun emuh nahsaub nahneboondewining?
41Kenuhwind suh quuhyuk kedoodahgoonaun; anandahgwuk muh kedezhechegawinenahnin kenuhwind kedoodahgoonaun; wah‐owh dush enene kahween ningood kemujje‐ëzhechegase.
42Oogeënaun dush Jesusun, Tabaningayun mequanemeshin uhpe peëzhahyun emuh kedoogemahwandahgoozewining.
43Jesus dush oo‐oo oogeënaun, Kagate kedenin, noongoom kezheguk kegahweejewh emuh oonahnegoozewining.
44Kuhnuhbuj suh nuhwuhquagoobun, ketebikahbuhmenahgwud emuh anegookwaug uhkee peenish egoo shaunguhsoo‐tebahegunag.
45Ketebikahbuhmenahgooze dush owh kezhike‐keezis, kuhya dush ewh kebuhgoojegun emuh keche‐ahnuhmeä‐weguhmigoong ketaushkekesa.
46Uhpe dush Jesus keche‐anegook kahpepahgid oo‐oo keëkedoo, Noosa, emuh keneenjeeng nepuhgedenah ninjechaug. Oo‐oo dush kahekedood, keïshquahnuhmoo.
47Uhpe dush owh menesenoo‐oogemah kahwahbundung ewh kahezhewabuk, oogepezhegandahgooäun Kesha‐Muhnedoon, oo‐oo keëkedood, Kagate suh menoo‐ezhewabezegoobun mahbuh.
48Kuhkenuh dush ahnishenahbag kahpemahwunjeëdewaud chewahbunduhmoowaud oonoo, uhpe kewahbundahmoowaud ewh kahezhewabuk, kepuhkittaöodezoowug emuh ookahkegunewaung, keühnekewawaud.
49Kuhkenuh dush enewh kahkekanemegoojin, kuhya equawun kahnoopenuhnegoojin Galileeïng kahoonjebahnejin wahsuh kenebahwewun, kewahbunduhmoowahnid oonoo uhyeëen.
50Benuh dush, keähyah pazhik enene Joseph azhenekahzood, kahkekedoo‐wenene; kemenoo‐ezhewabeze dush kuhya kequuhyukwahdeze:
51(Kahween wah‐owh keënanduhse ewh kahenahkooneganid kuhya kahezhecheganid ahnind kekedoo‐wenenewun;) Arimathæaïng duhzhe‐wenenewegoobun oodoodanahwewah egewh Jewyug; kuhya ween oogebeeton oodoogemahwewin owh Kesha‐Muhnedoo.
52Mesuh owh enene kahezhaud enewh Pilateün, kenundoodahmoowaud ewh ooweyow owh Jesus.
53Oogenesaunduhwanaun dush, oogetetebegenaun dush emuh puhpuggewuhyauneginoong, keähsaud dush emuh chebaguhmigoong ewh kahweembahbikahegahdag ewh ahzhebik, kah wekah ahweyah enene kepuggedanemahse emuh.
54Me suh ewh uhpe kezheguk wahwazhetahwine-kezhegudoogoobun, gagah dush zhuhyegwah aunwabe‐kezhegudoogoobun.
55Kuhya dush egewh equawug kahpeweejewahjig, ewede Galileeïng kahpeöonjebahjig, oogenoopenuhnahwaun, kewahbunduhmoowaud ewh chebaguhmig, kuhya kahezhesing ewh weyowemah.
56Me dush kekewawaud, kewahwazhetoowaud enewh manoomahgwukkin mushkeekeen kuhya noomenegunun: keäunwabewug aunwabe‐kezhegudenig ewh egoo akedoomahguk kuhgequawin.
Currently Selected:
ST. LUKE 23: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
